LUKAS 20
20
Kakiwal᷊on mạanung kawasang Yesus
(Mat. 21:23-27; Mrk. 11:27-33)
1Piạ e su sahěllo, i Yesus kạpaněntirone ringangu mělẹ̌habaren Injilẹ̌ bọu Mawu Ruata su taumata l᷊awọ su ral᷊ungu Wal᷊em Mawu. Manga imang těmbonange, manga mananěntiro agama ringangkewen měngangahạ tau Yahudi riměnta, 2kụ němpẹ̌bera si Yesus, ”Kěnang habarẹ̌ si kami kai apa wanggilu timonanu hakịu i Kau nẹ̌koạ kěbị ini? Kai i sai tangu nẹ̌gěllịu kawasa ene si Kau?”
3Yesus simimbang, ”Iạ mapulu makiwal᷊o. Kěnangko pěhabarẹ̌ si Siạ, 4I Yohanes kai něnahani ringangu kawasang sai tangu? Mawu Ruata arau taumata?”
5Tangu i sire nanětạ e nahumbisara, ”Kereu i kitẹ měhabarẹ̌, ’U kai ringangu kawasan Mawu Ruata,’ ute i Sie sarung mẹ̌bera, ’Mạeng kerene, kawe unụe i kamene tawe mangimang si Sie?’ 6Arawe mạeng i kitẹ mẹ̌bera, ’Kai ringangu kawasang taumata,’ ute sěngkawanuange měntěhang mangěntungu watu si kitẹ, batụu i sire mạngimangu i Yohanes kai sěngkatau nabi.” 7Kutẹu i sire simimbangu, ”I kami wẹ̌ga wue.”
8Tangu i Yesus něhengetang si sire, ”Kamageng kerene Iạ e tawe lai maul᷊ị si kamene, měnsang dingangu kawasang sai Iạ měkẹ̌koạ kěbị ene.”
Papinintung manga mělahal᷊ẹ̌ u waelʼu anggorẹ̌
(Mat. 21:33-46; Mrk. 12:1-12)
9 #
Yes. 5:1
Mawu Yesus měbẹ̌běke su taumata l᷊awọ e, papinintu kere ini, ”Piạko nạung sěngkatau nẹ̌koạ sasuange anggorẹ̌. I sie nakitamang sasuange su pirang katau mělẹ̌hal᷊ẹ̌ sasuang mase nakoạ sarang banua wal᷊ine kụ nẹ̌tanạ diọ marěngụ sene. 10Su tempone e manipo wuang anggorẹ̌, taghuangu sasuange něndolohʼu ěllange sarang anun mělahal᷊ẹ̌ ene tadeạu manarimạ bageange. Kutẹu manga mělahal᷊ẹ̌ ene nělimadẹ̌ ěllang ene kụ i sie nirolohẹ̌ niapakapul᷊ẹ dingangu limane tạ l᷊ohone. 11Tangu taghuangu sasuange saụewe lai rimolohʼu ěllange lai wal᷊ine; kutẹu ěllange ene mal᷊aing nilimadʼi sire ringangu nipakameang manga mělahal᷊ẹ̌, mase niapakapul᷊ẹ tạ ul᷊e apa. 12Bọu e taghuangu sasuange rimolohʼu ěllange katěllune. Arawe ěllang ene mal᷊aing nilimadʼu manga mělahal᷊ẹ̌ ene kụ niteledʼi sire sul᷊ikudu sasuang ene. 13Pěngěnsueěnge taghuang sasuang ene nẹ̌berạ e, ’Iạ e kai mẹ̌kapurạe ngae? Iạ e sarung měndolohen ahusẹ̌ku ikẹ̌kěndagẹ̌. Sembeng nal᷊ahẹu i sie sarung adateng i sire!’ 14Akutẹu sarang manga mělahal᷊ẹ̌ nakasilo anạ u taghuangu sasuang ene, i sire němpahumbisarạ e sěngkatau su wal᷊ine, ’Kai ěndaị i sie ini e taghuange. Mahịe i kitẹ měmate si sie, mědeạu i kitẹ managhuang pusakạ e.’ 15Tangu i sire něhipen sie sarang l᷊ikudʼu sasuang mase pinate.”
Mase Mawu Yesus nakiwal᷊ọ e, ”Ene ěng, kamageng taghuangu sasuang ene mẹ̌bal᷊ị, i sie sarung mẹ̌kapurạe su manga mělahal᷊ẹ̌ ene? 16Mambeng těngadẹ̌, i sie sarung duměnta kụ mamate manga mělahal᷊ẹ̌ ene, kụ manarakangu sasuange su mělahal᷊ẹ̌ e wal᷊ine.”
Nakaringihẹ̌ ene, němpẹ̌berạ e taumata l᷊awọ si Yesus, ”Mambeng aị kariadi kerene!”
17 #
Mzm. 118:22
Mawu Yesus kai namanda si sire mase nakiwal᷊o, ”Kamageng kerene, apa mangal᷊en bawal᷊om Binohẹ Susi ini?
’Batu niwalan mẹ̌kakoạ bal᷊e e kai seng nakoạ batu kahumotongange.’
18Kěbị taumata apan naěnsạ su watu ene sarung maral᷊utạ; dingangu i saịewen kaěnsakengu watu ene sarung mararul᷊ẹ makoạ awul᷊ẹ̌.”
Hal᷊ẹ̌ u pěmamaehẹ̌ balasteng
(Mat. 22:15-22; Mrk. 12:13-17)
19Manga mananěntiro agama ringangu manga imang těmbonange masingkạ u papinintu ene ipẹ̌tẹ̌tal᷊ahinon Yesus si sire. Ual᷊ingu ene i sire mědẹ̌deạ manamẹ si Sie su orasẹ̌ ene lai, kai i sire matakụ u kawanua e. 20Kutẹu i sire měngkai mědẹ̌deạ loahe mapia. I sire rimolohʼu taumata sarang anung Yesus makoạ mẹ̌papahimang makịtikạu taumatawe matul᷊idẹ̌ tadeạu i sire měngal᷊ạ bera si Yesus dingangu kakiwal᷊o mědeạu i sire makapěnarakang i Sie su mananěmbonange ringangu kawasang guběrnurẹ̌. 21Tangu i sire apan nionggotangu roitẹ̌ e němpẹ̌bera si Yesus, ”Tuang Guru, i kami masingkạ u kěbị apan niwera ringangu nitěntiron Tuange něhino wue. I kami masingkạ lai u i Tuang dingangu mahatedẹ̌ maněntirong kapulun Mawu Ruata su taumata, batụu i Tuang tawe měmamile taumata. 22Ual᷊ingu ene kěnang i Tuang pẹ̌bera si kami, tuhụewe su těntirong agamang kitẹ botonge wue mamaehẹ̌ balasteng su Kaisarẹ̌ arau tala?”
23Kai Mawu Yesus masingkạu tondol᷊ikụ i sire hakịu ene i Sie něhengetang, 24”Kěnangko todẹ si Siạ doitẹ̌ sal᷊aka sěngkal᷊ěpa. Tul᷊ada ringangu arengi sai ini e?”
”Kaisarẹ̌!” nisimbahʼi sire.
25”Mạeng kerene,” angkuěng i Yesus si sire ute, ”ghělịbe su Kaisarẹ̌ apạewen darotongu Kaisarẹ̌ dingangu su Mawu Ruata apạewen darotongu Mawu Ruata e.”
26Kawe těngadẹ̌ su těngon taumata l᷊awọ e i sire tawe nakasamẹ sal᷊a maning kětạu sěmbaụ si Yesus. I sire měngkatewe marěmasẹ̌ dingangu mạdal᷊ingụen sasimbangʼE.
Hal᷊ẹ̌ u pẹ̌bawangung bọu papate
(Mat. 22:23-33; Mrk. 12:18-27)
27 #
MMR. 23:8
Pirang katau wọu ghal᷊ipohong Saduki nahunděnta sarang anum Mawu Yesus. (I sire ghal᷊ipohon taumata kụ piạ kasingkạ u tawẹ apa pẹ̌bawangungu taumata nate.) I sire nakiwal᷊o si Yesus, 28#Pang. 25:5 ”Tuang Guru, i Musa kawe namohẹ u tita ini si kitẹ: Kereu piạ u sěngkatau esẹ mairị kụ i sie kawe wantọ, tangu tuarine (tuhange) harusẹ̌ pẹ̌kawing dingangu wal᷊une mědeạu mapal᷊ětowen hite su tau seng nairị. 29Piạ nạung i sire pitu tamahuari. Ene iakange nẹ̌kawing dingangu wal᷊une, kutẹu i sie lai nate wantọ. 30Mase karuane nẹ̌kawing dingangu wal᷊une, kutẹu i sie lai nate wantọ. 31Hal᷊ẹ̌ lai mẹ̌sul᷊ung naraiadi su anạ u sěmbaụ katěllune ringangu sarang lai kapitune. 32Nạdehọ tau wawine ene nate e lai. 33Su ěllon pẹ̌bawangungu taumata nate ute, kai kawingken sai tau wawine ene? Batụu i sire pitu e seng bọu němpẹ̌kawing i sie kěbị.”
34Mawu Yesus simimbang, ”Manga taumata mẹ̌bẹ̌biahẹ̌ orasẹ̌ ini měmpẹ̌kẹ̌kawing, 35kai i sai-saing hinong ipẹ̌bangung kapia wọu papatene, kụ mẹ̌biahẹ̌ su tempo ramahi e i sire seng tawe mẹ̌kawing. 36Kakakoạ i sire kai kere malạekatẹ̌ tawe l᷊umaate. I sire kai manga anạ u Mawu Ruata, watụ u i sire seng niapẹ̌bangung kapia wọu papate. 37#Sas. 3:6 I Musa sẹ̌sane nělahẹ u taumata nate sarung iapẹ̌bangung kapia. Su ral᷊ungu winohẹ e mạanun gahundungu sumpinị kụ dụděllị ene i sie nakasěbạu Mawu kere ’Ruatang Abraham, Duatang Ishak, Duatang Yakub’. 38Kụ Duata ene bal᷊inewe Ruatan taumata nate! I Sie kai Ruatan taumata wiahẹ̌! Batụu su Ruata e kěbị taumata e wiahẹ̌.”
39Pirang katau mananěntiro agama němpẹ̌bera, ”Sasimbangi Tuang Guru e mapaelẹ̌ kahěngang.” 40Ual᷊ingu ene i sire sembeng tawe lai wahani makiwal᷊on manga apa si Yesus.
Hal᷊ẹ̌ u Ratu Mananal᷊amatẹ̌
(Mat. 22:41-46; Mrk. 12:35-37)
41Mawu Yesus nakiwal᷊o si sire, ”Kere apa ral᷊enge mědeạu Ratu Mananal᷊amatẹ̌ e ikawerawe hěnton Daud? 42#Mzm. 110:1 Sumbal᷊iau i Daud sẹ̌sane nẹ̌bera su ral᷊ungu bukẹ̌ u Mazmur,
’Mawu kasěllahenge něhengetang su Mawuku:
Kaiangko su koaneng-Ku,#20:42: Kaiangko su koaneng-Ku: Tumuhụ tundun tau Yahudi, apang lẹ̌adateng dingangu lẹ̌onggotangu kawasa apạkaiang su koanengʼE.
43sarang Iạ měkoạ manga rokạʼU e
mẹ̌suba si Kau.’
44Kutẹu kamageng i Daud měsẹ̌sẹ̌bạu Ratu Mananal᷊amatẹ̌ e, ’Mawu’, kụ kereapa wue i Sie kawe hěnton Daud?”
Laingatu tadeạu pakatateghang bue su manga mananěntirong agama
(Mat. 23:1-36; Mrk. 12:38-40)
45Ene taumata e kapẹ̌daringihe si Yesus mělẹ̌hengetang, i Sie nẹ̌bera su manga muritʼE, 46#Luk. 11:43 ”Pakatateghang bue su manga mananěntiro agama. I sire puluang mẹ̌daral᷊eng dingangu lakụ mananandu, kụ papuluang makịadatẹ̌ su manga pasarẹ̌. I sire papuluang kumaiang su kakaianeng su horone su pěmamisaěng dingangu su manga sal᷊imbang. 47I sire měmpạngakal᷊ẹ̌ manga wawine wal᷊u ringangu mělẹ̌hampasẹ̌ bal᷊ene. Kụ mědeạu karal᷊ai i sire tawe kasingkateng ute, i sire měmpẹ̌kẹ̌kal᷊iomaneng manandu-nandu. Hukumang i sire sarung limembong kawěhạe.”
Currently Selected:
LUKAS 20: SXN
Highlight
Share
Copy
Want to have your highlights saved across all your devices? Sign up or sign in
