LUKAS 13
13
Kamageng tawe měmpẹ̌tobatẹ̌ bọu rosa ute sarung mawinasa
1Su orasẹ̌ ene taumata e němpẹ̌běke si Yesus mạul᷊ịu pirang katau tau Galilea nịpapaten Pilatusẹ̌ e, piạ e i sire němpẹ̌bawa sasěmba su Mawu Ruata e. 2Kapẹ̌tiněnnaneng bẹ̌ke ene i Yesus simimbangke, ”Batụu tau Galilea e nịpapate kerene ute su naung i kamene i sire kai limembong kawarạdosane wọu patikụ tau Galilea wal᷊ine? 3Mambeng bal᷊ine wue! Kaiso pẹ̌tahěndungko: kereu i kamene tawe měmpẹ̌tobatẹ̌ bọu kal᷊awọu rosang kamene ute, i kamene kěbị sarung mate lai mẹ̌sul᷊ung i sire. 4Kụ kereapa ngae habarʼi sire mapul᷊o ual᷊u su kataune nate su Siloam, su tempon candi e naěnsạ si sire? Su naung i kamene ene kai nanodẹu i sire limembo waradosa wọu patikụ taumata wal᷊ine mạtanạ su Yerusalem? 5Mambeng tala wue! Sěnsul᷊eko l᷊ai Iạ měluntingihẹ̌: Kereu i kamene tawe měmpẹ̌tobatẹ̌ bọu kal᷊awọu rosanu, i kamene kěbị mal᷊aing mate kerene.”
Papinintun kalu ara tawe nẹ̌bua
6Bọu ene i Yesus nẹ̌běken l᷊ai papinintu ini, ”Kai nạung piạ sěngkatau kụ piạ arane sěngkalu su wawaelangu anggorẹ̌ e. Sěnsul᷊e tempo riměntạ e i sie mědẹ̌deạ e wuane, kutẹu tawe nakahombang sarang sěmbaụ. 7Kutẹu, i sie nẹ̌berạ e su mandorẹ̌ u sasuange, ’Kěllạe, seng těllu taung iạ dụděnta mědẹ̌deạ buang ara ěndaị e, kutẹu mang ta makal᷊aẹ̌bạ maning sěmbaụ. Tuwangke kalu e! I sie kětạeng mạngěnsue tawang ěntana e!’ 8Arawe mandorẹ̌ u sasuang ene simimbang, ’Walạe i sie patuwo sěntaung ini l᷊ai, Mawu. Iạ deng měmacolẹ̌ ěntana pakal᷊ikụ mase pẹ̌tahoěngu pupukẹ̌. 9Měnsang i sie reng mẹ̌bua su taung mahi e. Kereu mang tala, ute buhụe Mawu měngoro pakituwang.’ ”
Mawu Yesus napakapian sěngkatau wawine wětụ su ěllon Sabatẹ̌
10Su ěllon Sabatẹ̌ sěmbaụ, i Yesus naněntiro su wal᷊em pẹ̌kakal᷊iomanengang. 11Sene piạ sěngkatau wawine kụ seng mapul᷊o ual᷊u su taunge masakị, watụ u piạ rohkẹ̌ dal᷊akị su ral᷊ungu watangenge. Bawine ene wětụ kụ mambeng tawe makararisị matei. 12Ene i Yesus nakasilọe, měngkatewe kimui, ”E wawine, i kau seng nal᷊iu wọu sakịu!” 13Mase i Yesus nanělliden l᷊imanʼE su wawine ene kụ su tempo ene lai i sie nakararisị matei-tei, kụ nẹ̌dalo Mawu Ruata e.
14 #
Sas. 20:9-10; Pang. 5:13-14 Těmbonangu kanisa ene limangehẹ̌ batụu i Yesus napakapian tau ene su ěllon Sabatẹ̌, ual᷊ingu ene i sie něhengetang si sire, ”Ěnnungu ěllo wue ipẹ̌karadiahang; kụ děntako su apan ěllo ene makisal᷊imaẹ u wadang, abe kawe su ěllon Sabatẹ̌!”
15Mawu e simimbang, ”I kamene ini e tahapěmělle! Su ěllon Sabatẹ̌ kěbị taumata měngkai masịlukan sapine arau kalidene wọu kandange mase lẹ̌ahakeng iapạnginung. 16Kụ ěndaị sini e kai piạ sěngkatau wawine hěntong Abraham, kụ seng mapul᷊o ual᷊u su taunge karěngụe mạl᷊ahapusẹ̌ su setang. Unụe i sie tawe hinon lukaěng bọu l᷊ahapusẹ̌ e su ěllon Sabatẹ̌ e?” 17Sasimbangi Yesus ene kai nakamea si sire apan dụdokạ si Yesus; arawe taumata l᷊awọ bal᷊ine lụl᷊uasẹ̌ makạsilo patikụ munara mawantugẹ̌ kẹ̌koateng i Yesus.
Papinintun bakị u sasawi
(Mat. 13:31-32; Mrk. 4:30-32)
18I Yesus nakiwal᷊o, ”Kereu Mawu Ruata e mẹ̌parenta kai kereapa kakakoạ e? Kai Takụ isihing su apa ngae? 19Kakakoạ e mẹ̌sul᷊ungu papinintu ini. Bakịu sasawi#13:19: Sasawi: Sasawi sini ute ghahị u sasuang kụ tumuwo karangẹ e manga těllu meterẹ̌. sěmbaụ nisawuhʼu sěngkatau su waelẹ̌. Bakị e himětị mase nariadi kalu, kụ manga manụ u winalangeng e někoạ sal᷊ehʼi sire su manga lelange.”
Papinintun lahaesẹ̌
(Mat. 13:33)
20Sěnsul᷊eko l᷊ai i Yesus nakiwal᷊o, ”Kereu Mawu Ruata e mẹ̌parenta, kai Takụ isihing su apa ngae kakakoạ e? 21Kakakoạ e mẹ̌sul᷊ungu l᷊ahaesẹ̌ nial᷊ạ u tau wawine mase nilaụ e su tapoěng ěpạ u pul᷊o su litere, sarangkewe timuwo kěbị.”
Tukadẹ̌ masuhepẹ
(Mat. 7:13-14, 21-23)
22Suraral᷊eng i Yesus nakoạ sol᷊ong Yerusalem, i Yesus dimal᷊eng simahe manga soa ringangu manga kampong mang kạpěněntirone. 23Mase piạ tau nakiwal᷊o si Sie, ”Tuang, mang mahal᷊i ngae taumata masal᷊amatẹ̌ e ěng?”
Mawu Yesus simimbang, 24#Mat. 7:13-14 ”Pěmpẹ̌tatětehẹ̌ sěngapam botonge sumuẹ̌ u sasuěkang mahepọ e. Watụ u, pẹ̌tahěndung! Lawọ taumata sarung měmpẹ̌deạ u mahunsuẹ̌ kutẹu tawe makapahunsuẹ̌. 25Su tempon taghuangu wal᷊e seng nẹ̌buạ kụ namal᷊e tukadẹ̌ e, i kamene mahundarisị ete su l᷊ikude kụ manětạe měmpanengkohẹ̌ apidʼu kạpẹ̌berane, ’Mawu, topeiko tukadẹ̌ i kami!’ Mawu e sarung sumimbang, ’Iạ běgaweng kamene měnsang bọu a!’ 26#Mat. 7:22-23 I kamene sarung sumimbang, ’I kami e nạung bọu kimaěng dingangu něnginung dingangu e Mawu, kụ Mawu e seng naněntiro lai su manga ral᷊eng su soang kami!’ 27#Mzm. 6:9 Arawe Mawu ene sarung mẹ̌bera l᷊ai, ’Iạ bẹ̌ga wue měnsang i kamene wọu apa. Pěmpamehọe wọu ini e i kamene tahapẹ̌koạ dal᷊aị!’ 28#Mat. 22:13, 25:30 #Mat. 8:11-12 Su tempong i kamene makasilo e si Abraham, Ishak dingang i Yakub dingangkewen kal᷊awọu nabi měmpahul᷊uasẹ̌ su ral᷊ungu Wanuan Duata Wuhu, i kamene sarung mahunsangị dingangu mẹ̌tatahangu sigěsạ batụu i kamene hala nipasẹ̌bang su l᷊ikudẹ̌. 29I sire apam bọu sarameng dingangu sědapeng bọu sawěnahẹ̌ dingangu wọu timuhẹ̌ kụ mahul᷊uasẹ̌ su Duniang Duata kụ Buhụe. 30#Mat. 19:30, 20:16; Mrk. 10:31 Mambeng těngadẹ̌, piạ u kasasamuriange měngkakoạ kahumotongange ringangu piạ u kahumotongange měngkakoạ kasamuriange.”
Mawu Yesus kiměndagu Yerusalem
(Mat. 23:37-39)
31Su orasẹ̌ ene lai piạ pirang katau Farisi němpẹ̌děnta su anung Yesus dingangu němpẹ̌bera, ”Abe katanạ sini! Sěbangke sol᷊ong tampạ bal᷊ine u i Herodes kai mẹ̌kẹ̌karaki mamate si Kau.”
32Mawu Yesus simimbang, ”Dakọko paul᷊ị su tau tawẹ gunane ene, ’Ěllo ini ringangu riọěllo, Iạ kai manokol᷊u rohkẹ̌ daral᷊akị dingangu mapakapian taumata masakị, arawe su ěllo katěllune, Iạ sarung mělěpasẹ̌ hal᷊ẹ̌-Ku.’ 33Maningbe kerene Iạ kai hinon dumal᷊eng měněpasu raral᷊engangku ěllo ini, riọěllo ringangu karumahing, batụu ta hinone nabi e pateěng su l᷊ikudʼu Yerusalem.
34Yerusalem! Yerusalem! Tahapamate manga nabi! Manga rarolohangu Mawu Ruata e nasueng ěntunge kahiang kamene ringangu watu sarang nate! Seng apa piran sul᷊e Iạ nạung mapulu manampung patikụ taumatanu mẹ̌sul᷊ungu i ninangu manụ měndẹ̌diagạ manga anạe su al᷊ungu papanide, kutẹu i kamene mang měngkadiri! 35#Mzm. 118:26 Ual᷊ingu ene tangu, Mawu Ruata e seng tawe ruměndingang si kamene. Kěngkasingkạko, manětạ bọu orasẹ̌ ini i kau semben tawe makasilo Siạ, sarang i kau mẹ̌berau, ’Al᷊amatẹ̌ i Sie rụděnta su areng u Mawu Kasěllahenge.’ ”
Currently Selected:
LUKAS 13: SXN
Highlight
Share
Copy
Want to have your highlights saved across all your devices? Sign up or sign in
