MATIUS 12
12
Penotoa-penotoa soal tetang bilai Sabat tun Yahudi
(Mrk. 2:23-28; Luk. 6:1-5)
1 #
Ul. 23:25
Pado waktau'o, pado bilai Sabat tun Yahudi, Yesus liwet neak kebun gendum. Penotoa-penotoa muloi mopoa gendum, lajau mbukne kerno nyemen. 2Ketiko tun-tun Farisi kemliak'o, tobo'o madeak ngen Yesus, “Keliak! Penotoa-penotoa-Nu melanggea hukum agamo ite ngen menea de nlarang pado bilai Sabat tun Yahudi.”
3 #
1Sam. 21:1-6
Yesus jemawab'o, “Ati perneak udi mbaco tetang jano de menea Daud waktau si ngen tun-tunne nyemen? 4#Im. 24:9 Si masuk moi lem Bait Allah; lajau mbuk ruti de sudo nlei ngen Allah. Padahal temurut hukum agamo ite, si ngen tun-tunne kulo coa buliak mbuk ruti cuma imem-imem bae de buliak. 5#Bil. 28:9-10 Atau ati perneak udi mbaco neak lem kiteb Musa, bahwa tiep bilai Sabat tun Yahudi, imem-imem de betugas neak Bait Allah melanggea ukum bilai Sabat, tapi coa senaleak? 6Teni'ukba jano de Uku madeak yo: neak yoo ade de lebiak lai kunei Bait Allah. 7#Hos. 6:6; Mat. 9:13 Lem Kiteb Ade tenulis: Uku kenlok raso ibo iso kurban binatang. Amen sekirone udi benea-benea ngertai Firman'o, sahe udi coa bakea semaleak tun-tun de coa besaleak. 8Kerno Anok Manusio bekuaso pado bilai Sabat tun Yahudi.”
Tun de tangenne lupuak depeak
(Mrk. 3:1-6; Luk. 6:6-11)
9Yesus teminggea penan'o lajau lalau moi de bueak umeak semyang tun Yahudi. 10Neak di ade tun de tangenne lupuak depeak. Kekedau tun de lok mesoa saleak Yesus, betanye ngen-Si, “Jano buliak kema'en tun pado bilai Sabat tun Yahudi?”
11 #
Luk. 14:5
Yesus jemawab, “Seandaine ade suang tun kunei antaro udi temuan dikup domba ngen domba'o us moi lem lubang pado bilai Sabat, jano de temuan domba'o coa bakea berusaho kemluea domba'o kunei lem lubang'o? 12Nah, manusio uak lebiak bego kunei domba! Jijai, amen awei'o buliak temulung tun pado bilai Sabat.” 13Lajau Yesus madeak ngen tun de tangenne pakuak depeak'o, “Nuluaba tangennu.”
Tun'o mulua tangenne, ngen tangenne'o mako ka'en awei tangenne de depeak. 14Tapi tun-tun Farisi teminggea umeak semyang'o, sudo'o basen utuk munuak Yesus.
Utusan de niliak Allah
15Yesus namen bahwa tun-tun Farisi'o berniat kidek teadep dirai-Ne. Tapi Si lalau kunei penan'o ngen dau tun temotoa Si. Lajau Si kema'en kute tun bolon. 16Tapi Si temgeak tobo'o melei namen tetang Si ngen tun luyen. 17Jijai genepba jano de nadeak Allah liwet Nebai Yesaya.
18 #
Yes. 42:1-4
“Keliakba, dioba utusan-Ku de niliak-Ku,
Tun de Uku kemasiak ngen de semnang atei-Ku,
Uku bakea melei Roh-Ku ngen-Si,
Si bakea melei namen bangso-bangso bahwa tobo'o bakea temimo ukuman-Ku de adea.
19Si co'a bakea betekea atau menggang coa gen tun,
atau temi'uk suarone neak dalen-dalen.
20Buluak de tekulaicoa bakea natiak-Ne
lapu de pudea coa bakea padem-Ne.
Si bakea bejuang sapei tecapai de adea.
21Kute bangso bakea berharap ngen-Si.”
Yesus ngen Beelzebul
(Mrk. 3:20-30; Luk. 11:14-23)
22Sudo'o neminba ngen Yesus suang tun de pasuk semat tun'o buto ngen bisau, lajau Yesus kemaen tun'o si nam miling ngen kemliak. 23Kute tun heran, ngen madeak, “Jano mukin Si yo Anok Daud de jenanjai'o?”
24 #
Mat. 9:34, 10:25 Tiko tun Farisi temi'uk'o, tobo'o jemawab, “Tun yo cuma nam musir roh jahat, kerno Beelzebul pemimpin roh jahat bi melei kuaso'o ngen-Si.”
25Yesus namen pekeran tun-tun Farisi'o, jijai Si madeak ngen tobo'o, “Amen suatu negara terpecuak lem golongan-golongan de saling bemusuak, negara'o coa bakea betaen, ngen de bueak kota atau keluargo de tepecuak-pecuak ngen bemusuak do ngen de luyenne bakea ajua. 26Awei'oba kulo neak lem kerajaan Iblis; amen do kelopok musir kelopok de luyen mako kerajaan Iblis'o bi tepecuak-pecuak ngen bakea ajua. 27Udi madeak bahwa Uku musir roh jahat kerno kuaso Beelzebul, amen awei'o ngen kuaso api penotoa-penotoanu dewek de mbukti bahwa udi saleak! 28Tapi Uku musir roh jahat ngen kuaso Roh sucai kunei Allah. Ngen do'o taine bahwa Allah bi muloi meriteak neak tengeak-tengeak udi.
29Awei ipe tun nam masuk lem umeak tun de kuet ngen mbut hartone, amen coa neket kileak tun kuet'o? Sesudo neketne Si nam mbut hartone.
30 #
Mrk. 9:40
Tun de coa memihak Uku sebeneane si netang Uku. Ngen tun de coa temulung Uku sebeneane musak kerjo-Ku! 31Kerno'o udi perlu namen amen tun menea duso ngen mino, si dapet napun! Tapi amen si mimo Roh Sucai kunei Allah, si coa bakea napun! 32#Luk. 12:10 Amen tun miling sesuatu tetang anok manusio, si dapet napun, tapi amen si mino Roh Sucai kunei Allah si coa bakea napun, teak uyo kulo neak akhirat!”
Pun ngen bueak-bueakne
(Luk. 6:43-45)
33 #
Mat. 7:20; Luk. 6:44 “Utuk dapet bueak de baik, punne coa subur. Amen punne harus subur, bueakne coa baik kulo. Subur coane suatupun tekeliak kunei bueakne. 34#Mat. 3:7, 15:18, 23:33; Luk. 3:7, 6:45 Ko tun jahat, kero ko dapet mucep hal-hal de baik amen ko jahat? Jano de nucep bibia do'oba de keluea kunei atei! 35Tun de baik mucep hal-hal de baik kerno si penuak ngen hal-hal de baik. Kebelekne tun de jahat mucep hal-hal de jahat kerno si penuak ngen hal-hal jahat.
36Jijai, ingetba: pado Bilai Kiamat, tiep tun harus tanggungjawab ngen tiep de nucapne de coa beguno. 37Sebab temurut padeak dewekba de bakea nakei utuk mutus jano ko besaleak atau coa.”
Tun-tun Farisi minoi Yesus menea Mujizat
(Mrk. 8:11-12; Luk. 11:29-32)
38 #
Mat. 16:1; Mrk. 8:11; Luk. 11:16 Sudo'o kekedau gu'au agamo ngen tun Farisi madeak, “Pak gu'au, keme lok kemliak Bak menea mujizat.”
39 #
Mat. 16:4; Mrk. 8:12 “Padeak jahatne ngen durhakone tun-tun zaman uyo!” Yesus jemawab. “Udi minoi Uku menea mujizat? Udi coa bakea nelei mujizat kulo, seluyen mujizat Nebai Yunus. 40#Yun. 1:17 Nebai Yunus tinggea telau bilai telau malem neak lem tenei kan lai. Awei'o kulo Anok Manusio bakea tinggea telau bilai telau malem neak lem tenei bumai. 41#Yun. 3:5 Pado Bilai Kiamat, penduduk Niniwe bakea idup igai kune matei besamo tun-tun zaman uyo ngen temuduak tobo'o. Sebab tun-tun Niniwe'o betobat kunei duso-duso tobo'o, tiko Nebai Yunus berkotbah ngen tobo'o, tapi neak yo adei de kembiak lai kunei pado Nebai Yunus! 42#1Raj. 10:1-10; 2Taw. 9:1-12 Pado Bilai Kiamat, ratu kunei negrai Selatan bakea idup igai kunei mateine besamo tun-tun zaman yo ngen temuduak tobo'o. Sebab utuk temi'uk ajaran Salomo de pitok, ratu'o menea pemaneu de uak sekilai kunei ujung bumai. Tapi neak yo uyo lebiak lai kunei pado Salomo!”
Belekne Roh Jahat
(Luk. 11:24-26)
43“Amen Roh jahat teminggea suang tun, Roh'o keliling moi penan-penan de ke'ing utuk mesoa penan badan, tapi si coa dapetne. 44Kerno'o si madeak, ‘Uku bakea belek moi umeak de sudo uku teminggea.’ Waktau si sapei neak di, umeak'o kosong, bersih ngen teratur. 45Lajau si lalau mbin tujuak roh luyen de lebiak jahat kunei si. Sudo'o tobo'o moi lem tun'o, lajau tinggea neak di. Ngen akhirne tun'o jijai lebiak kidek kunei semulo. Do'o kulo de bakea tejijai ngen tun-tun jahat zaman uyo.”
Mak ngen pasuak-pasuak Yesus
(Mrk. 3:31-35; Luk. 8:19-21)
46Sementaro Yesus masiak miling ngen tun dau'o, tekoba mak ngen pasuak-pasuak-Ne. Tobo'o je neak luea samo berusaho utuk dapet miling ngen Si. 47Suang kunei tun dau'o madeak ngen Yesus, “Bak, mak ngen pasuak-pasuak Bak ade neak luea. Tobo'o lok miling ngen Bak.”
48Lajau Yesus jemawab, “Api mak-Ku? Api pasuak-pasuak-Ku?” 49Lajau Si temunjuk ngen penotoa-penotoa-Ne ngen madeak, “Dioba mak ngen pasuak-pasuak-Ku. 50Tun de kemerjo kelok Bak-Ku neak surgo, siba pasuak semenei, pasuak selawei ngen mak-Ku.”
Currently Selected:
MATIUS 12: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
