YOANA 19
19
1Kutötö nyu Pilato Yeso kepa ketwaruna syariti. 2Kïnanagh askarinechoni tenta kato akulokyï mötïnyi akulokyï sïra nyo lata akwa lamay, 3akïpechï wölini mi nyinte akïlenchï, “Isöp nyo kogh, we pöytoghinto pipö Yaudi!” Atolapay kurapa nyinte.
4Kïwö Pilato sany ngat akïlenchï söpïchay, “Arose ya lö kamïtwan nyinte sany atonkïtunökwa lö mosöchanye nyinte lelut nyonikïny.” 5Kïwö nyu Yeso sany kulokotoy tentanay pö kato nko sïranay kilata akwa lamay. Kïlenchï Pilato chane, “Maros nyu! Anyï chichanye!”
6Otini kisïwa tïsï cho echön nko ripï kuteghyö lö, “Owudochinö kimurtöwon! Owudochinö kimurtöwon!” Kïlenchï Pilato pïchay, “Amïtakwa nyu akwane nyinte, apa owudochï kimurtöwon, ompöwölo mosöchanye nyinte lelut nyonikïny.”
7Kïwöghokyï pïchay pö Yaudi lö, “Kïtïngetecha kirurut nyo ato kïrïp kïmïchini kïma, ompöwölo kegh lö ochï Wero Tororöt.”
8Otini kilïm Pilato kïmwa chane lenyoni, kuwöghisyö tya. 9Kïmïla ngat köyay pö soch akïtep Yeso lö, “Kengwïnenyi onö nya?” Wölo kimökuyokyïnye Yeso nyinte ngölyon. 10Kïlenchï Pilato, “Mengölonenyinye so nko ani? Menkïtönyinye so lö otïngetan owesyö nyo otyokinyi amukan owudochinyi kimurtöwon?”
11Kuyokyï Yeso lö, “Melö kötetïngetenyi paytagh nyonikïny ompö ani ntömökikoninyi Tororöt. Kïlenyona, tïng ngokï cho chang tya chichoni kemïtwanïn wölo imitenyi.”
12Otini kilïm Pilato lenyoni, kumukyï kïmar or nyo tyoko Yeso. Wölo kuteghyö pïchay pö Yaudi lö, “Ato ityakanyi nyinte kuporu lö mechinyinye kongo Kaisari. Chi anka tïkwïl nyo ighöy kegh pöytoghin kïtöghöy Kaisari.”
13Otini kilïm Pilato ngalechoni, kumït Yeso ato le sany akïtöpö ngacharu kirwok ompö ato kïkuro, “Tïtïka koghïn.” (Kïkuro ompö Eprania, “Kapata.”) 14Ki wölo ngata satïn mut nko akonga nyo pö asis nyo kiyekyini asispa Pasaka.* Kïlenchï Pilato pïchay pö Yaudi, “Arosa pöytoghintengwo!”
15Kuteghyö ngat lö, “Tötenö kepar! Tötenö kepar! Kanya kewudochï kimurtöwon!”
Kïtep Pilato chane lö, “Omökekwa so owudochinan pöytoghintenkwa kimurtöwon?”
Kuyokyï tïsï cho echön lö, “Melö kïtïngetecha pöytoghin anka kïpoto Kaisari.”
16Kutö nyu Pilato morikwa atökïwudochï nyinte kimurtöwon.
Kakïwudochï Yeso kimurtöwon
(Mat 27:32-44; Mrk 15:21-32; Luk 23:26-43)
Kïlenyona, kïnam chane Yeso akumït. 17Kïwö nyinte kïkösönöy kimurtöwontenyi ntökwit ato kïkuro “Kowo Möt,” (Kïlentöy ompö Eprania, “Kolkota.”) 18Kewudochï nyinte atoni nko pikö walaka odeny, anka ewu tagh anka ewu löt, ketö Yeso kwen. 19Kukir Pilato ngal cho kikiwusö parakuto kimurtöwontenyi cho kikir lö, “Yeso nyo pö Nasaret, pöytoghinto pipö Yaudi.” 20Kusomön nyu pipö Yaudi cho chang ngalechoni, ompöwölo kimölownye otini kikïwudochï Yeso kimurtöwon nko kanasyan. Kikir ngalechoni ompö ngala Eprania nko Rumi nko Krik. 21Kïlenchï nyu tïsi pipö Yaudi cho echön Pilato, “Mekiröy lö, ‘Pöytoghinto pipö Yaudi,’ wölo kira lö, ‘Kilö chichï ochan pöytoghinto pipö Yaudi.’ ”
22Kuyokyï Pilato lö, “Möwöghökönye ngal cho kakiran.”
23Kikany kuwany askarinechoni kïwudochï Yeso kimurtöwon, kïcheng sïrokachï akupar kïlïkwï rötöw angwan, kip askaryon anka tïkwïl rötöwontenyi. Kïcheng kolike tïkwïl nya kikikïnap kïlïkwï akonga akimöminye wölo kikituyö, kikïnap kïlïkwï akonga kïngeta parak ntökwit kel. 24#Tum 22:18. Kïmwochinchö askarinechoni lö, “Mökekarer, wölo kyama pkiryot tökesïwena lö ekïpöyitu ngo.” Kigh chane lenyoni atökwitïta Kikirut lö, man cho lentöy,
“Kiporchï kegh chane sïroköchan,
akwama pkiryot kolikenyan.”
Kwigh nyu askarinechoni lenyoni.
25Kighyongo ato lekïto kimurtöwonto Yeso kame nko chepto ompö kame, Marya koko Klopas nko Marya Makdalena. 26Kïsïwa Yeso kame nko kinetanenyi nyanya kichömöy mito kughyongo atoni, kïlenchï nyu kame, “Yonyu, rose anyï werïngu.”
27Atolapay kïlenchï kinetanenyi nyay, “Rose anyona komöt.” Kumït nyu kinetananoni kame kïngeta sayanoni akïwö kitöpö tïkwïl katanyi.
Megha Yeso
(Mat 27:45-56; Mrk 15:33-41; Luk 23:44-49)
28 #
Tum 22:15; 69:21. Kinkït nyu Yeso kïngeta atoni lö kikwitïta laras tïkwïn tïkwïl atökegh Kikirut kïrumï lö man, kïlö, “Kamanïn maral.”
29Kimi törö atoni nyo kikinyïghit dipay* cho ngwonöch, kulut siponki dipayichoni, akïrotyï morno isop* akwonkoghchï kïgha. 30Kïkany kïgha Yeso dipayichoni kumuchö kïlö, “Kewonyö!”
Atolapay kungïruk mötïnyi akutötö mïkulöwunyi.
Kakïpïsïghö ngot karaspa Yeso
31Ki asispa Chuma asisoni nyo kile asispa Ighata kegh, kïpa pipö Yaudi kïsom Pilato kïchömchï chane kumïregh kelyeko pïchoni kikïwudochï kimurtöwon atökerekunö porwöyikwa kimurtöwon tömöruyö mïntïruch kimurtöwon asispa Sapato,* ompöwölo ki wow asisto Sapato nyo kirïptoy asisoni. 32Kïpa nyu askarinechay akumïregh kelyeko chitö nyo pö tagh nko nyo pö odeny ompö pïchoni kiwudochï kimurtöwon nko Yeso. 33Wölo otini kitï wölo mi Yeso, kutomï kima, kömökumïreghcha kelyechi. 34Wölo kïpïsïghö ngot karastanyi askaryon akong akïtökïnyini lawel, kïpkana kisön nko pögh. 35(Nyinte nyini kisïwa ngalechoni kwighisot nyo söwintönöy akï pö man söwintönenyi, atamuka aghana ngalechoni mwowu nyinte akunkït nyinte lö omwoghöy ngala man.) 36#Wuw 12:48; Kiy 9:12; Tum 34:20. Kighisyö ngalechoni ntökwitïta lö man Kikirut nyo lentöy, “Möminye kowenyi nyo le ompö akonga nyo kimïreghöy.” 37#Sak 12:10; Ngo 1:7. Akïmi Kikirutkö walaka cho lentöy, “Topönöy chane asïyech chichoni kipïsïgh chane.”
Kakïtïp Yeso
(Mat 27:57-61; Mrk 15:42-47; Luk 23:50-56)
38Kïkany kuwanta kegh choni, kïwö Yosep, chi pö kanasyanta Arimatea, wölo mi Pilato akïsom nyinte por pö Yeso atökwip. (Ki rïpana Yeso Yosep, wölo kiwïngöy kegh, ompöwölo kiwöghöy pipö Yaudi.) Kïchömchï Pilato nyinte kwip poroni, kïwö nyu Yosep akwip. 39#Yna 3:1-2. Kïwö Nikodemo nyanya kirutochï Yeso oghö nko Yosep, kipöy nyinte kilen cho ngata tömönut sömök cho pö tïkwïn cho lata köröstino mankoy cho kikituyö nko tolkosay. 40Kïcheng pïchoni kwodeny poroni pö Yeso akïnonoghchï ananka katani akutö tïkuchoni lata köröstino mankoy, ompöwölo lenyoni wölo ightoy pipö Yaudi mïntïrïch ato tomönye ketïp. 41Kimi par ato kikïpörchï Yeso nyo kimi pïrïm nyo rel nyo kitomönye ketïpchï chi. 42Akwompöwölo ki asis nyo kiyekyini asispa pipö Yaudi nyo pö Sapato, akimi ato lekït pïrïmponay, kutö nyu por pö Yeso wöloni.
Tïryal pïrïmponay
(Mat 28:1-8; Mrk 16:1-8; Luk 24:1-12)
Currently Selected:
YOANA 19: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
