Luka 23

1Kiduma kyosi kuvo kya singira ni va mu hila imbiri wa Pilatu. 2Va tanga kumuyala, ni va vola, Kwa nyola mundu uyu na a girunkannya ihiri yetu, na a vambaka nnya kutunga Kaisari ubushutu, na a vola, mwene a veye Kristo, mwami. 3Pilatu ya mu teva na a vola, Ive niye Mwami wa Vayuda? Na ya mu tivulira na a vola, Ive u vola. 4Kandi Pilatu ya volera avasalisi vanene neviduma, Si ndola kindu ku mundu uyu. 5Navutswa va kira ligali, ni va vola, A gemehidza avandu, ni yegidza mu Buyuda mwosi kandi kutanga Galilaya nokuduka hano. 6Navutswa Pilatu lwa ya hulira, ya teva nkani mundu uyu no Mugalilaya. 7Kandi lwa ya manya a veye mu makono ga Herodi, ya mu hila ku Herodi, wa li na a veye mu Yerusalemi mu madiku yago.

8Herodi lwa ya lola Yesu ya yanza ligali: kigira ya li na a kayirwa kumulola kutwula kale, kandi kigira ya hulira amakuva kuye; kandi ya suuvira kulola kilolekidzu kya a li kola. 9Kandi ya mwizodza ama kuva manyingi; navutswa si ya tivula kindu. 10Kandi avasalisi navang'odi va singira, ni va mu yala budinyu. 11Herodi navasikari veve va mu lega ni va mu kolera kihenyahenye ni va mu vika t singubo tsindahi ni va mwirannya wa Pilatu. 12Herodi na Pilatu va hambana ubulina lidiku zana yilyo: kigira lwambiri va li ni va henzana ubusigu.

13Kandi Pilatu ya vugannya avasalisi vanene navanene navandu, 14na a va volera, Mu ndeteye mundu uyu kuli u girunkannya avandu: kandi henza, inze mmali kumwizodza imbiri wenyu, si ndola kindu ku mundu uyu kali kilala ku ga mu mu yalira: 15kandi Herodi ndiyo: kigira u mwirannyiye ku kwinye. Kandi henza, si a veye nekindu kuye ki dukana nelikudza. 16Kigira yaga nda mu kuya ma mmu boholole. 17Ga mu niga kuvabohololera mulala inyinga ye lilia yili. 18Navutswa va hanzuka nomwoyo mulala, ni va vola, U twulidze mundu uyu, u ku bohololire Baraba: 19naye nu mulala wa vikwa mu inyumba yava hambe kigira ligemehidza, neliita lya kolwa mu lidala. 20Na Pilatu ya va volera kandi ni yenya kuboholola Yesu. 21Navutswa va hanzuka ni va vola, Mbambe, Mbambe. 22Naye ya va volera hali kavaka, Kigira ki? Mundu uyu a kola ubudamano ki? Si ndola kindu kuye ki dukana nelikudza: kigira yaga nda mu kuya ma mmu boholole. 23Navutswa va kira ligali kuginga myoyo gyavo, ni va saava, a bambwe. Kandi myoyo gyavo gya guuta. 24Pilatu ya haana munwa ga ve kuli wa venya. 25Kandi ya boholola uyu wa vikwa mu inyumba yavahambe kigira ligemehidza neliita, uyu wa va saava; navutswa ya haana Yesu a kolwe kuli wa va yanza.

26Navo lwa va mu hila, va gumira mulala Simoni wa Kurene, na a twula mu mulimi, ni va mu dwika musalaba a gu ginge, a londe Yesu. 27Kandi kiduma kinene kyavandu kya mu londa, kandi kyavakali ave duya ni va mu syomera. 28Navutswa Yesu ya girunkana, na a va volera, Avakana ve Yerusalemi, mu ta ndirira, navutswa mwelirire avene navana venyu. 29Kigira, henza, madiku gadza aga va li vola, Va veye nobugasu avagumba, netsinda tsi vula kwivula, netsimbeere tsi vula kunyunnya. 30Hene yaho va la tanga kuvolera vigulu, Mu ku gwire; no tugulu, Mu ku kunike. 31Kigira vindu yivi ni vi kolwa mu musala muvisi, mu mwumu vi la va ndi?

32Kandi va hilwa halala naye avandi vaviri, ava kola ubudamano, va tsie kwiitwa.

33Lwa va duka ha langwa Kihanga, va mu bamba yaho, kandi avakola ubudamano, mulala ku mukono mulungi nowundi ku mukono mmosi. 34Kandi Yesu ya vola Dada u va samehe, kigira si va manya ga va kola. Va gavana tsingubo tsitsye ni va kola ikura. 35Na vandu va singira, ni va henza. Kandi avanene va mu kolera kihe nyahenye ni va vola, Ya honnya avandi; yehonnye mwene, uyu na a va na a veye Kristo wa Nyasaye, mutovole wewe. 36Na vasikari kandi va mu kolera kihenyahenye, ni vadza kuye ni va mu letera siki, 37ni va vola, Ive nu u va Mwami wa Vayuda, wehonnye mwene. 38Kandi amang'oda ga li kuye higulu, UYU NU MWAMI WAVAYUDA.

39Mulala ku va kola budamano ava sungwa, ya mu nyega, na a vola, Ive si u veye Kristo? Wehonnye mwene nekwinye. 40Navutswa wundi ya tivula na a mu gaya, na a vola, Ive si u tia kali Nyasaye, kigira u veye mu likalagirwa yili? 41Na ligali ga ku dukira kwinye; kigira kwinye ku koleywi ki dukana nemi yinzi gyetu: navutswa mundu uyu si ya kola kindu kidamano mba. 42Kandi ya vola, Yesu, u nzidzu litse lwa u li duka mu bwami bubwo. 43Naye ya mu volera, Ligali nku v olera, Lero u ia va ninze mu Paradisi.

44Inyinga yeyo ya li kuli isaa yenya kuduka tsitanu na indala, kandi kisundi kya duka mu kivala kyosi kuduka isaa i kola tsitanu na tsine, 45ubulavu bweliuva bwa gota: kandi ingubo yelitempeli ya tandulwa hagati. 46Kandi Yesu ya hanzuka nomwoyo munene, na a vola, Dada, mbika mwoyo gwange mu makono gogo. Lwa ya mala kuvola yaga ya lakula mwoyo gwigwe. 47Munyampara, lwa a lola aga kolwa, yidzominya Nyasaye, na a vola, Ligali uyu ya li mundu mulungi. 48Kandi viduma vyosi vya vugana kulola vindu yivi, lwa vya lola vya kolwa, virana ni viduya ku viritu. 49Kandi vosi ava ma nyana naye, kandi avakali ava mu londa kutwula Galilaya, va singira ihale ni va lola vindu vivi.

50Kandi henza, mundu wa langwa Yosefa wa li munene wekyina, mundu mulahi nomulungi 51(si ya bugirira amakuva gavo nemivinzi gyavo), mundu wa Arimatia, lidala lya Vayuda, wa lindirira ubwami bwa Nyasaye. 52Mundu uyu ya tsia wa Pilatu, na a saava mubiri gwa Yesu. 53Kandi ya gwikidza na a gu naza nengubo yekatani, na a mu vika mu kilindwa kya kalagwa mu ligina, kyomundu a kikiri kuvikwa mu. 54Kandi lya li lidiku Lyokulomba, kandi lisabato lya tanga kuduka. 55Kandi avakali ava mu londa kutwula Galilaya, va londa ni va lola kilindwa, kandi kuli wa mubiri gwigwe gwa vikwa. 56Kandi virana ni va lomba vyafunya mwayu namaguta.

Currently Selected:

Luka 23: MBE

Highlight

Copy