Lukas 17

Ma'istiari 'ori i'a rimoi i'a ga'a sigasa ngowa'a 'aḏi eta'a toma ḏosa

(Mat. 18:6-7, 21-22; Mrk. 9:42)

1Yesus 'o kanau Tai me-mete'e, “Tantu ḏua 'ori i'a rimoi sigasa ngowa'a 'aḏi eta'a toma ḏosa, mada'a bahala 'a guna ḇato 'ai ga'a sigasa ngowa'a ma lelegu di'a eta'a toma ḏosa! 2Jobilaha maḏi la-lamo'o 'i siḏobe tai camala, kara siupa'a unanga toma ngoloto reo unanga 'ai ga'a 'i sigasa ngowa'a ma pake ua ga'a ngaku Ngoi, 'o eta'a toma ḏosa. 3Sababu gena-ge, ngini ni ma'istiari.

Na'o 'ani ioronongoḏu 'o 'a'a ḏosa ra ngana, ḇangata unanga. Na'o 'ani ioronongoḏu gena-ge 'o maḏibo toma ngo'omo boloto, si'apongo unanga.#Mat. 18:15 4Na'o 'ani ioronongoḏu gena-ge 'o 'a'a ḏosa ra ngana, wange moi sou tumudingi re 'o sapolo tau-taunu sou tumudingi ḏi'i ra ngana re 'o kanau, ‘Ngoi to golo'o ma'afu,’ na si'apongo unanga.”

Do-doto'o mangale ngo-ngaku

5Yesus 'ai so-soma'a 'aḏi kanau ra Ma Jou, “Ma Jou na site'e minga ngo-ngaku.”

6Ma Jou 'a sangoro, “Na'o ngini ninga ngo-ngaku ma lamo'o sa'olo gisisi lai ceka'a ma moi ngai moi, ngini nga'unu ni kanau i'a toma ate 'ara, ‘Mawoi'i toma ngi'i gena-ge re malage toma ngoloto,’ tantu ḏua ate gena-ge 'i mete'e ninga parenta.”

Budaka 'ai munara di'a mete'e 'ai tuanga ma parenta

7“Si'ade-'ade i'a taninga sigolona 'age rema ngowa'a matengo rai budaka ga'a 'o mapajeko toma guḏa bolo 'o jaga doba. Wakutu 'ai budaka gena-ge 'o ḏibo toma wala, sanga ua ngana no kanau ra unanga gena-ge, ‘Capati ino re no oromo!’ 8Tantu ḏua, ngana no kanau, ‘Na ḏu-ḏuanga i'a ngoi 'ari ngo-ngoromo, no ngali 'ani pakeanga la-la, re no de-de'oso ngoi singadolo ngoi to oromo togumu ḏua, kara ngana no oromo ḏi'i.’ 9Paralu ua no sitoro budaka gena-ge, sababu unanga pa'i 'a mete'e 'ai tuanga ma parenta ḇato. 10So'o gena ḏi'i ngini, na'o ngini 'a'a Ngoi 'ari parenta mo-moini ḏua, ni kanau ‘Ngomi pa'i budaka ḇato, ngomi pa'i mi 'a'a 'oru ga'a 'i dadi ngomi minga munara.’ ”

Yesus 'o si-la ngowa'a si-siḏi 'eno'o nga nyagi moi

11Wakutu Yesus 'o tagi toma limau Yerusalem 'o tola'a i'a daeraha Samaria re daeraha Galilea ma bati. 12Wakutu Unanga 'o osama toma gamu rimoi, 'age rema ngowa'a si-siḏi 'eno'o#17:12 Oḏi'i 5:2 nga nyagi moi 'aḏi made-de'oso toma giḏanga mau ma'u sanga ra Yesus. 13Ananga 'aḏi madigaro'o siduga-duga, “Yesus, Tuanga, no sijumu 'Ani 'akala re sinyingara ma la-la ra ngomi!”

14Yesus 'o oḏi'i ananga so'o gena, ḏua 'o kanau, “Ni tagi toma 'imam-'imam, golo'o ananga ya oḏi'i ninga lese.” Dadi ananga 'aḏi tagi re tamanga ḏo-ḏagi ma dara, ananga manga si-siḏi ri iranga.#Im. 14:1-32

15'Age matengo toma ngowa'a si-siḏi 'eno'o gena-ge nga nyagi moi manga sigolona, wakutu unanga 'o mabasono tala 'ai si-siḏi ri iranga, unanga 'o maḏibo rai roanga re monere 'o puji re silamo'o Ma Jou'ongu Madutu rai iḏingi 'a siduga-duga. 16Unanga 'o mapagara 'ai biono tala ra Yesus 'ai rou, re 'o pula'a murasa ma la. Unanga gena-ge ngowa'a Samaria. 17Ḏua Yesus 'o kanau, “Ngoi ta'u si-la ngowa'a nga nyagi moi, nga siworo ananga le'a? 18I'a sa'olo pa'i unanga matengo ḇato 'o maḏibo di'a 'o pula'a 'ai murasa ma la ra Ma Jou'ongu Madutu! Sidogo ḏi'i unanga nena-ne, ngowa'a Yahudi ua!” 19Ḏua Yesus 'o kanau toma ngowa'a gena-ge, “Te'oso re no tagi, sababu ngana no ngaku Ngoi, ngana reno la.”

Ngau Ma Jou'ongu Madutu 'ai Pareta 'i sapolo?

(Mat. 24:23-28, 37-41)

20Toma wangere rimoi, Ngowa'a Farisi nga muḏuo i'a 'aḏi sano ra Yesus, “Ngau Ma Jou'ongu Madutu 'ai Pareta 'i sapolo?”

Yesus 'a sangoro, “Ngowa'a 'aḏi oḏi'i ua Ma Jou'ongu Madutu 'ai Pareta 'i sapolo sababu 'i sapolo ua reo didina'o-didina'o ga'a nyengara 'aḏi oḏi'i. 21Ngowa'a 'aḏi kanau yoḏu'u, ‘Enanga nanga 'ane!’ bolo ‘Enanga nanga da'a!’ Sababu Ma Jou'ongu Madutu 'ai Pareta 'i tegoro ra ngini ninga 'akala re sinyingara ma dara.”#17:21 'Age toma kartasi lo-lolo lelegu 'i silefo so'o ne: sababu Ma Jou'ongu Madutu 'ai Pareta 'i tegoro taninga sigolona.

22Ḏua Unanga 'o kanau Tai me-mete'e, “Ḏuanga i'a ma 'orasa 'i sapolo na'o ngini mau ni oḏi'i Ngoi, Manusia ma Ngowa'a Nau'u, mada'a ni oḏi'i yoḏu'u. 23Maha ngowa'a ḏuanga i'a 'aḏi kanau ra ngini, ‘Oḏi'i Unanga 'ane’ bolo ‘Oḏi'i Unanga da'a.’ Mada'a ni tagi mete'e awa! 24Ngoi, Manusia ma Ngowa'a Nau'u ḏuanga i'a to sapolo moju ma tero sa'olo ḇeḇelanga 'i cawi-cawi da'u diwanga tala, re ma lalaki dai dere ngadolo dina dere. 25Mada'a siḏa-siḏa, Ngoi balasu to basono sangisara toma ngowa-ngowa'a 'orasa nena-ne ga'a 'aḏi oḏu'u dawongo Ngoi.

26Wakutu Ngoi, Manusia ma Ngowa'a Nau'u dadunu to sapolo moju, gena-ge ma tero sa'olo 'oru 'i dadi toma 'orasa nabi Nuh 'ua re 'au wali.#Do. 6:5-8 27Toma 'orasa nabi Nuh, ngowa'a 'aḏi oromo re 'aḏi ka'e, ananga 'aḏi ma'u molo'ara singadolo ma wangere 'a Nuh 'o osama toma kapala ma dara re ngu'uisi sapolo singadolo ngowa'a mo-moini matai sengene.#Do. 7:6-24 28So'o gena ḏi'i, 'orasa 'a Lot. Ngowa'a 'aḏi oromo re 'aḏi ka'e, matibo re mawu'unu, ngowa'a 'aḏi maso'ana re side'oso wala. 29Mada'a wangere gena-ge 'i ngadolo 'a Lot 'o supu toma limau Sodom, 'o u'u re walira 'i 'uci da'u diwanga tala singadolo ananga mo-moini 'aḏi sengene.#Do. 18:20—19:25 30So'o gena ḏi'i, toma wangere Ngoi, Manusia ma Ngowa'a Nau'u, dadunu to sapolo moju.

31Ma wangere gena-ge, ngowa'a da'u toma wala teru, 'uci awa di'a 'o 'oro 'ori i'a rana tai wala ma dara! So'o gena-ge ḏi'i, ngowa'a toma guḏa, maḏibo awa tai wala!#Mat. 24:17-18; Mrk. 13:15-16 32'Elingi, 'oru ga'a 'i dadi ḏua ra Lot 'ai were'a.#Do. 19:26 33'A guna ḇato 'o kadiarata pa'i 'ahu toma dungia nena-ne ḇato, unanga gena-ge 'o sanga ua 'ahu kasingado-ngadolo i'a. Mada'a 'a guna ḇato 'o ḏu-ḏuanga ḏua di'a 'o sengene sababu mete'e Ngoi, unanga gena-ge ḏuanga i'a 'o sanga 'ahu kasingado-ngadolo i'a.#Mat. 10:39, 16:25; Mrk. 8:35; Luk. 9:24; Yoh. 12:25

34Ngoi to siajele ra ngini nena-ne: Lobi'i gena-ge, 'age rema ngowa'a nga muḏiḏi 'aḏi otu ma dederu moi: Matengo ga'a 'o mete'e Ngoi 'o sanga salamata mada'a matengo ḏi'i 'o mete'e Ngoi ua 'o sanga salamata ua. 35We-were'a nga muḏiḏi 'aḏi mamete'e gulinga gandum: Matengo ga'a mo mete'e Ngoi mo sanga salamata mada'a matengo ḏi'i mo mete'e Ngoi ua mo sanga salamata ua. [36Na-nau'u nga muḏiḏi 'aḏi munara toma guḏa: Matengo ga'a 'o mete'e Ngoi 'o sanga salamata mada'a matengo ḏi'i 'o mete'e Ngoi ua 'o sanga salamata ua.]”

37Yesus 'ai me-mete'e 'aḏi sano, “Ma Jou, gena-ge 'i dadi le'a i'a?”

Yesus 'a sangoro, “Ngowa'a mo-moini ḏuanga i'a 'aḏi waro ma ngi'i gena-ge. Gena-ge ma tero sa'olo ngowa'a 'aḏi waro ngi'i le'a ḇato rema mayeti, sababu 'aḏi oḏi'i 'age rema namo-namo ga'a 'i 'omo-'omo mayeti.”

Currently Selected:

Lukas 17: SNT

Highlight

Copy