LIVALIZA 7
7
Vihaanwa via vimiliri mu Lihema Litakatifu
1Lwa Musa yamala kwumbaka lihema lia Yahova, yalitakasa kandi nalikora litakatifu harara ni viju vialio viosi; kandi yatakasa uvwali navokola uvutakatifu harara ni viju via vwo viosi. 2Maku aviimiliri va vandu va Isiraeli, avaari aviimiliri vi zinyumba ziavo kandi aviimiliri vi zihiiri ziavo, avaari avanene vu kuvaliza vandu, 3Valeta vihaanwa viavo ku Yahova: Magare 6 agaali ni vikuniku, zigiriki 12, vahaana kandi ligari lilala ku vuli vimiliri vaviri, kandi igiriki indala ku vuli mwimiliri. Vahaana vindu yivi viosi imbiri wi Lihema. 4Maku Yahova yavolera Musa, 5“Uvugiliri vihaanwa yivi vitumiki ku miyinzi ju mu Lihema. Uvihaane ku Ihiiri ya vandu va Levi kolondekana ni miyinzi jaavo.” 6Kunangwa Musa yavugula magare harara ni zigiriki ma nahaana ku Ihiiri ya vandu va Levi. 7Yahaana magare 2 harara ni zigiriki 4 ku vayaayi va Gerishoni, kolondekana nu vutumiki vwavo, 8kandi yahaana magare 4 harara ni zigiriki 8 ku vayaayi va Merari, kolondekana nu vutumiki vwavo. Miyinzi jaavo josi jakoleka mu vwimiliri vwa Izamara muyaayi wa Haruni musaalisi. 9Navuzwa Musa si yahaana magare anoho zigiriki ku vayaayi va Kohazi mba, kigira iviju vitakatifu via valinda vienyekanaa vagingiri ku mavega gaavo.
10Aviimiliri valeta kandi vihaanwa viavo mu litakasa vwali, vahaana vihaanwa viavo imbiri wu vwali. 11Yahova yavolera Musa, “Ovoolere aviimiliri yava ndi, vuli lidiku ku ing'inga ya madiku 12 vuli mulala alaleeta vihaanwa vivie mu litakasa uvwali.”
12Oyo vahaana kihanwa chiche: Lidiku liu kutanga yaali Nashoni muyaayi wa Aminadabu wi ihiiri ya Yuda. 13Yahaana isahani indala yi ifeza, yaali nu vulitu vwi kiloguramu 1.5, ibakuli indala yi ifeza ziguramu 800 kolondekana ni ligera lie lihema litakatifu, viombi vizura uvusie vwazuganywa maguta kuva kuli kihanwa chu vuswage. 14Vahaana kandi ibakuli indala yi zahabu yaali nu vulitu vwi ziguramu 110, ni yizuuyi kimuli kifunyaa mwayu 15kemoli kilala kigiriki, ligondi lilala limigu, ne kememe kilala kimigu chu muhiga mulala vive kuli vihaanwa viu kusambwa. 16Yahaana kandi imburi ekole eve kuli vihaanwa chu vwoni, 17zigiriki 2, magondi mamigu 5, zimburi zikole 5 kandi vimeme via magondi vimigu 5 viu muhiga mulala vive kuli vihaanwa vie mirembe. Yivi viali vihaanwa via Nashoni muyaayi wa Aminadabu.
18Lidiku lia kaviri yaali Nezaneli muyaayi wa Zuari, mwimiliri wi ihiiri ya Isakari. 19Yahaana isahani ndala yi ifeza yuvulitu vwi kiloguramu 1.5 kandi ibakuli indala yi ifeza yu vulitu vwi ziguramu 800, kolondekana nilegera lie Lihema litakatifu. Viombi vizura uvusie vwazuganywa amaaguta kuva kuli kihanwa chu vuswage. 20Yahaana kandi ibakuli indala yi zahabu yu vulitu vwi ziguramu 110, niyizuuyi kimuli kifunyaa mwayu, 21kemoli kilala kigiriki, ligondi lilala limigu, ne kememe kilala kimigu chu muhiga mulala, vive kuli vihaanwa viu kusambwa. 22Yahaana kandi imburi ekole eve kuli kihanwa chu vwoni, 23zigiriki 2, magondi mamigu 5, zimburi zikole 5, kandi vimeme via magondi vimigu 5 viu muhiga mulala vive kuli vihaanwa vi mirembe. Yivi viali vihaanwa via Nazaneli muyaayi wa Zuari.
24Lidiku lia kavaga yaali Eliabu muyaayi wa Heloni, mwimiliri wi ihiiri ya Zabuloni. 25Yahaana isahani indala yi ifeza yuvulitu kiloguramu 1.5, ibakuli indala yi ifeza ziguramu 800 kolondekana ni ligera lie lihema litakatifu. Viombi vizura uvusie vwazuganywa amaguta, kuva kuli vihaanwa viu vuswage. 26Kandi yahaana ibakuli indala yi zahabu, yu vulitu ziguramu 110 ni yizuuyi kimuli kifunyaa mwayu, 27kandi kemoli kigiriki kilala, limigu lilala ne kememe kilala kimigu chu muhiga mulala, vive kuli vihaanwa viu kusambwa. 28Yahaana kandi imburi ekole eve kuli kihanwa chu vwoni, 29zigiriki 2, magondi mamigu 5, zimburi zikole 5, kandi vimeme via magondi vimigu 5 viu muhiga mulala vive kuli vihaanwa vie mirembe. Yivi viali vihaanwa via Eliabu muyaayi wa Heloni.
30Lidiku lia kane, Elizuri muyaayi wa Shedeuri, mwimiliri wi ihiiri ya Rubeni yaleeta kihanwa chiche. 31Yahaana isahani indala yi ifeza yu vulitu kiloguramu 1.5, ibakuli indala yi ifeza ziguramu 800 kolondekana ni ligera lie Lihema litakatifu. Viombi vizura uvusie vwazuganywa amaguta, kuva kihanwa chu vuswage. 32Kandi yahaana isahani indala yi zahabu, yuvulitu ziguramu 110, ni yizuuyi kimuli kifunyaa mwayu, 33kemoli kigiriki limigu lilala ne kememe kilala kimigu chu muhiga mulala, vive kuli kihanwa chu kusambwa. 34Yahaana kandi imburi ekole indala eve kuli kihanwa chu vwoni, 35zigiriki 2, magondi mamigu 5, zimburi zikole 5, kandi vimeme via magondi vimigu 5 viu muhiga mulala vive kuli Vihaanwa vie mirembe. Yivi viali vihaanwa via Elizuri muyaayi wa Shedeuri.
36Lidiku lia katano yaali Shelumieli muyaayi wa Zurishadai, mwimiliri wi ihiiri ya Simioni yaleeta kihanwa chiche. 37Yahaana isahani indala yi ifeza yuvulitu kiloguramu 1.5, ibakuli indala yi ifeza ziguramu 800, kolondekana ni ligera lie Lihema litakatifu. Viombi vizura uvusie vwazuganywa amaguta, kuva kuli vihaanwa viu vuswage. 38Kandi yahaana ibakuli indala yi zahabu, yuvulitu ziguramu 110, ni yizuuyi kimuli kifunyaa mwayu, 39kemoli kilala kigiriki, limigu lilala ne kememe kilala kimigu chu muhiga mulala, vive kuli vihaanwa viukusambwa. 40Yahaana kandi imburi ekole eve kuli kihanwa chu vwoni, 41zigiriki 2, magondi mamigu 5, zimburi zikole 5, kandi vimeme via magondi vimigu 5 viu muhiga mulala vive kuli Vihaanwa vie mirembe. Yivi viali vihaanwa via Shelumieli muyaayi wa Zurishadai.
42Lidiku lia sita yaali Eliasafu muyaayi wa Deyeli, mwimiliri wi ihiiri ya Gadi yaleeta kihanwa chiche. 43Yahaana isahani indala yi ifeza yu vulitu kiloguramu 1.5, ibakuli indala yi ifeza ziguramu 800, kolondekana ni ligera lie Lihema litakatifu. Viombi vizura uvusie vwazuganywa amaguta, kuva kuli vihaanwa viu vuswage. 44Kandi yahaana ibakuli indala yi zahabu yu vulitu ziguramu 110, ni yizuuyi kimuli kifunyaa mwayu, 45kemoli kilala kigiriki, ne kememe kilala kimigu chu muhiga mulala, vive kuli vihaanwa viu kusambwa. 46Yahaana kandi imburi ekole eve kuli kihanwa chu vwoni, 47zigiriki 2, magondi mamigu 5, zimburi zikole 5, kandi vimeme via magondi mamigu 5, viu muhiga mulala vive kuli vihaanwa vie mirembe. Yivi viali vihaanwa via Eliasafu muyaayi wa Deyeli.
48Lidiku lia saba yaali Elishama muyaayi wa Amihudi, mwimiliri wi ihiiri ya Efuraimu yaleeta kihanwa chiche. 49Yahaana isahani indala yi ifeza yu vulitu kiloguramu 1.5, ibakuli indala yi ifeza ziguramu 800, kolondekana ni ligera lie lihema litakatifu. Viombi vizura uvusie vwazuganywa amaguta, kuva kuli vihaanwa viu vuswage. 50Kandi yahaana ibakuli indala yi zahabu yu vulitu ziguramu 110, ni yizuuyi kimuli kifunyaa mwayu, 51Kemoli kilala kigiriki, limigu lilala ne kememe kilala kimigu chu muhiga mulala, vive kuli vihaanwa viu kusambwa. 52Yahaana kandi imburi ekole eve kuli kihanwa chu vwoni, 53zigiriki 2, magondi mamigu 5, zimburi zikole 5, kandi vimeme via magondi mamigu 5, viu muhiga mulala vive kuli vihaanwa vie mirembe. Yivi viali vihaanwa via Elishama muyaayi wa Amihudi.
54Lidiku lia munane yaali Gamalieli muyaayi wa Padahizuri, mwimiliri wi ihiiri ya manase yaleeta kihanwa chiche. 55Yahaana isahani indala yi ifeza yu vulitu kiloguramu 1.5, ibakuli indala yi ifeza yu vulitu ziguramu 800, kolondekana ni ligera lie Lihema Litakatifu. Viombi vizura uvusie vwazuganywa amaguta, kuva kuli vihaanwa viu vuswage. 56Kandi yahaana ibakuli indala yi zahabu yu vulitu ziguramu 110, ni yizuuyi kimuli kifunyaa mwayu, 57kemoli kilala kikiriki, limigu ne kememe kilala kimigu chu muhiga mulala, vive kuli vihaanwa viu kusambwa. 58Yahaana kandi imburi ekole eve kuli kihanwa chu vwoni, 59zigiriki 2, magondi mamigu 5, zimburi zikole 5, kandi vimeme via magondi vimigu 5, viu muhiga mulala vive kuli vihaanwa vie mirembe. Yivi viali vihaanwa via Gamalieli muyaayi wa padahizuri.
60Lidiku lia tisa Abidani muyaayi wa Gidioni, mwimiliri wi ihiiri ya Benjamini yaleeta kihanwa chiche. 61Yahaana isahani indala yi ifeza yu vulitu kiloguramu 1.5, ibakuli indala yi ifeza yu vulitu ziguramu 800, kolondekana ni ligera lie Lihema Litakatifu, viombi vizura uvusie vwazuganywa amaguta, kuva kuli vihaanwa viu vuswage. 62Kandi yahaana ibakuli indala yi zahabu yuvulitu ziguramu 110 ni yizuuyi kimuli kifunyaa mwayu, 63kemoli kilala kigiriki, limigu lilala ne kememe kilala kimigu chu muhiga mulala, vive kuli vihaanwa viu kusambwa. 64Yahaana kandi imburi ekole eve kuli kihanwa chu vwoni, 65zigiriki 2, magondi mamigu 5, zimburi zikole 5, kandi vimeme via magondi vimigu 5, viu muhiga mulala vive kuli vihaanwa vie mirembe. Yivi viali vihaanwa via Abidani muyaayi wa Gidioni.
66Lidiku lie likomi Ahiezeri muyaayi wa Amishadai, mwimiliri wi ihiiri ya Dani yaleeta kihanwa chiche. 67Yahaana isahani indala yi ifeza yuvulitu kiloguramu 1.5, ibakuli yi ifeza yuvulitu ziguramu 800, kolondekana ni legera lie Lihema Litakatifu. Viombi vizura uvusie vwazuganywa amaguta kuva kuli vihaanwa viu vuswage. 68Kandi yahaana ibakuli indala yi zahabu yuvulitu ziguramu 110 ni yizuuyi kimuli kifunyaa mwayu 69kemoli kigiriki, limigu lialala ne kememe kilala kimigu chu muhiga mulala, vive kuli vihaanwa viu kusambwa. 70Yahaana kandi imburi ekole eve kuli kihanwa chu vwoni, 71zigiriki 2, magondi mamigu 5, zimburi zikole 5, viu muhiga mulala, vive kuli vihaanwa vie mirembe. Yivi viali vihaanwa via Ahiezeri muyaayi wa Amishadai.
72Lidiku lia 11 Pagieli muyaayi wa Okarani, mwimiliri wi ihiiri ya Asheri yaleeta kihanwa chiche. 73Yahaana isahani indala yi ifeza yuvulitu kiloguramu 1.5, ibakuli indala yi ifeza yuvulitu ziguramu 800, kolondekana ni ligera lie Lihema Litakatifu. Viombi vizura uvusie vwazuganywa amaguta, kuva kuli vihaanwa viu vuswage. 74Kandi yahaana ibakuli indala yi zahabu yuvulitu ziguramu 110 ni yizuuyi kimuli kifunyaa mwayu, 75kemoli kigiriki, limigu lilala ne kememe kilala kimigu chu muhiga mulala, vive kuli vihaanwa viu kusambwa. 76Yahaana kandi imburi ekole eve kuli kihanwa chu vwoni, 77zigiriki 2, magondi mamigu 5, zimburi zikole 5, kandi vimeme via magondi vimigu 5, viu muhiga mulala vive kuli vihaanwa vie mirembe. Yivi viali vihaanwa via Pagieli muyaayi wa Okarani.
78Lidiku lia 12, Ahira muyaayi wa Enani, mwimiliri wi ihiiri ya Nafutali yaleeta kihanwa chiche. 79Yahaana isahani indala yi ifeza yu vulitu kiloguramu 1.5 ibakuli yi ifeza yu vulitu ziguramu 800, kolondekana ni ligera lie Lihema Litakatifu. Viombi vizura uvusie vwazuganywa amaguta, kuva kuli vihaanwa viu vuswage. 80Kandi yahaana ibakuli indala yi zahabu yu vulitu ziguramu 110, niyizuuyi kimuli kifunyaa mwayu, 81kemoli kigiriki, limigu lilala ne kememe kimigu chu muhiga mulala, vive kuli vihaanwa viu kusambwa. 82Yahaana kandi imburi ekole eve kuli kihanwa chu vwoni, 83zigiriki 2, magondi mamigu 5, zimburi zikole 5, viu muhiga mulala vive kuli vihaanwa vie mirembe. Yivi viali vihaanwa via Ahira muyaayi wa Enani.
84Vihaanwa viosi via vimiliri 12 va vandu va Isiraeli valeta ku lidiku liu kutakasa uvwali viali: zisahani zie ifeza 12, zibakuli zie ifeza 12, zisahani zie zahabu 12. 85Vuli isahani yi ifeza yaali nu vulitu kiloguramu 1.5, vuli ibakuli yi ifeza yaali nu vulitu ziguramu 800, kolondekana ni ligera lie Lihema Litakatifu. 86Vuli ibakuli yi zahabu ni yizuuyi kimuli kifunyaa mwayu yu vulitu ziguramu 110, kolondekana ni ligera lie Lihema Litakatifu. Zisahani ziosi zie zahabu 12, ziali nu vulitu kiloguramu 1.5. 87Vimoli viosi vigiriki vie kihanwa chu kusambwa viali 12, magondi mamigu 12, vimeme via magondi mamigu viali 12 viu muhiga mulala, harara nuvuswage vwavo; kandi zimburi zikole zie kihanwa chu vwoni ziali 12. 88Mitugu josi jie kihanwa chi mirembe jali: zigiriki 24, magondi mamigu 60, zimburi zingole 60, vimeme vimigu via magondi muhiga mulala 60. Yivi viosi viali vihaanwa vialetwa kutakasa uvwali nu kuvakwa maguta.
89Lwa Musa yingira mu Lihema liukuvuganira kumoloma na yahova, yahulira umwoyo gumolomaa kuye kutura igulu we endeve yi zimbavasi, iyaali igulu wi Lisandugu lia Malago; iliali hagati ha Vakerubi vaviri, nu mwoyo gwa Yahova gwamoloma kuye.
Currently Selected:
LIVALIZA 7: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019