VATUMWA 3
3
1Lidiku lilala, zisa tisa zia mbasu, Petero na Yohana vazia mu Litembeli, kusaala. 2Ahene yaho, ha kiliango chi Litembeli ichalangwa “Kirivwa Kilahi,” yaali ho mundu mulala uwaali mulema kutura niyiivulwa. Vuli lidiku yagingwa nukuhirwa ha kirivwa zana, aduuki kusava mabese kutura ku vandu avingiraa mu Litembeli. 3Lwa yalora Petero na Yohana nivingira mu Litembeli, yavasava vamuhe kindu. 4Petero na Yohana vamwumika, ma Petero yamuvolera, “Kohenze!” 5Kunangwa yavahenza, nasuuvira ndi alanyoola kindu kutura kuvo.
6Navuzwa Petero ya muvooleraa, “Inzi simbeeye na mabese mba, navuzwa ndakuha choosi icha mbeeye nacho. Mulieta lia Yeso Kristo wa Nazareti, ngulaga, singira ogeende!” 7Maku yamugumira nu mukono gwigwe mulungi naamusingiriza. Nonoho virenge na amaru geege vianyola zinguru. 8Yatuma igulu vwangu nasingira natanga kogenda. Maku yingira Mwitembeli harara navo, nagenda natuumatuuma, niyizominya Nyasaye. 9Avandu vosi avaari ho vamulola nagenda kandi niyizominya Nyasaye. 10Lwa vamanyiriza ndi uyu niyie wikala ha Kirivwa Kilahi chi Litembeli naasavasavaa, vosi vagenya kandi nivahuga kugaali nigekoleki kuye.
Limoloma lia Petero mu Litembeli
11Lwu mundu musavasavi oyo yaali nakigumiyi nokolonda Petero na Yohana mu Lusimbu lwa Solomoni, kuli lwalangwa, avandu vagenya ligali kandi vanyagura zimbiru kuzia kuvo. 12Lwa Petero valora avandu yavo, yavavolera, “Munyi vachange avandu va Isiraeli kigira ki mugenyaa ku likuva liu mundu uyu kandi kigira ki mukoteleeye emoni kuli nikuzingulu zietu anoho ku vutakatifu vwitu ovokoli mundu uyu agende? 13Nyasaye wa Aburahamu, Isaka na Yakobo, Nyasaye wa avaguuga viitu, uhaani vukumi vwu vunyasaye ku Mutumikiri weve Yeso. Navuzwa mwamuzaama kandi nimumuhaana ku vamiihi kandi mwamwambakana imbiri wa Pilato, kali lwa Pilato yaali niyakaganagana kumuvoholora. 14Navuzwa munyi mwambakana uyu uwaali Mutakatifu kandi mulungi; na mu vogono yivwo mwenya muvoholerwe oyo uwaali mwiti nu mulumindi. 15Munyi mwita oyo oveeye uvutangiliru vwi livamwoyo. Navuzwa Nyasaye yamusimugukiza kutura mu likuza, nakunyi koveeye avalolekizi ku yaga. 16Ziali zinguru zie lieta lia Yeso, ziahaana ku mundu mulema uyu zinguru. Icha munyi muloraa nukumanya chekoleka kigira lisuuvira mu lieta lilie. Lisuuvira mu Yeso nilio liheeye mundu uyu uvulamu vwokohona ligali kuli mwosi muloraa.
17“Kalunu, avaamitu vange, inzi manyi ndi icha munyi harara na aviimiliri vinyu mwakora ku Yeso chaali kigira livula kumanya lienyu. 18Nyasaye yalandiza kale kuvitira mu vaporofeti vosi ndi; gaduukiraa Mesia weve asalirizwi kandi yagakola gaduuki kuva agiligali munzira yiyi. 19Kulwayago mwiganiri, kandi mwihaane ku Nyasaye, kunangwa aduuki kumusamiiha uvwoni vwinyu. Niiva mukora ndio, 20Nyasaye alakahaane kumunyi zinguru zia Roho Mutakatifu, kandi alakatumi Yeso, oveeye Mesia wamali kumutovolera. 21Gamuduukira atigale mwigulu kuduuka lwi vindu viosi vililombwa vuhia, kuli Nyasaye yalandiza kuvitira mu vaporofeti veve vatakatifu avaari ho kutura kale. 22Kigira Musa yavoola, ‘Mwami Nyasaye winyu alamutumira muporofeti kuli yatuma, naye alava mulala ku avandu vinyu vene gamudukira muhuliri goosi gamuvooleraa mukore. 23Ku vosi uvula kuhulira muporofeti oyo alahulwa kutura mu vandu va Nyasaye, kandi aladivizwa.’ 24Avaporofeti vosi vaali kutura ku Samweli na yavo vosi vaza inyima weve, vavoola amakuva ageekolekaa madiku yaga.
25“Lisuuvirizwa lia Nyasaye kuvitira mu avaporofeti veve, gaveeye kigira munyi; na munyi musangaa mu lilagana lia Nyasaye yalomba na avaguuga vinyu. Kuli yavolera Aburahamu, ‘Kuvitira mu visukululwi vivio ndakagasizi avandu vosi ku lirova.’ 26Kunangwa, Nyasaye yatovola mutumikiri weve naamutuma kutanga ku munyi amugasizi ku likora samulala ku munyi agirung'ane kutura muzinzira zizie ziu vudamanu.”
Petero na Yohana imbiri wi kiyaalo
Currently Selected:
VATUMWA 3: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
