VATUMWA 17
17
1Vavitira Amufipoli na Apolonia, nivazia kuduuka Tesalonike aha lisinagogi lia Vayuda liali. 2Paolo yingira mu, kuli gwaali mwima gwigwe, na avoolerana navo ku madiku gavaga gi Lisabato galondekani, natumikira Mang'oda Matakatifu. 3Yavivaalira Amang'oda Amatakatifu kandi na avamanyia ndi gaduukiraa Mesia asalirizwi nu kusimuguka kutura mu vakuzu. Yavavolera kandi, “Yeso uyu wa inzi nzilwazira munyi niyie Mesia.” 4Avalala kuvo vavugilira, nivahambana na Paolo na Sila. Avanyingi ku Vaguriki vaatia Nyasaye, na avakali vanene vanyingi vigulu, vahambana navo.
5Navuzwa Avayuda vakendeka; vavungiza harara avandu vadamanu, avaguunza mu chiitu, nivavungiza kiduma, nivakora kivihiri mu lidaala liosi. Vingira munyumba ya Jasoni, nivasuuvira ndi, valanyora mu Paolo na Sila, vavaleete ichova imbiri wa avandu. 6Navuzwa sivavanyoola mu mba. Nivakweesa Jasoni harara na avaamitu vandi nivavahila ku avanene vi lidaala, nivakora liyoga, nivavoora, “Avandu yavo vagoyanyia lirova liosi, na kalunu vaduuki mu lidaala yili kandi. 7Jasoni umali kuvingiriza munyumba yeeye. Vosi vahing'ana na amalago ga Kaisari, nivavoora, ‘Aveeye ho Mwami wundi ulangwa Yeso.’ ” 8Lwa vavoola makuva yaga, avanene vi lidaala, mioyo ni kiduma cha avandu. 9Vatungiza Jasoni na avache mabesa gu kuvalakula, ma nivavavoholola.
Paolo yilwaza mu Berea
10Nonoho vudiku yivwo, avaamitu yavo vatuma Paolo na Sila vazie Berea. Lwa vamala kuduuka yo, vazia mu lisinagogi lia Vayuda. 11Avandu vu weneyo vaali avahuliri kuvita avandu va Tesalonike. Vavugilira likuva ni likayirwa linene, nivenya mu Mang'oda Matakatifu kazozo valore niiva amakuva ga Paolo na Sila vavoola gaali gagiligali. 12Avanyingi kuvo vasuuvira; kandi avakali avi igulu va Vaguriki na avasaza kandi. 13Navuzwa lwa Avayuda va Tesalonike, vamanya Paolo yilwaza likuva lia Nyasaye mu Berea, vazia yo kandi, nivatanga kogoyanyia no kogemehiza viduma via avandu. 14Avaamitu vamuhereka vwangu kuzia kunyanza; navuzwa Sila na Timateo vatigara Berea. 15Avaamitu yavo avahereka Paolo vazia kumuduukiza Azene. Maku virana na malago kutura ku Paolo ndi Sila na Timateo vamulondelere vwangu kuli ganyalika.
Paolo yamoloma na avandu va Azene
16Lwa Paolo yaali naalindaa Sila na Timateo mu Azene, mwoyo gwigwe gwavihilirwa ligali lwa yalora kuli lidaala yilio liali nilizula vifananyi via avanyasaye. 17Yahangalizana na Vayuda na avandu vandi vi zihiiri avasigamiraa Nyasaye wa Isiraeli; na kazozo yalange ni lihangalizana mu chiitu na avandu vosi ava yavugana navo. 18Avalala ku vigizi vageri va Epikura na vigizi va Sitoiki, vahangalizana naye. Avalala vavoola, “Mudemanyi uyu yenya kovora ki?” Kigira Paolo yaali niyilwaza amakuva ga Yeso na gi lisimuguka, avandi vavoola, “Aveeye kuli wilwazaa makuva ga avanyasaye avageni.” 19Kunangwa vagumira Paolo nivamuhila imbiri wi lidaala lia Areopaga, nivavoora, “Kunyi kwenya kumanya amigizu mahia ga ivi wigiza yaga. 20Vindu vilala via kuhuliraa novoora ni vigeni ku kunyi. Kwenya kumanya cha makuva yaga gavoora.” 21Avandu va Azene na avageni vandi avamenya mu lidaala yilio vatumikira vwiyangu vwavo vwosi kovolerana nu kuhuliriza amakuva mageni.
22Kunangwa, Paolo yasingira imbiri wi livugana lia Areopaga, navoora, “Munyi avandu va Azene! Ndola munyi, muveeye avandu vi dini ligali. 23Lwa ndavita mu lidaala lienyu linene nimbenza ahukusigamira hinyu, ndanyoora uvwali vwang'odwa ku amakuva yaga, ‘Ku Nyasaye utamanyikani’ uyu wa musigamiraa vugira kumumanya niyie wa inzi nzilwazira munyi.
24“Nyasaye uyu, Mulombi wi lirova ni vindu viosi viveeye mu, aveeye Mwami wi ligulu ni lirova; si amenyaa mu matemberi gumbakwa na avandu. 25Anoho yenya kindu cha kunyala kumuha lwa kumuyinzilira mba. Kigira niyie mwene ohezaa avandu livamwoyo kandi liherana ni vindu viosi. 26Yalomba zihiiri ziosi kutura ku mundu mulala, naziviika komenya ku lirova liosi. Yatovola no kolomba kale ligali zing'inga kandi keheri chi vivala via zilimenya mu. 27Yakola ndio kunangwa zihiiri yizio ziduuki kwenyeleriza Nyasaye mbula vamunyoole. Navuzwa kali ndio, Nyasaye siaveeye ihale ni kunyi kwosi mba. 28Mundu mulala yavoola,
‘Muye komenyaa kandi koveeye mwoyo,
kogenda, kandi koveeye ho!’
Gaveeye kuli avalala ku vandu vinyu vavoola,
‘Kunyi koveeye avana veve.’
29“Kigira kunyi koveeye avana va Nyasaye, sivoveeye vulahi kuganagana ndi Nyasaye aveeye kuli izahabu, ifeza, anoho kali kuli ligina liavazwa; vindu viakongwa nu vusiza kandi no vogeri vwa avandu. 30Nyasaye yayivilira zing'inga ziavandu vavura, kumumanya, Navuzwa kalunu, alaangaa avandu vosi, havundu hoosi, viganiri. 31Kigira umali kotovola lidiku lia alikalagira kivala nu vulungi, kuvitira ku mundu mulala wa yatovola. Yahaana ku avandu vosi lisuuviriza lwa lisimugukiza kutura mu vakuzu!”
32Navuzwa lwa vahulira Paolo navoora makuva gi lisimuguka lia avakuzu, avalala kuvo eseko yaali ivamale; navuzwa avandi vavoola, “Kulayaanza kukuhulira kandi ku likuva yili!” 33Kunangwa Paolo yavaleka, natura hagati hi livugana liavo. 34Navuzwa avandu valala vahambana naye nivasuuvira. Mulala kuvo yaali Dionisio mulala ku avikiyaalo cha Areopaga, kandi yaali ho mukali mulala walangwa Damari, na avandi avasuuviraa harara navo.
Paolo yilwaza mu Korinzo
Currently Selected:
VATUMWA 17: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
