Matias 7

Do-doto'o mangale sijuruhakimi ngowa'a

(Luk. 6:37-38, 41-42)

1“Awa ngini ni sijuruhakimi ngowa'a, la Ma Jou'ongu Madutu ni sijuruhakimi ngini ua. 2Sababu ma tero sa'olo ngini ni sijuruhakimi ngowa'a, so'o gena ḏi'i Ma Jou'ongu Madutu ḏuanga i'a 'o sijuruhakimi ngini. Re ninga du-duga ga'a ngini ni pake di'a situga toma ngowa'a lelegu, du-duga gena-ge ḏi'i Ma Jou'ongu Madutu 'a pake 'a situga ra ngini!#Mrk. 4:24

3I'a sa'olo ngini ni oḏi'i 'o ate ma bingana taninga ioronongoḏu manga la'o, mada'a jaro jule moi taninga la'o, ni siwaro i'a ua. 4I'a sa'olo ngini ni kanau taninga ioronongoḏu, ‘Ino ngoi ta woi'i 'o ate ma bingana tani la'o,’ mada'a taninga la'o ma dara rema jaro jule moi? 5Hai ngini ngowa'a munafiki! Ni sisupu siḏa 'o jaro jule moi tani la'o, la ni oḏi'i tarangi, kara nga'unu ni sisupu 'o ate ma bingana taninga ioronongoḏu 'ai la'o ma dara.

6Awa no pula'a 'ori i'a 'ofi-'ofi toma nunu'u, la nunu'u gena-ge 'i macelolo re 'i goḏi ngana awa! Re awa no pula'a mutiara toma soto, la awa soto gena-ge ya jo'u la-la mutiara gena-ge.”

Golo'o ra Ma Jou'ongu Madutu

(Luk. 11:9-13)

7“Ni golo'o, ḏuanga i'a ni dawongo. Ni disa, ḏuanga i'a ni sanga. Ni tolo'o ngalana, re ngalana ḏuanga i'a ya welanga. 8Sababu 'a guna ḇato ga'a 'o golo'o, ḏuanga i'a 'o dawongo. 'A guna ḇato ga'a 'o disa, ḏuanga i'a 'o sanga. Re 'a guna ḇato ga'a 'o tolo'o ngalana, ḏuanga i'a ya welanga. 9Sanga ua, 'age rema ḇaḇa matengo taninga sigolona ga'a 'o pula'a maḏi, na'o 'ai ngowa'a nau'u 'o golo'o roti! 10Bolo unanga 'o pula'a cuku'u, na'o 'ai ngowa'a nau'u 'o golo'o nyao'o! 11Kalaha ngini ngowa'a baraḏosa, ngini mai ni waro ḏi'i ni pula'a 'ori i'a ma la-la taninga ngowa-ngowa'a. Ma la-lamo'o i'a ḏi'i, ninga Ḇaḇa toma soroga! Tantu ḏua, Unanga 'o pula'a 'ori i'a ma la-la ra ananga ga'a 'aḏi golo'o ra Unanga.”

12“Sababu gena-ge, 'a Musa 'ai hukumu ma do-doto'o re nabi-nabi manga do-doto'o ma ngale so'o ne: 'Oru ḇato ngini ni mau ngowa'a 'aḏi 'a'a ra ngini, ni 'a'a siḏa ra ananga.”#Luk. 6:31

Ngalana ga'a 'i tuḏu

(Luk. 13:24)

13Osama mete'e ngalana ga'a 'i peletoro. Sababu ngalana re ngo'omo roata ga'a 'i sigasa ngowa'a toma naraka re ngowa'a repe ya mete'e. 14Mada'a ngalana re ngo'omo ga'a 'i peletoro ga'a 'i sigasa ngowa'a toma 'ahu ma dara, ngowa'a repe ua ya sanga.

Ate re enanga ma sowo'o

(Luk. 6:43-44)

15“Ni ma'istiari toma nabi-nabi sa-sakala. Ananga 'aḏi sapolo ra ngini ma tero sa'olo doba. Mada'a ma ba-banari ananga manga maksudu 'i sijira ninga ngo-ngaku ma tero sa'olo serigala ga'a 'i oro-oromo ngowa'a. 16Ngini ḏuanga i'a ni nana'o ananga sa'olo nabi sa-sakala mete'e manga ga'a. Ngini ni sanga ua 'anggur ma sowo'o toma rurubu dodowo'o, re ni sanga ua 'ara ma sowo'o toma goroa dodowo'o. 17So'o gena-ge ḏi'i, 'o ate 'i rousu, ma sowo'o 'i la-la. Mada'a 'o ate ma rousu ua, ma sowo'o 'i cira. 18Ate 'i rousu, sanga ua enanga ma sowo'o 'i cira. So'o gena-ge ḏi'i 'o ate 'i rousu ua, sanga ua enanga ma sowo'o la-la. 19Ate 'oru ḇato ga'a ma sowo'o rousu ua, wa tawele re tau'u toma u'u.#Mat. 3:10; Luk. 3:9 20So'o gena ḏi'i reo nabi-nabi sa-sakala. Tantu ḏua, ngini ni waro na'o ananga nabi sa-sakala sababu ananga manga de'oso re ḏegoro.”#Mat. 12:33

Si'a'a, awa pa'i kanau ḇato

(Luk. 13:25-27)

21“Toma Kiamata ma Wangere, ngowa'a manga repe ḏuanga i'a 'aḏi 'aro'o Ngoi, ‘Ma Jou! Ma Jou!’ Mada'a ananga mo-moini ua 'aḏi osama nyo-nyoimi toma Soroga ma Pareta!#7:21 “Soroga ma Pareta” ma tero Ma Jou'ongu Madutu 'ai Pareta Pa'i ngowa'a ga'a mete'e 'Ari Ḇaḇa 'ai mau, ananga gena-ge ḏuanga i'a 'aḏi sanga osama. 22Toma wangere gena-ge, ngowa'a manga repe 'aḏi kanau ra Ngoi, ‘Ma Jou! Ma Jou! Wakutu ngomi mi nubuata mi pake 'Ani lomanga, re mi pake 'Ani lomanga di'a dusu'u roh ma jira, re ḏi'i mi pake 'Ani lomanga di'a 'a'a ga'a hera-heranga ma repe!’ 23Mada'a Ngoi ta sangoro, ‘Ngoi to nana'o ngini ua. Ni maḏagi ra Ngoi, sababu ngini ninga ga'a 'i cira!’ ”#Nya. 6:9

Wala ma tukanga ma pahe re wala ma tukanga ma haga

(Luk. 6:47-49)

24“Sababu gena-ge, ngowa'a mo-moini ga'a 'aḏi 'isene Ngoi 'ari demo re ya mete'e, ananga gena-ge ma tero sa'olo ngowa'a pahe matengo 'o side'oso 'ai wala toma maḏi ma re'u. 25Kalaha besa'a lai lamo'o 'i sapolo singadolo ḇanyo dogo, re karawiana lai siḏi ya nga'unu wala gena-ge, enanga 'i ruba ua, sababu 'i side'oso toma maḏi ma re'u.

26Mada'a ngowa'a mo-moini ga'a ya 'isene Ngoi 'ari demo, mada'a ya mete'e ua, ananga gena-ge ma tero sa'olo ngowa'a haga matengo ga'a side'oso wala toma dongi ma re'u. 27Wakutu besa'a lai lamo'o 'i sapolo singadolo ḇanyo dogo re ma karawiana lai siḏi 'i nga'unu wala gena-ge, enanga 'i ruba singadolo 'i pinya'olo lai siḏi.”

Yesus 'ai kuasa

28Wakutu Yesus 'o doto'o togumu i'a, ngowa-ngowa'a toma ngi'i gena-ge ga'a 'aḏi isene 'Ai do-doto'o, ananga gena-ge 'aḏi dadi heranga madutu. 29Sababu Unanga 'o doto'o rai kuasa ma tero ua sa'olo ananga manga guru-guru 'agama!#Mrk. 1:22; Luk. 4:32

Currently Selected:

Matias 7: SNT

Highlight

Copy