Yohanes 18

Yesus sanga cako'o

(Mat. 26:47-56; Mrk. 14:43-50; Luk. 22:47-53)

1Wakutu Yesus 'o manyiata togumu i'a, Unanga re 'Ai me-mete'e 'aḏi tagi 'aḏi masala i'a toma ḇanyo Kidron kaci moi. Toma ngi'i gena-ge, ananga 'aḏi osama toma guḏa zaitun ḇotu moi.

2Yudas ga'a ḏuanga i'a 'o sipula'a Yesus rai lawana, unanga ḏi'i 'a waro ngi'i gena-ge. Sababu soi rai o'o i'a Yesus re 'Ai me-mete'e, ananga ga'a 'aḏi malomu toma ngi'i gena-ge. 3Dadi Yudas 'o sapolo toma guḏa gena-ge. Unanga gena-ge 'o gasa sordado-sordado Roma regu rimoi re Ma Jou'ongu Madutu 'ai Wala ma ja-jaga nga muḏuo i'a. Ananga gena-ge 'aḏi gasa dare, lantera re 'oboro. Re ananga gena-ge, 'imam-'imam ma sae'e re ngowa-ngowa'a Farisi ya'u 'utusu.

4Yesus 'a waro mo-moini 'oru ga'a ngasamoi 'i dadi ra Unanga. Dadi Unanga 'o sisoi'i tala ngi'i gena-ge 'o ma'u sanga ra ananga, kara 'o sano, “Ngini ni disa 'a guna?”

5Ananga ya sangoro, “Yesus ngowa'a Nazaret.”

Yesus 'o kanau, “Ngoi nena-ne Unanga.” (Re Yudas ga'a gasa ananga gena-ge toma ngi'i gena-ge, unanga 'o made-de'oso ra ananga.)

6Wakutu Yesus 'o kanau, “Ngoi nena-ne Unanga,” ananga 'aḏi madorusu re 'aḏi ruba ie toma tana'a. 7Soi moi moju Yesus dadunu 'o sano ra ananga, “Ngini ni disa 'a guna?” Ananga ya sangoro, “Yesus ngowa'a Nazaret.”

8Yesus 'o sangoro, “Ngoi reto kanau ḏua, ‘Ngoi nena-ne Unanga.’ Re na'o ngini ni disa Ngoi ḇato, ni sieanga i'a 'Ari me-mete'e 'aḏi tagi.” 9Wakutu Yesus 'o kanau so'o gena, Unanga 'o sitotomo 'oru ga'a Unanga 'o manyiata 'au nga'ene: “Baba, ngowa-ngowa'a ga'a Baba no sidoa'a ra Ngoi, matengo i'a mai ua ananga 'aḏi iranga.”

10Ḏua Simon Petrus 'a tuono 'ai samaranga, kara 'o cafa 'a 'imam 'agung 'ai budaka 'ai ngau'u ma kuwiḏa singadolo tola'a. (Budaka gena-ge 'ai lomanga Malkus.) 11Ḏua Yesus 'o kanau i'a ra Petrus, “Dadunu na singosama 'ani samaranga toma sarungu. Ngana no ta'ajiri mangale Ngoi to oḏu'u sanga sangisara ga'a 'Ari Ḇaḇa 'a sitantukanga ḏua Ngoi balasu ta sanga?!”#Mat. 26:39; Mrk. 14:36; Luk. 22:42

Yesus sitalaḏi ra Hanas

12Ḏua sordado-sordado Roma regu rimoi re manga sae'e re ḏi'i Ma Jou'ongu Madutu 'ai Wala ma ja-jaga, ananga 'aḏi cako'o 'a Yesus re 'U piri'u. 13Siḏa-siḏa ananga 'U gasa sitalaḏi ra Hanas, Kayafas 'ai dedono na-nau'u. Toma musungu gena-ge, Kayafas 'o dadi 'imam 'agung. 14Kayafas gena-ge ngowa'a ga'a pula'a duga re domolo toma ngowa-ngowa'a Yahudi manga bi-biri'i: “Jobilaha ngowa'a matengo 'o sengene di'a ngowa'a repe.”#Yoh. 11:49-50

Petrus 'o soloto Yesus ma mulaingi

(Mat. 26:69-70; Mrk. 14:66-68; Luk. 22:55-57)

15Simon Petrus re Yesus 'ai me-mete'e matengo, ananga 'aḏi mete'e tu-tuu'u ra Yesus. Sababu 'imam 'agung ro nana'o Yesus 'ai me-mete'e ma lelegu unanga 'o osama mamete'e ra Yesus toma 'imam 'agung 'ai wala ma soana. 16Mada'a Petrus balasu 'o totoma toma ngalana ma ḏuḏunu. Ḏua Yesus 'ai me-mete'e ma lelegu gena-ge, unanga 'o supu reo makanau toma we-were'a ga'a ngalana ma ja-jaga, kara munanga mo singosama 'a Petrus toma dara.

17We-were'a ngalana ma ja-jaga mo sano i'a ra Petrus, “Hei ngana ḏi'i Unanga nena-ne 'Ai me-mete'e?”

Petrus 'a sangoro, “Ngoi ua.”

18Utu gena-ge 'alo. Dadi budaka-budaka re ngowa-ngowa'a ja-jaga, ananga 'aḏi 'a'a u'u reo konu'u. Gena ḏua, ananga 'aḏi marasu'u re 'aḏi made-de'oso sigoloḏi u'u gena-ge. Petrus 'o masebanga i'a ra ananga toma u'u, la 'o marasu'u ḏi'i mamete'e ra ananga.

'Imam 'agung 'o sano Yesus

(Mat. 26:59-66; Mrk. 14:55-64; Luk. 22:66-71)

19'Imam 'agung 'o sano ra Yesus mangale 'Ai me-mete'e re 'Ai do-doto'o.

20Yesus 'o sangoro, “Ngoi to kanau toma mandan. Ngoi to doto'o tau-taunu toma wala-wala puji re ra Ma Jou'ongu Madutu 'ai Wala ma soana, ngi'i ngowa'a Yahudi 'aḏi malomu, soi moi nyangu Ngoi to kanau 'ori i'a Ta go-gogono. 21Dadi i'a sa'olo ngana no sano ra Ngoi moju? No sano ḇato ra ananga ga'a ya 'isene 'Ari do-doto'o. Tantu ḏua ananga ya waro 'oru ga'a Ngoi to kanau!”

22Wakutu Yesus 'o kanau so'o gena, 'imam 'agung 'ai ngowa'a ja-jaga matengo 'U sata Yesus re 'o kanau, “No nau'u masala No kanau so'o gena-ge toma 'imam 'agung!”

23Yesus 'a sangoro, “Na'o Ngoi 'ari demo bale moi 'i rapu, nange-ne na siajele 'Ari rapu 'oru! Mada'a na'o 'oru ga'a Ngoi to kanau 'i banari, i'a sa'olo no sata Ngoi?”

24Gena ḏua, Hanas 'o soma'a ananga 'aḏi gasa Yesus ga'a 'ai giama 'i pi-piri'u moju, ra Kayafas 'imam 'agung.

Petrus 'o soloto Yesus moju

(Mat. 26:71-75; Mrk. 14:69-72; Luk. 22:58-62)

25Simon Petrus 'o made-de'oso 'o marasu'u moju toma ngi'i gena-ge, 'age ngowa-ngowa'a 'aḏi sano, “ 'Oru ngana nena-ne ḏi'i Yesus 'ai me-mete'e?”

Mada'a Petrus 'o masoloto, “Ngoi ua!”

26'Age rema 'imam 'agung 'ai budaka matengo. Unanga gena-ge 'ai ioro re nongoḏu ngowa'a matengo ga'a Petrus 'a cafa 'ai ngau'u ma kuwiḏa. Unanga gena-ge, 'o kanau, “Ngoi to oḏi'i 'au nange-ne ngana ḏi'i no mamete'e ra Yesus toma guḏa zaitun!”

27Mada'a Petrus 'o masoloto moju. Toma 'orasa gena-ge namo 'i solene.

Yesus sitalaḏi ra Pilatus

(Mat. 27:1-2, 11-14; Mrk. 15:1-5; Luk. 23:1-5)

28Da-daini i'a moju ananga raḏi 'oro 'a Yesus ra Kayafas 'ai wala, kara 'U gasa Unanga ra gubernur Roma 'ai kadato. Ngowa-ngowa'a Yahudi manga bi-biri'i masiretene 'aḏi osama ua toma kadato ma dara, la awa manga diri 'i faja mete'e 'agama ma 'atoranga, sababu ananga mau 'aḏi mete'e oromo toma Paskah ma Wangere ma laya. 29Sababu gena-ge, Governor Pilatus 'o supu re 'o sano ra ananga, “Ngini ninga da'awa 'oru ra Unanga nena-ne?”

30Ananga ya sangoro, “Na'o Unanga kai sala ua, ngomi mi gasa ua ra Tuanga!”

31Ḏua Pilatus 'o kanau ra ananga, “Nu 'oro re nu gasa Unanga, la nu sijuruhakimi Unanga mete'e ngini ninga hukumu masiretene.”

Mada'a ngowa'a Yahudi manga bi-biri'i 'aḏi sangoro, “Ngomi mi sihukumu sengene ngowa'a yoḏu'u.”

32(Enanga 'i dadi so'o gena-ge, la sitotomo 'oru ga'a Yesus ro kanau ḏua, mangale Unanga 'ai se-sengene ma ngo'omo.)#Yoh. 3:14, 12:32 33Pilatus dadunu 'o osama tai Kadato ma dara re 'o 'aro'o Yesus, kara 'o sano, “Ngana ngowa'a Yahudi manga 'Olana bolo ua?”

34Yesus 'o sangoro, “Mete'e 'ani 'akala ma sanga masiretene bolo ngowa'a lelegu 'aḏi siajele ra ngana mangale Ngoi?”

35Pilatus 'o sangoro, “Ngoi ngowa'a Yahudi ua! Ngowa'a Yahudi 'Ani bangsa masiretene, ananga re 'imam-'imam ma sae'e ḏi'i, ananga gena-ge 'aḏi gasa Ngana ra ngoi. 'Oru ga'a Ngana reno 'a'a?”

36Yesus 'o kanau, “Ngoi 'ari pareta ma 'asala toma dungia nena-ne ua. Sababu na'o ma 'asala toma dungia nena-ne, Ngoi 'ari ngowa-ngowa'a 'aḏi sapolo lawana, la ngowa'a Yahudi manga bi-biri'i 'aḏi cako'o Ngoi ua. Mada'a mode-mode'e Ngoi 'ari pareta ma 'asala toma dungia nena-ne ua.”

37Ḏua Pilatus dadunu sano moju, “Na'o so'o gena, Ngana nena-ne 'olana?”

Yesus 'o sangoro, “Ngana masiretene no aje, Ngoi nena-ne 'Olana, re 'ani demo 'i banari. 'Ari ngina sibuoro Ngoi re ngoi to sapolo toma dungia nena-ne, di'a maksudu rimoi ḇato: di'a To pula'a sakisi mangale 'ori i'a ga'a ba-banari. Ngowa'a mo-moini ga'a 'aḏi disa ba-banari, ananga gena-ge 'aḏi mete'e Ngoi 'ari do-doto'o.”

38aPilatus 'o sano, “Ba-banari gena-ge 'oru?!”

Yesus 'o sanga hukumu sengene

(Mat. 27:15-31; Mrk. 15:6-20; Luk. 23:13-25)

38bGena ḏua, unanga dadunu 'o supu re 'o kanau toma ngowa-ngowa'a Yahudi, “Ngoi ta sanga Unanga 'ai sala rimoi i'a mai ua. 39Mada'a mete'e ngini ninga 'atoranga wakutu Paskah ma Wangere, ngoi to sibebasa matengo toma bui. Dadi na'o ngini ni mau, ngoi nyengara to sibebasa Unanga, ngowa'a Yahudi manga 'olana?”

40Ananga ya sangoro ya siduga-duga, “Sibebasa Unanga awa, sibebasa 'a Barabas!” (Barabas gena-ge unanga 'o lawana Roma ma pareta.)

Currently Selected:

Yohanes 18: SNT

Highlight

Copy