LIVALIZA 20
20
Mazi Kutura ku Lwanda
(Kut. 17:1-7)
1Ku mweli gwo kutanga vandu va Isiraeli vaduuka mwigendanyama lia Zini ma nivasosera ha Kadeshi. Hene yaho Miriamu yakuza nivamuyavira ho. 2Amazi sigali hokososera mba, kunangwa vandu vazia kukumberiza Musa na Haruni 3ni vigaana nivavoora, “Ngano vwali vulahi kulakuzila imbiri wi Lihema lia Yahova harara na vandu va Isiraeli vache viitu. 4Kigira ki umali kukuleta mwigendanyama yimu? Kuduuki kukuzira hano harara ni mitugu jitu? 5Kigira ki wakutuliza Egebeti kukuleta mukivala cho vudinyu hi kindu kitamela? Hataveeye no vuswage, ni mizabibu na makuyu, kali hataveeye na mazi gu kunwa!” 6Musa na Haruni visunda kutura ku vandu nivasingila muvwingiliru vwi Lihema. Vinaminya vweni vwavo kuduuka kumalova na vukumi vwa Yahova vwaloleka kuvo.
7Yahova yavolera Musa, 8“Vugula imbimbu eveeye imbiri we Lisandugu lia Malago maku yivi na Haruni muvungizi vandu. Ahene yaho imbiri wavo vosi, omolomere lwanda lula na mazi galasinuka kutura mulwo. Munzira yiyi ulaleeta mazi kutura mu lwanda ga vandu vanwa harara ne mitugu jaavo.” 9Musa yazia navugura imbimbu kuli Yahova yamulaga.
10Musa na Haruni vavungiza vandu imbiri wu lwanda, na Musa yavavolera, “Huliri munyi vahing'ani! Kunyala kutuliza mazi kutura mu lwanda yilu kigira munyi?” 11Kunangwa Musa yaginga imbimbu nakuya ku lwanda haali kaviri, nu mugela munene gwa mazi gwasinuka, kunangwa vandu vosi ni mitugu vanwa mazi.
12Navuzwa Yahova yagondokera Musa na Haruni, navoora, “Kigira muvuli kuva ne lisuuvira kuvugilira zinguru ziange zindakatifu imbiri wa vandu va Isiraeli, simulavimilira kuzia mu kivala cha ndavalaga mba.” 13Yaga gekolekela ha Meriba#20:13 Meriba: Yili ni lieta liu Luheburaina; liveeye kovora, “Avandu va Isiraeli vigaana.” ha vandu va Isiraeli vigaana kigira Yahova kandi hayavamanyila ndi aveeye mutakatifu.
Mwami wa Edomu Siyavugilira Vandu va Isiraeli Kuvita Mba
14Musa yatuma vatumwa kutura Kadeshi kuzia ku mwami wa Edomu, ni vavoola, “Yaga na mang'ana kutura ku vamiitu vinyu, avandu vihiiri ya Isiraeli. Mumanyi vudinyu vwa kwasalira, 15kuli vaguuga vitu vazia Egebeti, wa kwamenya mihiga minyingi. Vandu va Egebeti vadaamiza avaguuga viitu harara na kunye, 16navuzwa kwalilira Yahova ahaane vokonyi kukunyi. Yahulira lilira lietu na yatuma engelosi wa kwimilira kutura Egebeti. Kalunu koveeye ha Kadeshi lidaala liveeye kulwako ni kivala chicho. 17Nuyanza vugilira kuvitiri mu kivala chicho. Kunyi harara ni mitugu jitu si kulaleka inzira anoho kuzia mu milimi jinyu ja makuyu mba, kandi sikulanwa mazi kutura mu vidaho vienyu mba. Kulagenda kunzira kuduuka lwa kutura mu kivala chicho.”
18Navuzwa vandu va Edomu vativura nivavoora, “Kusuuyi kuleka munyi kuvitira mu kivala chiitu! Niiva mulageliza kulaaza kulwaana ni munyi.”
19Avandu va Isiraeli vavoola, “Kulagenda kumbalabala vuzwa, na niiva mitugu jietu noho kunyi vene kunwa ku mazi ginyu kulatunga, chakwenyaa ni kuvitira mukivala chicho.”
20Avandu va Edomu vilanila nivavoora, “Kwa kusura!” Na vazia ichova ni liihi linene kulwaana vandu va Isiraeli. 21Kigira vandu va Edomu sivavugilira vandu va Isiraeli kuvitira mu kivala chavo mba, vandu va Isiraeli vagirung'ana nivavitira munzira yindi.
Likuza lia Haruni
22Avandu vosi va Isiraeli vaatura Kadeshi nivaduuka ha kiguru cha Hori, 23keveeye kulwako lwa Edomu. Hene yaho Yahova yavolera Musa na Haruni, 24“Haruni sialazia kwingira mu kivala cha ndalaga vandu va Isiraeli mba; azizaa kukuza kigira munyi vombi mwibaara ku malago gange ha Meriba. 25Vugula Haruni nu mwana weve muyaayi Elieza muzie mu kiguru cha Hori, 26muduuki yo, utulize zinguvu zio vusaalisi zia Haruni na uviiki mwana weve Elieza. Haruni azizaa kukuzira hene yaho.” 27Musa yakola ga Yahova yamulaga. Vazia mu kiguru cha Hori imbiri wa vandu vosi; 28Musa yaatuliza ku Haruni zinguvu zio vusaalisi naviika muyaayi weve Elieza. Haruni yakuzira mu kiguru, navuzwa Musa na Elieza vasulunguta kutura mu kiguru nivilana. 29Avandu vosi vamanya ndi Haruni ukuzi na vamusiomera madiku 30.
Currently Selected:
LIVALIZA 20: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019