Ore i mexü̃ ga Luca ümatüxü̃ 14

Ngechuchu rü naxca̱x nayataanexẽxẽ ga wüxi ga yatü ga dexámaxã ipu̱xunexü̃

1Rü wüxi ga ngü̃xchigaarü ngunexü̃gu rü Ngechuchu rü wüxi ga Parichéugüarü ãẽ̱xgacüpatawa nayachibü. Rü yéma nayexmagü ga togü ga Parichéugü ga yéma bexma Ngechuchuxü̃ ngugüexü̃.

2Rü yéma nayexma ta ga wüxi ga yatü ga ida̱xawexü̃ ga dexámaxã ipu̱xunexü̃.

3Rü yexguma ga Ngechuchu rü yema ngúexẽẽruü̃gü ga Moichéarü mugüwa ngu̱xẽẽtaegüxü̃na rü Parichéugüna naca, rü ñanagürü: —¿Pexca̱x namexü̃ ega ngü̃xchigaarü ngunexü̃gu naxca̱x chayataanexẽxẽgu i wüxi i ida̱xawexü̃? —ñanagürü.

4Natürü ga nümagü rü nangea̱xgümare. Rü yexguma ga Ngechuchu rü naxme̱xgu nayayauxãchi ga yema ida̱xawexü̃, rü nanamexẽxẽ. Rü namaxã nüxü̃ nixu nax íyaxũxü̃ca̱x.

5Rü ñu̱xũchi ñanagürü Parichéugüxü̃: —¿Texé i pemax i ngẽxguma perü búru rü ẽ̱xna perü woca puchugu nagoxgu, rü taux ẽ̱xna i ngẽxgumatama ípeyadauxü̃ rü ípeyatúãchixü̃ i woo ngü̃xchigaarü ngunexü̃ yixĩxgu? —ñanagürü.

6Rü nümagü rü taxuxü̃maama Ngechuchuxü̃ nangãxü̃gü.

Duü̃xü̃gü ga ngĩgüarü petawa nüxna naxugüxü̃chiga

7Rü yexguma mechawa natogüchaü̃gu ga yema nüxna naxugüxü̃, rü Ngechuchu nüxü̃ nadau nax wüxichigü rü ĩarü yoraxü̃tawaxüchi natoxchaü̃xü̃. Rü yexguma yemaxü̃ nada̱u̱xgu rü nayaxucu̱xẽgü, rü ñanagürü:

8—Ngẽxguma texé cuxna uxgu i wüxi i ngĩgüarü petawa, rü tama name i petaarü yoraxü̃tawaxüchi üxü̃ i naxma̱xwe̱xewa cuyarüto. Erü yixcüra ngürüãchi tá ínangu i to i nüxna naxuxü̃ i curü yexera tachigaxü̃.

9Rü ngẽma petaarü yora i pexna uxü̃, rü tá cumaxã nüxü̃ nayarüxu nax icuchixü̃ca̱x i ngẽma nachicawa nax ngéma natoxẽẽãxü̃ca̱x i ngẽma to i curü yexera ixĩxü̃. Rü ngẽxguma i cumax rü poraãcü cuxãneãcüma rü nawa iyacuáxü̃ i naxma̱xwe̱xewa tá cuyarüto.

10Rü narümemae ega texé cuxna uxgu, rü nawa iyacuáxü̃ i naxma̱xwe̱xewa curüto. Rü ngẽxguma i ngẽma petaarü yora i cuxna uxü̃ rü ñanagürü tá cuxü̃: “Pa Chomücüx, ¡nua chauxü̃tawa yarüto!” ñanagürü tá cuxü̃. Rü ngẽmaãcü ngẽma petaarü yora rü wüxi i mexü̃ tá cumaxã naxü nape̱xewa i guxü̃ma i ngẽma togü i duü̃xü̃gü i nüxna naxuxü̃ i cumaxã ngéma rütogüxü̃.

11Erü texé ya tügü írütaxe rü Tupana tá tüxü̃ naxãnexẽxẽ. Natürü texé ya tügü írüxíraxe rü Tupana tá tüxü̃ nicua̱xüxü̃ —ñanagürü ga Ngechuchu.

12Rü ñanagürü ta ga Ngechuchu nüxü̃ ga yema yatü ga nüxna uxü̃: —Rü ngẽxguma wüxi i õnaca̱x rüe̱xna petaca̱x texéna cuxũxchaü̃gu, rü tama name i nüxna cuxu i cumücügü, rü bai i cuenexẽgü, rü bai i cutanüxü̃, rü bai i curü ngaicamagu pegüxü̃ i duü̃xü̃gü i diẽruã̱xgüxü̃. Erü nümagü rü tá nüxĩ́ cuxna naxugüe, rü ngẽmaãcü tá cuxü̃́ nanaxütanügü.

13Natürü ngẽxguma wüxi i peta cuxü̱xgu, rü narümemae nixĩ i nüxna cuxu i duü̃xü̃gü i ngearü diẽruã̱xgüxü̃, rü duü̃xü̃gü i taxucürüwama puracüexü̃, rü ngẽma ichixeparagüxü̃, rü ngẽma ingexetügüxü̃.

14Rü tá cutaãẽxü̃chi i ngẽxguma erü nümagü rü taxucürüwa cuxü̃́ nanaxütanügü. Natürü tá cunayaxu i curü natanü i ngẽxguma wena namaxẽgu i Tupanaarü duü̃xü̃gü i mexü̃ —ñanagürü.

Ore i taxü̃ i õnagu ixuxü̃

(Mt. 22.1-10)

15Rü yexguma yemaxü̃ naxĩnügu ga wüxi ga yatü ga mechawa rütoxü̃ rü Ngechuchuxü̃ ñanagürü: —Rü tataãxẽ ya yíxema Tupana ãẽ̱xgacü ixĩxü̃wa chibüxe —ñanagürü.

16Rü yexguma ga Ngechuchu rü ñanagürü nüxü̃: —Wüxi ga yatü nanaxü ga wüxi ga õna ga taxü̃. Rü norü duü̃xü̃xü̃ namu nax nüxna yaxuxü̃ca̱x ga muxü̃ma ga duü̃xü̃gü.

17Rü yexguma marü namexgu ga norü õna, rü wena norü duü̃xü̃xü̃ namu nax yema duü̃xü̃gü ga marü nüxna naxugüxü̃maxã nüxü̃ nax yanaxuxü̃ca̱x nax marü namemarexü̃ ga norü õna, rü paxa yéma nax naxĩxü̃ca̱x.

18Natürü guxü̃ma ga yema nüxna naxugüxü̃, rü inanaxügü nax nügü ínaxuegüxü̃. Rü yema nüxíra nüxna naxuxü̃ rü ñanagürü: “Ngexwacatama naxca̱x chataxe i wüxi i naane. Rü paxa tá íchayadau. ¡Rü namaxã nüxü̃ ixu i cori rü taxucürüwama ngéma chaxũ!” ñanagürü.

19Rü yema to rü ñanagürü: “10 i wocagü i puracüruü̃ca̱x chataxe, rü tá ngẽmaxü̃ chaxü. ¡Rü namaxã nüxü̃ ixu i cori rü taxucürüwama ngéma chaxũ!” ñanagürü.

20Rü to rü ñanagürü: “Ngexwacatama chaxãma̱x rü ngẽmaca̱x taxucürüwama ngéma chaxũ”, ñanagürü.

21Rü yexguma nataeguxgu ga yema coriarü duü̃xü̃, rü norü corimaxã nüxü̃ nixu ga guxü̃ma ga yema ore. Rü yexguma ga norü cori rü nanu, rü ñanagürü nüxü̃ ga norü duü̃xü̃: “¡Paxa ngéma ĩanearü namagüwa rü namaxacügüwa naxũ, rü nua nagagü i ngẽma duü̃xü̃gü i ngearü diẽruã̱xgüxü̃, rü ngẽma duü̃xü̃gü i taxucürüwama puracüexü̃, rü ngẽma ichixeparagüxü̃, rü ngẽma ingexetügüxü̃!” ñanagürü.

22Rü yixcamaxü̃ra ga yema coriarü duü̃xü̃ rü norü corixü̃ ñanagürü: “Pa Corix, marü chanaxü i ngẽma chomaxã nüxü̃ quixuxü̃, natürü naxãchicaaneãmatama i nua cupatawa”, ñanagürü.

23Rü yexguma ga norü cori rü ñanagürü nüxü̃: “¡Paxa ngéma nama i taxü̃güwa rü nama i íraxü̃güwa naxũ, rü nua nagagü i togü i duü̃xü̃gü nax nuxã chopatagu nachocuxü̃ca̱x, rü ngẽmaãcü nax naxããcuxü̃ca̱x ya daa chopata!

24Erü pemaxã nüxü̃ chixu rü taxuxü̃ma ga yema nüxíra nüxna chaxuxü̃ rü nua chorü õnawa tá nachibüe” —ñanagürü.

Tama natauxcha nax Cristuwe rüxũxü̃

(Mt. 10.37-38)

25Rü muxũchixü̃ma ga duü̃xü̃gü Ngechuchuwe narüxĩ. Rü Ngechuchu rü nadauegu rü ñanagürü nüxü̃:

26—Rü ngẽxguma texé chowe rüxũxchaü̃gu, rü tanaxwa̱xe i choxü̃ tangechaü̃ tümanatüarü yexera, rü tümaéarü yexera, rü tümama̱xarü yexera, rü tümaxacügüarü yexera, rü tümaenexẽgüarü yexera, rü tümaeya̱xgüarü yexera, rü tümaarü maxü̃arü yexera rü ta. Rü ngẽxguma tama ngẽmaãcü choxü̃ tangechaü̃gu rü taxucürüwama aixcüma chorü ngúexü̃ tixĩ.

27Rü yíxema nüxü̃ oxe nax chaugagu ngúxü̃ tingeãcüma chowe tarüxũxü̃, rü taxucürüwama chorü ngúexü̃ tixĩ.

28Rü ngẽxguma chi wüxíe i petanüwa rü wüxi ya ĩpata ya taxü̃ne taxüxchaü̃gu, ¿rü tama ẽ̱xna i tanangugüxíraxü̃ nax ñuxre i diẽrugu tá tüxü̃́ naxãtanüxü̃? Rü ngẽmawa nüxü̃ tacua̱x rü marü tüxü̃́ yangu i ngẽma tümaarü diẽru i tüxü̃́ ngẽxmacü nax tayanguxẽẽxü̃ca̱x ya yimá ĩ.

29Erü ngẽxguma chi tama mea tanangugügu i tümaarü diẽru nax ñuxregu tá naxãtanüxü̃ ya yima ĩ, rü norü caxtaxica chi itapugügu rü taxucürüwa chi tayanguxẽẽgu i ngẽma puracü, rü guxü̃ma i duü̃xü̃gü i nüxü̃ daugüxü̃ i ngẽma tümaarü puracü rü tá tüxü̃ nacugüe.

30Rü ñanagürügü tá: “Ngẽma yatü inanaxügü nax naxüpataxü̃, natürü taxucürüwama nayanguxẽxẽ”, ñanagürügü tá.

31Rü ngẽxguma wüxi i nachixü̃anearü ãẽ̱xgacü rü to i nachixü̃anearü ãẽ̱xgacümaxã nügü nadaixchaü̃gu, ¿rü tama ẽ̱xna i noxri inangugüãxü̃ rü 10,000 i churaragü rü marü nüxü̃́ yangu nax nügü nada̱i̱xü̃ca̱x namaxã i norü uanü i 20,000 i churaragü nüxü̃́ ngẽxmaxü̃?

32Rü ngẽxguma nangugüãgu nax tama yanguxü̃ i norü churaragü rü, ¿taux ẽ̱xna i ngẽxguma yáxü̃wa nangẽxmagutama i norü uanü, rü naxü̃tawa namugüãxü̃ i norü orearü ngeruü̃gü, rü namaxã nüxü̃ nax yanaxugüexü̃ca̱x nax nügümaxã nangüxmüexü̃?

33Rü ngẽxgumarüxü̃ tá ta nixĩ i pemax, erü ngẽxguma ngexerüxüxe i petanüwa tama ngéma tanawogügu i guxü̃ma i tüxü̃́ ngẽxmaxü̃ nax chowe tarüxũxü̃ca̱x, rü taxucürüwama aixcüma chorü ngúexü̃ tixĩ.

Ngẽxguma nangeacagu ya yucüra rü taxuwama name

(Mt. 5.13; Mr. 9.50)

34Name ya yucüra. Natürü ngẽxguma chi nangeacagu, ¿rü ñuxãcü tá wenaxarü naxããcaxü̃?#14.34 Pemax rü ñoma yucürarüxü̃ pixĩgü i ñoma i naanewa, erü yimá yucüra rü õna nax namexẽxẽxü̃rüxü̃ rü pema rü ñoma i naanecüã̱x i duü̃xü̃gütanüwa rü norü mexẽẽruxü̃ pixĩgü.

35Rü taxuwama name. Rü woo waixü̃müarü wamüanexẽẽruü̃ca̱x rü tama name. Rü ítanata̱xmare. Rü yíxema ãchi̱xẽgüxe, ¡rü nüxü̃ taxĩnüe i ngẽma ore! —ñanagürü.

Currently Selected:

Ore i mexü̃ ga Luca ümatüxü̃ 14: tcaP

Highlight

Copy