Yohana 10
10
1Ligali, ligali, mmu volera, U vula kwingira mu kiliango kyekego kyamagondi, navutswa a tsia kuhudula ha luvega, uyu nu mwivi kandi nu mwiguliri. 2Navutswa wingirira mu kiliango nu mwayi wamagondi. 3Mulindi a mwigulira kiliango; kandi magondi ga hulira mwoyo gwigwe: kandi a langa amagondi gege sa lilala lieta lyalyo, na a gimirira kutsia kyova. 4Lwa a mala kugahila agege gosi kyova, a gimirira imbiri wago, nago amagondi ga mu londa: kigira ga manya mwoyo gwigwe. 5Kandi si ga nyala kulonda mundu mgeni, navutswa ga la mwiruka: kigira si ga manya mwoyo gwavageni. 6Lugano yilu Yesu ya va kupa: navutswa si va manya ni makuva ki ga ya va volera.
7Kunangwa Yesu ya va volera kandi, Ligali, ligali, Inze mbeye kiliango kyamagondi. 8Vosi avadza imbiri wange va li avivi kandi aviguliri: navutswa amagondi si ga va hulira. 9Inze ni kiliango; mu ndu ni yingira ku inze, a la honnywa, naye a lingira mugati kandi a twula kyova, kandi a la lola kyayo. 10Mwivi si yadza bugira kwiva, nokwiita, nokwononnya: inze ndadza va nyola livamwoyo, kandi va li nyole linyingi. 11Inze mbeye mwa yi mulahi: mwayi mulahi a haana livamwoyo lilye kigira magondi. 12U tungangwa, na a ta veye mwayi, wamagondi ga ta va agege, a lola kisalang'ongo ni kidza, ma a leka magondi, yiruke, kandi kisalang'ongo ki ga gamula, kandi ki ga salannya: 13yiruka kigira a veye mutungwi, kandi si a nyala kuganagana magondi. 14Inze mbeye mwayi mulahi; kandi nga manya aga veye agange, kandi agange ga mmanya, 15kuli Dada a manya inze, na inze mmanya Dada; kandi mbaana livamwoyo lyange kigira magondi. 16Kandi mbeye namagondi agandi, ga ta veye gomu kego yiki: nago kandi ga ndukira ndete, kandi yaga ga la hulira mwoyo gwange; ga la gwa kyayo kilala nomwayi mulala. 17Yiki ni kigira Dada a nyanza, kigira inze mbaana livamwoyo lyange nduke kuligumira kandi. 18Si ha veye nomundu u nyaga Ziva mwoyo, navutswa ndi haana inze mwene. Mbeye netsingulu kulihaana, kandi mbeye netsingulu kuligumira kandi. Lilago yili nda nyola ku Dada wange.
19Lya duka kandi lyavukana ku Vayuda kigira amakuva yaga. 20Kandi avanyingi kuvo va vola, A veye nelidemone, kandi a laluka; kigira ki mwinye mu mu hulira? 21Avandi va vola, amakuva yaga si ga li amakuva ga mundu a veye nelidemone. Lidemone li nyala kukunula tsimoni tsyavaboku.
22Lilia lyokugima litempeli lya li mu Yerusalemi: 23ga li madiku gobukindu; kandi Yesu ya vaya mu litempeli mu lusimbu lwa Solomoni. 24Kunangwa Avayuda va mu kumbiridza, ni va mu volera, U la ku hayahayidza kuduka inyinga ki? Nu u va nu u veye Kristo u ku volere habulavu. 25Yesu ya va tivulira, nda mu volera, Si mu suuvira: miyinzi gya nkolanga ku lieta lya Dada wange, yigyo gyi ndolekidzanga. 26Navutswa mwinye si rnu suuvira, kigira si mu veye mu magondi gange. 27Magondi gange ga hulira mwoyo gwange, kandi inze nga manya, kandi ga nonda: 28inze nga hedzanga livamwoyo li ta hera mba; ga la vula kudivz imihiga nemihiga, kandi si ha veye nomundu u li ga nyaga mu mkono gwarige 29Dada wange wa mpa, a veye munene kuvita vosi; kandi si ha veye nomundu u nyala kuganyaga mu mkono gwa Dada. 30Inze na Dada ku veye kindu kilala. 31Avayuda va dola magina kandi kumulasa. 32Yesu ya va tivulira, Miyinzi milahi minyingi mmu mannya gyi twulanga ku Dada; ku miyinzi yigyo ni gu li ha gwa mu ndasira magina? 33Avayuda va mu tivulira, Si ku ku lasa kigira muyinzi mulahi, navutswa kigira ubunyegi; kandi kigira ive, mundu, mwene wekola Nyasaye. 34Yesu ya va tivulira, Si ga ng'odwa mu lilaga lyenyu, Inze nda vola, Mwinye mu veye avanyasaye? 35Na a va na a va langa vanyasaye, yavo avelikuva Iyn Nyasaye lidza kuvo (kandi Amang'oda si ga nyala kugota), 36wa Dada ya tovola na a mu tuma kuudza mu kivala, mwinye mu vola kuye, U nyega; kigira nda vola, Inze mbeye Mwana wa Nyasaye? 37Ni mba ni nta kola miyi nzi gya Dada wange, mu ta nsuuvira. 38Navutswa ni mba ni nkola, kali mu vula kunsuuvira, mu suuvire miyinzi, mu duke kuhulira nokumanya, Dada a veye mu inze, na inze mu Dada. 39Kunangwa venya kandi kumugumira: navutswa ya twula mu makono gavo.
40Ya tsia kandi hangereka ha Yordani ha Yohana ya batidzira inyinga yokutanga; na a menya yo. 41Kandi avandu vanyingi va tsia kuye, ni va vola, Ligali Yohana si ya kola kilolekidzu, navutswa vindu vyosi vya Yohana ya vola ku mundu uyu vya li vyeligali. 42Kandi vanyingi va mu suuvira yaho.
Currently Selected:
Yohana 10: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967
