Matias 23

Ma'istiari ino toma guru-guru 'agama re ngowa-ngowa'a Farisi

(Mrk. 12:38-39; Luk. 11:37-54, 20:45-47)

1Gena ḏua, Yesus 'o kanau toma ngowa'a kawasa re Tai me-mete'e. 2“Guru-guru 'agama re ngowa-ngowa'a Farisi 'aḏi sanga kuasa di'a doto'o 'a Musa 'ai hukumu. 3Dadi ngini balasu na mete'e ti-tiai 'oru ga'a ananga 'aḏi doto'o mangale Musa 'ai hukumu. Mada'a awa na si'a'a mete'e ananga manga de'oso re ḏegoro, sababu ananga ya mete'e ua manga do-doto'o masiretene. 4Ananga 'aḏi simau-mau ngowa'a 'aḏi mete'e 'atoranga ma ḏu-ḏubuso ma tero sa'olo 'aḏi piri'u gina-gina ma ḏu-ḏubuso, kara siteru toma ngowa-ngowa'a manga bele'asa. Mada'a ananga masiretene ceka'a i'a mai ua 'aḏi riono ngowa'a ya siḏagi 'atoranga gena-ge.

5'Oru ḇato ga'a ananga ya si'a'a, enanga gena-ge di'a pa'i ngowa'a ya oḏi'i ḇato: Ananga 'aḏi mapake gumi ma nyiata ma ro-roata tamanga sae'e re giama re 'aḏi mapake juba ma renge-renge lai ki-kiḏanga.#Mat. 6:1; Dad. 6:8; Nyo. 15:38 6Ananga nyanyaḏi tegoro toma ngi'i ga'a ngowa'a ya'u silamo'o toma laya-laya, re toma wala puji 'aḏi nyanyaḏi tegoro toma kursi ga'a di'a ngowa'a la-lamo'o. 7Re ananga gena-ge 'aḏi nyanyaḏi ngowa'a ya'u silamo'o toma pasara-pasara, re ngowa'a ya'u si'aro'o ananga, ‘Rabi’.#23:7 “Rabi” toma demo Yunani “Guru” di'a ngowa'a ga'a 'o sayanga ma jingi'i.

8Mada'a ngini awa simaha ngowa'a nu'u si'aro'o ngini re nu'u 'aro'o ngini ‘Guru’. Sababu ninga Guru pa'i matengo ḇato, re ngini mo-moini ni ioronongoḏu ngo-ngaku rimoi. 9Re awa ni silamo'o re ni 'aro'o matengo i'a toma dungia nena-ne ‘Baba’. Sababu ninga Ḇaḇa pa'i matengo ḇato re Unanga gena-ge tegoro toma soroga. 10Re ngini awa simaha ngowa'a nu'u si'aro'o ngini re nu'u si'aro'o ngini ‘Ngowa'a Bi-biri'i’. Sababu ninga bi-biri'i pa'i matengo ḇato re Unanga gena-ge 'O Kristus. 11'A guna ga'a mau dadi ngowa'a lebe la-lamo'o i'a taninga sigolona, unanga balasu siḏa-siḏa 'o dadi ninga falalomu.#Mat. 20:26-27; Mrk. 9:35, 10:43-44; Luk. 22:26 12'A guna ḇato 'o sihie 'ai diri, unanga gena-ge ḏuanga i'a Ma Jou'ongu Madutu 'u siholo. Mada'a 'a guna ḇato 'o maholo 'ai diri, unanga gena-ge Ma Jou'ongu Madutu ḏuanga i'a 'u sihie.” #Luk. 14:11, 18:14

Yesus 'o emono ngowa'a munafiki

(Mrk. 12:40; Luk. 11:39-42, 44, 52, 20:47)

13“Bahala ra ngini guru-guru 'agama re ngowa-ngowa'a Farisi! Ngini, ngowa'a munafiki! Ngini ni simaha ua ngowa'a 'aḏi osama nyo-nyoimi toma Soroga ma Pareta.#23:13 “Soroga ma Pareta” ma tero Ma Jou'ongu Madutu 'ai Pareta. Ngini masiretene ni oḏu'u osama nyo-nyoimi toma Soroga ma Pareta, re ni dola'aku ngowa'a lelegu ga'a mau osama nyo-nyoimi toma Soroga ma Pareta.

[ 14Bahala ra ngini guru-guru 'agama re ngowa-ngowa'a Farisi. Ngini ngowa'a munafiki! Ngini ni sihaga balo-balo, re ni ra-rabasa ananga manga 'ori i'a rana tamanga wala ma dara. Re ngini ni manyiata lai kiḏa-kiḏanga di'a na damunu ninga kajahatana. Sababu gena-ge, Ma Jou'ongu Madutu ḏuanga i'a 'o sihukumu lai tubuso madutu ra ngini!]#23:14 Toma kartasi lo-lolo lelegu, bu-bula'a gena-ge 'i cua

15Bahala ra ngini guru-guru 'agama re ngowa-ngowa'a Farisi. Ngini ngowa'a munafiki! Ni tagi na sikiḏanga palene ngoloto re tana'a, pa'i ni disa ngowa'a matengo ḇato di'a 'o dadi ninga me-mete'e. Re na'o ngowa'a gena-ge ro dadi ninga me-mete'e, ngini nu'u doto'o di'a mete'e ninga de'oso re ḏegoro singadolo ma ḏo-ḏogumu unanga gena-ge lebe cira i'a reo ngini di'a osama naraka!

16Bahala ra ngini, ngowa'a hafu ga'a sigasa ngowa'a ma lelegu 'aḏi iranga ngo'omo! Ngini ni doto'o nena-ne: ‘Na'o ngowa'a 'aḏi masisasi terongo Ma Jou'ongu Madutu 'ai Wala, ngowa'a gena-ge manga sasi 'i tike ananga ua. Mada'a na'o ananga 'aḏi masisasi terongo guraci ra Ma Jou'ongu Madutu 'ai Wala, manga sasi gena-ge 'i tike ananga!’ 17Ngini ngowa'a ma haga ga'a hafu! Le'a lebe la-lamo'o i'a: Guraci ra Ma Jou'ongu Madutu 'ai Wala, bolo Ma Jou'ongu Madutu 'ai Wala ga'a 'i si'a'a guraci gena-ge 'i dadi 'ofi-'ofi?! 18Ngini ni doto'o ḏi'i ne: ‘Na'o ngowa'a 'aḏi masisasi terongo jou-jou ma ngi'i, manga sasi gena-ge 'i tike ananga ua. Mada'a na'o ananga 'aḏi masisasi terongo jou-jou toma jou-jou ma ngi'i, manga sasi gena-ge 'i tike ananga!’ 19Ngini ni masihafu lai siḏi! Le'a lebe la-lamo'o i'a: Jou-jou bolo jou-jou ma ngi'i ga'a si'a'a jou-jou gena-ge 'i dadi 'ofi-'ofi? 20Sababu gena-ge, na'o matengo i'a 'o masisasi terongo jou-jou ma ngi'i, sasi gena-ge ma ngale jou-jou re jou-jou ma ngi'i ḏi'i. 21Re na'o matengo i'a 'o masisasi terongo Ma Jou'ongu Madutu 'ai Wala, sasi gena-ge ma ngale Ma Jou'ongu Madutu 'ai Wala re Ma Jou'ongu Madutu ga'a 'a tegoro toma wala gena-ge ḏi'i. 22Re na'o matengo 'o masisasi terongo soroga, gena-ge mangale unanga 'o masisasi Ma Jou'ongu Madutu 'ai ḏe-ḏegoro re Ma Jou'ongu Madutu ga'a 'o tegoro toma ḏe-ḏegoro gena-ge ḏi'i.#Yes. 66:1; Mat. 5:34

23Bahala ra ngini guru-guru 'agama re ngowa'a Farisi! Ngini ngowa'a munafiki! Rampa-rampa sa'olo: selasi, adas mami, re 'o jintan, gena-ge ngini na pula'a jou-jou ga'a ma balangu moi toma balangu nyagi moi ino di'a Ma Jou'ongu Madutu. Momongolo ua, parenta ma re'u i'a ra Musa 'ai hukumu sa'olo: Ngini balasu ni 'adili toma ngowa'a lelegu, balasu ni sijumu ninga 'akala re sinyingara ma la-la, re balasu ni cufala mete'e Ma Jou'ongu Madutu 'ai parenta, gena-ge ngini na siwaro i'a ua! Mada'a ngini balasu na si'a'a, re ma lelegu ḏi'i mai na sidaioranga awa.#Im. 27:30 24Ngini mo-moini ni dadi sae'e, mada'a ngini ma tero sa'olo ngowa'a hafu! Botou'u taninga ngo-ngo'e na tafi, mada'a onta na nyamolo!

25Bahala ra ngini guru-guru 'agama re ngowa-ngowa'a Farisi. Ngini ngowa'a munafiki! Ninga moku-moku re ninga suḏe-suḏe ma ḏuḏunu na soso'o nya-nyangele. Momongolo ua, enanga ma dara faja madutu moju ma tero sa'olo ninga 'akala re sinyingara 'i romanga reo danata re nyafusu ngowa'a manga 'ori i'a rana. 26Ngowa'a Farisi ngini sa'olo ngowa'a hafu! Soso'o nya-nyangele ninga moku-moku re suḏe-suḏe ma dara, la ma ḏuḏunu 'i dadi nyangele ḏi'i.

27Bahala ra ngini guru-guru 'agama re ngowa-ngowa'a Farisi! Ngini ngowa'a munafiki! Ngini ma tero sa'olo kubu-kubu maceti bu-buḏo. Toma ḏuḏunu oḏi'i lai rousu, mada'a toma dara 'i romanga reo obongo re 'ori i'a fara muḏuo i'a ga'a 'i po-pokuru.#Som. 23:3 28So'o gena ḏi'i, ngowa'a 'aḏi oḏi'i ninga ga'a re 'aḏi ta'ajiri ngini ngowa'a loasa re banari. Mada'a ngini mode-mode'e ngowa'a munafiki, re ninga 'akala re sinyingara ma dara 'i romanga reo kajahatana.”

Yesus 'o nubuata mangale hukumu toma ngowa-ngowa'a Farisi re guru-guru 'agama

(Luk. 11:47-51)

29Yesus dadunu 'o kanau moju, “Bahala ra ngini guru-guru 'agama re ngowa-ngowa'a Farisi! Ngini ngowa'a munafiki! Ngini ni 'a'a nabi-nabi manga kubu sirousu re ni sidiai ma ngasu-ngasu'u di'a si'elingi ngowa-ngowa'a loasa re banari. 30Re ni kanau, ‘Na'o si'ade-'ade i'a ngomi mi 'ahu-'ahu toma 'orasa ete re dotumu ma siḏa, tantu ḏua ngomi mi mete'e ananga ua di'a sisengene nabi-nabi!’ 31Dadi ngini ni mangaku masiretene mangale ngini nena-ne 'o ju'uda ngowa-ngowa'a ga'a sisengene nabi-nabi! 32Na'o so'o gena-ge, na dowanga re na siḏuanga ḏosa-ḏosa ga'a ninga ete re dotumu reya si'a'a mulaingi i'a!

33Ngini ngowa'a ma jira ma tero sa'olo cuku'u! Ngini ngowa'a ma jira ma ju'uda ma tero sa'olo cuku'u rema bisa ma ngowa!#Mat. 3:7, 12:34; Luk. 3:7 Sanga ua, ngini nyengara sisalamata ninga diri toma hukumu naraka! 34Ni 'isene la-la ino: Ma sababu gena-ge, Ngoi nena-ne ḏuanga i'a to 'utusu ra ngini nabi-nabi, ngowa-ngowa'a 'akala soro'unu re guru-guru 'agama. Mamuni'a ngini na'u sisengene re mamuni'a ngini na'u sisalib. 'Age ḏi'i mamuni'a ngini na'u sipo toma wala-wala puji, re na'u dedele ananga toma limau rimoi sigasa limau ma lelegu. 35Dadi ngini ḏuanga i'a ni sanga hukumu di'a ngowa'a kamanga sala ua mo-moini ninga ete re dotumu ya'u sisengene. Mulaingi ra Habel, ngowa'a ga'a kai sala ua, singadolo ngini ni sisengene 'a Zakharia 'a Berekhya 'ai ngowa'a nau'u, ga'a nu sisengene wakutu unanga toma jou-jou ma ngi'i ra Ma Jou'ongu Madutu 'ai Wala ma sigolona. 36Ni ngaku mode-mode'e Ngoi 'Ari demo-demo nena-ne: Ma Jou'ongu Madutu ḏuanga i'a 'o sihukumu ngini ga'a 'ahu-'ahu toma 'orasa nena-ne, sababu ngini re ninga ete re dotumu ananga 'aḏi sisengene 'Ari ngowa-ngowa'a kamanga sala ua.”

Yesus 'ai dadalara 'i baolo toma ngowa-ngowa'a Yerusalem

(Luk. 13:34-35)

37“Yerusalem, Yerusalem! Ngini, ngowa'a Yerusalem ga'a 'aḏi sisengene nabi-nabi re ni poini reo maḏi Ma Jou'ongu Madutu 'ai 'utusana singadolo 'aḏi sengene! Soi muḏuo i'a ḏua, Ngoi mau tini saolo ngini ma tero sa'olo namo ma ngina ya worongo ma ngowa-ngowa toma kalatu'u ma 'aḏu, mada'a ngini ni oḏu'u! 38Ni 'isene la-la ino: Ma Jou'ongu Madutu ḏuanga i'a 'O sisoi'i tala Unanga 'ai Wala nena-ne! 39Re Ngoi to siajele ra ngini nena-ne: Mulaingi nange-ne re si'a ngini ḏuanga i'a ni oḏi'i Ngoi riwara singadolo ngini ni kanau, ‘Sibarakati Unanga ga'a 'o sapolo rea Ma Jou'ongu Madutu 'ai lomanga!’ ”

Currently Selected:

Matias 23: SNT

Highlight

Copy