YOANA 18
18
1Otini kiwany Yeso kïmwa ngalechoni, kïnget nko kinetankachi akïwö kwoghyö champilwa Kidron. Kimi par atoni, kïlït nyinte nko kinetankachi paranoni. 2Kinkït Yudas nyo kiwïchtö nyinte wöloni ompöwölo kituyeghö Yeso atoni kïnomnyö nko kinetankachi. 3Kïwö nyu Yudas kutang paranoni, kimi nyinte nko söpïch pö soch nko askarin cho kiripöy Kö pö Tororöt* cho kiyonï tïsï cho echön nko Parisaytin,* kitïng chane karikwa, akipöy tatïn nko tapayaw. 4Kinkït Yeso kïgh anka tïkwïl nyo kitini nyinte, kïlenyona kunaytegha keltanyi tagh akïlenchï, “Ngo nyini omörekwa nya?”
5Kuyokyï chane lö, “Yeso nyo pö Nasaret.”
Kïlenchï Yeso, “Ani nyoni.”
Kighyongö Yudas wïchtoghintö atoni nko pïchoni.
6Otini kilenchï nyu Yeso chane, “Ani nyoni,” kïchïchïkisyö akupïtyï ngwïny. 7Kïtep Yeso chane ngat lö, “Ngo nyini omörekwa?” Kuyokyï chane lö, “Yeso nyo pö Nasaret.” 8Kuyokyï Yeso lö, “Nyaye kökomwowokwa lö ani nyoni? Kwato omöranïkwa, opïstö nyu pïchï kïpa.” 9(Kimwa ngalechoni ntökwitïta lö man ngala cho kökikïmwa nyinte lö, “Kimopïstanye nyo le ompö akonga kupot ompö pïchoni kikonaninyi.”) 10Kitïng chok Simon Petro, kïngwïsï akïsila yit pö sekeyonto Tïsin nyo Wow* nyo pö ewu tagh. Kïkuro kayneto chichoni Malko. 11#Mat 26:39; Mrk 14:36; Luk 22:42. Kïlenchï Yeso Petro, “Yokyinö chokengu mïlenyi! Ilentenyi so otöghan ogheghöy kikompo nyarïl nyo kakïkonanïn Paponyu?”
Yeso ompö tawu Anas
12Atolapay kïnam askarin nko wowïntöngwa nko ripi pipö Yaudi Yeso akïrat, 13akïnya kumït wölo mi Anas, nyo kile kapikoy pö Kayapa. Ki Tïsin nyo Wow Anas könyinoni. 14#Yna 11:49-50. Ki Kayapa nyo kinya kurur pipö Yaudi lö mïchini kïmegha chi akong pipö kor.
Kötiyö Petro lö monkït Yeso
(Mat 26:69-70; Mrk 14:66-68; Luk 22:55-57)
15Kïrïp Simon Petro Yeso nko kinetane anka. Kinkïtote Tïsintononi Wow kinetananoni, kïlenyona kïwö nko Yeso akïlït kiroryeto Tïsintononi Wow. 16Wölo kughyongö Petro or sany. Kïnget kinetananay nkït kegh nko Tïsi nyo Wow akïwö kïmwochï työ nyo kiripöy or kïpïsï Petro kungwïn ori. 17Kïlenchï chepay kiripöy kukat Petro, “Ichinyi so tïkwïl akonga ompö kinetanpa chichoni?”
Kuyokyï Petro lö, “Ewo, mochanye.” 18Kökikunagh ma mötworiko kayoni nko pikö cho le ripï, ompöwölo ki osiswo kaghïtan atoni akimi chane kïyïwöy mangwa. Kimi Petro tïkwïl kughyongo atoni nko chane kïyïwöy ma.
Katep Tïsin nyo Wow Yeso ngal
(Mat 26:59-66; Mrk 14:55-64; Luk 22:66-71)
19Kïtep nyu Tïsintononi Wow Yeso teput kïparta kinetankachi nko kinetutkachi. 20Kuyokyï Yeso nyinte lö, “Kyongölonchan pich löwïr kïlöpo kïteno osis ato kyonetisïyan ompö kori sowut nko ompö Kö pö Tororöt kituyegho pipö Yaudi kïmïkul akïtomönye amwaghan ngölyon nyonikïny ompö wïngat. 21Kwompö ne tetepaninyi? Tepena pïchoni kilïmöy kïyoni kyomwochan chane. Nkït chane kïgh nyo kyamwaghan.” 22Otini kiwany Yeso kimwa lenyoni, kurapach ripin akong nyinte akïlö, “Iyokyinenyi so Tïsin nyo Wow lenyoni?” 23Kïwöghökyï Yeso lö, “Ato kamwaghan kïgh nyo gha löwïr ghöyityononi, wölo ato kamwaghan nyo karam, kwompö ne terapakaninyi?” 24Kïyonta nyu Anas nyinte kiratate kïwö wölo mi Kayapa nyo kile Tïsin nyo Wow.
Kötiyö Petro ngat lö monkït Yeso
(Mat 26:71-75; Mrk 14:69-72; Luk 22:58-62)
25Kitökïmi Simon Petro kughyongo atoni kïyïwöy manyi. Kïtep pikö walaka nyinte lö, “Mechinyinye so akonga ompö kinetankachi?” Wölo kumöl Petro lö, “Ewo, mochanye.” 26Kungwïn mötworintö Tïsin Wow akong nyo pö nyo kitïngö kïgh chichanya kisil Petro yit akïlö,
“Nyanye kyosöchinyi par mitenö nko nyinte?” 27Kïtiyö ngat Petro akïtökïnyini lawel, kïwach kïrpö kokoroch.
Kakimït Yeso tawu Pilato
(Mat 27:1-2,11-14; Mrk 15:1-5; Luk 23:1-5)
28Kumït chane Yeso kïweghö köyay pö Kayapa kutang kö pö soch. Ki kiwasan atoni. Kimölïtöcha pipö Yaudi köyoni ori, ompöwölo kiripöy kegh tamalïkwï chane sïmnyon ompö ara saghat atömökumï kwam omisyo Pasaka.* 29Kïlenyona, kïlït Pilato sany wölini kimi chane akïtep lö, “Korwokikwa chichï ompö kïgh nya ne?” 30Kuyokyï chane nyinte lö, “Melö kötökimïtunecha chichete tawungu ntökömelö mwokïyon nyinte.” 31Kïlenchï Pilato pïchay, “Amïta akwane atorwokyinö kïrïp kegh nko kirurutyengwo.” Kuyokyï pïchay pö Yaudi lö, “Melö kïchömwecha ketïghe chi anka tïkwïl.” 32#Yna 3:14; 12:32. (Kimwa chane ngalechoni atökwitïta lö man ngölyonto Yeso nyo kökikïmwa nyo poru meghat wölo meghtoy nyinte.) 33Kïmïla Pilato ngat wölay le kö pö soch akïkur Yeso akïtep lö, “Kelö so ichï pöytoghinto pipö Yaudi?” 34Kuyokyï Yeso lö, “Teputyengu nyinte kegh nyoni nya anta kömwowunyi pikö walaka ngalechan?” 35Kuyokyï Pilato lö, “Ilentenyi so ochan chi pö Yaudi? Piköku chane nko tïsï cho echön chini konkoghwanïn nyi. Keghanyi nya ne?” 36Kuyokyï Yeso lö, “Möpönye ngwïnyinï paytaghtanyan, ntökö pö paytaghtanyan ngwïnyinete, kötösöröpkanïn pikachu kïporyot tömöparanïn pipö Yaudi. Wölo möpönye paytaghtanyan wöletewöl!” 37Kïlenchï nyu Pilato, “Nyo ichinyi ye nyu pöytoghin so?” Kuyokyï Yeso lö, “Kemwaghanyi nyinte lö ochan pöytoghin. Kikïyiyanïn, angwïnan ngwïnyinete ompö makatanoni le akonga, atamuk ngalana man. Chi anka tïkwïl nyo pö man, kïteröy ngalechan.” 38Kïtep Pilato lö, “Ne nyo le man?”
Kakirwokyï Yeso kepar
(Mat 27:15-31; Mrk 15:6-20; Luk 23:13-25)
Otini kiwany Pilato kïmwa ngalechoni, kïmïla sany wölo mi pipö Yaudi akïlenchï, “Mosöchanye lelut nyinte nyonikïny. 39Wölo otïngetekwa otöp nyo omukan otyokwokwa chi nyo ratate asispa Pasaka. Omökekwa otyokwokwa pöytoghinto pipö Yaudi nya?”
40Kuyokyï chane nyinte ompö kiteghat ngat lö, “Ewo, melö chichï, kïmökecha Parapas!” (Ki chi nyo le mosin Parapas.)
Currently Selected:
YOANA 18: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
