IGHISYEWUT 5
5
1Kimito chi nyo kikuro Anania nko korkenyi Sapira, nyo kyalta kareranto tïkukwa, 2wölo kuchuchuk ropïyeni walaka nko korkenyi, akwip cho mi ori kïwö kutö kiyoktoghï. 3Wölo kïlenchï Petro, “Ompö ne nya Anania tepïsinönyi Onyöt kipöyï mïkulöwungu ntelïsanyi Mïkulögh nyo Tïlil, aichïchukanyi ompö sison kareranto ropïyeni cho kesïkenyi par? 4Otini kitomönye kyalta kï kinyengu, akwotini kyaltenyi kï kipöyunenyi. Kwompö ne nyu tepïsinönyi mïkulöwungu kwigh kïgh nyo lata nyï? Melïsanyinye pich wölo kelïsanyi Tororöt.” 5Nyini kilïm Anania ngalechoni kupït akïma, kwotyö pich lapay cho kilïm, 6kïpka pich cho le chumwak, akïnanagha portanyi ananka, akïsït sany kïpa kïtïp.
7Kïkany kuwer satïn cho lentöy chi mu sömökï, kïlïtï korkenyi, akimenkïtnye kegh nyo kigha. 8Kïlenchï Petro, “Mwowante lö, tenö chete ropïyeni cho kalteghekwa parenkwa?”
Kïlö, “Owöy, tenö choni.”
9Kïlenchï Petro, “Kötöptö onö tochomnyechinökwa kwodeny atyama Mïkulöwu Echotyon? Achona pïchay kapa kïtïp pontengu mi kukat ye, pkonöy chane kïsïtinyi tïkwïl.” 10Panini lawel kupïtyï ngwïny otini le kelyechi akïma. Kïlïtï chumwakchay kutomï kima, kïlenyona kïsït sany akïpa kïtïpchï kamasuto santenyi. 11Kungwïnchi mïghötö kanise kïmïkul nko pikö walaka cho kilïm ngalechoni kighisyö.
Kiporunöt nko töngönchin
12Kwigh kiyoktoghï kiporunöt nko töngönchin ompö kwenu pich. Kinyoryeghö kighönïchoni körköru Solomon ompö machat akonga. 13Kimöminye chi nyo kitomönye kughan nyo kïlït nyoryononi, wölo kikonyït pich löwïr chane. 14Kitösisyö kïtösisyot tya kighönï cho chang ompö nyoryononi, cho le mïrön nko kor cho kighan Echotyon. 15Ntökumïtï pich cho chirsot kïpa ortïn, akumïkonchï chane men nko rïpkay tömanyïl otini weröy Petro kïswangata rurwenyi pïchoni walaka. 16Kïpkana söpïchis kanastin cho kilekïto Yerusalem, cho kipu pikökwa cho kichirsot nko cho kipote oy. Kesop chane lapay.
Kakichop kong kiyoktoghï
17Atolapay kïnget Tïsin nyo Wow* nko kongotichi cho kile pipö Sadukaytin* kwipö sikong kiyoktoghï. Kïlenyona kïmach kwighchï chane kïgh nyo gha. 18Kïnam kiyoktoghichay akïtorchï chela. 19Wölo kïyat malaykayanta Echotyon kukoti chela oghö akumïtï chane kïpka sany, akïlenchï, 20“Ape oghyongenö Kö pö Tororöt,* amwochï pich ngal lapay cho pö Söponï.” 21Kïkonyït kiyoktoghï ngalechay, akïpa kïlïtöy Kö pö Tororöt kiwasan akutor kunetisyö. Kïlenyona kïnget Tïsin nyo Wow nko cho kimi tïkwïl, kïkur Kokwö* nko poyi Yaudi löwïr, atolapay kïyonta pich kïpa chela kumïtï cho kiyoktoy. 22Wölo otini kitïta askarinechay, mökïnyorïcha chane ompö chela. Kïmïlonchö nyu akïmwa lö, 23“Otini kakitïtecha chela ketomtecha körote kukoti lasiny, akimito ripï kughyongo kukotichay, wölo nyini kakïyatacha kukotichay kïmökïnyoruchanye chi ompö ori.” 24Nyini kilïm ngalechoni yetïn pö ripi Kö pö Tororöt nko tïsï cho echön, kïtöngönchï lö ne kïtö nyini kegha. 25Atolapay kungwïn chi kïmwochï chane lö, “Mi pïchay kotorchikwa chela kughyongo Kö pö Tororöt, akunetöy pich.” 26Kïwö nyu yetïnay nko askarinechi kumïtï kiyoktoghï, amelö ompö kichiköt ompöwölo kiwagh lö, wiro pich chane koghïn.
27Akwotini kikimïtï chane, ketö chane kughyongö tawu Kokwö. Kïtep nyu Tïsin nyo Wow chane 28#Mat 27:25. lö, “Kolentan kikïmwowokwa lasiny lö, monetisyeghö kaynata chichï, wölo arose kini kaghakwa! Köghömï Yerusalem kïmïkul kinetutyenkwa, ayörekwa omwoghe lö acha cho kikighyongchï meghenyi.”
29Kuyokyï Petro nko cho kiyoktoghi walaka lö, “Mïchinecha kekonyïtö Tororöt, kïtïl pich. 30Kigh Tororöt pö papotïnecho Yeso kututï ompö ngwen, nyinte nyo kyowïdochikwa kimurtöwon apar. 31Kisyol Tororöt nyinte kïtöpö ewunyi okumpö tagh, kïlïkwï kintöghoghin nko Ghetin. Atökutö pipö Israel pöroyïn nyo kötegho ngokikwa akelöstoghchï chane. 32Akechicha söwiko ngalechete acha nko Mïkulögh nyo Tïlil, nyo kikonï Tororöt kutö pich cho ghönöy nyinte.”
33Nyini kilïm lenyoni, kusïnyorisyö akïyar kïpar kiyoktoghï, 34wölo kïnget Parisayon* akong, nyo kikuro Kamaliel nyo kile konetinto kirurut, nyo kikonyïtöy pich löwïr, kïlö, “Akanye kïpa pïchï sany kite,” 35atolapay kilenchï Kokwonay, “Mïrönchï pö Israel, orip kegh lasiny ngala pïchï kïtomö amuta kïgh nyo odoy chane. 36Ompöwölo kikonï kegh Teuda osiswe walaka cho kikuwer, akïlö ochï chi nyo wow, kïrïp nyinte pich cho ngata 400. Wölo kepar nyinte aketoyö pikachi, akïlïkwï kwïle. 37Kïrïpta chichoni Yudas nyo pö Kalilaya ompö osis cho kikiyitöy pich, kïrip söpïch nyinte, kïma nyinte, aketoyö tïkwïl cho kirïpöy nyinte. 38Kïlenyona nyu, omwowokwa ye lö, amalena kegh pïchï. Opïstenö chane, ompöwölo ato pö pich ngalechï anta pöghisyonï, kupotöy lö weng, 39wölo ato ngwïno wölo mi Tororöt, kïmomukekwanye ntarinta. Atömötöp ntökïrumï lö omitekwa omölöy Tororöt!”
40Kïrïp Kokwonay ngalechay, kekur kiyoktoghï akemuny, atolapay kemwochï lö, mangalanena ngat kaynata Yeso, akepïstö chane kïpa. 41Kïngeta kiyoktoghï Kokwö nko ngörekyö nyo wow, ompöwölo kisïwa lö, mïchini kuwongunö chane kaynata Yeso. 42Akimösisyöcha chane asis anka tïkwïl kunetisyö ompö Kö pö Tororöt nko kori pich, kwamta Lökoy cho Karamach lö, “Yeso kï Kristo.”*
Kingörokï cho le mut nko odeny
Currently Selected:
IGHISYEWUT 5: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
