MARKUS 15

Deside Isa léq arepan Pilatus

(Mat. 27:1-2, 11-14; Luk. 23:1-5; Yah. 18:28-38)

1Masih aru gati, selapuq Mahkamah Agame lantong imam-imam kepale, pemimpin-pemimpin dait ahli-ahli Taurat becat-becat berunding. Ie pade sékoq Deside Isa beterus jauq Ie dait nyerahang tipaq Pilatus. 2Pilatus metakén léq Deside Isa, “Napi tetu Pelungguh raje dengan Yahudi?”

Jawab Deside Isa, “Maraq nike basen pelungguh.”

3Imam-imam kepale nyampéang luwéq tuduhan tipaq Deside Isa. 4Beterus Pilatus metakén malik léq Deside Isa, “Napi Pelungguh nénten kayun bejawab? Cobaq serioq luwéq gati tuduhan saq ie pade tuduhang tipaq Pelungguh!”

5Laguq Deside Isa nénten bejawab napi-napi malik, sehingge Pilatus bengaq.

Deside Isa tehukum maté

(Mat. 27:15-26; Luk. 23:13-25; Yah. 18:39–19:16)

6Léq sebilang Perayaan Paskah, biasene Pilatus bébasang sopoq tahenan menurut piléqan dengan luwéq. 7Léq dalem bui, léq antare pemberontak-pemberontak saq sampun nyematéq sewaktu kerusuhan, araq sopoq dengan aranne Barabas. 8Dengan luwéq bekumpul dait tunas léq Pilatus adéq ie bébasang sopoq tahenan maraq biasene. 9Pilatus beketuan léq ie pade, “Napi side pade mélé, tiang bébasang raje dengan Yahudi nike?” 10Séngaq Pilatus sadar bahwe imam-imam kepale nyerahang Deside Isa léq ie cume lantaran talon até.

11Laguq imam-imam kepale hasut dengan luwéq adéqne tunas Pilatus bébasang Barabas umaq ie pade. 12Beterus Pilatus bebase malik léq dengan luwéq nike, “Lamun maraq nike, tiang harus kumbéqang dengan saq side pade sebut raje dengan Yahudi nike?”

13Ie pade nyurak, “Pakuq Ie léq kayuq salib!”

14“Laguq pegawéan jahat napi saq sampun Ie piaq?” Pilatus beketuan.

Laguq siq suare saq beléqan malik dengan-dengan nike bekuih, “Pakuq Ie léq kayuq salib!”

15Pilatus mélé nyenengang angen dengan luwéq nike, make ie bébasang Barabas umaq ie pade. Beterus ie préntahang dengan pecut Deside Isa, terus serahang-Ne jari tepakuq léq kayuq salib.

Deside Isa teoloq-oloq siq prajurit-prajurit

(Mat. 27:27-31; Yah. 19:2-3)

16Deside Isa tejauq siq prajurit-prajurit ojok ruang pengadilan léq istane gubernur. Beterus selapuq pasukan tempoh bekumpul. 17Terus ie pade kaduang Deside Isa jubah lempok lomaq dait miaq mahkote léman pémpang-pémpang beduwi, beterus kaduangne léq sirah Deside Isa. 18Sesampun nike, ie pade ngucapang salam tipaq Ie. “Idup raje dengan Yahudi!” basen ie pade. 19Ie pade empuk sirah Deside Isa kadu tunjang, terus ie pade tijuh Ie dait nyembah sujut léq arepan-Ne. 20Sesampun ngoloq-oloq Deside Isa, ie pade lekaq jubah lempok lomaq nike terus kaduangne malik kuace-Ne mésaq. Beterus Ie tejauq ojok luah jari tepakuq léq kayuq salib.

Deside Isa tepakuq léq kayuq salib

(Mat. 27:32-44; Luk. 23:26-43; Yah. 19:17-27)

21 # Rm. 16:13 Léq tengaq langan, ie pade paksaq sopoq dengan ngelémbah kayuq salib Deside Isa. Dengan nike baruq léman dése mélé tame ojok kote. (Aran dengan nike Simon, -- asalne léman Kirene -- amaqne Aleksander dait Rupus.) 22Deside Isa tejauq ojok sopoq taoq aranne Golgota saq artine “Taoq Jerangkong”. 23Léq derike ie pade mélé ngaturin Deside Isa anggur saq becampur mur, laguq Deside Isa nénten kayun nginem anggur nike. 24#Zbr. 22:19 Beterus ie pade pakuq Deside Isa léq kayuq salib dait bagi-bagiang kuace-Ne kadu undian jari nentuang bagian sopoq-sopoq. 25Ie tepakuq léq kayuq salib jam siwaq kelémaq. 26Léq atas kayuq salib-Ne tepasang tulisan mengenai tuduhan tipaq Ie: “Raje Dengan Yahudi”. 27Bareng-bareng kance Deside Isa éndah, ie pade pakuq léq kayuq salib due perampok; sopoq léq sedi kanan dait sopoq malik léq sedi kiri-Ne. [28#Yes. 53:12 Siq care nike telaksane saq tetulis dalem Kitab Suci: “Ie tame itungan léq antare dengan-dengan jahat.”]

29 # Zbr. 22:8, 109:25; Mrk. 14:58; Yah. 2:19 Dengan-dengan saq liwat léq derike ngintek dait menghine Deside Isa, ie pade bebase, “Hai, Side saq mélé ngerobohang Gedéng Allah terus gen penganjeng dalem telu jelo. 30Cobaq turun léman kayuq salib nike dait selametang diriq-De!”

31Maraq nike éndah imam-imam kepale dait ahli-ahli Taurat ngoloq-oloq Deside Isa. Ie pade bebase sopoq kance saq lain, “Ie nyelametang dengan lain, laguq diriq-Ne mésaq ndéq bau Ie selametang! 32Lamun Ie Almasih, Raje Israel, cobaq mangkin Ie turun léman kayuq salib nike, adéq tiang pade serioq dait percaye léq Ie!”

Dengan-dengan saq tepakuq léq kayuq salib bareng Deside Isa nike éndah menghine Deside Isa.

Deside Isa ninggal

(Mat. 27:45-56; Luk. 23:44-49; Yah. 19:28-30)

33Jam due olas, sengonéq telu jam selapuq wilayah negeri nike jari peteng. 34#Zbr. 22:2 Dait jam telu kebian, Deside Isa bekuih keras-keras, “Eloi, Eloi, lama sabaktani?” artine, “Ya Allah Tiang, ya Allah Tiang, kembéq Deside menengang Tiang?”

35Pire dengan saq nganjeng léq derike, dengah suare nike dait bebase, “Cobaq dengah, Ie ngempoh Elia!” 36#Zbr. 69:22 Salaq sopoq léman ie pade becat-becat lumbar bait bunge karang, terus celepne ojok dalem anggur saq pedis, beterus tancepne léq pucuk gegale, dait jonjongne ojok cangkem Deside Isa, sambil bebase, “Silaq ite serioq napi Elia rauh nurunang Ie léman kayuq salib nike.”

37Beterus Deside Isa bekuih keras-keras, dait nyerahang nyawe-Ne.

38 # Kel. 26:31-33 Kelambu saq begantung léq dalem Gedéng Allah soék jari due léman atas jangke ojok bawaq. 39Kepale pasukan saq nganjeng léq julu kayuq salib nike, serioq berembé Deside Isa ninggal. Kepale pasukan nike bebase, “Mule tetu dengan niki Bije saq asalne léman Allah!”

40 # Luk. 8:2-3 Léq derike araq éndah pire dengan nine saq kenyeke serioq selapuqne nike léman jaoq. Léq antarene araq Salome, Mariam Magdalena, dait Mariam inaqne Yakub saq bajang dait Yoses. 41Ie pade dengan-dengan nine saq ngiring dait nulung Deside Isa sewaktu Ie léq Galilea. Dait araq luwéq malik dengan-dengan nine lain léq derike saq sampun dateng ojok Yerusalem bareng-bareng kance Deside Isa.

Pemakaman Deside Isa

(Mat. 27:57-61; Luk. 23:50-56; Yah. 19:38-42)

42-43Léq waktu serep jelo Yusup léman Arimatea dateng. Ie anggote Mahkamah Agame saq tehormatin. Ie éndah kenyeke ngantih piran Kerajaan Allah rauh. Jelo nike jelo persiepan (jelo sendéqman jelo Sabat). Yusup baniang diriqne parek ojok Pilatus dait tunas jenazah Deside Isa. 44Pilatus bengaq pirengang bahwe Deside Isa sampun ninggal. Jari ie préntahang dengan ngempoh kepale pasukan dait beketuan léq ie napi Deside Isa sampun ninggal. 45Sesampun pirengang laporan prewire nike, Pilatus ngijinang Yusup bait jenazah Deside Isa. 46Beterus Yusup beli kain lénen alus saq putéq, dait sesampun nurunang jenazah Deside Isa, ie bungkus siq kain nike. Beterus ie toloq jenazah nike léq dalem sopoq makam saq tepiaq léq dalem bukit batu. Sesampun nike, ie gelompongang sopoq batu beléq jari ngimpet lawang makam nike. 47Léq waktu nike Mariam Magdalena dait Mariam inaqne Yoses merhatiang léq mbé Deside Isa tetoloq.

Currently Selected:

MARKUS 15: LAISAS

Highlight

Copy