LUKAS 12
12
Peringetan tipaq dengan-dengan munapik
(Mat. 10:26-27)
1 #
Mat. 16:6; Mrk. 8:15 Léq waktu beiyu-iyu dengan sampun bekeriwung dait bedesek-desekan, Deside Isa bemanik léq pengiring-pengiring-Ne, “Onyaq-onyaq léq ragi ruti dengan Parisi, maksut Tiang kemunapikan ie pade. 2#Mrk. 4:22; Luk. 8:17 Ndéq araq saq teseboq saq ndéq gen penggitan, dait ndéq araq saq terahasieang saq ndéq gen tebungkar. 3Saq side pade ucapang léq taoq saq peteng, gen kedengahan léq taoq saq menah; dait saq side pade péséq léq kentok dengan léq dalem kamar saq teimpet, gen teumumang beléq-beléq.”
Takut tipaq Allah
(Mat. 10:28-31)
4“Tiang badaq side, batur-batur Tiang! Ndaq takut léq ie pade saq bau nyematéq awak laguq sesampun nike ndéqne bau piaq napi-napi malik. 5Mangkin araqan Tiang badaq side léq sai side pade harus takut. Pade takut tipaq Allah! Séngaq sesampun nyematéq, Ie éndah bedowe kuase netéh ojok dalem api nerake! Tiang badaq side pacu-pacu, tipaq Allah doang side pade harus takut.
6Lime kedit perit tejual ajine due képéng saq paling kodéq. Timaq maraq nike ndéq araq sopoq juaq saq telupaqang siq Allah. 7Bulu léq ulunde éndah sampun terékéng selapuqne, keranaq nike ndaq takut; side pade jaoq beléqan ajine tebanding kedit-kedit perit nike.”
Ngakuq jari pengiring Deside Isa léq julun dengan luwéq
(Mat. 10:32-33, 12:32, 10:19-20)
8“Tiang badaq side: Dengan saq ngakuq léq julun dengan luwéq bahwe ie pengiring Tiang, ie gen teakuq éndah siq Bije Manusie léq arepan malaékat-malaékat Allah. 9Laguq dengan saq nilas léq julun dengan luwéq bahwe ie pengiring Tiang, ie gen tetilas éndah siq Bije Manusie léq arepan malaékat-malaékat Allah.
10 #
Mat. 12:32; Mrk. 3:29 Lamun dengan ngucapang sopoq hal saq nentang Bije Manusie, ie bau teampunin; laguq lamun ie menghine Roh Suci, ie ndéq gen teampunin.
11 #
Mat. 10:19-20; Mrk. 13:11; Luk. 21:14-15 Lamun side pade tejauq ojok balé-balé ibadah jari teadilin léq arepan pemréntah atao penguase, ndaq kuatir mengenai berembé side pade harus béle diriq atao mengenai napi saq harus side pade sampéang. 12Séngaq léq waktu nike éndah Roh Suci gen badaq side pade napi saq harus side pade sampéang.”
Perumpamean dengan sugih saq bodo
13Sopoq dengan léman tengaq-tengaq dengan luwéq nike matur léq Deside Isa, “Bapaq Guru, silaq Pelungguh manikang semeton tiang adéqne béng tiang separo harte warisan amaq tiang.”
14Jawab Deside Isa, “Semeton, sai saq ngangkat Tiang jari hakim atao tukang bagi warisan antare deduaq side pade?” 15Beterus léq selapuq dengan saq araq léq derike Deside Isa bemanik, “Onyaq-onyaq dait waspade, ndaq jangke side pade serakah. Séngaq idup manusie ndéq beharep léman kesugihanne, timaq dowéne belimpah-limpah.”
16Beterus Deside Isa nyeriteang perumpamean niki, “Araq sopoq dengan sugih. Ie bedowé tanaq saq belimpah-limpah hasilne. 17Dengan sugih nike mulai mikir dalem aténe, ‘Sampun ndéq araq malik taoq tiang jari nyimpen hasil tanaq tiang. Napi akal tiang mangkin?’ 18Beterus ie mikir malik, dait ie ngeraos mésaq, ‘Nah, tiang araq akal; gen tiang bungkar gudang-gudang tiang terus tiang penganjeng saq beléqan. Léq derike taoq tiang toloq selapuq gandum tiang dait barang-barang tiang saq lain. 19Beterus tiang gen muni léq diriq tiang mésaq: Side aget! Side sampun bedowé selapuq saq solah, dait ndéq gen bis jangke betaun-taun. Mangkin mentelah! Ngelor dait nginem, dait puasang idupde!’ 20Laguq Allah bemanik léq ie, ‘Hai dengan bodo! Kelem niki éndah side gen maté, terus sai saq gen mauq selapuq kesugihan saq sampun side kumpulang umaq diriqde nike?’
21Maraq nike kejarianne sebilang dengan saq berusahe pesugih diriqne mésaq, laguq ndéq berusahe jari sugih menurut pekayunan Allah.”
Percaye léq Allah
(Mat. 6:25-34)
22Beterus Deside Isa bemanik léq pengiring-pengiring-Ne, “Keranaq nike Tiang badaq side pade, ‘Ndaq side pade kuatir mengenai idupde, napi saq gen side pade kelor, atao napi saq gen side pade kadu.’ 23Séngaq idup nike pentingan léman keloran dait awak pentingan léman kelambi. 24Perhatiang kedit-kedit gagak! Ie pade ndéq uwah sawur binéq, ndéq éndah bedowé gudang atao lumbung. Laguq Allah peliharaq ie pade! Side pade jaoq beléqan ajine ketimbang kedit-kedit! 25Sai léq antare side pade siq kuatirne bau ngeromboq umurne timaqne sekediq? 26Jari, lamun side pade ndéq sanggup miaq sopoq hal timaq saq paling kodéq, kembéq side pade harus kuatir mengenai hal-hal lain? 27#1Raj. 10:4-7; 2Hik. 9:3-6 Perhatiang berembé kembang-kembang bakung tiwoq; kembang-kembang nike ndéq begawéan, ndéq éndah nyésék, laguq Tiang badaq side: Nabi Sulaiman timaq ie sugih gati, ndéq ngengadu kelambi saq solahne maraq kembang-kembang nike! 28Pupaq léq lendang tiwoq jelo niki dait lémaq bis tesedut. Laguq Allah payas pupaq nike solah gati. Lebih-lebih side pade, dengan-dengan saq kurang percaye! 29Jari, ndaq kuatir dait bingung mengenai napi saq side pade kelor dait inem. 30Selapuq nike teboyaq siq bangse-bangse léq dunie saq ndéq kenal kance Allah. Padahal napi saq side pade perluang léq dalem idupde, selapuqne nike sampun tewikanang siq Bapa side pade. 31Laguq boyaq Kerajaan Allah, make selapuq saq lain éndah gen teromboqang tipaq side pade siq Allah.”
Harte léq sorge
(Mat. 6:19-21)
32“Ndaq takut, side saq cume sekediq jumlahne! Séngaq Bapa side seneng ngicanin side Kerajaan-Ne nike. 33Jual dowénde dait sedekahang képéngne tipaq dengan miskin. Piaqang diriqde dompét saq ndéq iniq séde, nike harte saq tesimpen léq sorge. Harte nike ndéq iniq telang séngaq maling ndéq bau bait dait tembréné ndéq bau nyenyédaq. 34Séngaq léq mbé hartende araq, léq derike éndah angende!”
Pelayan saq tetep sedie
35 #
Mat. 25:1-13
“Bejage-jage léq selapuq hal. Side harus tetep siep kadu kelambi dait dilahde tetep tenyalaqang, 36#Mrk. 13:34-36 pade maraq pelayan-pelayan saq kenyeke ngantih majikanne tulak léman gawé ngawinang. Lamun majikan nike tulak, dait ketok lawang, ie pade nyerepek bukaq lawang. 37Bahagie gati pelayan-pelayan saq tedait kenyeke ngantih léq waktu majikanne dateng. Tiang badaq side: Setetune majikan nike gen besiep-siep dait suruq pelayan-pelayan nike tokol, terus ie ngelayanin ie pade. 38Bahagie gati pelayan-pelayan nike lamun majikan nike ndait ie pade kenyeke siep ngantih, timaq ie dateng tengaq kelem atao subuh! 39#Mat. 24:43-44 Pade inget! Seandéne épén balé sampun nenaoq jam pire maling gen dateng, ie gen bejage adéq maling ndéq tame ojok dalem baléne. 40Keranaq nike, side pade éndah harus besiep-siep, séngaq Bije Manusie gen rauh léq waktu saq ndéq side pade badéq.”
Pelayan saq setie dait pelayan saq ndéq setie
(Mat. 24:45-51)
41Petrus metakén, “Junjungan Saq Mulie, napi perumpamean nike Pelungguh tujuang tipaq tiang pade atao tipaq selapuq dengan?”
42Jawab Junjungan Saq Mulie, “Sai pelayan saq setie dait bijaksane sehingge teangkat siq majikanne jari kepale tipaq pelayan-pelayan lain, adéq ie béng ie pade bekelor lamun sampun wayene? 43Bahagie gati pelayan saq tedait kenyeke ngelaksaneang tugasne waktu majikanne tulak! 44Tiang badaq side: Setetune pelayan nike gen tesaduq siq majikanne jari jagaq selapuq dowéne. 45Laguq lamun pelayan nike jahat, ie gen bebase léq dalem angenne, ‘Majikan tiang masih ngonéq tulak,’ terus ie ngempuk selapuq pelayan dait bekelor dait nginem jangke bowos, 46beterus majikanne gen tulak léq jelo dait jam saq ndéq ie badéq. Make pelayan nike gen tesiksaq siq majikanne, dait tejariang senasip kance dengan-dengan saq ndéq setie.
47Pelayan saq nenaoq pekayunan majikanne, laguq ndéq besiep-siep dait ndéq ngelaksaneang pekayunan majikanne nike, gen tepecut keras-keras. 48Laguq pelayan saq ndéq nenaoq pekayunan majikanne, beterus ngelaksaneang hal saq salaq, sehingge harus tepecut sekediq doang. Séngaq dengan saq sampun teicanin luwéq, léman ie gen tetuntut luwéq éndah. Dait dengan saq sampun tepercayeang luwéq, léman ie gen tetuntut luwéq éndah.”
Ndéqne perdaméan laguq perlawanan
(Mat. 10:34-36)
49“Tiang dateng jari nimbulang julat léq gumi niki. Solahan malik lamun apine sampun nyale! 50#Mrk. 10:38 Tiang harus ngalamin sopoq baptisan, dait angen Tiang osah gati sendéqman hal nike telaksane. 51Napi side pade paran Tiang dateng jari jauq perdaméan ojok dunie? Ndéq, ndéqne perdaméan, laguq perlawanan. 52Mulai léman mangkin, keluarge saq luwéqne lime dengan gen bemusuhan, telu lawan due atao due lawan telu. 53#Mi. 7:6 Amaq gen ngelawan anakne saq mame, dait kanak mame gen ngelawan amaqne. Inaq gen ngelawan anakne saq nine, dait kanak nine gen ngelawan inaqne. Mentoaq nine gen ngelawan menantune saq nine dait menantu nine gen ngelawan mentoaqne saq nine.”
Nenaoq tande jaman
(Mat. 16:2-3)
54Deside Isa bemanik éndah léq dengan luwéq, “Lamun side pade serioq awan taék léq bagian bat, langsung side pade bebase, ‘Gen ujan.’ Dait tetu-tetu ujan. 55Lamun side pade beridap angin dateng léman lauq, side pade bebase, ‘Gen panas.’ Dait tetu-tetu panas. 56Side pade dengan-dengan munapik! Side pade tao badéq cuace léman serioq keadaan langit dait gumi. Kembéq tande-tande jaman niki ndéq tao side pade tapsir?”
Bedamé kance musuh
(Mat. 5:25-26)
57“Kembéq side pade ndéq mutusang mésaq napi saq kenaq? 58Lamun araq dengan ngelaporang side pade ojok pengadilan, berusahe semampu side jari nyeleséang pelekare nike kance ie sewaktu side pade masih léq tengaq langan. Lamun ndéq, laun ie jauq side pade ojok hakim dait hakim nike gen nyerahang side pade ojok petugasne, dait dengan nike gen tamaqang side pade ojok dalem bui. 59Tiang badaq side: Side pade ndéq gen sugul léman bui sendéqman side bayah utangde jangke lunas!”
Currently Selected:
LUKAS 12: LAISAS
Highlight
Share
Copy
Want to have your highlights saved across all your devices? Sign up or sign in
