Vikolwa 11
11
1Avatumwa navamitu ava li mu Buyuda va hulira ave Tsihiri kandi va mali kugumira likuva lya Nyasaye. 2Kandi Petro lwa yanegira kuduka Yerusalemi, yava va li avakevwa va hangalidzana naye, 3va vola, Ive wingira ku vandu va ta kevwa, nu u lia halala navo. 4Navutswa Petro ya tanga kuvalu ngikidzira amakuva kuli ga veye, na a vola, 5Nda li mu lidala lya Yopa ni nsaala: mu ligirunkanywa lyomwoyo gwange na nda lola liloto, kindu kikidzwa ku tsinziga tsine ki twula migulu kuli ingubo inene; kidza kali ku inze. 6Lwa nda kyumika, nki henza ligali, nda lola muno tsinyama tsyelirova tsyevirenge vine, netsinyama tsyombulimu netsinya ma tsi mola, namanyonyi gegulu. 7Kandi nda huhra mwoyo gwa mbolera, Singira, Petro; wiite u lie. 8Navutswa nda mu volera, Auwa, Mwami: kigira kindu kivi nekidamano ki kikiri kwingira mu munwa gwange. 9Navutswa mwoyo gwa tivula, gu twula migulu hali kaviri, Kya Nyasaye a takasa ive u ta ki kola kidamano. 10Yiki kya kolwa hali kavaka: kandi vyosi vya nyinywa kandi migulu. 11Henza, nonoho avandu vavaka va singira imbiri wenyumba ya kwa li mu, ava tumwa ku inze kutwula Kaisaria. 12Roho ya mbolera, u tsie navo, u ta visiigana. Navamwavo yava vatanu na mulala va tsia halala ninze; ni kwingira mu inyumba yomundu uyu: 13kandi ya ku volera kuli wa ya lola ingelosi na a singiye mu inyumba yeye, na a mu volera, U tume avandu va tsie Yopa, va lange Simoni welieta lindi Petro; 14a la ku volera amakuva ga la ku honnya ive navenyumba yoyo vosi. 15Na lwa nda tanga kuvola, Roho Mutakatifu yika kuvo kuli wa ya tanga kwika ku kwinye lwambiri. 16Ma ndidzulitsa likuva lyo Mwami, kuli ya vola, Yohana ya batidza na madzi ligali, navutswa mwinye mu la batidzwa mu Roho Mutakatifu. 17Kunangwa Nyasaye na a va na a va ha kihaanwa yikyo kya ya ha kwinye, lwa kya suuvira ku Mwami Yesu Kristo, inze ni bwaha, nyale kwamba kannya Nyasaye? 18Kandi lwa va hulira yaga va kiring'ana, ni vidzominya Nyasaye, ni va vola, Kali ku Tsihiri, Nyasaye u mali kuvaha Iveganira li leta livamwoyo.
19Kunangwa yava va salanywa kigira lidambidzwa lya twulira ku Stefano, va tsia kuduka kali Foinike na Kuporo, na Antiokia, si va volera mundu likuva navutswa Avayuda veng'ine. 20Navutswa avandi ku vo, avandu va Kuporo na Kurene, lwa va duka Antiokia va volera Avagreki kandi, vilwadza amakuva go Mwami Yesu. 21Kandi mu kono gwo Mwami gwa li halala navo: na vanyingi ava suuvira va girunkana ni va yeka ku Mwami. 22Amakuva gavo ga duka mu matu gelivu gana lya li mu Yerusalemi: ni va tuma Baranaba a tsie Antiokia. 23Naye lwa ya duka na a lola tsimbabasi tsya Nyasaye, ya yanza, na a veganehidza vosi va dinye ku Mwami nobusaaviri bwomwoyo; 24kigira ya li mundu mulahi ni wizula Roho Mutakatifu nelisuuvira: navandu vanyingi va dasika ku luvega lwo Mwami. 25Kandi ya tsia Tariso kwenya Saulo; 26lwa ya mala kumulola ya mu leta Antiokia. Kandi muhiga mulala va vugana nelivugana halala, ni vegidza avandu vanyingi: kandi ave gidzwi va tanga kulangwa Avakristayo mu Antiokia.
27Mu madiku yago avaprofeti va sulunguta kutwula Yerusalemi kuduka Antiokia. 28Kandi mundu mulala kuvo wa langwa Agabo ya singira, na a lolekidza netsingulu tsya Roho, inzala inene i ladza mu lirova lyosi: nayo ya duka mu madiku ga Klaudio. 29Navegidzwi sa mulala kuli va nyala va lalira kuhila ubukonyi ku vamwavo ava menya Ebuyuda: 30navo va kola ndiyo ni va bu hilira avakulundu mu ma kono ga Baranaba na Saulo.
Currently Selected:
Vikolwa 11: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967
