Mt 10
10
Kurumiwa ka vadondrisiwa va khume na vabiri
(Mrk 3:13-19; 6:7-13; Lk 6:12-16; 9:1-6)
1Kati loko Yesu avitani a vadondrisiwa vakwe lava va khume na vabiri, avanyika ntamu wa kuhlongola mimoya leyi mimfani ni kuhanyisa mavabyi ya tinxaka hinkwatu, ni kukarateka hinkwaku. 2A mavito ya vapostola lava va khume na vabiri hi lawa: A wa kusungula, Simoni, lweyi ahlayiwaka Petrosi, ni makwavu Andreyasi; Yakobe ni makwavu Yohana, vana va Zebedeya; 3Filipi na Bartolomewu; Tomasi na Matewu, muhlengisi; Yakobe n'wana Alifewu, na Tadewu; 4Simoni mu-Kanana na Yudasi Iskariyota, lweyi angawonga Yesu. 5Yesu arumi lava va khume na vabiri, avaleleta aku: N'wingayi ku va-Matiko, n'winganhingeneni amutini wa va-Samariya#10:5 A va-Samariya, handle ka kuva vangana kutwala kunene hikuva vali va lixaka drin'wana, ni hikola ka leswi swinyingi swa ta tiko ni ta vukhongoti, afa vavoniwa swanga valala va va-Yuda. 6yanani ntsena ku tihamba ta kulahleka ta yindlu ya Israyele. 7Loko n'wifamba tivisani leswaku a Mfumu wa Matilo wutrhindrekelile. 8Hanyisani timbabyi, pfuxani lava vafiki, basisani a va nhlokonho, hlongolani mademoni. N'winyikiwi ntsena, na n'wine nyikani ntsena. 9N'wingatekeni a mali ya libungu, nambi ya ntlhohe, kumbe mali ya nsuku, amabandini yenu, 10ni timbuva ta ndlela; n'wingatekeni a mpahla ya kutxintxa ha yone, nambi ti tintangu, kumbe nhonga, hikusa a mutiri afanela hi swakuda swake.
11Loko n'witlhasa amutini kumbe amutanini wa kukari, djulani mhunu wa kudumbeka n'witrhama a kaya kwake kukondra n'wisuka. 12Loko n'winhingena ku yindlu ya kukari, loselani hi kurula#10:12 A losela dra xi-Yuda afa driyentxiwa hi kunavelelana a kurula. 13Loko a yindlu leyo yifanela swone, a kurula kwenu akute henhla ka yone; kambe loko yingafaneli swone, a kurula kwenu akutlheleli ku n'wine. 14Loko vangan'wiyamukeli, nambi kuyingela a maritu yenu, sukani ku yindlu leyo kumbe amutini lowo, n'wiva n'wiphumuna ni ntrhuri#10:14 A kuphumuna a ntrhuri afa swidjula a kuhlaya leswaku akudjuleki ntxumu ni vatrhami va tiko ledriya, nambi wungava ntrhuri wunga trhamaka aminkondrweni. aminkondrweni. 15Nihlayelamfuri nili ku n'wine, hi siku dra kuyavanyisa a kukhatisa kutavevuka ku tiko dra Sodoma na Gomora#10:15 Loko ali Sodoma na Gomora, lavisa Ms(Gn) 18-19. kutlula muti lowo.
Tinxanisa ni mahlomulo ya vapostola
(Mrk 13:9-13; Lk 21:12-17)
16Lavisani, nin'wiruma swanga tihamba amakari ka mahava. Hileswo-ke tlharihani swanga tinyoka, n'wirula swanga matuva. 17Tivonelani, hikuva vatan'wikokela tihubyini, vatan'wipswhita amasinagogeni, 18n'witayisiwa amahlweni ka tindruna ni ka vafumi hikola kwanga; kone n'witanihambela a vumboni ku vone ni ku va-Matiko. 19Kambe loko van'winyiketa ku vafumi n'wingakaratekeni hi leswi n'witakakhanelisa xiswone, nambi leswi n'witakaswihlaya, hikusa loko kutlhasa nkama wakuva n'wikhanela, Xikwembu Nkulukumba atan'winyika maritu. 20Hikusa ahi n'wine n'witakakhanela, kambe wutava Moya wa Tatana wenu lowu wunga ku n'wine. 21Na swone, a mhunu atanyiketa makwavu akudlayiweni, ni tatana atanyiketa n'wana; a vana vatapfukela a vapswali, kutani vatavadlaya. 22N'witahambuliwa hi misava hinkwayu hinkonta yanga; kambe lweyi atakatiyisela kutlhasa vugan'wini atahuluxiwa.
23Loko van'wixanisa ku muti lowu, trutrumelani ku wumbeni; nihlayelamfuri nili ku n'wine: N'wingaka n'wingaheti miti hinkwayu ya Israyele na N'wana wa Mhunu angasinabuya.
24Akuna mudondri lweyi atlulaka a mudondrisi wakwe, ni nandra lweyi atlulaka a n'winyi wakwe. 25Swadringana ku mudondri ava swanga hi mudondrisi wakwe, ni nandra ava swanga hi n'winyi wakwe. Loko-ke varuki a n'winyi wa yindlu vamuhlaya Beelzebule, xana vangaka vangatxhuli ngopfu vone lava vatrhamisaka na yene?
26Hileswo-ke, n'wingatxhaveni; hikusa akuna xa ntxhumu lexi xifuneketiweke, xingatikifunukuliwa, na kone akuna xantxhumu lexi xifihlekiki xingatikitibyiwa. 27Leswi niswihlayaka amunyameni, swihlayani alivaningweni, ni leswi n'wihleveteliwaka atindleveni, swirerani a henhla ka tiyindlu. 28Nakone n'wingatxhaveni lava vadlayaka a miri, na vangakotiki kudlaya a hika; kambe txhavani ngopfu lweyi angani ntamu wa kusuvisa a hika ni miri akheleni dra ndrilo. 29Avaxavisi a swinyanyana swibiri hi ximalana xin'we, xana? Kambe ni xin'we xa swone xitakawa a hansi loko kunge kurandra ka Tatana wenu. 30Na yone misisi hinkwayu ya tinhloko tenu mihlayiwile a ntalu wa yone! 31Hileswo-ke n'wingavi txhava! N'wine n'witlula a swinyanyatana leswi swinyingi.
Kupfumela Kriste
(Lk 12:8-9)
32Lweyi atakanihlaya amahlweni ka vhanu, na mine nitamuhlaya amahlweni ka Tatana wanga lweyi anga Matilweni; 33kambe lweyi atakaniyala amahlweni ka vhanu, na mine nitamuyala amahlweni ka Tatana wanga lweyi anga Matilweni.
34N'wingayanakanyeni leswaku nitisi kurula amisaveni; anitelanga kutisa kurula, kambe dra kuva tlhari; 35hikusa niteli kutatabeka kuhambinisa n'wana wa xinuna ni tatana wakwe, n'wana wa xisati ni mamana wakwe, a n'wingi ni n'wingi wakwe; 36#Lavisa Mik 3:1. a valala va mhunu vatava va ndangu wakwe.
37Lweyi arandraka a tatana wakwe kumbe mamana wakwe kutlula mine, anganifaneli; ni lweyi arandraka ngopfu a n'wanakwe wa xinuna kumbe wa xisati kutlula mine anganifaneli. 38Lweyi angarwalikiki a xihambano xakwe anilandra anganifaneli. 39Lweyi abekisaka a vutomi byake atabyilahla, kambe lweyi alahlekeliwaka hi vutomi byake hinkonta yanga, atatlhela abyikuma.
Hakelo
(Mrk 9:41)
40Lweyi an'wiyamukelaka ayamukela mine, ni lweyi aniyamukelaka, ayamukela lweyi anirumiki. 41Lweyi ayamukelaka muprofeta hikuva ali muprofeta, atakuma a hakelo ledri drifanelaka muprofeta; ni lweyi ayamukelaka mululami hikuva ali mululami, atakuma a hakelo ledri drifanelaka mululami. 42Nakone lweyi atakanyika a ntrheko wa mati ya kutitimeta ku mun'we wa lava vatrongonyana hikuva ali mudondrisiwa wanga, nan'wibyela nili angaka angalahlekeliwi hi hakelo drakwe.
Currently Selected:
Mt 10: NTX2007
Highlight
Share
Copy
Want to have your highlights saved across all your devices? Sign up or sign in
Xironga New Testament with Psalms © Bible Society in Mozambique, 2007.
