Ngechuchuarü ngúexü̃gü ga yamugüxü̃arü puracüchiga 4
4
Ãẽ̱xgacügüpe̱xewa nayexmagü ga Pedru rü Cuáü̃
1Rü yexguma duü̃xü̃gümaxã íyadexagüyane ga Pedru rü Cuáü̃, rü yéma nangugü ga chacherdótegü namaxã ga gumá Tupanapata ga taxü̃nearü purichíagüarü ãẽ̱xgacü, rü Chaduchéugü.
2Rü nümagü ga yemagü rü Pedrumaxã rü Cuáü̃maxã nanue yerü duü̃xü̃güxü̃ nangúexẽxẽ nax wena namaxü̃xü̃ ga Ngechuchu, rü ngẽxgumarüxü̃ tá ta wena namaxẽxü̃ i guxü̃ma i duü̃xü̃gü i marü yuexü̃.
3Rü ínanayauxü̃, rü poxcupataü̃gu nanawocu ñu̱xmata moxü̃ãcü, yerü marü nayáuane.
4Natürü muxü̃ma ga yema duü̃xü̃gü ga nüxü̃ ĩnüexü̃ ga yema Tupanaarü ore rü nayaxõgü. Rü wixguxüchi 5,000 wa nangu ga yatüxü̃xica ixugügu.
5Rü moxü̃ãcü Yerucharéü̃wa nangutaque̱xegü ga Yudíugüarü ãẽ̱xgacügü namaxã ga chacherdótegü ga ãẽ̱xgacügü ixĩgüxü̃, rü ngúexẽẽruü̃gü ga mugüwa ngu̱xẽẽtaegüxü̃.
6Rü yéma nayexma ga Aná ga chacherdótegüarü ãẽ̱xgacü ixĩcü, rü Caipá, rü Cuáü̃, rü Areyándru, rü guxü̃ma ga yema chacherdótegü ga Anátanüxü̃ ixĩgüxü̃.
7Rü nanamu nax naxü̃tawa nagagüãxü̃ca̱x ga Pedru rü Cuáü̃. Rü yexma norü ngãxü̃tanügu nanachigüxẽxẽ rü nüxna nacagü, rü ñanagürügü: —¿Texé pexü̃ tamu, rü texé pexna tanaxã i pora nax penamexẽẽxü̃ i ñaa yatü? —ñanagürügü.
8-9Rü Pedruwa nayexma ga Tupanaãxẽ ga Üünecü, rü yemaca̱x ga Pedru rü nanangãxü̃, rü ñanagürü: —Pa Yudíuarü Ãẽ̱xgacügüx, rü Pa Chacherdótegüarü Ãẽ̱xgacügüx, rü ñu̱xma toxna peca naxca̱x nax ñuxãcü namexü̃ i ñaa chixeparachiréxü̃ erü nüxü̃ pecuáxchaü̃ nax texé naxca̱x yataanexẽxẽxü̃.
10Rü ñu̱xma tá pemaxã nüxü̃ tixu nax nüxü̃ pecuáxü̃ca̱x i guxãma i pemax, rü nüxü̃ nacua̱xgüxü̃ca̱x i guxü̃ma i tatanüxü̃ i Iraétanüxü̃. Rü ñaa yatü i ñu̱xma pepe̱xewa ngẽxmaxü̃ rü Ngechuchu ya Cristu ya Nacharétucüã̱x nixĩ ga namexẽẽcü. Rü gumá nixĩ ga pema curuchawa peyapotacü rü peyuxẽẽcü. Natürü ga Tupana rü wena nanamaxẽxẽ.
11Rü gumátama Ngechuchu nixĩ ga pema nüxü̃ pexoecü. Natürü ga Tupana rü nayamucuchi nax guxü̃arü ãẽ̱xgacü yixĩxü̃ca̱x.
12Rü yimá Ngechuchuxicatama nixĩ ya tórü maxẽxẽxẽruxü̃, erü yixicatama nixĩ ga Tupana nüxü̃ unetacü i ñoma i naanewa nax tüxü̃ namaxẽxẽẽxü̃ca̱x —ñanagürü ga Pedru.
13Rü yexguma yema ãẽ̱xgacügü nüxü̃ daugügu ga ñuxãcü tama muü̃ẽãcüma nax yadexagüxü̃ ga Pedru rü Cuáü̃, rü naba̱i̱xãchie, yerü nüxü̃ nicua̱xãchitanü ga tama mea poperaxü̃ nax yacuáxü̃ rü puracütanüxü̃mare yixĩgüxü̃. Rü nüxü̃ nicua̱xãchitanü nax Ngechuchuarü ngúexü̃gü yixĩgüxü̃.
14Rü ñu̱xũchi nüxü̃ nadaugü ta ga gumá yatü ga rümecü ga Pedru rü Cuáü̃xü̃tagu nax nachixü̃. Rü yemaca̱x ga yema ãẽ̱xgacügü rü taxuacüma ñuxũ ñanagürügü nachiga ga yema ngupetüxü̃.
15Rü yexguma ga yema ãẽ̱xgacügü rü ínanamuxü̃ ga yema ínangutaque̱xegüxü̃wa, rü nüxicatama nügümaxã nidexagü.
16Rü ñanagürügü: —¿Ta̱xacü tá namaxã ixüexü̃ i ñaa yatügü? Erü guxü̃ma i Yerucharéü̃cüã̱x i duü̃xü̃gü rü nüxü̃ nacua̱xgü i ngẽma mexü̃ i taxü̃ i naxügüxü̃, rü taxuacüma itayacu̱x.
17Natürü ngẽma nax tama yexeraãcü duü̃xü̃gütanüwa nanguchigaxü̃ca̱x i ngẽma ngupetüxü̃, ¡rü ngĩxã tanaxãxũnegü nax ñu̱xmawena rü taxúemaama ngẽma Ngechuchuégagu yadexagüxü̃ca̱x! —ñanagürügü.
18Rü wenaxarü Pedruca̱x rü Cuáü̃ca̱x nacagü, rü nüxna naxãga nax tama Ngechuchuégaxü̃ yaxugüxü̃ca̱x, rü bai i texéxü̃ nax nangúexẽẽxü̃ca̱x i nachiga.
19Natürü ga Pedru rü Cuáü̃ rü nanangãxü̃gü, rü ñanagürügü: —¡Nagu perüxĩnüe i pematama! ¿Rü namexü̃ i Tupanape̱xewa nax pega taxĩnüexü̃ rü ẽ̱xna Tupanaga taxĩnüexü̃?
20Erü toma rü taxuacüma nüxü̃ tarüxoe nax nüxü̃ tixuxü̃ ga yema nüxü̃ tadaugüxü̃ rü nüxü̃ taxĩnüexü̃ —ñanagürügü.
21Rü yexguma ga yema ãẽ̱xgacügü rü nayaxãxũnegü rü yemaacü ínayamugü. Rü nataxuma ga ta̱xacüca̱x nax napoxcueãxü̃ rü ñu̱xũchi duü̃xü̃güxü̃ namuü̃e, yerü guxü̃ma ga duü̃xü̃gü rü Tupanaxü̃ nicua̱xüü̃gü naxca̱x ga yema nüxü̃ ngupetüxü̃ ga gumá yatü ga chixeparacü.
22Rü gumá yatü ga Tupanaarü poramaxã naxca̱x itaanecü, rü 40 arü yexera nixĩ ga norü taunecü.
Yema yaxõgüxü̃ rü Tupanaarü ngü̃xẽxẽca̱x ínacagü
23Rü yexguma marü ínamuxü̃ã̱xgu, rü Pedru rü Cuáü̃ rü namücügü íyexmagüxü̃wa naxĩ. Rü namaxã nüxü̃ nixugüe ga guxü̃ma ga yema ore ga Yudíugüarü ãẽ̱xgacügü rü chacherdótegüarü ãẽ̱xgacügü namaxã nüxü̃ ixuxü̃.
24Rü yexguma Pedruxü̃ rü Cuáü̃xü̃ naxĩnüegu ga namücügü, rü guxü̃ma wüxigu nayumüxẽgü rü Tupanamaxã nidexagü rü ñanagürügü: —Pa Corix, cuma cunaxü ga daxũguxü̃ ga naane rü ñoma ga naane, rü már, rü guxü̃ma i ta̱xacü i nawa ngẽxmaxü̃.
25Rü cumatama nixĩ ga nũxcüma Cuãxẽ ya Üünecüxü̃ cumuxü̃ nax curü ngü̃xẽẽruxü̃ ga Dabíwa yanadexaxü̃ca̱x ga yexguma ñaxgu:
“¿Tü̱xcüü̃ ínanue i ñoma i naanecüã̱x i duü̃xü̃gü i tama yaxõgüxü̃?
¿Rü tü̱xcüü̃ ngẽma natüca̱xmamare ixĩgüxü̃gu narüxĩnüe i nachixü̃anecüã̱xgü?
26Ngẽma nachixü̃anegüarü ãẽ̱xgacügü rü Tupanamaxã nanue,
rü nügümaxã nangutaque̱xegü nax wüxigu nügümaxã nagu naxĩnüexü̃ca̱x nax ñuxãcü tá nüxü̃ nax nayexeragüxü̃ca̱x ya Cori ya Tupana rü Nane ya nüxü̃ naxunetacü ya Cristu”,
ñanagürü ga Dabíwa.
27Rü aixcüma nixĩ, Pa Tupanax, ga daa ĩanewa ga ãẽ̱xgacügü ga Eróde rü Pirátu nax nügümaxã nangutaque̱xegüxü̃ namaxã ga to ga nachixü̃anegücüã̱x rü totanüxü̃ ga Iraétanüxü̃, nax yama̱xgüãxü̃ca̱x ya curü ngü̃xẽẽruxü̃ ya üünecü ya Ngechuchu ya cuma nüxü̃ cuxunetacü nax Cristu yixĩxü̃ca̱x.
28Rü yemaacü ga yema ãẽ̱xgacügü rü nayanguxẽxẽ ga guxü̃ma ga yema cuma nũxcümama nagu curüxĩnüxü̃ rü nüxü̃ quixuxü̃ rü tá nax yanguxü̃.
29¡Rü ñu̱xma, Pa Corix, cuma nüxü̃ cucua̱x nax ñuxãcü toxü̃ naxãxũnegüxü̃! Toma nixĩ i curü ngü̃xẽẽruü̃gü rü tanaxwa̱xe nax toxü̃ cuporaexẽxẽxü̃ nax tama tamuü̃eãcüma nüxü̃ tixuxü̃ca̱x i curü ore.
30¡Rü curü poramaxã nameexẽxẽ i duü̃xü̃gü i ida̱xaweexü̃! ¡Rü duü̃xü̃güxü̃ nawe̱x i cua̱xruü̃gü i curü poramaxã cuxüxü̃ i naégagu ya curü ngü̃xẽẽruxü̃ ya üünecü ya Ngechuchu! —ñanagürügü.
31Rü yexguma yumüxẽwa nüxü̃ nachauegu, rü gumá ĩpata ga nawa nangutaque̱xegüne rü naxĩã̱xãchi. Rü Tupanaãxẽ ya Üünecü rü nüxna nangu ga guxü̃ma. Rü tama namuü̃eãcüma nüxü̃ nixugüe ga Tupanaarü ore.
Yema yaxõgüxü̃arü yemaxü̃gü rü guxü̃arü nixĩ
32Rü namu ga yema yaxõgüxü̃. Rü guxü̃ma rü wüxigu narüxĩnüe. Rü taxuxü̃ma nagu narüxĩnü nax noxrüxicatama yixĩxü̃ ga norü yemaxü̃gü, natürü guxü̃ma ga ta̱xacü nüxü̃́ yexmaxü̃ rü guxãarü nixĩ.
33Rü yema ngúexü̃gü ga Ngechuchu imugüxü̃ nax Tupanaarü puracü naxügüxü̃ca̱x, rü Tupanaarü poramaxã nüxü̃ nixugüe nax wena namaxü̃xü̃ ga Cori ga Ngechuchu. Rü Tupana rü poraãcü nüxü̃ narüngü̃xẽxẽ ga guxü̃ma ga yema yaxõgüxü̃.
34-35Rü natanüwa rü nataxuma ga wüxi ga nüxü̃́ nataxuxü̃, yerü guxü̃ma ga yema nüxü̃́ yexmaxü̃ ga naanegü rüe̱xna ĩpatagü, rü namaxã nataxegü. Rü yema diẽru ga ngĩxü̃ nayauxgücü, rü yema ngúexü̃gü ga Ngechuchu imugüxü̃na ngĩxü̃ nayaxãgü. Rü nümagü rü wüxichigüna ngĩxü̃ naxã naxca̱x ga yema nüxü̃́ taxuxü̃ ga wüxichigü.
36Rü nayexma ga wüxi ga yatü ga Lebítanüxü̃ ga Chíperecüã̱x ga Yúchegu ãégacü. Rü yema ngúexü̃gü ga Ngechuchu imugüxü̃ nax Tupanaarü puracü naxügüxü̃ca̱x rü Bernabémaxã nanaxugü. Rü ngẽma naéga, rü: “Taãẽxẽẽruxü̃”, ñaxü̃chiga nixĩ.
37Rü nüma ga Bernabé rü nüxü̃́ nayexma ga wüxi ga naane, rü namaxã nataxe. Rü yema ngúexü̃gü ga Ngechuchu imugüxü̃xü̃tawa ngĩxü̃ nana ga yema diẽru.
Currently Selected:
Ngechuchuarü ngúexü̃gü ga yamugüxü̃arü puracüchiga 4: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
