LUKAS 18

Papinintung bawine wal᷊u ringangu mělahukung

1Bọu ene i Yesus měbẹ̌běken sěmbaụ papinintu waugu ipaněntiro manga muritʼE tadeạu i sire hanesẹ̌ měmpẹ̌doa ringangu tawe ikawěsụ u ěnna. 2Mawu Yesus něhengetang, ”Su soa sěmbaụ kai piạ mělahukung kụ tamatatakụ u Mawu Ruata e, dingangu tawe měndarekeng i sai-sai. 3Su soa ene piạ l᷊ai sěngkatau wawine wal᷊u kụ seng pira-pirang sul᷊e mětẹ̌těngong mělahukung ene mědẹ̌dorong perkarane pakịontol᷊ẹ̌, ’Tul᷊ungko iạ mẹ̌těngon dokạku,’ angkuěngu wawine wal᷊u ene. 4Ene sěngapang děngụe mělahukunge tawe mapulu mẹ̌tul᷊ungu wawine wal᷊u ene. Kai samurine mělahukung ene kai nẹ̌tiněnna, ’Maningbeng iạ tamatakụ u Mawu Ruata ringangu tawe měndarekeng i sai-sai, 5kai ual᷊ingu wawine wal᷊u ini měngkai hanesẹ̌ duděnta manahaghe siạ, mapiangbe iạ mẹ̌tul᷊ungu perkarane. Kai kereu tala, i sie měntěhang měngkai hanesẹ̌ duděnta kụ makasigěsạ si siạ.’ ”

6Bọu e Mawu něhengetang, ”Pẹ̌tiněnna apang kụ niwerang mělahukung tạ katul᷊ide ene! 7Ho! Sěnaungu Mawu Ruata kai ta makakoạ tumatawang pěrkarang umatʼE sẹ̌sane kụ měmpẹ̌kẹ̌kal᷊iomaneng si Sie ěllo-hẹ̌bi? Su naungu i Sie měnẹ̌nohọ u tempo mědeạu mẹ̌tul᷊ung i sire? 8Pangimangke: I Sie měngkate masahawụ tumatawang pěrkarang sire! Kaiso kamageng Ahusʼu Taumata ruměnta, apa wědaweng makahombang taumata mạngimang si Sie su dunia ini?”

Papinintung tau Farisi ringangu maghaghělle bea

9Mawu Yesus mal᷊aing nẹ̌běkeng papinintu ini kụ pinẹ̌timonanʼE su taumata mapakasanạ u taumata wal᷊ine, kaiso mangiaking u batangeng i sire mapia. 10Angkuěng i Yesus, ”Piạ tau ruang katau kụ nakoạ sarang bal᷊eng Mawu měmpẹ̌kal᷊iomaneng. Sěngkatau tau Farisi, kụ sěngkatau e wal᷊ine lai e maghaghělle bea. 11Tau Farisi ene rimarisị nẹ̌těngkahae sẹ̌sane kụ nẹ̌kal᷊iomaneng,#18:11: Rimarisị nẹ̌těngkahae sẹ̌sane kụ nẹ̌kal᷊iomaneng: pira-pira winohẹ u nạung: dimarisị kụ nẹ̌kal᷊iomaneng su naung. ’Oh Ruata, iạ makitarimakasẹ si Kau, u iạ bal᷊ine kere taumata sěnggạ, kụ tahapěhampasẹ̌, tạ katul᷊ide, arau tahawuang. Iạ makitarimakasẹ ual᷊ingu iạ bal᷊inewe mẹ̌sul᷊ungu maghaghělle bea ěndaị ene. 12Iạ mẹ̌puasa duan sul᷊e sěngkamisa dingangu iạ mangonggọ u sasěmbaku si Kau katahạpul᷊ong bahageange bọu kěbị ěbạku.’ 13Arawe maghaghělle bea ene dụdarisi bọu maraune dingangu sal᷊a matakụ kadal᷊ingarane sarang l᷊angị. Apidʼu kạpẹ̌ngapune sěbạ e i sie kapẹ̌berane, ’O Mawu Ruata, tal᷊ěntụkon iạ taumata waradosa ini!’ ”

14 # Mat. 23:12; Luk. 14:11 ”Pangimangke,” angkuěng i Yesus, ”su tempong napul᷊ẹ sol᷊ong bal᷊e, maghaghělle bea ene kụ nitarimạ u Mawu Ruata bal᷊inewe tau Farisi ene. U apan taumata kụ mẹ̌těngkarangẹ u watangenge kai iapakasanạ; dingangu i saing kụ mětěngkasanạ u watangenge kai iapakarangẹ.”

Mawu Yesus mangal᷊amatẹ̌ manga rariọ

(Mat. 19:13-15; Mrk. 10:13-16)

15Piạ manga taumata němpẹ̌bawa manga rariọ darodọ sol᷊ong anun Mawu Yesus tadeạu i Sie manenggehẹ̌ dingangu mangal᷊amatẹ̌ si sire. Sarạeng manga muritʼi Yesus nakasilo ene, i sire kai limangehẹ̌ su taumata l᷊awọ ene. 16Kai i Yesus nẹ̌kui manga rariọ e mase něhengetang su manga tumatol᷊enʼE, ”Balạ e manga rariọ aparěnta su anu-Ku! Abe sahaghei i sire, batụ kai taumata kere ěndaị ini makoạ anạ u Mawu Ruata. 17Tahěndungeko! I sain tawe mẹ̌těngon Duata e kere manga rariọ ini, tawe makoạ manga anạ u Mawu Ruata.”

Kakakoạ u taumata kalạ

(Mat. 19:16-30; Mrk. 10:17-31)

18Sěngkatau pangahạ u tau Yahudi e nakiwal᷊o su Mawu Yesus, ”Tuang Guru lẹ̌adateng, iạ harusẹ̌ mẹ̌kapura ho, tadeạu makaěbạ pẹ̌bawiahẹ̌ kakalẹ̌?”

19”Kawe unụe i kau měsěsěbạ u Iạ mapia?” kakiwal᷊on Mawu si sie. ”Tawẹu sarang sěngkatau mapia, sul᷊ikudʼu Mawu Ruata sẹ̌sane. 20#Sas. 20:12-16; Pang. 5:16-20 I kau seng masingkạ manga parentang Mawu Ruata: ’Kumbahang mawuang, kumbahang mamate, kumbahang mẹ̌tako, kumbahang měsahiding konti, ringangu pangadatẹ̌ si amangu ringangu si ninangu.’ ”

21”Kěbị parenta ene seng takụ nituhukang, dokeng iạ bẹ̌dang kadodọ,” sasimbangu tau ene.

22Nakaringihẹ̌ ene, i Yesus něhengetang, ”Bědang piạ sěmbaụ hinong koatengu: Bal᷊ụko kěbị arětạ u kụ onggọko roite su tau kasiang, kụ i kau sarung makahombang arětạ u su sorga. Bọu ene mahịe tol᷊e Siạ.” 23Sarangke tau ene nakaringihẹ̌ ene, i sie měngkatewe masusa naunge, ual᷊ingu i sie kai kalạ kahěngang.

24I Yesus masingkạ u tau ene masusa naunge ual᷊ingu ene Mawu Yesus něhengetang, ”Masigěsạ kahěngang tau kalạ makoạ kawanuang Mawu Ruata! 25Mal᷊owokangbe onta sumuẹ̌ su tul᷊in darahung, sul᷊ungu tau kalạ sumuẹ̌ su kararatuang u Mawu Ruata.”

26Kěbị taumata apan nakaringihẹ̌ si Yesus něhengetang kerene nakiwal᷊o, ”Kamageng kerene, i sai tangu hinong masal᷊amatẹ̌?”

27Yesus simimbang, ”Apan tawe mariadi su taumata e, mariadi wue su Mawu Ruata!”

28Mase i Petrus nẹ̌bera, ”Kakělla! I kami seng naněntangu sěmbal᷊eěng baugu tumol᷊e si Tuang.”

29”Pangimangke!” angkuěng i Yesus. ”I sain seng naněntangu wal᷊ene, arau kawinge arau mahuanene arau inang-iamange arau manga anạ e ual᷊ingu mẹ̌tangkiang Mawu Ruata, 30i sie sarung bal᷊isang limembong kal᷊awọe pira haweng su tempo ini, dingangu su tempo sarung duměnta, i sie sarung gělikangu pẹ̌tatumbiahẹ̌ tutune ringangu kakalẹ̌.”

Mawu Yesus nẹ̌bisara katěllung sul᷊ene hal᷊ẹ̌ u kapapohonge

(Mat. 20:17-19; Mrk. 10:32-34)

31Mawu Yesus nangomol᷊i sire muritʼE mapul᷊o dua nihaene mase něhengetang, ”Daringihẹ̌ko! I kitẹ ini mětẹ̌timona Yerusalem. Pai sene, kěbị apan niwohẹ u manga nabi mạanun Ahusʼu Taumata sarung mariadi. 32I Sie sarung isarakang su apan taumata wal᷊ine Yahudi, kụ sarung mẹ̌taghunalang, měhinakang dingangu mangědu si Sie. 33I sire sarung manịgěsạ dingangu mamate si Sie, arawe su katěllu ěllone i Sie sarung mẹ̌bangung.”

34Patikụ ene tawe nikaěnnaěngu manga muritʼE sarang kadodọ-dodọ. Mangal᷊en bawerang Yesus ene nibawunin sire. I sire běgan Sie měnsang měbẹ̌bisarang apa.

Mawu Yesus napakapian taumata wuta taharorong

(Mat. 20:29-34; Mrk. 10:46-52)

35Su tempon Yesus marani mahumpạ u Yerikho, sěngkatau wuta mạiang mẹ̌taharorong su wiwihʼu ral᷊eng. 36Piạ i sie nakaringihẹ̌ taumata l᷊awọ sụsahe i sie nakiwal᷊o, ”Kai piạ apa?”

37”Yesus tau Nazaret ene sụsahe,” angkuěng i sire si sie.

38Tangu tau wuta e nẹ̌kiạe, ”Yesus, Ahusʼi Daud! Tal᷊ěntụkong iạ!”

39I sire apan su těngone, němpẹ̌pědu ringangu něngoron sie apakạděmasẹ̌. Kai i sie saunengkewe nẹ̌kuịewen tingihe limembong kaihạ e, ”Ahusʼi Daud! Tal᷊ěntukong iạ!”

40Mawu Yesus nẹ̌dung dingangu nangoro taumata apẹ̌bẹ̌bawa tau wuta ene sarang anunʼE. Sarạeng i sie nahumpạ, Yesus nakiwal᷊o, 41”Kai apa kapulunu Takụ koateng si kau?”

”Tuang,” sasimbahu tau wuta ene, ”iạ mapulu makasilo.”

42Mase Mawu Yesus něhengetang, ”Kamageng kerene ute, pẹ̌kěllạe! Ual᷊ingu i kau mangimang si Siạ ute, i kau e mul᷊e.”

43Su tempo ene lai, i sie ringangu nakasilo, mase i sie timol᷊e si Yesus apidu nakitarimakasẹ, su Mawu Ruata. Sarạeng taumata l᷊awọ e nakasilọ e hal᷊ẹ̌ ene ute, i sire kěbị němpẹ̌dalo Mawu Ruata.

Currently Selected:

LUKAS 18: SXN

Highlight

Copy