Marko 12
12
1Ya tanga kuvavolera amakuva mu tsing'ano. Mundu ya simika mizabibu, na a lomba lwebo, na a yava lina lyokukamira mu mazabibu, ni yombaka kitaradza, na a ha avalimi va mu limire, na a tsia mu kivala kindi. 2Ku, inyinga yamazabibu, ya tuma mutugwa kutsia ku valimi, a vugule ku valimi mazabibu gemizabibu. 3Navo va mu gumira ni va mu duya, ni va mu kunga na a tsia vutswa. 4Kandi ya tuma mutugwa wundi kutsia ku valimi; uyu va mwaata ulugoma, ni va mu kola ubudamano. 5Kandi ya tuma wundi; na uyu va mwiita: kandi avandi vanyingi; avalala va va duya, navandi va viita. 6Ya tigala naye mulala, naye nu mwana wewe, muyanzi wewe: lwanyima ya mu tuma kuvo na a vola va la tia mwana. 7Navutswa valimi yavo va volerana, Uyu a veye mwene miyandu; gendi, ku mwiite, na miyandu gyosi gyi la va gyetu. 8Ku, va mu gumira, ni va mwiita, ni va mu twulidza mu mizabibu. 9Kigira yaga, mwene mizabibu a la kola ki? A ladza ni viite avalimi, na a la ha avandi mizabibu. 10Si mu somi kali ling'oda yili:
Ligina lya vombaki va suye,
Yili lyene lya kolwa mutwe gwo lwiga
11Yaga ga twula ku Mwami.
Ni ligenya mu tsimoni tsyetu?
12Ni venya kumugumira; navutswa va tia kiduma; kigira va manya ya vola lugano yilu kuvo: ku, va mu leka ni va tsia.
13Na va tuma kuye avalala ku Vafarisayo noku vanga Herodi va mu tege ku makuva gege. 14Lwa va duka kuye va mu volera, Mwegidzi, ku manya ive u veye weligali, kandi si u tidza mundu; kigira si u henza ligondo lyavandu, navutswa ligali wegidza inzira ya Nyasaye. Nu bulahi kutunga ubushutu ku Kaisari, naho si bu li bulahi? 15Ku haane, naho ku ta haana? Navutswa ya manya ubugadi bwavo, na a va volera, Kigira ki mu ngeridza? Mu ndetere ishilling, ngi lole. 16Va gi leta. Na a va volera, Kifwananyi yiki ni kya bwaha kandi ni ling'oda ya bwaha? Ni va mu volera, Vya Kaisari. 17Yesu ya va volera, Mu he Kaisari vindu vya Kaisari kandi mu he Nyasaye vindu vya Nyasaye. Ku, va mu genyera munonono.
18Vadza kuye Avasadukayo, ava vola, si ha li ne lisimuguka lya vakudzi, ni va mu teva, ni va vola 19Mwegidzi, Musa ya ku volera Amwavo womundu na a kudza na a leka mukali wewe, na a vula kuleka mwana, amwavo wewe yirannye mukali wewe, yivulire amwavo wewe avana. 20Ha li avamwavo vatanu na vaviri vomundu mulala: wembiri ya leta mukali, na a kudza na a ta nyola mwana; 21kandi wa kola vaviri yirannya mukali, na a kudza, na a ta nyola mwana; kandi wa kola vavaka ya li ndiyo: 22vosi vatanu na vaviri si va nyola avana mba. Nyima wa vosi mukali mwene ya kudza. 23Mu lisimuguka lyavakudzi a la va mukali wa u li ha ku yava? Kigira vosi vatanu na vaviri va li naye. 24Yesu ya va volera, Si mu goteywi, kigira si mu manya mang'oda, kinga tsingulu tsya Nyasaye? 25Lwa va li simuguka mu vakudzi, si va serera, kandi si va sererewa mba; navutswa va fwana tsingelosi migulu. 26Ku lisimuguka lyavakudzi; mu kikiri kusoma mu kitabu kya Musa, mu mulango gwa kasala, kuli wa Nyasaye ya volerana naye na a vola, Inze ni Nyasaye wa Abrahamu, na Nyasaye wa Isaka, na Nyasaye wa Yakobo? 27Si a li Nyasaye wavakudzi, navutswa wa va veye mwoyo: mu goteywi ligali.
28Mulala ku vang'odi yadza, na a va hulira va tevananga, na a manya u va tivuliye bulahi, na a mu teva, Ku malago, linene ku vita gosi ni li ha? 29Yesu ya mu tivulira Li vita gandi gosi ni yili, Mu hulire Israeli; Mwami Nyasaye wetu, Mwami nu mulala: 30u yanze Mwami Nyasaye wowo nomwoyo gugwo gwosi, neliva mwoyo lilyo lyosi, nobugeeri bubwo bwosi, netsingulu tsitsyo tsyosi. 31Li kola gaviri ni yili, U yanze mutende wowo kuli weyanza. Si ha li nelilago li vita yaga. 32Ku, mung'odi ya mu volera, Ligali, Mwegidzi, u voye bulahi, a veye mulala; si ha li nowundi: 33kandi kumuyanza nomwoyo gwosi, nobugeeri bwosi, netsingulu tsyosi, nokuyanza mutende wewe kuli yeyanze, li veye linene kuvita miluka gyosi gya sambwa ne vya salisirwa. 34Yesu lwa ya lola ya tivula nobugeeri, ya mu volera, Si u veye ihale nobwami bwa Nyasaye mba. Si ha li nomundu kandi wa luvirira kumuteva liteva lindi.
35Yesu lwa yegidza mu litempeli, ya tivula na a vola, Avang'odi va vola ndi, Kristo nu Mwana wa Daudi? 36Daudi mwene ya vola na Roho Mtakatifu,
Mwami ya volera Mwami wange,
Wikala ha mkono mulungi gwange,
Ndadza nduke kukola avasigu vovo va gwe kisako kyevirenge vivyo.
37Daudi mwene ya mu gulika Mwami; a nyala ndi kuva mwana wewe? Vanyingi ku vandu va mu hulira nobuyanzi. 38Mu migidzo gege ya vola, Mu gelihe avang'odi, ava yanza kugenda netsingubo tsintambi, nokuchelidzwa mu vitu, 39nevisako vinene mu masomero, nevisako vilahi mu lilia: 40yava ava lia tsinyumba tsyavakunzakali vekikali, kandi va saala lisaa la litambi no bugadi. Yavo va la nyola likalagirwa linene kuvita.
41Ni yikala himbi nenyumba yetsishilling, na a henza kiduma kuli wa kya tunga tsishilling: avanyingi avatugi va tunga tsishilling tsinyingi. 42Mukunzakaliwekikali mudaka yadza na a tunga tsinkekeke tsiviri tsi kola isenti indala. 43Ku, ya langa avegidzwi veve na a va volera, Ligali, mmu volera, Muku nzakali uyu u tungi vi viti vya vandi vosi va tungi. 44Kigira yava vosi va tungi mu butugi bwavo: navutswa mu budaka bwibwe u tungi vyosi vya a vedza navyo, navyo vya a honera.
Currently Selected:
Marko 12: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967
