LITANGA 11
11
Munara gwa Babiloni
1Mu litanga, avandu vosi mukivala vaali nu lulimi lulala kandi vaali ni limoloma lilala. 2Lwa vagenda genda kutura ivugwi, vaduuka mu kereremo mukivala cha Babiloni ma nivamenya hene yaho. 3Vavolerana vene ku aveene, nivavoora, “Hambi! Gendi kolombe amadafari ma kugasambe gahie vulahi.” Kunangwa valomba madafari ma ni vagahambanyia harara na madohi. 4Vavoola, “Kalunu gendi kwumbake lidaala linene, ma kolombe munara mutambi kali kuduuka mu ligulu, kunangwa kwelombele lieta kunyi aveene kandi kuvuli kusalana mu lirova liosi.”
5Maku Yahova yaza kutura mu ligulu kolola lidaala linene harara nu munara gwa vandu vaali ni vumbaki. 6Yahova yavoola, “Kalunu avandu yava vosi vaveeye vi ihiiri indala kandi vamoloma lulimi lulala. Yili liveeye vuzwa litanga lie vindu viosi via vazizaa kokora. Si keveeye ho kindu cha valohiza kokora ikinyala kuvatama mba. 7Gendi kuzie kogoyanyia lulimi lwavo kunangwa vavuli kuhulirizana aveene na vene.” 8Kunangwa Yahova yaavasalanyia mu lirova liosi, na valekera kwumbaka lidaala linene. 9Lidaala yili lialangwa “Babiloni#11:9 Babiloni: Liveeye lieta liu Luheburaina - livoora “Kogoyanyia.”” kigira Yahova yaagoyanyia lulimi lwa vandu vosi ku lirova, na kutura lwene yilwo, yaavasalanyia ku lirova liosi.
Visukululwi via Shemu
(1 Zin. 1:24-27)
10Yivi ni visukululwi via Shemu. Lwa Shemu yaali ni mihiga 100, mihiga giviri inyima wi migelera ja mazi, yivula mwana muyaayi walangwa Aripakishadi. 11Inyima wa yaali ni yakivula Aripakishadi, Shemu yamenya mihiga 500 ma niyiivura avana vandi avayaayi na vakana.
12Lwa Aripakishadi yaali ni mihiga 35, yivula mwana muyaayi walangwa Shela. 13Aripakishadi yamenya mihiga 403 ma niyiivura avana vandi avayaayi na vakana.
14Lwa Shela yaali ni mihiga 30, yivula mwana muyaayi walangwa Eberi. 15Shela yamenya mihiga 403 ma niyivura avana vandi avayaayi na vakana.
16Lwa Eberi yaali ni mihiga 34, yivula mwana muyaayi, walangwa Pelegi. 17Eberi yamenya mihiga 430 ma niyivura avana vandi avayaayi na vakana.
18Lwa Pelegi yaali ni mihiga 30, yivula mwana muyaayi walangwa Reu. 19Pelegi yamenya mihiga 209 ma niyiivura avana vandi avayaayi na vakana.
20Lwa Reu yaali ni mihiga 32, yivula mwana muyaayi walangwa Serugi. 21Reu yamenya mihiga 207 ma niyivura avana vandi avayaayi na vakana.
22Lwa Serugi yaali ni mihiga 30, yivula mwana muyaayi walangwa Nahori. 23Serugi yamenya mihiga 200 ma niyivura avana vandi avayaayi na vakana.
24Lwa Nahori yaali ni mihiga 29, yivula mwana muyaayi walangwa Tera. 25Nahori yamenya mihiga 119 ma niyiivura avana vandi avayaayi na vakana.
26Lwa Tera yaali ni mihiga 70, yivula Aburamu, Nahori na Harani.
Visukululwi via Tera
27Yivi ni visukululwi via Tera, uwivula Aburamu, Nahori na Harani. Harani yivula Loti, 28ma yamanya nakuzira Uru mu lidaala lia yiivulirwamu mukivala cha Babiloni, lwa baba weve yaali nakikiri mwoyo. 29Aburamu yaleeta mukali walangwa Sarai. Nahori yaleeta mukali walangwa Milika, mukaana wa Harani. Milika na Isika vaali avana va Harani. 30Sarai yaali mukali mugumba.
31Tera yavugula mwana weve Aburamu na navizara weve Sarai, harara nu mwisukulu weve Loti uwaali mwana wa Harani. Vatura mu lidaala lia Uru mukivala cha Babiloni ma ni vazia mukivala cha Kanaani. Vazia kuduuka Harani nivamenyayo. 32Tera yakuzira mukivala yiki naveeye ni mihiga 205.
Currently Selected:
LITANGA 11: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
