LUKAS 16
16
Pegawai keuangan de coa jujur
1Yesus madeak ngen penotoa-penotoa-Ne, “Adeba suang kayo. Si temuan suang pegawai keuangan de murus hokne. Tun kayo o dapet laporan bahwo pegawaine yo bogoa mabis cacine. 2Lajau si menok pegawai keuangan o ngen madeak, ‘Jano dio de uku temi'uk tetang udi? Uyo, senreak ngen uku laporan tetang kerjonu murus hokku. Ko coa buliak igai jijai pegawai uku.’ 3Mako pegawai o bepeker, ‘Uku harus menea jano uyo? Tuanku lok mpas uku. Makau uku coa kuet, beradoi uku selek. 4Uku ade akea, amen uku sudo nepas, uku harus temuan dau kuat de lok temapung uku neak umeak tobo'o!’ 5Lajau si menok tiep tun de butang ngen tuanne. Ngen de dute, si madeak, ‘Kedau utangnu ngen tuan uku?’ 6Jawab tun o, ‘Sotos kaco minyok zaitun.’ Lajau nadeakne ngen tun o, ‘Dioba su'et utangnu. Temotba ngen gacangba temulis: lemo puluak.’ 7Sesudo'o si madeak ngen tun keduai, ‘Kedau utangnu?’ Tun o jemawab, ‘Seribau ka'ung gelpung.’ Pegawai o madeak ngen si, ‘Dio su'et utangnu. Tulisba: lapen otos.’
8Lajau tuan o mujai pegawaine de coa jujur o, kerno si bi betindak ngen pacok. Sebab anok-anok dunio yo lebiak coa jujur te'adep sesamone kunei pado anok-anok te'ang.”
9Lajau Yesus miling igai, nadeak-Ne, “Ti'ukba! Pakeiba kayo dunio yo utuk dapet kuat, supayo amen kayo dunio yo sudo coa bego igai, udi bakea tenimo neak penan tinggea de abadi. 10Api setia lem pekaro-pekaro titik, si setio kulo lem pekaro-pekaro lai. Ngen api coa benea lem pekaro-pekaro titik, si coa benea kulo lem pekaro-pekaro lai. 11Jijai, amen udi coa setia lem hal kayo dunio, api de bakea masai ngen udi harto de sesungguakne? 12Ngen amen udi coa setia lem harto tun luyen, api de bakea semreak hartone suang ngen udi?
13 #
Mat. 6:24
Coa suang tun de dapet kerjo ngen duai tuan. Sebab si bakea lebiak mengasiak de do kunei pado de luyen, atau si bakea lebiak setia ngen tuan de do kunei pado de luyen. Awei o ba kulo ngen udi. Ko coa dapet bekerjo utuk Allah ngen utuk harto bendo kulo.”
Kecek-kecek Yesus
(Mat. 11:12-13, 5:31-32; Mrk. 10:11-12)
14Tun-tun Farisi temi'uk kute de nadeak Yesus. Lajau tobo'o temawai-Ne, sebab tobo'o galok caci. 15Tapi Yesus madeak ngen tobo'o, “Ko ba tun de neak adep tun luyen keten benea, tapi Allah namen isai ateinu. Sebab jano de nanggap lekat ngen manusio, nanggap tembeak ngen Allah.
16 #
Mat. 11:12-13
Ukum de nelei ngen Musa ngen ajaran nebai-nebai, tep belakau sapei pado maso Yohanes Pembaptis. Sejok waktau o Bito Baik tetang awei ipe Allah meriteak awei Rajo nelei bito bogoa. Ngen tun mekuak dirai utuk jijai anggota umat Allah. 17#Mat. 5:18 Lebiak mu'eak lenget ngen bumai nyep kunei pado do titik kunei ukum Allah jijai buye.
18 #
Mat. 5:32; 1Kor. 7:10-11 Tiep tun de sema'ok ngenyanne, lajau nikeak ngen selawei luyen, si menea zinah; ngen api nikeak ngen selawei de sena'ok, si menea zinah kulo.”
Tun kayo ngen Lazarus de peset
19“Adeba suang de kayo. Bajaune la'ang gone, ngen tiep bilai idupne mewah. 20Neak muko bang umeakne neltok suang tun peset genne Lazarus. Awokne penuak ngen baket. 21Si lok semi'ing teneine ngen jano de us kunei mija tun kayo o. Kuyuk teko jemilet baketne.
22Tun peset sesudo'o meninggea lajau nembin malaikat moi penan tehormat neak depeak Abraham neak surgo. Tun kayo o meninggea kulo ngen kenubua. 23Neak dunio tun matei si kembiak derito sekilai. Ngen pado waktau si demnong kunei di moi das, si kemliak Abraham neak penan de uak ngen Lazarus ade neak depeak Abraham. 24Lajau si menggang, nadeakne, ‘Bak Abraham, kasiakba uku. Luakba Lazarus, supayo si cemlup ujung ji'aine moi lem bioa lajau tekoba meleceak dileakku. Sebab uku kembiak gis lem opoi yo!’
25Tapi Abraham madeak, ‘Anok, ingetba: bahwo ko bi temimo kute de baik sewaktau idupnu, tapi Lazarus kute de kidek. Uyo si senang neak yo ngen ko saro. 26Seluyen do'o, neak antaro do ngen keme sudo nea do jurang de lai, supayo tun kunei yo coa dapet moi mindi ngen tun kunei di coa dapet kulo miyo!’ 27Nadeak tun o, ‘Amen awei yo, uku minoi ngen udi, Bapa, supayo udi meluak Lazarus moi umeak bakku. 28Sebab masiak ade lemo tun pasuakku, supayo Lazarus minget tobo'o ngen sungguak-sungguak, kunyau tobo'o jibeak masuk pasuakne moi lem penan senikso yo.’
29Abraham jemawab, ‘Tobo'o sudo temuan bukau-bukau Musa ngen bukau tobo nebai! Kunyauba tobo'o temurut jano de tetulis lem bukau-bukau o!’ 30Tapi tun kayo o jemawab, ‘Do'o coa genep, Bak Abraham. Tapi amen ade tun matei idup igai ngen teko ngen tobo'o, tobo'o bakea betobat kunei duso-duso tobo'o.’ 31Tapi Abraham madeak, ‘Amen tobo'o coa temi'uk periteak Musa ngen nebai-nebai, pasetba tobo'o coa bakea masai kulo, kunyau kulo ade tun matei de idup igai.’ ”
Currently Selected:
LUKAS 16: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
