Yohana 14

1Mu ta henda myoyo gyenyu: suuviri Nyasaye, mu suuvire inze kandi. 2Mu inyumba ya Dada wange i veye nobumenyi bunyingi; ni i ta veye ndiyo, nkano nda mu volera; kigira ntsitsa kumulombera ubugono. 3Kandi ni mba ni ntsia kumulombera ubugono, nzidza kandi, kandi nda mwingiridza inze mwene; ha mbeye inze, mwinye kandi mu ve ho. 4Na ha ntsia mu manya; na mu manya inzira. 5Tomasi ya mu volera, Mwami, ha u tsia si ku manya; ku manya ndi inzira? 6Yesu ya mu volera, Inze niyo inzira, nageligali, nelivamwoyo: si ha veye nomundu u duka ku Dada na a leki inze. 7Ni mba mwa manya inze, nkano mwa manya Dada wange kandi: kutwula kalunu mu mu manya, kandi mu mu loli. 8Filipu ya mu volera, Mwami, u ku mannye Dada, ma ga ku duke. 9Yesu ya mu volera, Tsinyinga yitsi tsyosi mbeye halala ne mwinye, nive u ta manya inze, Filipu? U lola inze u loli Dada; kigira ki u vola, U ku mannye Dada? 10Si u suuvira inze mbeye mu Dada, na Dada a veye mu inze? Amakuva ga mmu volera si nga vola inze mwene: navu tswa Dada a veye mu inze a kolanga miyinzi gyigye. 11Mu suuvire inze mbeye mu Dada, na Dada a veye mu inze: kinga mu suuvire inze kigira miyinzi gyeng'ine. 12Ligali, ligali mmu volera, Uyu u suuvira inze miyinzi gya nkolanga naye kandi a la gyi kola; kandi a la kola minene ku vita yigyi; kigira inze ntsitsa wa Dada. 13Ku vyosi kya mu li saala ku lieta lyange, yiki nda kola, Dada a duke kukuminyirwa ku Mwana. 14Ni mba ni mu saala kindu ku lieta lyange, yiki nda kola. 15Ni mba ni mu yanza inze, mu la gumira malago gange. 16Kandi inze nda saava Dada, naye a la mu ha Muko nyi wundi, a ve na mwinye halala mihiga nemihiga. 17Naye ni Roho wa geligali, wavomkivala va ta nyala kumuvugula; kigira si va mu lola, kandi si va mu manya: mwinye mu mu manya; kigira a menya na mwinye, naye a la va mu mwinye. 18Si ndi mu leka avabisandu: ndadza ku mwinye. 19I tigaye inyinga inkekeke, avomkivala si va li ndola kandi; navutswa mwinye mu ndolanga: kigira inze mbeye mwoyo, kandi mwinye mu la va mwoyo. 20Ku lidiku yilyo mu la manya, inze mbeye mu Dada wange, na mwinye mu veye mu inze, na inze mbeye mu mwinye. 21Uyu u veye namalago gange, na a ga gumira, uyu niye u nyanza: naye u nyanza, Dada wange a la mu yanza na inze nda mu yanza, kandi inze nda mu vuulikira. 22Yuda (u ta li Iskarioti) ya mu volera, Mwami, ga la va ndi ive u la vuulikira kwinye, navutswa u ta vuulikira avomkivala? 23Yesu ya tivula, na a mu volera, Mundu na a nyanza, a la gumira likuva lyange: na Dada wange a la mu yanza kwinye ku ladza kuye, na ku la, menya naye. 24U ta nyanza si a gumira amakuva gange: kandi likuva lya mu huliranga si li veye lyange, navutswa ni lya Dada wa ntuma.

25Amakuva yaga mmu volera lwa nkikiri nemwinye. 26Navutswa uyu Mukonyi, Roho Mutakatifu wa Dada a la tuma ku lieta lyange, a la mwegidza amakuva gosi, naye a la mwidzulitsa gosi ga nda mu volera. 27Mirembe mmu lekera; mirembe gyange mmu hedza: si mmu ha kuli avomkivala va haana. Mu ta henda myoyo gyenyu, kandi gvi ta va nobu tii. 28Mwinye mwa hulira kuli nda nmu volera, Ntsitsa, kandi ndadza ku mwinye. Mu va mwa nyanza, nkano mwa sangala, kigira ntsitsa wa Dada: kigira Dada a veye munene kuvita inze. 29Kandi inze mmu volera kalunu, li kikiri kuduka, lwa li mala kuduka, mu nyale kusuuvira. 30Si nda mu volera manyingi kandi, kigira munene wavomkivala yadza: kandi si a veye nekindu mu inze; 31navutswa kuli wa Dada ya ndaga, inze nkolanga ndiyo, avomkivala va duke kumanya nyanza Dada. Singiri, ku gende.

Currently Selected:

Yohana 14: MBE

Highlight

Copy