LUKAS 9
9
Deside Isa ngutus due olas pengiring-Ne
(Mat. 10:5-15; Mrk. 6:7-13)
1Deside Isa ngemanikang kedue olas pengiring-Ne, terus ngicanin ie pade kuase jari sediq sétan-sétan dait nyelahang penyakit. 2Beterus Deside Isa ngutus ie pade lumbar nyelahang dengan sakit dait nyampéang kabar mengenai Kerajaan Allah. 3#Luk. 10:4-11 “Ndaq jauq napi-napi dalem kelampande,” manik Deside Isa léq ie pade. “Ndaq jauq tunjang, atao takaq sangu, ruti atao képéng, atao due kelambi. 4Léq mbé juaq side pade teterimaq, ndot léq derike jangke side pade bilin kote nike. 5#Kis. 13:51 Dait léq mbé side pade ndéq teterimaq, léq waktu side pade bilin kote nike, kerapang kerepuk léman lampak naénde jari peringetan tipaq ie pade.”
6Pengiring-pengiring Deside Isa berangkat, beterus lumbar ojok dése-dése jari nyampéang Kabar Solah nike dait nyelahang dengan sakit léq selapuq taoq.
Herodes bingung
(Mat. 14:1-12; Mrk. 6:14-29)
7 #
Mat. 16:14; Mrk. 8:28; Luk. 9:19 Sewaktu Herodes saq jari raje wilayah negeri Galilea, mirengang selapuq peristiwe nike, ie jari bingung. Séngaq araq saq bebase bahwe Yahya Pembaptis sampun idup malik. 8Araq éndah saq bebase bahwe Elia sampun muncul malik. Dengan lain éndah bebase bahwe sopoq nabi léman nabi-nabi jaman laéq idup malik. 9Herodes bebase, “Tiang sampun ngutus dengan penggal ulune Yahya. Laguq Dengan niki, sai setetune Ie? Luwéq tiang dengah mengenai Ie.” Beterus Herodes berusahe adéqne bau bedait kance Deside Isa.
Deside Isa ngicanin bekelor lime iyu dengan
(Mat. 14:13-21; Mrk. 6:30-44; Yah. 6:1-14)
10Rasul-rasul Deside Isa tulak dait nyeriteang tipaq Deside Isa selapuq saq sampun ie pade laksaneang. Terus Deside Isa ténaq ie pade lumbar ojok kote Betsaida sehingge cume ie pade kance Deside Isa léq derike. 11Laguq sewaktu dengan-dengan nenaoq hal nike, ie pade nerutuk Deside Isa. Ie pade tesambut siq Deside Isa, terus bebaos tipaq ie pade mengenai Kerajaan Allah. Dait Ie éndah nyelahang dengan sakit léq antare ie pade.
12Sewaktu serep jelo, kedue olas pengiring Deside Isa parek tipaq Deside Isa dait matur, “Taoq niki kesempil, solahan Pelungguh manikang dengan-dengan niki lumbar adéq ie pade bau boyaq keloran dait taoq madéq léq kampung-kampung dait dése-dése léq sekiter niki.”
13Laguq jawab Deside Isa, “Side pade saq harus ngebéng ie pade bekelor.”
Pengiring-pengiring Deside Isa matur, “Tiang pade cume bedowé lime ruti dait due empaq. Segerah tiang pade harus lalo beliang selapuq dengan niki keloran?” 14(Araq kire-kire lime iyu dengan mame léq derike.)
Deside Isa bemanik léq pengiring-pengiring-Ne, “Suruq dengan-dengan niki tokol bekelompoq, kire-kire séket dengan sekelompoq.”
15Pengiring-pengiring Deside Isa ngelaksaneang napi saq temanikang Deside Isa nike, terus ie pade suruq dengan luwéq nike tokol. 16Beterus Deside Isa bait lime ruti dait due empaq nike, terus nengadah andang langit dait ngucap syukur tipaq Allah. Sesampun nike Ie peleng-peleng ruti dait empaq nike kadu gading-Ne terus icanin-Ne léq pengiring-pengiring-Ne jari tebagi-bagiang tipaq dengan luwéq nike. 17Ie pade selapuq bekelor jangke besuh. Beterus pengiring-pengiring Deside Isa ngumpulang salone, ternyate araq due olas bakaq.
Pengakuan Petrus mengenai Deside Isa
(Mat. 16:13-19; Mrk. 8:27-29)
18Léq sopoq jelo, sewaktu Deside Isa kenyeke bedo'e mésaq-mésaq, pengiring-pengiring-Ne parek tipaq Ie. Deside Isa beketuan léq ie pade, “Menurut dengan luwéq, sai Tiang niki?”
19 #
Mat. 14:1-2; Mrk. 6:14-15; Luk. 9:7-8 Jawab ie pade, “Araq saq bebase Yahya Pembaptis. Araq éndah saq bebase Elia, saq lain malik bebase salaq sopoq nabi jaman laéq saq sampun idup malik.”
20 #
Yah. 6:68-69
Deside Isa beketuan, “Laguq menurut side pade, sai Tiang niki?”
Jawab Petrus, “Pelungguh Almasih saq tejanjiqang Allah.”
Deside Isa bebaos mengenai kesengsarean dait ninggal-Ne
(Mat. 16:21-28; Mrk. 8:31–9:1)
21Beterus Deside Isa bemanik léq pengiring-pengiring-Ne, “Ndaq gati badaqang hal nike léq sai-sai.” 22Deside Isa bemanik éndah, “Bije Manusie mule harus luwéq menderite dait tetentang siq pemimpin-pemimpin, imam-imam kepale, dait serte ahli-ahli Taurat. Ie gen tematéq, laguq léq jelo saq ketelu Ie gen teidupang malik.”
23 #
Mat. 10:38; Luk. 14:27 Beterus Deside Isa bemanik léq selapuq dengan saq araq léq derike, “Sebilang dengan saq mélé turut Tiang, ie harus ngelupaqang kepentinganne mésaq, ngelémbah salibne sebilang jelo, dait tetep turut Tiang. 24#Mat. 10:39; Luk. 17:33; Yah. 12:25 Séngaq dengan saq mélé nyelametang nyawene, gen kélangan nyawene. Laguq dengan saq kélangan nyawene lantaran Tiang, dengan nike gen nyelametang nyawene. 25Napi untungne léq sopoq dengan, lamun seantéro dunie niki jari dowéne, laguq ie binaseang dait nyenyédaq idupne mésaq? 26Lamun dengan ilaq ngakuq Tiang dait manik Tiang, Bije Manusie éndah gen ilaq ngakuq dengan nike léq waktu Ie rauh éraq dalem kemuliean-Ne, dait dalem kemuliean Bapa dait malaékat-malaékat saq suci! 27Tiang badaq side: Setetune léq antare side pade léq deriki araq saq ndéq gen ninggal, sendéqman ie pade serioq Kerajaan Allah.”
Deside Isa temulieang
(Mat. 17:1-8; Mrk. 9:2-8)
28 #
2Ptr. 1:17-18
Kire-kire baluq jelo sesampun Deside Isa ngajahang hal nike, Ie gadingang Petrus, Yahya dait Yakub taék ojok atas gunung jari bedo'e. 29Sewaktu Deside Isa bedo'e léq derike, penjarupan-Ne berobah dait kuace-Ne jari putéq ngempor. 30-31Selung-selung araq due dengan, Musa kance Elia penggitan léq dalem kemuliean. Ie pade kenyeke bebaos kance Deside Isa, mengenai ninggal-Ne saq ndéq ngonéq malik gen telaksane léq Yerusalem. 32Léq waktu nike Petrus dait kedue pengiring saq lain ketindoqan, laguq selung-selung ures dait serioq Deside Isa léq dalem kemuliean-Ne dait kedue dengan nike nganjeng dékét Deside Isa. 33Sewaktu Musa dait Elia gen bilin Deside Isa, Petrus matur tipaq Deside Isa, “Paq Guru, maiq gati ite léq deriki, mangkin tiang pade penganjeng telu kémah sopoq umaq Pelungguh, sopoqne umaq Musa dait sopoqne malik umaq Elia.” (Petrus matur maraq nike séngaq ndéq nenaoq napi saq ie ucapang.)
34Sewaktu Petrus masih ngeraos, awan turun keliningin ie pade sehingge ie pade takut. 35#Yes. 42:1; Mat. 3:17, 12:18; Mrk. 1:11; Luk. 3:22 Beterus léman awan nike kedengahan suare, “Niki Bije Tiang saq Tiang piléq, pade dengahang Ie!”
36Sesampun suare nike telang, ie pade serioq Deside Isa mésaq-mésaq léq taoq nike. Pengiring-pengiring-Ne rahasieang hal nike dait ndéq betutur léq sai-sai mengenai peristiwe saq sampun ie pade serioq.
Deside Isa nyelahang kanak saq tekuasein siq roh jahat
(Mat. 17:14-18; Mrk. 9:14-27)
37Léq jemaqne Deside Isa dait ketelu pengiring-Ne turun léman gunung nike, dait dengan luwéq dateng ojok Deside Isa. 38Sopoq dengan mame léman tengaq-tengaq dengan luwéq nike bekuih, “Paq Guru, tulung cingakin anak tiang -- ie sopoq-sopoqne anak tiang! 39Lamun roh jahat nyerang ie, ie selung-selung nyurak dait awakne kojor-kojor jangke biwihne bekowok. Roh nike terus nyiksaq ie dait ndéq mélé sugul léman ie! 40Tiang sampun tunas pengiring-pengiring Pelungguh sediq roh nike, laguq ie pade ndéq tao.”
41Deside Isa bemanik, “Luar biase side pade niki! Side pade tetu-tetu dengan saq ndéq percaye dait sesat. Jangke piran Tiang harus tetep araq kance side pade, dait sabar tipaq side pade? Jauq anakde nike ojok deriki!”
42Léq waktu kanak nike lampaq ngerapetin Deside Isa, sétan nike timpak ie dait piaq awakne jari kojor-kojor. Laguq Deside Isa préntahang roh jahat nike sugul, terus kanak nike selah. Beterus kanak nike teserahang ojok amaqne. 43Selapuq dengan bengaq serioq kuase Allah saq luar biase beléqne.
Deside Isa bebaos malik mengenai ninggal-Ne
(Mat. 17:22-23; Mrk. 9:30-32)
Léq waktu dengan-dengan masih bengaq serioq saq telaksaneang siq Deside Isa, Deside Isa bemanik tipaq pengiring-pengiring-Ne, 44“Perhatiang solah-solah dait ndaq lupaq ucapan-ucapan Tiang niki: Bije Manusie gen teserahang tipaq kuase manusie.” 45Laguq pengiring-pengiring Deside Isa ndéq ngerti napi maksut manik Deside Isa nike. Hal nike terahasieang tipaq ie pade adéq ie pade ndéq ngerti. Laguq ie pade takut metakén léq Deside Isa mengenai napi maksud manik-Ne nike.
Sai saq paling beléq léq antare pengiring-pengiring Deside Isa
(Mat. 18:1-5; Mrk. 9:33-37)
46 #
Luk. 22:24
Pengiring-pengiring Deside Isa betungkasan mengenai sai saq paling beléq léq antare ie pade. 47Deside Isa wikan pikiran ie pade, keranaq nike Ie bait sopoq kanak kodéq, dait penganjeng-Ne kanak nike léq dékét-Ne. 48#Mat. 10:40; Luk. 10:16; Yah. 13:20 Terus Deside Isa bemanik léq pengiring-pengiring-Ne, “Dengan saq nerimaq kanak niki lantaran Tiang, artine nerimaq Tiang. Dait dengan saq nerimaq Tiang, nerimaq Ie saq ngutus Tiang. Séngaq dengan saq paling kodéq léq antare side pade, ie saq paling beléq!”
Dengan saq ndéq ngelawan ite, ie léq pihak ite
(Mrk. 9:38-40)
49Yahya matur, “Paq Guru, tiang pade serioq dengan sediq roh jahat siq peséngan Pelungguh, dait tiang pade balaq ie, séngaq ie ndéq léman kelompoq ite.”
50Laguq manik Deside Isa, “Ndaq balaq ie, séngaq dengan saq ndéq ngelawan side pade, artine bepihak léq side pade.”
Sopoq kampung léq Samaria ndéq mélé nerimaq Deside Isa
51Sewaktu sampun rapet wayene Deside Isa teangkat ojok sorge, Deside Isa mutusang gen lumbar ojok Yerusalem. 52Beterus Deside Isa ngemanikang dengan lumbar senjuluq Ie. Dengan-dengan saq Ie manikang nike lumbar, terus tame ojok sopoq kampung léq Samaria jari nyiepang selapuq saq teperluang siq Deside Isa. 53Laguq dengan-dengan léq kampung nike ndéq mélé nerimaq Deside Isa, séngaq Deside Isa kenyeke bemargi ojok Yerusalem. 54#2Raj. 1:9-16 Léq waktu kedue pengiring Deside Isa, Yakub dait Yahya nenaoq hal nike, ie pade matur, “Junjungan Saq Mulie, napi Pelungguh kayun, tiang pade tunas api turun léman langit jari binaseang dengan-dengan niki?”
55Deside Isa nyereminang andang ie pade, dait menggah léq ie pade. 56Sesampun nike ie pade lumbar ojok kampung saq lain.
Dengan-dengan saq mélé jari pengiring-pengiring Deside Isa
(Mat. 8:19-22)
57Léq waktu Deside Isa dait pengiring-pengiring-Ne nerusang pemargian, araq dengan saq matur léq Deside Isa, “Paq, tiang mélé ngiring Pelungguh ojok mbé juaq Pelungguh lumbar!”
58Jawab Deside Isa, “Serigale bedowé loang, dait kedit bedowé kesebu, laguq Bije Manusie ndéq bedowé taoq begélaq.” 59Terus Deside Isa bemanik léq dengan saq lain, “Silaq turut Tiang.”
Laguq dengan nike matur, “Paq ijinang tiang uléq juluq nguburang amaq tiang.”
60Jawab Deside Isa, “Alurang dengan ninggal nguburang dengan ninggal. Laguq side, silaq lumbar dait beriteang Kerajaan Allah léq selapuq taoq.”
61 #
1Raj. 19:20
Araq éndah dengan lain saq matur, “Paq, tiang mélé ngiring Pelungguh, laguq ijinang tiang uléq juluq bepamit léq keluarge tiang.”
62Deside Isa bemanik léq dengan nike, “Dengan saq siep nenggale, laguq ngéngat andang mudi, ndéqne patut bagi Kerajaan Allah.”
Currently Selected:
LUKAS 9: LAISAS
Highlight
Share
Copy
Want to have your highlights saved across all your devices? Sign up or sign in
