IGHISYEWUT 4
4
1Akwotini kimi Yoana nko Petro kïngölochini pich kurelï tïsï nko wowïn nyo kighyongchini pich cho kiripöy Kö pö Tororöt* nko Sadukaytin* wölo mi chane, 2kisïnyorïsyö ompöwölo kinetöy akwomchini pich kinetanchay lö, kitutï Yeso kututunö ngwen, kïgh nyo poru lö tutu pich kïsöpchöt ngat. 3Kïlenyona, kenam pïchay aketorchï chane chela ntökïyech, ompöwölo kökikwimön. 4Wölo kighan pich cho chang cho kilïm ngölyontonay, kitïta kiyitöto pïchoni mïrön 5,000.
5Nyini kïyech, kuryama Yerusalem kintöghoghi pipö Yaudi nko poy nko koneti kirurut kanasyanta. 6Kïtuyö nko Anas nyo kile Tïsin nyo Wow* nko Kayapa nko Yoana nko Aleksanda nko walaka cho kipö ara Tïsin nyo Wow. 7Nyini kitö kinetanchay kughyongö kwen kïtep chane lö, “Owesyö ne nyï otïngetekwa, anta kayna ngo nyini kopöghisyeghekwa?”
8Kuyokyï Petro ompö owesyo Mïkulögh nyo Tïlil pïchay lö, “Akwa kintöghoghï nko poy: 9ato kïtepecha nyu asete kïgh nyo karam nyo kakighchï chichï kingwolöy nko wölo kisöptö, 10nya kïpköchokwa löwïr nko pipö Israel lapay lö, ghyongo chichï yi le tawunkwa kïsöpote ompö kaynata Yeso Kristo* nyo pö Nasaret nyay kyowudekwa, wölo kututunö Tororöt ngwen wölo mi pich cho kimeghö. 11#Tum 118:22. Yeso nete köghay kyataghakwa tekï, wölo kawaghaka ye nyu kïlïkwï koghpa luch nyinte. 12Amöminye sörunötö nyo kïnyoruno chitö anka, ompöwölo, möminye kaynat anka ngwïny nyo kikitö pich tökïsörwecha.”
13Kïtangany Kokwonay* otini kisïwa Petro nko Yoana kïngölonöy ompö nyakanat, akwanyï ki pich pat cho kitomöcha kusomön, kunkïtï lö, kimi chane nko Yeso. 14Wölo möminye kïgh nyo kitökïmwoghöy ompöwölo kisïwa chichay kikisop kughyongo otini mi chane. 15Kïlenyona kimwochï Kokwö chane kïpa sany, kutor kïngalana parakungwa, kïlentöy, 16“Kido ne pïchï? Akwanyï nkït chi tïkwïl nyo möngöy Yerusalem kiporunötonï pö töngönchin kegh pïchï, amökimukechanye ntökemöl? 17Wölo atömayasta ngölyontonï ompö kwenu pich, akany kyotyeghenö pïchï lö mongölonchï chi anka tïkwïl ompö kaynanoni.”
18Kïlenyona kïkur chane akïlenchï motöp ngat kokay tangalana anta anet ompö kaynata Yeso. 19Wölo kuyokyï Petro nko Yoana chane lö, “Arosa akwane lö, nyono roko ompö tawu Tororöt, keterwokwa nya anta keterchï Tororöt. 20Ompöwölo mökimukechanye kesisyenö amökïngalana tïkwïn cho kikesïwecha akelïmacha.” 21Kïkany kwotyeghö Kokwö chane ngat kumuchö, kutyakta kïpa. Kimemïcha kïmuny chane, ompöwölo kimi pich kïsölöy Tororöt ompö tïkwïn cho kighisyö. 22Ompöwölo kitïng chichoni kikisop ompö töngönchin könyis cho tïlöy tömönut angwan.
Kasagh kighönï kïnyorï nyakanat
23Nyini kikïpïstö chane, kïmïla Petro nko Yoana kutang wölo mi kongotïkwa akïmwatïta ngal löwïr cho kimwochï chane tïsï cho echön nko poy. 24#Wuw 20:11; Nem 9:6; Tum 146:6. Nyini kilïm lenyoni, kïsagh Tororöt tïkwïl ompö kut akonga lö, “Echotyon, Kimuktoghïn nyo kigh yïm nko ngwïny nko nanam nko tïkwïn lapay cho mi ori. 25#Tum 2:1-2. Kingalanenyi könyisyok ompö Mïkulöwungu nyo Tïlil kuwerï paponcha Daudi, mötworintengu lö,
‘Ompö ne tökwam apït puntonï,
akunonöy tötut cho pö kwïle?
26Kigh kegh yetïntino ngwïny,
akusup kegh pöytoghï
atökïporyeghö Echotyon nko Masiyenyi.’
27 #
Mat 27:1-2; Mrk 15:1; Luk 23:1,7-11; Yna 18:28-29. “Nyoman kituyö kegh Erode nko Pontio Pilato nko pipö punton nko pipö Israel ompö kanasyantanete akïtagh Mötworintengu nyo tïlil, Yeso, nyo kikïlanyi le Masiya.* 28Kituyö chane atökwigh kïgh anka tïkwïl nyo kitatanyi könyisyok, ompö owesyengu nko machatengu lö, igho. 29Kïlenyono ye nyu Echotyon, rose wölo otyeghenecha kïlïkwï, itö mötworiku, owesyö nko nyakanat nyo ngölono ngölyontengu. 30Ghïtenö ewungu kïsöpchö pich, aikany kwighisyö kiporut nko töngönchin ompö kaynata Yeso Mötworintengu nyo Tïlil.”
31Nyini kuwany kïsoghöy, kïpotan atoni kinyoryeghö chane. Kenyïghit chane Mïkulögh nyo Tïlil, akïngalan ngölyonto Tororöt ompö nyakanat.
Ghömtoy kighönï tïkukwa
32 #
Ist 2:44-45. Kitïng nyoryononi pö kighönï machat akonga nko kinonut akonga. Akimöminye chi nyo le ompö akonga nyo kimwa lö nyenyi kïgh nyo kitïng, wölo kighamta tïkukwa chane lapay. 33Kitötö kiyoktoghï söwintön ompö owesyö nyo wow lö, kitutï Echotyon Yeso, ketö chane pöropchö nyo wow. 34Kimöminye chi nyo le ompö akonga nyo kichop kïgh ompö chane. Kyalta pich cho kitïng parenikwa anta korikwa, akwipï ropïyeni, 35kutö kiyoktoghichay atökechöghchï chi anka tïkwïl kïrïp kegh nko wölo tenö machatenyi.
36Kïnget Yosep nyo kikurö kiyoktoghï Parnapa (nyo ato kïwaghach kï, “Chi nyo kilöy pich”), ki chi pö Lawi nyinte, nyo kingwïna Kupro. 37Kwalta par nyo kitïng akwipï ropïyeni akutö kiyoktoghï.
Anania nko Sapira
Currently Selected:
IGHISYEWUT 4: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
