Lukas 20

So-sano mangale Yesus 'ai kuasa

(Mat. 21:23-27; Mrk. 11:27-33)

1Toma wangere rimoi Yesus 'o doto'o re 'o singadolo Habari Roanga ra Ma Jou'ongu Madutu ino toma ngowa-ngowa'a ra Ma Jou'ongu Madutu 'ai Wala ma soana. 'Imam-'imam ma sae'e re guru-guru 'agama re Yahudi manga sae'e, ananga 'aḏi sapolo ḏi'i. 2Ananga 'aḏi sano ra Yesus, “No sanga kuasa le'a ino re 'a guna 'o pula'a kuasa ra Ngana singadolo nga'unu no 'a'a mo-moini so'o nena-ne?”

3Yesus 'a sangoro, “Ngoi mau to sano ḏi'i ra ngini. Ngini ni siajele ra Ngoi. 4'A Yohanes tukanga baptis, unanga gena-ge 'o sanga 'ai kuasa ra guna ino? Ra Ma Jou'ongu Madutu bolo toma manusia ino?”

5Ḏua ananga mulaingi 'aḏi ma'u kanau, “Na'o ngene wo sangoro, ‘ 'A Yohanes gena-ge 'o sanga kuasa ra Ma Jou'ongu Madutu ino,’ ḏua Unanga 'o sano, ‘Na'o so'o gena-ge, i'a sa'olo ngini ni ngaku Unanga ua?’ 6Mada'a na'o ngene wo sangoro, ‘Unanga 'o sanga kuasa toma manusia,’ ngowa'a mo-moini 'aḏi poini ngene reo maḏi, sababu ananga 'aḏi ngaku Yohanes gena-ge 'o nabi.” 7Dadi ananga 'aḏi sangoro, “Ngomi ma waro ua.”

8Ḏua Yesus 'o kanau ra ananga, “Na'o so'o gena, Ngoi mai ta siajele ua ra ngini mangale Ngoi to sanga kuasa ra guna ino singadolo nga'unu ta si'a'a mo-moini gena-ge.”

'Ade-'ade mangale ngowa'a munara toma guḏa 'anggur

(Mat. 21:33-46; Mrk. 12:1-12)

9Yesus 'o kanau ḏi'i toma ngowa-ngowa'a gena-ge reo 'ade-'ade rimoi so'o ne: “ 'Age matengo 'o otomo 'anggur tai guḏa ḇotu moi. Unanga gena-ge 'o sisewa toma ngowa-ngowa'a munara toma guḏa, kara 'o tagi lai ti'ara.#Yes. 5:1 10Wakutu ma 'orasa 'utu'u enanga 'i ngadolo, guḏa ma dutu 'o siḏingoto 'ai budaka matengo 'o tagi toma ngowa-ngowa'a munara toma guḏa di'a ya 'oro 'ai balangu. Mada'a ngowa-ngowa'a munara toma guḏa 'u ca'olo 'ai budaka gena-ge, kara 'aḏi soma'a maḏibo ma nga-ngawere. 11Ḏua guḏa ma dutu dadunu 'o siḏingoto 'ai budaka ma lelegu matengo 'o tagi toma ngowa-ngowa'a munara toma guḏa. Mada'a ananga gena-ge 'u ca'olo ḏi'i re 'aḏi sipula'a mara'a, kara 'aḏi soma'a maḏibo ma nga-ngawere. 12Togumu i'a, guḏa ma dutu 'o siḏingoto 'ai budaka ma soi ro'ange matengo 'o tagi toma ngowa-ngowa'a munara toma guḏa. Mada'a ananga gena-ge 'u ca'olo singadolo nyabo-nyaboto kara 'aḏi siwale unanga toma guḏa ma di'anga.

13Ma ḏo-ḏogumu tala guḏa ma dutu 'o kanau, ‘Ngoi balasu to 'a'a 'oru moju? Ngoi ḏuanga i'a to siḏingoto 'ari ngowa'a nau'u ga'a ta dadalara. Tantu ḏua, ananga 'aḏi silamo'o unanga!’

14Mada'a wakutu ngowa-ngowa'a munara toma guḏa 'aḏi oḏi'i guḏa ma dutu 'ai ngowa'a nau'u 'o sapolo, ananga 'aḏi ma'u kanau matengo re matengo, ‘Unanga nena-ne 'o warisi ma gu-gu'u. Ino ngene wu sisengene unanga, la ngene wa sanga 'ai warisi.’ 15Ananga 'aḏi taba-taba'a unanga toma guḏa ma di'anga, kara 'u sisengene.”

Ḏua Yesus 'o sano, “Wakutu guḏa ma dutu gena-ge 'o sapolo toma guḏa unanga 'o 'a'a 'oru tai ngowa-ngowa'a munara toma guḏa gena-ge?! 16Tantu ḏua, Unanga 'o sapolo re ya'u sisengene ngowa-ngowa'a munara toma guḏa gena-ge, re 'o pula'a 'ai guḏa 'anggur toma ngowa-ngowa'a munara toma guḏa ma lelegu.”

Wakutu ngowa'a gena-ge ya 'isene so'o gena 'aḏi kanau ra Yesus, “Awa 'i dadi so'o gena-ge!”

17Yesus 'o tatamo i'a ngowa'a gena-ge re 'o kanau, “Na'o so'o gena, bu-bula'a ga'a 'i silefo toma Boku 'Ofi-'Ofi ma dara mangale 'oru?

‘Maḏi ga'a wala ma tukanga-tukanga ya upa'a,

ma nyonyata maḏi gena-ge ri dadi maḏi ma re'u i'a di'a wala ma bangini.’#Nya. 118:22

18Ngowa'a mo-moini 'aḏi eta'a toma maḏi gena-ge, ananga raḏi wejere rotu-rotu, re 'a guna ḇato ga'a maḏi gena-ge 'u pe-pe'ara, unanga 'o wejere singadolo 'o dadi korou'u.”

Mangale fangu balastengi

(Mat. 22:15-22; Mrk. 12:13-17)

19Guru-guru 'agama re 'imam-'imam ma sae'e ya waro 'ade-'ade gena-ge Yesus 'o kanau mangale ananga. Sababu gena-ge, ananga 'aḏi disa ngo'omo, la cako'o 'a Yesus toma 'orasa gena-ge ḏua, mada'a 'aḏi mojongo ngowa'a kawasa. 20Dadi 'aḏi disa donga gasa 'i rousu i'a. Ananga 'aḏi siḏingoto mata-mata ga'a 'aḏi masa-sakala matuhu ma tero sa'olo ngowa'a la-la di'a disa Yesus 'ai sala, la ananga 'aḏi sitalaḏi Yesus ra gubernur Pilatus. 21Mata-mata gena-ge 'aḏi kanau ra Yesus, “Guru, ngomi waro Jou 'ani demo re 'ani do-doto'o 'i banari re No mete'e ua 'a guna ḇato 'ai mau, mada'a no doto'o ma duhu sa'olo di'a ngowa'a balasu 'aḏi 'ahu mete'e Ma Jou'ongu Madutu 'ai 'akala ma mau. 22Na'o so'o gena Jou no siajele ra ngomi: Mete'e nanga 'agama ma 'atoranga, ngene balasu wo fangu balastengi ra Kaisar bolo ua?”

23Mada'a Yesus 'a waro ananga manga 'akala re sinyingara ma jira. Sababu gena-ge, Unanga 'o kanau, 24“Tai'i na sibaiti ra Ngoi pipisi salaka ngai moi. 'A guna 'ai biono re 'ai lomanga?”

Ananga ya sangoro, “Kaisar.”

25Yesus 'o kanau ra ananga, “Na'o so'o gena, ta Kaisar pula'a di'a Kaisar re ta Ma Jou'ongu Madutu, pula'a di'a Ma Jou'ongu Madutu.” 26Ananga ya sanga ua Yesus 'ai sala toma ngowa'a repe manga biono. Ananga pa'i 'aḏi masiogoro ḇato, sababu ananga 'aḏi heranga Unanga 'ai sa-sangoro.

Mangale dadunu 'o 'ahu moju

(Mat. 22:23-33; Mrk. 12:18-27)

27Ngowa'a Saduki nga muḏuo i'a 'aḏi sapolo ra Yesus. (Ngowa'a Saduki 'aḏi ngaku ua ngowa'a dadunu 'aḏi 'ahu toma ngowa'a senge-sengene manga sigolona.) Ananga gena-ge 'aḏi sano ra Unanga.#Som. 23:8 28“Guru, 'a Musa 'o lefo hukumu di'a ngene so'o ne: Na'o nau'u matengo 'o sengene kai ngowa'a ua; 'ai ioro bolo 'ai nongoḏu balasu 'a molo'ara balo gena-ge, la ngowa'a sengene nange-ge 'ai ju'uda 'i iranga awa.#Dad. 25:5 29'I dadi ḏua, toma ngowa'a nau'u gena-ge, gia nongoḏu nga tumudingi. Ma ioro ro molo'ara re 'o sengene kai ngowa'a ua. 30Gena ḏua, ma nongoḏu 'a molo'ara ma ioro 'ai balo, mada'a singadolo unanga 'o sengene kai ngowa'a ua ḏi'i. 31Gena-ge 'i dadi ḏi'i tai no-nongoḏu tala ma reta-reta'a singadolo nga tumudingi. 32Ma ḏo-ḏogumu tala were'a gena-ge mo sengene ḏi'i. 33Sababu gena-ge toma 'orasa ngowa'a senge-sengene dadunu 'aḏi 'ahu moju, we-were'a gena-ge 'a guna 'ai were'a? Sababu munanga ma'u molo'ara mo-moini ananga nga tumudingi!”

34Yesus 'a sangoro, “Ngowa-ngowa'a 'ahu toma dungia nena-ne biasa 'aḏi ma'u molo'ara. 35Mada'a toma dungia su-sungi so'o gena-ge ua. Ma Jou'ongu Madutu ḏuanga i'a 'o dadunu si'ahu moju ngowa'a ga'a patasa ra Unanga 'ai momina. Ananga gena-ge kama ma'u molo'ara ua. 36Ananga manga 'ahu ma tero sa'olo mala'ekata ma 'ahu, ananga kama sengene ua. Ananga gena-ge Ma Jou'ongu Madutu 'ai ngowa-ngowa'a, sababu Ma Jou'ongu Madutu 'o si'ahu moju ananga gena-ge toma ngowa'a senge-sengene manga ngi'i. 37'A Musa 'o sijumu mangale ngowa'a sengene ḏua, ḏuanga i'a dadunu 'ahu moju. Sababu toma carita mangale 'o goroa 'i leja-lejanga toma dara unanga 'o siajele mangale Ma Jou gena-ge sa'olo, ‘Ma Jou'ongu Madutu ga'a Abraham, Ishak re Yakub 'aḏi silamo'o re siḏubuso.’ #Sup. 3:6 38Ngowa'a sengene 'aḏi silamo'o re siḏubuso yoḏu'u Ma Jou'ongu Madutu, pa'i ngowa'a 'ahu-'ahu ḇato nyengara 'aḏi silamo'o re siḏubuso Unanga.”#20:38 Gena-ge ma ngale: Kalaha 'a Abraham, 'a Isak, 'a Yakub, ananga mo-moini raḏi sengene, ananga gena-ge 'aḏi 'ahu-'ahu moju ra Ma Jou'ongu Madutu 'ai biono!

39Guru 'agama nga muḏuo i'a 'aḏi kanau, “Guru 'ani sa-sangoro ne lai rousu madutu.” 40Sababu gena-ge, ananga raḏi mojongo 'aḏi sano 'oru ḇato ra Yesus.

'O Kristus, 'Olana Daud 'ai ju'uda re 'ai Jou

(Mat. 22:41-46; Mrk. 12:35-37)

41Yesus 'o sano ra ananga, “I'a sa'olo ngene wo kanau 'O Kristus 'Olana Daud 'ai ju'uda? 42Momongolo ua toma boku Mazmur ma dara, 'a 'Olana Daud 'o kanau:

‘Ma Jou'ongu Madutu 'o kanau Tari Jou: #20:42 “Jou” ma tero sa'olo 'O Kristus

No tegoro Tari giama ma kuwiḏa i'a

43singadolo Ngoi ta 'a'a 'Ani lawa-lawana 'aḏi ta'aloko ra Jou.’#Nya. 110:1

44Dadi na'o 'O Kristus gena-ge 'a 'Olana Daud 'ai ju'uda, i'a sa'olo 'Olana Daud 'o si'aro'o 'O Kristus gena-ge 'ai Jou?”

Ma'istiari ino toma guru-guru 'agama

(Mat. 23:1-36; Mrk. 12:38-40)

45Toma 'orasa gena-ge 'a Yesus 'o kanau Tai me-mete'e re ngowa'a repe 'aḏi 'isene ḏi'i, Unanga 'o kanau, 46“Ma'istiari ino taninga guru-guru 'agama. Ananga 'aḏi nyanyaḏi tagi-tagi mapake juba kiḏanga, re 'aḏi nyanyaḏi ḏi'i ngowa'a ya'u silamo'o toma pasara. Ananga 'aḏi nyanyaḏi tegoro toma biono na'o toma wala puji re toma laya-laya. 47Ananga 'aḏi sihaga balo-balo, re ya'u ra-rabasa ananga manga 'ori i'a rana tamanga wala ma dara. Re ananga 'aḏi manyiata lai kiḏa-kiḏanga di'a ya damunu manga kajahatana. Sababu gena-ge, Ma Jou'ongu Madutu ḏuanga i'a 'o sihukumu lai tubuso madutu ra ananga!”

Currently Selected:

Lukas 20: SNT

Highlight

Copy