Lukas 24

Yesus dadunu 'o 'ahu moju

(Mat. 28:1-10; Mrk. 16:1-8; Yoh. 20:1-10)

1Da-daini i'a moju toma Migu ma wangere, we-were'a gena-ge 'aḏi tagi toma kubu re 'aḏi gasa rampa-rampa ga'a ananga ya sidodahe pasala ḏua. 2'Aḏi ngadolo toma kubu ya sanga i'a kubu ma da-damunu maḏi ri lulu ie. 3Ḏua ananga 'aḏi osama toma kubu ma dara, mada'a ya sanga ua Ma Jou Yesus 'ai mayeti. 4Ananga 'aḏi made-de'oso toma ngi'i gena-ge re ya waro manga gogare riwara, kage-kage ngowa'a nga muḏiḏi raḏi made-de'oso toma we-were'a manga gumuḏu re ananga manga pakeanga 'i ciḏo-ciḏoto. 5We-were'a gena-ge 'aḏi mojongo lai siḏi, ḏua 'aḏi maḏipolono manga biono ngadolo toma tana'a toma ngowa'a nga muḏiḏi gena-ge. Ananga gena-ge 'aḏi kanau toma we-were'a gena-ge, “I'a sa'olo ngini disa ngowa'a 'ahu toma ngowa'a senge-sengene manga sigolona! 6Unanga ro cua 'ane-ne, Unanga ro dadunu 'o 'ahu moju. Ni 'elingi 'oru ga'a Unanga 'o kanau pasala ḏua ra ngini wakutu Unanga toma Galilea 7mangale Manusia ma Ngowa'a Nau'u ḏuanga i'a sipula'a toma ngowa'a baraḏosa re 'U sisalib, kara toma wangere ma soi ro'ange, Unanga dadunu 'o 'ahu moju.”#Mat. 16:21, 17:22-23, 20:18-19; Mrk. 8:31, 9:31, 10:33-34; Luk. 9:22, 18:31-33

8Dadi we-were'a gena-ge ananga ya si'elingi ie mangale Yesus 'ai demo-demo. 9Wakutu ananga 'aḏi maḏibo da'a kubu ino, ananga ya sijarita ra Yesus 'ai so-soma'a nga nyagi moi re matengo re 'Ai me-mete'e lelegu mo-moini ga'a 'i dadi pasala ḏua. 10We-were'a—we-were'a ga'a 'aḏi sijarita gena-ge ra Yesus 'ai so-soma'a, ananga gena-ge: ngo Maria Magdalena, ngo Yohana, re ngo Maria 'a Yakobus 'ai ngina, re we-were'a ma lelegu ḏi'i ga'a 'aḏi ma'u mete'e. 11Mada'a Yesus 'ai me-mete'e ananga 'aḏi ta'ajiri we-were'a gena-ge 'aḏi jarita 'ori i'a ma faeda 'i cua. Dadi ananga ya ngaku ua. 12Mada'a Petrus 'o te'oso re jau-jau 'o lalara si'a toma kubu, i'a da'a unanga 'o maruku re 'a tatamo kubu ma dara. Unanga 'a oḏi'i 'age pa'i ḇa'a linen. Petrus 'o heranga masala, ḏua ro maḏibo re madibanga tau-taunu tai 'akala re sinyingara ma dara 'oru ga'a 'i dadi pasala ḏua.

Yesus 'o masibaiti toma ngo'omo tagi gamu Emaus

(Mrk. 16:12-13)

13Toma wangere gena-ge ḏi'i, Yesus 'ai me-mete'e nga muḏiḏi 'aḏi tagi toma gamu rimoi ma lomanga Emaus. Toma limau Yerusalem tagi toma gamu Emaus ma giḏanga ḏa kilo nyagi moi re rimoi. 14Toma ḏo-ḏagi ma dara ananga 'aḏi ma'u kanau mangale mo-moini 'oru ga'a 'i dadi pasala ḏua. 15Wakutu ananga 'aḏi ma'u kanau re ma'u sano i'a re ino, Yesus masiretene 'o sebanga i'a re tagi mamete'e ra ananga. 16Ananga 'aḏi oḏi'i Yesus, mada'a 'age 'ori i'a rimoi i'a ma tero sa'olo ngowa'a ya piri'u manga la'o reo ḇa'a, singadolo ananga 'aḏi nana'o Unanga ua. 17Ḏua Yesus 'o sano, “Ngini ni makanau mangale 'oru toma ngo'omo ma golona?” Ananga 'aḏi matogumu tala remanga 'akala re sinyingara kangela 'i waiti tamanga biono.

18Ḏua matengo 'ai lomanga Kleopas 'o sano ra Yesus, “Pa'i Jou matengo ḇato ngowa'a sa-sapolo ino toma limau Yerusalem ga'a na waro ua 'oru ga'a 'i dadi pasala ḏua!”

19Yesus 'o sano, “ 'Oru 'i dadi ḏua?” Ananga ya sangoro, “ 'Oru ga'a 'i dadi ḏua ra Yesus, ngowa'a Nazaret ino. Unanga gena-ge 'o Nabi. 'Ai demo re 'Ai ga'a rema kuasa — bae ra Ma Jou'ongu Madutu 'ai momina bae ḏi'i toma manusia mo-moini manga momina. 20Mada'a 'imam-'imam ma sae'e re Yahudi manga bi-biri'i 'aḏi sipula'a unanga di'a sihukumu sengene re ananga 'U sisalib Unanga! 21Momongolo ua ngomi masinganono Unanga nga'unu 'o sibebasa Israel tamanga lawana! Unanga ro sengene, singadolo nange-ne toma wangere ma soi ro'ange ḏua. 22Sidogo ḏi'i, we-were'a nga muḏuo i'a tananga sigolona ananga 'aḏi sikage ngomi: Da-daini i'a moju, ananga raḏi tagi toma kubu. 23Mada'a i'a da'a, ananga ya sanga ua Yesus 'ai mayeti. Ḏua 'aḏi maḏibo ino ra ngomi re 'aḏi siajele ananga 'aḏi oḏi'i mala'ekata-mala'ekata. Re mala'ekata-mala'ekata gena-ge 'i siajele mangale Yesus dadunu 'o 'ahu moju. 24Ḏua nga muḏuo i'a taminga sigolona, ananga ya 'isene so'o gena jau-jau 'aḏi tagi ḏi'i toma kubu gena-ge re ya sanga i'a ma tero sa'olo we-were'a ya siajele, mada'a ananga 'aḏi oḏi'i Yesus ua.”

25Ḏua Yesus 'o kanau i'a ra ananga, “Ngini mode-mode'e ni haga! Ni ngaku nyangu moju mangale 'oru ga'a nabi-nabi ya lefo ḏua 'ua re 'au wali! 26Tantu ḏua, 'O Kristus balasu 'a basono ma sangisara kara nga'unu 'o osama Tai mulia.” 27Gena ḏua, Yesus 'a sitarangi ra ananga 'oru ga'a silefo ḏua toma Boku 'Ofi-'Ofi ma dara mangale Unanga masiretene; mulaingi ra Musa 'ai boku-boku re nabi-nabi mo-moini manga boku.

28Wakutu gena ananga sa'i ri co-cori osama toma gamu Emaus, Yesus 'o 'a'a sa'olo 'o mau tagi turusu. 29Mada'a ananga 'aḏi baḏu re 'aḏi kanau ra Unanga, “No otu ra ngomi, sababu sa'i 'i lobi'i re sa'i 'i hafu-hafu.” Dadi Yesus 'o osama marimoi ra ananga. 30Wakutu ananga 'aḏi tegoro oromo, Yesus 'a 'oro ma roti re 'O sibere ie murasa ma la ra Ma Jou'ongu Madutu, kara 'A poti-poti ma roti re 'O pula'a ra ananga. 31Toma 'orasa gena-ge, ananga aro 'aḏi waro mangale Unanga gena-ge 'a Yesus - enanga 'i ma tero sa'olo manga la'o ma bi-biri'u ri woi'i. Mada'a kage-kage Unanga ro iranga tamanga sigolona. 32Ananga 'aḏi makanau matengo re matengo, “Tero mode'e Unanga nena-ne Yesus sababu tananga 'akala re sinyingara ma dara basono tala ma roanga 'i ro'u-ro'u, wakutu Unanga 'o kanau ra ngene toma ngo'omo ma golona moju, re 'A sitarangi Boku 'Ofi-'Ofi ma dara ra ngene!”

33Toma 'orasa gena-ge ḏua ananga te'oso re 'aḏi tagi maḏibo toma limau Yerusalem. I'a da'a, ananga gena-ge 'aḏi ma'u sanga Yesus 'ai me-mete'e nga nyagi moi re matengo re 'Ai me-mete'e ma lelegu, ananga 'aḏi malomu. 34Ḏua ananga ga'a 'aḏi malomu gena-ge 'aḏi kanau, “Tero mode'e, Ma Jou ro dadunu 'o 'ahu moju! Unanga ro masibaiti ra Simon!”

35Yesus 'ai me-mete'e nga muḏiḏi waro 'aḏi sapolo re ya sijarita ḏi'i 'oru ga'a ananga 'aḏi oḏi'i re 'aḏi basono toma ngo'omo ma golona, singadolo ananga 'aḏi waro Unanga gena-ge Yesus wakutu 'A poti-poti roti toma wala.

Yesus 'o masibaiti Tai me-mete'e

(Mat. 28:16-20; Mrk. 16:14-18; Yoh. 20:19-23; Som. 1:6-8)

36Wakutu ananga 'aḏi maja-jarita moju, kage-kage Yesus masiretene 'O made-de'oso tamanga sigolona, re 'O kanau, “Dame ra ngini mo-moini.”

37Ananga 'aḏi kage re matai mojongo sababu 'aḏi ta'ajiri Unanga 'o ca'ata. 38Mada'a Yesus 'o kanau, “I'a sa'olo ngini ni mojongo? I'a sa'olo ninga 'akala re sinyingara ma dara wawaḏu? 39Oḏi'i 'Ari giama re 'Ari rou ma nyaboto. Nena-ne Ngoi ḏua! Ni cigi re ni tailako, sababu ca'ata ma la-la'eme re ma obongo 'i cua, ma tero Ngoi ua ga'a ngini masiretene rini oḏi'i.”

40Gena ḏua, Yesus 'o sijumu 'Ai giama re rou ma nyaboto ra ananga. 41Kalaha ananga 'aḏi maroanga siḏi woḏi re heranga, ananga 'aḏi ngaku nyangu moju. Sababu gena-ge, Yesus 'o sano ra ananga, “ 'Age reninga ngo-ngoromo?” 42Ananga 'aḏi pula'a nyao'o osumu poti moi ra Unanga. 43Yesus 'a 'oro nyao'o gena-ge, re 'a oromo ra ananga manga biono.

44Togumu i'a, Unanga 'o kanau ra ananga, “Wakutu Ngoi to marimoi ra ngini moju, Ngoi ta siajele ḏua ra ngini: Mo-moini mangale Ngoi ga'a 'i silefo ḏua ra Musa re toma nabi-nabi manga boku re toma Mazmur ma dara; gena-ge balasu 'i dadi.”

45Ḏua Yesus 'a welanga ananga manga fikirana, la ya sahe Boku 'Ofi-'Ofi ma dara. 46Unanga 'o kanau ra ananga, “Toma Boku 'Ofi-'Ofi ma dara 'i silefo mangale 'O Kristus balasu basono sangisara, re sengene re toma wangere ma soi ro'ange Unanga dadunu 'o 'ahu moju. 47Re ngowa-ngowa'a ḏuanga i'a 'aḏi singadolo habari rea Kristus gena-ge 'ai kuasa toma suku-suku mangale manusia balasu 'aḏi maḏibo toma ngo'omo boloto, la Ma Jou'ongu Madutu 'a singi-ngiranga manga ḏosa. Habari nena-ne balasu sirera re siwalata mulaingi toma limau Yerusalem singadolo toma dungia sitabi donga. 48Ngini nena-ne ni dadi 'ari sakisi ga'a 'ori i'a mo-moini ri dadi pasala ḏua. 49Ngoi masiretene ḏuanga i'a to siḏingoto Ma Ngagara 'Ofi-'Ofi ra ngini ga'a Ma Jou'ongu Madutu 'o sijaji 'ua re 'au wali. Mada'a ngini balasu ni totoma toma limau Yerusalem singadolo kuasa ra Ma Jou'ongu Madutu 'i sapolo tala ra ngini di'a site'e ngini.”#Som. 1:4

Yesus 'o pere sie toma soroga

(Mrk. 16:19-20; Som. 1:9-11)

50Togumu i'a, Yesus 'o gasa ananga tagi toma limau ma ḏuḏunu ngadolo toma gamu Betania. Toma ngi'i gena-ge Unanga 'a tede 'Ai giama re 'O sibarakati ananga.#Som. 1:9-11 51Wakutu Yesus 'o sibarakati ananga moju, Unanga 'o sisoi'i tala ananga Ro pere sie toma soroga.#24:51 Toma kartasi lo-lolo lelegu nena-ne 'i cua: “ro pere sie toma soroga.” 52Ananga 'aḏi maḏipolono silamo'o re siḏubuso Unanga. Gena ḏua, 'aḏi maḏibo toma limau Yerusalem remanga 'akala re sinyingara ma roanga masala 53re ananga 'aḏi puji re silamo'o Ma Jou'ongu Madutu tau-taunu ra Ma Jou'ongu Madutu 'ai Wala.

Currently Selected:

Lukas 24: SNT

Highlight

Copy