LITANGA 9
9
Lilagana lia Nyasaye na Nuhu
1Nyasaye yagasiza Nuhu navayayi veve kandi navoora, “Mwivulane kandi mumedeke, kunangwa visukululwi vienyu vimenye mulirova liosi. 2Zinyama ziosi, manyonyi kandi zisuzi zilakamutie. Munyi mulakave nuvunyari kuzio ziosi. 3Kalunu munyala kuzilia, kali nivitagwa. Inzi muheezaa viosi kuli iviukulia. 4Kindu kilala ichamutalia mba ni inyama eveeye mu na masahi. Inzi ngaya yaga kigira masahi gafananyiangwa ni livamwoyo. 5Niiva umundu woosi aliita wundi, alakahevwe mageri. Inzi ndakahaane mageri gi likuza ku inyama yoosi iyiita umundu. 6Umundu yalombwa kuli lifwana lia Nyasaye, kunangwa mundu woosi wita wundu aliitwa ndio nuwache.
7“Munyi kuduuka mwivulane kandi mudeeke, kunangwa visukululwi vienyu viemenye havundu hoosi mu lirova.”
8Nyasaye yavolera Nuhu harara navayayi veve, 9“Kalunu inzi nomba lilagana liange na munyi kandi nivisukululwi vienyu, 10kandi nivindu viosi viveeye mwoyo - manyonyi goosi kandi zinyama ziosi - vuli kindu chatula muliato harara na munyi. 11Ku makuva yaga inzi nomba lilagana liange ni munyi: Inzi ndagaa ndi vindu viveeye mwoyo si viladivizwa ku nimigelera jamazi kandi mba. Migelera jamazi sijiladiviza ku lirova kandi mba. 12Kuli kelolero chi lilagana lihindira mihiga ni mihiga yili lianomba ni munyi kandi nivilombe viosi viveeye mwoyo, 13inzi mbikaa kisaahi change mu malesi. Kilakave kelolero chi lilagana liange harara navandu vosi mu lirova. 14Lwa inzi ngunika ligulu na malesi kandi kisaahi kololeka, 15ndakizulizi lilagana liange ku munyi kandi ku zinyama ziosi ndi migelera jamazi si jilikadivizi ku kandi vindu viosi viveeye mwoyo mba. 16Lwa kisaahi kililoleka mu malesi, inzi ndakakelole kandi ndakizulizi lilagana lihindira mihiga ni mihiga hagati ha inzi nivindu viosi viveeye mwoyo ku lirova. 17Yicho nicho kelolero chi lilagana lianomba ku vindu viosi viveeye mwoyo.”
Nuhu na Vayaayi Veve
18Avayaayi va Nuhu avaatura muliato vaali Shemu, Hamu na Jafeza. Hamu yaali baba wa Kanaani. 19Avayaayi vavaga va Nuhu yava vaali avaguuga va vandu vosi ku lirova.
20Nuhu uwaali mulimi, yaali umundu wukutanga kusimika kizabibu. 21Lwinyima lwa yaali niyakanwa iwaini yahambika, natuliza zinguvu zizie, kandi naagona mu lihema lilie naveeye chahonyo. 22Lwa Hamu, baba wa Kanaani, yalora baba weve naveeye chahonyo, yatura ichova navolera avamwavo veve vaviri. 23Maku Shemu na Jafeza vaavugura isuuka ni vagingira kumavega gaavo. Vaziira mugongo kuduuka mu lihema ma ni vakunika baba wavo; vahenza lovega na sivalola chahonyo cha baba wavo mba. 24Lwa Nuhu yalava zimoni kutura mu lihambika, yamanya agu umwana weve mukekeeke yaali na koli, 25Yavoola,
“Kilaamo keve ku Kanaani!
Alakave mutugwa ku avamwavo veve.
26Haana lizominya ku Yahova, Nyasaye wa Shemu!
Kanaani alakave mutugwa wa Shemu.
27Vwakaveeye vulahi Nyasaye akole Jafeza komeedeka mu vuhinda!
Vwakaveeye vulahi visukululwi vivie vimenye na vandu va Shemu.”
Kanaani alakave mutugwa wa Jafeza.
28Inyima wi migelera jamazi Nuhu yamenya mihiga 350 29kandi yakuza naveeye ni mihiga 950.
Currently Selected:
LITANGA 9: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
