Ngechuchuarü ngúexü̃gü ga yamugüxü̃arü puracüchiga 3

Naxca̱x nitaane ga wüxi ga yatü ga chixeparacü

1Rü wüxi ga ngunexü̃gu ga Pedru rü Cuáü̃ rü tomaepü̱xarü oragu ga yáuanecü rü Tupanapata ga taxü̃newa naxĩ, yerü yema nixĩ ga yumüxẽarü ora.

2Rü yéma gumá Tupanapatawa nayexma ga wüxi ga yatü ga norü bucümatama chixeparacü. Rü guxü̃ ga ngunexü̃gu rü natanüxü̃ rü gumá Tupanapataarü ĩã̱x ga Mexẽchixü̃gu ãégaxü̃gu nayamugüxü̃, nax yéma diẽruca̱x ínaca̱xaxü̃ca̱x nüxna ga duü̃xü̃gü ga gumá Tupanapata ga taxü̃negu chocuxü̃.

3Rü yexguma Pedru rü Cuáü̃xü̃ nada̱u̱xgu ga Tupanapata ga taxü̃negu nax nachocuxü̃, rü gumá chixeparacü rü nüxü̃ nawéme̱x rü diẽruca̱x nüxna naca.

4Rü Pedru rü Cuáü̃ meama nüxü̃ narüdaunü, rü Pedru rü ñanagürü nüxü̃: —¡Toxü̃ nadawenü! —ñanagürü.

5Rü nüma ga yatü rü nüxü̃ nadawenü, yerü nüma nüxü̃ nacua̱xgu rü chi ta̱xacü nüxna naxãgü.

6Natürü ga Pedru rü ñanagürü nüxü̃: —Choxü̃́ nataxuma i diẽru rü úiru. Natürü ngẽma choxü̃́ ngẽxmaxü̃ tá cuxna chaxã. Rü naégagu ya Ngechuchu ya Cristu ya Nacharétucüã̱x cuxü̃ chamu, rü ¡inachi rü ixũ! —ñanagürü.

7Rü yema ñaxguwena ga Pedru, rü norü tügüneme̱xẽgu nayayauxãchi, rü inanachixẽxẽ. Rü yexgumatama naporae ga nacutügü rü naxme̱xtüü̃gü.

8Rü nayuxnagü rü inachi, rü inanaxügü nax iyaxũxü̃. Rü Pedruwe rü Cuáü̃we Tupanapata ga taxü̃negu naxücu. Rü nanayuxnagüane rü Tupanaxü̃ nicua̱xüxü̃.

9Rü guxü̃ma ga duü̃xü̃gü nüxü̃ nadaugü nax íyaxũxü̃ rü Tupanaxü̃ yacua̱xüxü̃xü̃.

10Rü poraãcü naba̱i̱xãchie ga duü̃xü̃gü naxca̱x ga yema nüxü̃ ngupetüxü̃ ga gumá yatü. Yerü nüxü̃ nacua̱xgü nax gumá yixĩxü̃ ga Tupanapata ga taxü̃nearü ĩã̱x ga Mexẽchixü̃gu ãégaxü̃wa rütooxü̃cü rü yéma diẽruca̱x ícacü.

Tupanapatacüwawa yexmaxü̃ ga chopetüchica ga Charomóü̃arü Üpetüchicagu ãégaxü̃wa nidexa ga Pedru

11Rü gumá chixeparachirécü ga marü naxca̱x yataanecü, rü tama Pedruna rü Cuáü̃na nixũgachichaü̃. Rü gumá Tupanapata ga taxü̃necüwawa nayexma ga wüxi ga chopetüchica ga “Charomóü̃arü Üpetüchicagu”, ãégaxü̃. Rü yema chopetüchicawa rü Pedruca̱x rü Cuáü̃ca̱x naxĩtaque̱xe ga guxü̃ma ga duü̃xü̃gü, yerü poraãcü naba̱i̱xãchie.

12Rü yexguma Pedru nüxü̃ da̱u̱xgu ga yema duü̃xü̃gü ga yéma naxca̱x ĩtaque̱xegüxü̃, rü ñanagürü nüxü̃: —Pa Chautanüxü̃ i Iraétanüxü̃güx, ¿Tü̱xcüü̃ peba̱i̱xãchie namaxã i ngẽma ñaa yatümaxã ngupetüxü̃? ¿Rü tü̱xcüü̃ toxü̃ perüdaunü ñoma torü poramaxã rü torü mexü̃maxã tanamexẽẽxü̃rüxü̃?

13Tórü o̱xigü ga Abraáü̃ rü Ichaá rü Acóbu rü togü ga tórü o̱xigü rü nüxü̃́ nayaxõgü ga Tupana. Rü yimátama Tupana nixĩ ya ñu̱xma Ngechuchuxü̃ tachigaxẽẽcü, nax guxü̃arü yexera yixĩxü̃ca̱x. Rü gumátama Ngechuchu ya Tupanaarü ngü̃xẽẽruxü̃ ixĩcü nixĩ ga pema ãẽ̱xgacü ga Pirátuxü̃tawa penagagücü. Rü yexguma nüxü̃ yangéxchaü̃gu ga Pirátu, rü pema rü tama penaxwa̱xegü nax yange̱xãxü̃.

14Pema rü tama penaxwa̱xe nax ínanguxuchixü̃ ga gumá Üünecü ga aixcüma mecü ga Ngechuchu, natürü naxca̱x ípeca nax pexca̱x ínanguxuchixẽẽãxü̃ca̱x ga wüxi ga máẽtaxü̃.

15Rü yemaacü pematama peyama̱xgü ga gumá Ngechuchu ya tüxü̃ maxẽxẽẽcü. Natürü ga Tupana rü wena nanamaxẽxẽ. Rü toma nixĩ ga nüxü̃ tadaugüxü̃ ga wena nax namaxü̃xü̃.

16Rü ñaa yatü ga chixeparachiréxü̃ i pema nüxü̃ pedauxü̃ rü nüxü̃ pecuáxü̃ rü marü naxca̱x nitaane erü Ngechuchuaxü̃́ nayaxõ. Rü ngẽma Ngechuchuaxü̃́ nax yaxõõxü̃ca̱x nixĩ i naxca̱x yataanexü̃ i ñaa yatü ga chixeparachiréxü̃ ngẽma ñu̱xma guxãma i pema nüxü̃ nax pedauxü̃.

17Rü dücax i ñu̱xma Pa Chauenexẽgüx, rü yexguma pema rü wüxigu perü ãẽ̱xgacügümaxã peyama̱xgügu ga Ngechuchu, rü tama nüxü̃ pecua̱xgü ga ta̱xacü nax pexüexü̃.

18Natürü ga Tupana rü yemaacü nayanguxẽxẽ ga yema uneta ga nũxcüma nümatama nüxü̃ yaxuxü̃ nawa ga guxü̃ma ga norü orearü uruü̃gü. Yerü yema norü ore ga ümatüxü̃wa rü ñanagürü:

“Cristu rü tá ngúxü̃ ninge”,

ñanagürü.

19Rü ngẽmaca̱x, Pa Chauenexẽgüx, rü name nixĩ i nüxü̃ perüxoe i pecüma i chixexü̃, rü Tupanaca̱x pexĩ, rü peyaxõgü nax nüma pexü̃́ ínapiãxü̃ca̱x i perü pecadugü.

20Rü ngẽxguma i nüma rü tá pexü̃ nataãẽgüxẽxẽ, rü tá núma nanamu ya Ngechuchu ga noxritama naane ixügügu rü pexca̱x nüxü̃ naxunetacü nax perü ãẽ̱xgacü ya Cristu yixĩxü̃ca̱x.

21Natürü i ñu̱xma rü Tupana nanaxwa̱xe i daxũguxü̃ i naanegu nax naxã́ũxü̃ ya Ngechuchu ñu̱xmatáta nüma ya Tupana wena namexẽẽãgu i guxü̃ma i ñoma i naanewa ngẽxmaxü̃. Yerü yemaacü nixĩ ga nüxü̃ yaxuxü̃ ga Tupana nawa ga nũxcümaü̃güxü̃ ga norü orearü uruü̃gü ga ixüünexü̃.

22Rü Moiché rü tórü o̱xigümaxã nüxü̃ nixu rü ñanagürü:

“Perü Cori ya Tupana rü petanüwa tá nüxü̃ naxuneta i wüxi i norü orearü uruxü̃ i chauxrüxü̃ ixĩxü̃.

Rü name nixĩ nax naga pexĩnüexü̃ i guxü̃ma i ngẽma pemaxã nüxü̃ yaxuxü̃.

23Rü texé ya tatanüwa tama naga ĩnüxe i ngẽma orearü uruxü̃,

rü tá tüxü̃ ínata̱xüchi i tatanüwa”,

ñanagürü ga Moiché.

24Rü Tupanaarü orearü uruxü̃ ga Chamué rü guxü̃ma ga togü ga Tupanaarü orearü uruü̃gü ga naweama ügüxü̃ rü ta nüxü̃ nixugüe ga ta̱xacü tá naxüpetüxü̃ i ñomaü̃cüü.

25Rü nũxcümaxü̃chima ga Tupana rü tórü o̱xi ga Abraáü̃maxã nüxü̃ nixu rü ñanagürü:

“Wüxi i cutaxa tá nixĩ i nüxü̃ rüngü̃xẽẽxü̃ i guxü̃ma i duü̃xü̃gü i ñoma i naanecüã̱x”,

ñanagürü. Rü yemaacü ta Tupana inaxuneta nawa ga nũxcümaü̃güxü̃ ga norü orearü uruü̃gü. Rü pemaxã nüxü̃ chixu i ñu̱xma, rü pexca̱x nixĩ ga yema unetagü ga nũxcümaü̃güxü̃ ga orearü uruü̃güwa tórü o̱xigümaxã nüxü̃ yaxuxü̃ ga Tupana.

26Rü yexguma Tupana wena namaxẽẽgu ga Nane ga Ngechuchu rü petanüwaxíra nanamu nax pexü̃ nangü̃xẽxẽxü̃ca̱x, erü nanaxwa̱xe i wüxichigü i pemax nax nüxü̃ perüxoexü̃ i pecümagü i chixexü̃ rü aixcüma peyaxõgüxü̃ —ñanagürü ga Pedru.

Currently Selected:

Ngechuchuarü ngúexü̃gü ga yamugüxü̃arü puracüchiga 3: tcaP

Highlight

Copy