Yohana 20

1Ku lidiku lyokutanga lisidza Maria Magdalene ya tsia mabwebwe, isi ni i kikiri mwamu, ku kilindwa, na a lola ligina li twulidzeywi ku kilindwa. 2Ya nyagula ku Simoni Petro, nowundi mwegi dzwi, wa Yesu ya yanza, na a va volera, Va twulidzi Mwami mu kilindwa va mu hili, si ku manya ha va mu viki. 3Kigira yaga Petro ya twula nomwegidzwi wundi, ni va tsia ku kilindwa. 4Navo va nyagula vombi: mwegidzwi wundi ya vita Petro kunyagula na a tanga kuduka ku kilindwa; 5yinama na a henza mu, na a lola tsingubo tsya katani tsi vikeywi; navutswa si yingira. 6Maku Simoni Petro naye yadza na a londa kandi yingira mu kilindwa; na a iola tsingubo tsya katani tsi vikeywi, 7kandi kagubo ka li ku mutwe si ka vikwa halala netsingubo tsya katani, navutswa ka lingwa ni ka vikwa ha luvega keng'ine. 8Kunangwa mwegidzwi wundi wa tanga kuduka ku kilindwa, yingira, na a lola na a suuvira. 9Kigira va li ni va kikiri kumanya mang'oda, ga mu dukira a simuguke kutwula mu vakudzi. 10Ku, avegidzwi va twula ni va tsia wavo.

11Navutswa Maria ya singira ha kilindwa kyova na a lira: ku, lwa ya lira yinama na a henza mu kilindwa; 12na a lola tsingelosi vaviri ni va veye netsingubo tsindavu, ni vikaye, mulala ha mutwe nowundi ha virenge, homubiri gwa Yesu gwa vikwa. 13Va mu volera, Mukali, u lirira ki? Ya va volera, Kigira va hili Mwami wange, na inze si mmanya ha va mu viki. 14Lwa ya mala kuvola yaga, ya girunkana inyima, na a lola Yesu na a singiye, navutswa si ya manya uyu ni Yesu. 15Yesu ya mu volera, Mukali, u lirira ki? Wenya bwaha? Naye ya ganagana uyu nomulimi womulimi, ya mu volera, Mwami, Nu u va nive u mu hili, u mbolere ha u mu viki, na inze nda mu hila. 16Yesu ya mu volera, Maria. Ya girunkana, na a mu volera mu Luhebraina, Raboni livola lyago li vola, Mwegidzi. 17Yesu ya mu volera, U ta ngumira, kigira nkikiri kwanegira kutsia wa Dada wange: navutswa u tsie ku vamwavo vange, u va volere, Inze nzanegira kutsia wa Dada wange, kandi Dada wenyu, kandi wa Nyasaye wange, kandi Nyhsaye wenyu. 18Maria Magdalene ya tsia na a volera avegidzwi, Mmali kulola Mwami; kandi Mwami ya mbolera vindu yivi.

19Kunangwa lwa gwa li mgolova gwelidiku yilyo, li veye lyokutanga lisidza, kandi viliango lwa vi mali kuhanwa ha vegidzwi va li ni va veye, kigira va tia Vayuda, Yesu yadza na a singira hagati, na a va volera, Mirembe ku mwinye. 20Lwa ya mala kuvola yaga, ya va mannya makono gege nomu tsimbalu mwimwe. Kunangwa avegidzwi lwa va lola Mwami, va yanza. 21Ku. Yesu ya va volera kandi, Mirembe ku mwinye: kuli wa Dada ya ntuma, inze kandi mmu tuma ndiyo. 22Lwa ya vola yaga, ya va heerera mwika, na a va volera, Mu vugule Roho Mutakatifu. 23Ku vosi wa mu sameha ubwoni bwibwe, bu samefwa; ku vosi wa mu mu bohera ubwoni bwibwe, bu boheywi.

24Navutswa Tomasi, mulala ku va li likumi na vaviri, wa langwa Malongo, si ya li ho halala navo inyinga ya Yesu yadza. 25Kigira yaga avegidzwi vandi va mu volera, Ku mali kulola Mwami. Navutswa ya va volera, Ni nta lola tsimbala tsyemisumari mu makono gege, ni nta vika kidete kyange mu tsimbala tsyemisumari, kandi ni nta vika mukono gwange mu tsimbalu tsitsye, si nyala kusuuvira.

26Inyima ya madiku gatanu na gavaka, kandi avegidzwi veve va li mu inyumba, kandi Tomasi ya li halala navo. Viliango ni vi mali kuhanwa, Yesu yadza na a singira hagati, na a vola, Mirembe ku mwinye. 27Maku ya volera Tomasi, Leta kidete kikyo u lole makono gange, kandi u lete mukono u hambe mu tsimbalu tsyange: u ta vula kusuuvira, navutswa u suuvire. 28Tomasi ya mu tivula, na a mu volera, Mwami wange, kandi Nyasaye wange. 29Yesu ya mu volera, Kigira u ndoli u suuviye: va veye nobugasu avasuuviye ni va kikiri kulola.

30Vi veye ho vilolekidzu vinyingi kandi vya Yesu ya kola imbiri wavegidzwi veve, vi ta ng'odwa mu kitabu yiki: 31navutswa yivi vi ng'odwa mu duke kusuuvira Yesu a veye Kristo, Mwana wa Nyasaye; kandi ku lisuuvira lyenyu mu ve nelivamwoyo mu lieta lilye.

Currently Selected:

Yohana 20: MBE

Highlight

Copy