LUKAS 11

Tatintiro-Ngi Yesus hal᷊i u mukal᷊iomaneng

(Mat. 6:9-13, 7:7-11)

1Pia su silou I Yesus nukal᷊iomaneng su tampa simbau. Nasue kal᷊iomanenge, singkatau bou manga tumatuhu-E nangul᷊i, “Mawu, kenangko tintiroi i kami mukal᷊iomaneng kere i Yohanes nanintiro manga tumatuhu-E mukal᷊iomaneng.”

2Kute I Yesus nangul᷊i si sire, “Boko i kumu mukal᷊iomaneng, puhabari kiri'i,

‘Yamang,

I Kau Mawu Ruata mang simbau.

Mal᷊umbako I Kau isumba l᷊au iadateng

I Kau ratungi kami.

Mal᷊umbako I Kau mamareta su dunia.

3Onggoko l᷊ou-l᷊ou

l᷊aidopi ko kanengang i kami.#11:3: l᷊aidopi ko kanengang i kami: arako kang guna ngu dol᷊ou.

4Ampungeko apang dosa ngi kami,

watu'u i kami l᷊ai seng nangonggo u

ampunge su apang taumata ko nunsal᷊a si kami.

Dang kumbahang mamalangi kami kailangeng u pangangimang su tempo i kami isal᷊ukateng.’ ”

5I Yesus nangul᷊i su apang tumatuhu-E, “Boko singkatau bou tal᷊oara i kumu nakoa sarang wal᷊e ngu ghawenge su huwi l᷊al᷊ung, dang nangul᷊i, ‘Anu, maiko ia mangirang boroti u tilumbau, 6watu'u ghaweku ko su ral᷊al᷊engang, wuhu-wuhu naotong su wal᷊e dang ia nikasueng u kang guna ngi sie!’ 7Boko ghawe ko ni songongu e'e nusumimbahi bou l᷊al᷊ung u wal᷊enge, kiri'i, ‘Kumbahang mupakasusa ngu ia! Tukari seng makakunsi l᷊au ia dingang u manga ana ku seng l᷊awo katikie. Ia seng ta makapuwangung dang mangonggo manga apa si kau.’ ”

8“Inau kirapa we?” angkung I Yesus tuhue. “Ia muhabari, iya! Maning we i kau ko ghawenge, i sie mang mandi muwangung dang mangonggo manga apa si kau. Kateho ual᷊ingu i kau ta mamea mundo turusi si sie, kute i sie mang sarung muwangung dang mangonggo si kau apa ko i kao u. 9Inau, Ia muhabari si kumu: Pundo e, kute i kumu sarung onggol᷊ang: pundea e, kute i kumu sarung makarea: panengkohete, kute tukari sarung i wuka si kumu. 10Watu'u taumata ko mundo sarung manarima: taumata ko mundea sarung makarea, dang taumata ko manengkohi, tukari sarung i wuka. 11Su tal᷊oara i kumu apa pia iamang ko mangonggo katoang su ana u, boko i sie mundo kina? 12Arako mangonggo maul᷊ipang, boko i sie mundo tul᷊uhi? 13Maning i kumu ko dal᷊ai, i kumu matitong l᷊ai mangonggo ko mapia su ana u. Nangilebe we I Yamangu su sorga! I Sie sarung mangonggo u Roh-E si sire ko mundo si Sie!”

I Yesus dingang u Be'elzebul

(Mat. 12:22-30; Mrk. 3:20-27)

14Pia su silou I Yesus nanguseri roh ko dal᷊ai pasuwang bou singkatau ko bobo. Suapang roh ko dal᷊ai e'e nusumuwang, tau e'e nanita nudidato. Maul᷊i taumata ko naherang, 15#Mat. 9:34, 10:25kateho pia ko nangul᷊i, “I Sie botonge nakauseri roh ko dal᷊ai ual᷊ingu kawasa ngu Be'elzebul, tumbonang u roh ko dal᷊ai e'e.”

16 # Mat. 12:38, 16:1; Mrk. 8:11 Pia l᷊ai manga taumata kowal᷊inge ko mundea sal᷊angi I Yesus, inau i sire mundo si Sie pukoa simbau ko makal᷊aherang kere tatia himoneu I Sie nusumongo bou Mawu Ruata. 17Arawe I Yesus matitong pandungi sire. Kute I Sie nangul᷊i si sire, “Boko simbau negara mapahia pirang kamonang ko kapurarokae, negara e'e tamaumuri. Dang simbau keluarga ko mapahia dang kapurarokae simbau dingang u kowal᷊inge sarung maghoghahi. 18Kere'e l᷊ai su l᷊al᷊ung u kararatuang u setang; boko komol᷊ang simbau mukakoka dingang u komol᷊ang kowal᷊inge, kararatuange e sarung mahaka. Kumu nangul᷊i ware Ia manguseri roh ko dal᷊ai ual᷊ingu kawasa ngu Be'elzebul. 19Boko kere'e, dingang u kawasa ngi sai manga tumatuhu u manguseri manga roh ko dal᷊ai e'e? Manga tamatuhu u e'e sisane nupakal᷊ahe himoneu i kumu ko nusala! 20Arawe Ia manguseri roh ko dal᷊ai dingang kawasa-Ngu Mawu Ruata, dang e'e mangal᷊enge humoneu Mawu Ruata, seng nanita mamarenta sutal᷊oara i kumu.

21Boko singkatau ko matoghasi, dingang u l᷊al᷊utang ko nasuku, mundiaga wal᷊enge sisane, kaul᷊i u rarotonge sarung masal᷊amati. 22Kateho boko singkatau ko nangilebe matoghasi mundoka dang mamata si sie, kute taumata ko nangilebe matoghasi e'e sarung muhampasi kaul᷊i u l᷊al᷊utan ko i pangumba ngu tataghuang u wal᷊e e'e, bou e'e mupapahia apang rarotonge.

23 # Mrk. 9:40 Taumata ko ta manimbuka si Sia, tinga-tingari mundoka si Sia, dang taumata ko ta musumbala si Sia, tinga-tingari mundusa hal᷊i-Ku!”

Pusasul᷊engu roh ko dal᷊ai

(Mat. 12:43-45)

24“Boko roh ko dal᷊ai manintang u singkatau, roh e'e l᷊umal᷊eng mul᷊iku apang tampa ko mamara mundea tampa pangindul᷊eng, kateho i sie ta nakarea. Ual᷊ingu e i sie nangul᷊i, ‘Ia sau musul᷊e sarang wal᷊e ko seng daku nitintang!’ 25Su tempo i sie nurating pai se'e, nikawuange wal᷊e e'e seng mabursi l᷊au naatori. 26Bou e'e i sie natamai dang numbawa si sire pitu roh dal᷊ai ko wal᷊inge ko mborong nangilebe kadal᷊ai bo i sie. Bou e'e i sire nusumu su tau e'e mbuhue natana se'e. Dang panginsuenge kakakoa u taumata e'e nangilebe kadal᷊aie bou horo.”

L᷊al᷊iaghi ko kahingang

27Suapang I Yesus bou nangul᷊i kere'e, singkatau kowawine bou tal᷊oara u taumata maul᷊i e'e nangul᷊i si Yesus, “Wal᷊inge gampang l᷊al᷊iaghi kowawine ko nupahinding dingang u nupasusu si Kau!”

28Arawe I Yesus nusumimbahi, “Mborong nangilebe l᷊ai l᷊al᷊iaghi taumata ko mundaringihi hengetang u Mawu Ruata dingang u mukoa e'e!”

Manga taumata mundo si Yesus pukoa kal᷊aherang

(Mat. 12:38-42)

29 # Mat. 16:4; Mrk. 8:12 Tintal᷊a manga taumata kapul᷊ahumbunge si Yesus, I Sie nanurusi didato-Nge, angkung-E, “Walinge gampang karal᷊aie mang taumata su tempo i'i. I sire mundo simbau ko makal᷊aherang, tadeau i sire makapangimang si Sia, kateho i sire ta sarung onggolang ko makal᷊aherang maning simbau, sul᷊ikuru ko makal᷊aherang i Nabi Yunus. 30#Yun. 3:4Musul᷊ung i Nabi Yunus nakoa kere ko makal᷊aherang su taumata ngu soang Niniwe, kere'e l᷊ai Ahusu Taumata sarung makoa simbau ko makal᷊aherang su manga taumata tempo i'i. 31#1Raj. 10:1-10; 2Taw. 9:1-12Su L᷊ou Kiamati, Ratu bou soa simbuka ngu Timuhi sarung muwangung dingang u manga taumata tempo i'i dang mangantang si sire. Watu'u, guna ngu mundaringihi tintirongi Salomo ko pande, Ratu e'e l᷊umal᷊eng marau kahingang bou pondol᷊u dunia. Arawe su si'i su tempo i'i pia ko nangilebe l᷊abo e bo i Salomo! 32#Yun. 3:5Su L᷊ou Kiamati, kawanua ngu Niniwe sarung muwangung dingang u manga taumata su tempo i'i, dang mangantang si sire, watu'u tau Niniwe e'e seng nutobati bou apang dosa ngi sire, su tempo ngi Yunus nunasi si sire. Arawe su si'i su tempo i'i pia ko nangilebe l᷊abo bo i Yunus!”

Masua l᷊au marundung

(Mat. 5:15, 6:22-23)

33 # Mat. 5:15; Mrk. 4:21; Luk. 8:16 “Takoa e taumata ko mundiko sol᷊o bou e'e manuhi arako manaka dingangu bunsari.#11:33: Su l᷊al᷊ung u pirambau wohe horo takoae: arako manaka dingangu bunsari. I sie sarung mamilo sol᷊o e'e su tampa e, tadeau taumata ko sumu botonge makawua suange. 34Mata ko sol᷊o ngu badang. Boko matangu matilang, kaul᷊i u badang u masua-sua. Arawe boko matangu marundung, kaul᷊i u badang u makoa ko marundung-rundung. 35Ual᷊ingu e'e, pakatiho, kumbahang sarang sua ko ene si kau e'e makoa ko marundung. 36Boko kaul᷊i u badang u masua, dang takoae sarang simpalang marundung, kute kaul᷊i u badang u suminang masua-sua musul᷊ung nisinang sua ngu sol᷊o.”

I Yesus nupunsal᷊angu manga taumata ngu Farisi l᷊au manga meteru agama

(Mat. 23:1-36; Mrk. 12:38-40)

37Suapang I Yesus nasue didatonge, singkatau Farisi nunoti si Sie nukumang su wal᷊enge. Kute I Yesus natamai nukumang su se'e. 38Tau Farisi e'e naherang nakawua si Yesus nukumang ta nanguhasi l᷊ima-Nge horo tumuhu atorang u agama. 39Watu'u e'e Mawu nangul᷊i si Sie, “Tingari i kumu apang tau Farisi nae nanarang manguhasi wohosi dingang u pinggang kitang su l᷊ikure, arawe su l᷊al᷊ung u badang i kumu napene u kitihi dingang u ko rol᷊ai. 40I kumu ko bodoki! Wal᷊inge we Mawu Ruata ko nukoa l᷊ikure e'e, seng nukoa l᷊ai ral᷊unge? 41Ko su l᷊al᷊ung u wohosi dingang u pinggangu e'e, ko e'e mambeng ionggo i kumu su apang tau ko susa. Dingang u l᷊al᷊eng e'e, kaul᷊ie sarung mabursi guna ngi kumu.

42 # Im. 27:30 Silaka si kumu, apang tau Farisi! L᷊uang sasuangu kere manga salasi l᷊au inggu dingang u manga rampa kowal᷊inge, i kumu mangonggo u simbahageang mapul᷊o su Mawu Ruata, kateho kal᷊aadili l᷊au kakindighi su Mawu Ruata ta ipandungang i kumu. Sumbal᷊i ko e'e mambeng koateng i kumu, dang ta mamala ngu ko wal᷊inge l᷊ai.

43Silaka si kumu, apang tau Farisi! I kumu mo manga tampa ko l᷊uadateng su l᷊al᷊ung u wal᷊e pukakal᷊iomanengang, dang mo iadateng su manga pasari. 44Silaka si kumu! I kumu musul᷊ung u kubul᷊i ko takoae arenge, ko nikawughaneng nakoa tatotokang u taumata.”

45Singkatau bou manga meteru agama nangul᷊i si Yesus, “Tuang Guru, dingang u wisara e'e, I Tuang nuhinakang l᷊ai si kami!”

46I Yesus nusumimbahi, “Silaka l᷊ai si kumu, manga meteru agama! I kumu manuntu apang hal᷊i ko masusa, dang munggile manga atorang ko mababuha, kateho sarang singkodo i kumu mandi mutul᷊ung u taumata pukoa e'e. 47Silaka si kumu! I kumu mukoa kubul᷊u manga nabi, ko l᷊inau nipate ngi upung i kumu. 48Inau i kumu sisane nangaku ngu apang ko nikoa i upung i kumu; watu'u mang i sire namate manga nabi e'e, dang i kumu nukoa kubul᷊e. 49E'e sabapie Kapandengu Mawu Ruata nangul᷊i, ‘Ia sarung mundoho sarang koa i sire manga nabi dingang u manga raroi-Ku; singga sarung pateng dang singga l᷊ai pahangeng!’ 50Mawu Ruata nukoa e'e tadeau apang taumata su tempo i'i ihukung ual᷊ingu pamamate ko nikoa su kaul᷊i u nabi mangking bou karariadingu dunia, 51#Kej. 4:8; 2Taw. 24:20-21nanita bou pamamate si Habel sarang pamamate si Zakharia, ko nariadi su tal᷊oara u mezbah dingang u Wal᷊e-Ngu Mawu. Pangimangte: Apang taumata su tempo i'i nal᷊ahe sarung i hukung ual᷊ingu kaul᷊i u e'e.

52Silaka si kumu, manga meteru agama! Kakunsi guna ngu pamuka tukaru titong nireso si kumu, kateho i kumu sisane mandi sumu su l᷊al᷊unge guna ngu mundea titong e'e. Su simbukange i kumu muhumping apang taumata ko mutawakal᷊i sumu sarang l᷊al᷊unge!”

53Su tempo I Yesus nanintang u tampa e'e, manga meteru agama dingang u manga tau Farisi nuheang mauha si Yesus. I sire nanita manaung si Sie tadeau i Sie mo mudidato hal᷊i maul᷊i. 54Dang tintal᷊a e'e i sire kaputuhunge si Sie mapia-pia guna ngu maname apang didato-Nge ko nunsal᷊a.

Currently Selected:

LUKAS 11: LAISXN

Highlight

Copy