LITANGA 25

Visukululwi Vindi via Aburahamu

(1 Zin. 1:32-33)

1Aburahamu yaleeta mukali wundi uwalangwa Ketura. 2Yamwivulira Zimurani, Jokishani, Medani, Midiani, Ishibaki, na Shua. 3Jokishani yaali baba wa Sheba na Dedani, visukululwi via Dedani viali Ashurimu, Letushimu na Leumimu. 4Avana va Midiani vaali Efa, Eferi, Hanoki, Abida, na Elida. Yivi viosi viali ivisukulurwi via Ketura.

5Aburahamu yalekera Isaka vuli kindu choosi icha yaali nacho. 6Navuzwa lwa yaali nakikiri mwoyo, yahaana vihaanwa ku avayaayi vavakali veve vandi vamwivulira. Maku yatuma avayaayi yava mukivala chi Ivugwi ihale kutura ku muyaayi weve Isaka.

Likuza lia Aburahamu

7Aburahamu yamenya mihiga 175. 8Yakuza naveeye musakulu ligali kandi muviri gwigwe gwayavilwa kuli avaguuga veve. 9Avayaayi veve Isaka na Ishimaeli vaamuyavira muluhangaywa lwa Makipela mu mulimi Ivugwi gwa Mamure ugwaalange gwa Efuroni muyaayi wa Zohari wa Hiti. 10Gwaali mulimi gwa Aburahamu yaali niyagula kutura ku avandu va Hiti. Aburahamu nu mukali weve Sara vaayavirwa hene yaho. 11Inyima wilikuza lia Aburahamu, Nyasaye yagasiza Isaka uwamenya ahimbi ni, kidaho kilangwa Beeri Lahai Roi#25:11 Beeri Lahai Roi: Kidaho cha oyo oveeye mwoyo..

Visukululwi via Ishimaeli

(1 Zin. 1:28-31)

12Ishimaeli yaali muyaayi wa Aburahamu na Hagari, mukali mutugwa uwaali wa Sara. 13Ishimaeli yaali navayayi 12 mulilohiza yili kolondekana kulivulwa liavo: Nebayozi, Kedari, Adibeeli, Mibisamu, 14Mishima, Duma, Maasa, 15Hadadi, Tema, Jeturi, Nafishi, na Kedema. 16Vaali avaguuga vi zihiiri 12 madaala gaavo na havundu havamenya halangwa ku amita gaavo. 17Ishimaeli yakuza naveeye ni mihiga 137. 18Visukululwi via Ishimaeli viamenya hagati hi vivala via Havila na Shuri, ahimbi nulwako lwa Egebeti kuzia kolovega lwa Asiria. Vamenya mulivula kuhulirizana na vamwavo vaavo vosi.

Liivulwa lia Esau na Yakobo

19Yilu nulugano lwa Isaka muyaayi wa Aburahamu. 20Isaka yaali ni mihiga 40 lwa yaleeta Rabeka mukaana wa Bezueli umundu kutura Arama mukivala cha Mesopotamia kandi mbozo Labani. 21Isaka yasaalira Rabeka ku Yahova kigira yaali mugumba. Yahova yahaana mativuli ku lisaala lilie kandi Rabeka yavereka. 22Yaali nazizaa konyoora avana malongo. Inyima wa vaali ni vakikiri kwivulwa, valwaana aveene ku vene munda. Rabeka yavoola, “Ki giraki kindu kuli yiki chekoleke ku inzi?” Kunangwa yazia koteeva Yahova amuhe mativuli.

23Yahova yamuvolera,

“Zihiiri ziviri ziveeye munda mumwo;

Ivi ulakivuli zihiiri ziviri, avandu vu kuhing'ana.

Ihiiri indala ilakave nizinguru kuvita ihiiri yindi.

Mukulundu alakatumikiri mwana mukekeeke.”

24Ing'inga yaduuka yukwivula, kandi yivula avayaayi malongo. 25Wukutanga kwivulwa yaali niligodo lilavu kandi muviri gwigwe gwosi gwaali na maswa kuli vwoya vwi inguvu, kunangwa yamugulika Esau. 26Wa kaviri yiivulwa nagumiyi vudinyu lichi lia Esau, kunangwa yamugulika Yakobo. Isaka yaali ni mihiga 60 lwa vivulwa.

Esau Yagulizaa Vonene Vwivwe Kuli Muyaayi Wukutanga

27Avayaayi yava vaaviruka, na Esau yagwa muhimi mulahi ligali, mundu wayanza limenya liechova. Yakobo yaali mundu muchiring'anu uwatigalaa hango. 28Isaka yaayanza Esau, kigira yayanzilira kulia zinyama zia Esau yahiimaa, navuzwa Rabeka yayanza Yakobo.

29Lidiku lilala lwa Yakobo yaali nadeeka muduyaa, Esau yingira natura mu lihiima. Yaali ni inzara 30kandi yavolera Yakobo, “Inzi mbeeye ni inzara ombe kumuduya mwakanyu yigwo.” Yiki nicho chagira nalangwa Edomu#25:30 Edomu: Mu Luheburaina liveeye vwakanyu..

31Yakobo yativura, “Inzi ndakuha niiva ivi ulamba vonene vuvwo kuli muyaayi wukutanga.”

32Esau yavoola, “Inzi mbeeye ahimbi kukuza; vonene voveeye novokonyi ki ku inzi?”

33Yakobo yativura, “Kutanga wisuhi ku inzi ndi: Ulangulizira ovonene vwuvwo.” Esau yisuha ma nagulizira Yakobo ovonene vwivwe. 34Maku Yakobo yaaha Esau vukima numuduya. Lwa Esau yaali niyakamara kulia nukunwa, yasingira ma nazia. Yaga gamanyia ndi Esau siyahendera mwoyo vonene vwi livulwa lilie mba.

Currently Selected:

LITANGA 25: LOGOOLI

Highlight

Copy