Luka 1
1
1Kigira vanyingi va gumira miyinzi gyokung'oda amakuva gevindu vya kolwa mu kwinye, 2kuli va ku volera yavo ava li avaloli navatumekiri velikuva kutwula litanga, 3kandi inze, kigira mmali kwelolera vyosi ligali kutwula ha litanga lyavyo, fwana nu bulahi nku ng'odera vindu vyosi kuli vi veye, Ive Theofilo mulahi; 4ive u duke kumanya ubulungi bwevindu vya wegidzwa.
5Mu madiku ga Herodi, mwami wa Buyuda, ha li nomusalisi mulala wa langwa Zekaria ku vatovoka va Abija: ya li nomukali ku vakana va Haruni, lieta lilye lya langwa Elisabeti. 6Navo vombi va li ava lungi imbiri wa Nyasaye, ni va gendera mu makuva gosi nomu malago go Mwami bugira kindu kuvo. 7Si va li nomwana, kigira Elisabeti ya li mugumba, navo vombi va duka mihiga minyingi.
8Lwa ya li na a kola miyinzi gyobusalisi imbiri wa Nyasaye mu bulohidzi bwelitovoka lilye, 9kuli miima gyobusalisi, ikura ya mu gwira yokwingira mu litempeli lyo Mwami a sambe kimuli. 10Kya li ho kiduma kyosi kyavandu va saala kyova inyinga yokusamba kimuli. 11Ingelosi wo Mwami ya loleka kuye u singiye ku luvega lwomukono mulungi gwo bwali bwe kimuli. 12Zekaria lwa ya mu lola, ya genya na a tia. 13Navutswa ingelosi ya mu volera, U ta tia, Zekaria: kigira lisaala lilyo li huleywi, kandi mukali wowo Elisabeti a la kwivulira mwana muyai, lieta lilye, u la mu gulika Yohana. 14U la ka ve nobuyanzi nobusangali, kandi vanyingi va la sangala ku livulwa lilye. 15Kigira a la va munene imbiri wo Mwami, si a li nwa iwaini namalwa mba; a lizula Roho Mtaka tifu, kutwula munda mwa mama wewe. 16Avanyingi ku vana va Israeli a la va girunkannya a va yekidze ku Mwami Nyasaye wowo. 17A limira imbiri wewe mu mwoyo nomu tsingulu tsya Elija, a giru nkannye myoyo gyavadada ku vana, kandi a vike avatingu mu bugeeri bwavalungi; kutegekera Mwami ava ndu avalombwa. 18Zekaria ya volera ingelosi, Inze nda manyira ndi yaga? Kigira inze mbeye musakulu, nomukali wange wa gwa mukeere. 19Ingelosi ya tivula na a mu volera, Inze mbeye Gabirieli u singiranga imbiri wa Nyasaye; ntumeywi kuvolerana nive nokukuletera amakuva malahi yaga. 20Henza, ive u la va idimbidi, si u li nyala kuvola, kuduka ku lidiku lya yaga ga li kolwa, kigira si wa suuvira amakuva gange, aga li kolwa inyinga yago. 21Na vandu va lindirira Zekaria ni va genya lilindagira lilye mu litempeli. 22Naye lwa ya twula si a nyala kuvolerana navo; ni va manya u loli lilola mu litempeli: naye ya va simasima na a menya idimbidi. 23Lwa, ya mala madiku gege gobutumiki bwibwe, ya tsia yengo wewe.
24Inyima wa madiku yago, Elisabeti mukali wewe ya vereka; ni yivisa imyeli gyitanu, na a vola, 25Mwami a nkoleye ndiyo mu madiku ga ya mbenzera kuntwulidzira tsisoni tsyange imbiri wavandu. 26Mu mweli gwa kola gyitanu na mulala ingelosi Gabirieli ya tumwa kutwula wa Nyasaye kutsia mu lidala lye Galilaya, lya iangwa Nazareti, 27ku mkana mugima wa kwebwa nomusatsa wa langwa Yosefa, mundu wenyumba ya Daudi; lieta lyomukana mugima lya langwa Maria 28Yingira na a tsia kuye na a vola Mirembe, ive u vereywi tsimbabas ligali, Mwami a veye halala nive 29Navutswa ya tia munonono ku livola lilye, na a ganagana mu mwoyo lichelidza yili li veye ndi. 30Kandi ingelosi ya mu volera, U ta tia, Maria kigira Nyasaye u ku vereye tsimba basi. 31Henza, ive u la vereka, u livula mwana muyai, u li mu gulika lieta lilye YESU. 32A la ka ve munene, kandi a la ka langwe Mwana wa Uveye Igulu Ligali: kandi Mwami Nyasaye a la ka mu he kisako kya guga wewe Daudi: 33a lameha ku avenyumba ya Yakobo imihiga nemi higa; ubwami bwibwe si bu li va nekiheri mba. 34Maria ya volera ingelosi, Ga la va ndi yaga, ninze si mmanya musatsa? 35Ingelosi ya tivula, na a mu volera, Roho Muta katifu a ladza ku ive, netsingulu tsya Uveye Igulu Ligali tsi la ku kinga kigira yaga Kitakatifu yikyo ki livulwa ku ive ki la langwa Mwana wa Nyasaye. 36Kandi henza, Elisa beti mwiko wowo u mali kuvereka mwana muyai mu bukeere bwibwe yigu nu mweli gwigwe gu kola gyitanu na mulala gwa uyu u langwa mugu mba. 37Kigira ku Nyasaye si ki li ho kindu ki ta nyalika. 38Maria ya vola, Henza, inze mbeye mwana mkana mutugwa wo Mwami; ga ve ku inze kuli aga u vola. Ingelosi ya twula kuye.
39Mu madiku yago Maria ya singira na a tsia bwangu mu kivala kyevigulu, mu lidala lye Buyuda; 40ni yingira mu inyumba ya Zekaria na a chelidza Elisabeti; 41Elisabeti lwa ya hulira lichelidza lya Maria, mwana ya kina munda mwimwe Elisabeti yizula Roho Mutakatifu, 42na a hanzuka nomwoyo munene, na a vola, U veye nobugasu ku vakali, kandi a veye nobugasu wa ive u livula. 43Inze nda nyola ha li ha likuva yili, mama wo Mwami wange yadza ku inze? 44Kigira henza, mwoyo gwelichelidza lilyo lwa gu duka mu matu gange, mwana ya kina mu munda mwange kigira ubuyanzi. 45Kandi a veye nobugasu wa suuvira; kigira yaga ga ya volerwa ga twula ku Mwami ga la dukidzwa.
46Kandi Maria ya vola,
Mwoyo gwange gwidzominya Mwami,
47Roho gwange gu yanza ku Nyasaye Muhonnyi wange.
48Kigira u henzi ubukekeke bwomukana mutugwa wewe:
Kigira henza, kutwula lero makula gosi ga la nanga mugasu.
49Kigira wetsingulu u nkoleye vindu vinene;
Lieta lilye li veye litakatifu.
50Kandi tsimbabasi tsyitsye tsi vedzanga ku makula namakula
Kuvo ava mu tia
51U lolekidzi tsingulu nomukono gwigwe
U salanyi avigingiri mu tsiganigani tsyemyoyo gyavo.
52Waguluye avagali ku tsintebe tsyavo,
Kandi u nenehidzi avakekeke.
53Wigutidzi avenzala nivindu vilahi;
Avatugi u va kungi bugira kindu.
54Ya konya Israeli mutumekiri wewe
A duke kwidzulitsa tsimbabasi tsitsye,
55(Kuli ya volera vaguga vetu)
Ku Abrahamu noku visukululwi vivye mihiga nemihiga.
56Maria ya menya naye kuduka myeli gyivaka, ma yirana yengo wewe.
57Inyinga ya Elisabeti yokwivula ya duka ligali; ni yivula mwana muyai. 58Avatende veve navandu veve va hulira Mwami u nenehidzi tsimbabasi tsitsye kuye; navo va sangala naye. 59Ku lidiku li kola gatanu na gavaka, vadza kukeva mwana; ni venya kumugulika Zekaria ku lieta lya ise wewe. 60Ma ma wewe ya tivula na a vola, Auwa; navutswa a la gulikwa Yohana. 61Kandi va mu volera, Ku vandu vovo si ha li nomulala u langwa lieta yili. 62Va sima ise wewe, va mu teva, wenya kumugulika ki? 63Yenya kibao na a ng'oda, na a vola, Lieta lilye ni Yohana. Va genya vosi. 64Hene yaho munwa gwigwe gwigulika, nolulimi lwilwe lwa boholoka, na a vola, ni yidzominya Nyasaye. 65Ubutii bwa duka ku vosi ava menya halala navo: amakuva yaga gosi ga landidzwa mu kivala kyosi kyevigulu vye Buyuda. 66Navo vosi ava ga hulira va ga vika mu myoyo gyavo, ni va vola, Mwana uyu a li va mwana ki? Kigira mukono gwo Mwami gwa li halala naye.
67Zekaria ise wewe, yizula Roho Mutakatifu, na a profeta, na a vola,
68A gasidzwe Mwami Nyasaye wa Israeli;
Kigira u henzi avandu veve, u va tungiye,
69Kandi u ku gingiye lwiga lwobuhonnyi
Mu inyumba ya Daudi mutumekiri wewe
70(Kuli ya vola neminwa gyavaprofeti veve vatakatifu va kale),
71Kukuha ubuhonnyi imbiri wava
sigu vetu, kandi mu makono ga vosi va ku dunyira;
72Nokuvera vaguga vetu tsimbabasi,
Nokwidzulitsa lilago lilye litakatifu;
73Lisuha lya yisuhira Abrahamu guga wetu
74Nokukuha ku honnywe ku twule mu makono gavasigu vetu,
Ku nyale kumutumekira bugira ubutii,
75Mu butakatifu nobulungi imbiri wewe madiku getu gosi.
76Yee, kandi ive mwana u la langwa muprofeti wa Uveye Igulu Ligali:
Kigira u la tsia imbiri wo Mwami kulomba tsinzira tsitsye;
77Kuha avandu veve limanya ubuhonnyi
Ku lisameha lyobwoni bwavo,
78Kigira tsimbabasi tsinene tsya Nyasaye wetu,
Kutsyo ubulavu bu twula igulu bu la ku dukira,
79Bu ng'ereng'ane kuvo ava menya mu kisundi nomu kiriri kyelikudza.
Kwimirira virenge vyetu ku inzira yemirembe.
80Mwana ya viruka na a dasa tsingulu mu mwoyo gwigwe, na a menya mwigendanyama kuduka inyinga yeye yokuloleka ku Israeli.
Currently Selected:
Luka 1: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967
