MARKUS 1

Nasi i Yohanes Mananahani

(Mat. 3:1-12; Luk. 3:1-18; Yoh. 1:19-28)

1I'i e habari mapia bou hal᷊i I Yesus Kristus, Ahusu u Mawu Ruata.#1:1: Su l᷊al᷊ung u pirambau wohe horo takoae Ahusu u Mawu Ruata 2#Mal. 3:1Habari mapia i'i nanita bou kere niwohe i Nabi Yesaya; kiri i:

“ ‘I'i e raroi-Ku’, angkungu Mawu Ruata,

‘Ia nundoi si sie puhoro si Kau,

tadeau i sie pamuka ral᷊eng gunang-Ngu.’

3 # Yes. 40:3 Pia taumata kapunggonge su tanah ko l᷊inggi,

‘Sadiaiko ral᷊eng guna-Ngu Mawu,

pakateneko apang l᷊al᷊eng ko sarung il᷊al᷊engang-E.’ ”

4Musul᷊ung kere mawawohe e'e, kere'e l᷊ai i Yohanes nasongo su tanah ko l᷊inggi. I sie nanahani taumata l᷊au nangul᷊i u habari bou Mawu Ruata.#1:4: keree l᷊ai … nangul᷊i u habari bou Mawu Ruata, pirambau wohe horo: keree i Yohanes Mananahani singkahuwiu ene su tana l᷊inggi dang nuhabari habari bou Mawu Ruata. “I kumu mambeng putobati bou kaul᷊i u dosa ngi kumu dang mambeng i sahani, tadeau Mawu Ruata mangonggo u ampunge si kumu,” kere'e angkung i Yohanes. 5Kaul᷊iu manga taumata bou Yudea l᷊au u bou soa ngu Yerusalem natamai mundaringihi si Yohanes. I sire nangaku ngu kaul᷊i u patiku dosa ngi sire, dang i Yohanes nanahani si sire su sal᷊uhu Yordan.

6 # 2Raj. 1:8 I Yohanes nul᷊oho l᷊aku bou ruku u onta. L᷊aiki u kal᷊uwaenge bou kul᷊i, kange wuangu kumbati l᷊au ghul᷊angu katiupang. 7I sie nangul᷊i u habari i'i, “Hindo bou ia sarung sumongo taumata ko mborong lebe l᷊abo bou ia. Sarang kumakurung mamuka tal᷊i ngu sapatu-E, ia ta hinonge. 8Ia manahani sikumu dingang u ake, arawe I Sie sarung manahani si kumu dingang u Roh u Mawu Ruata.”

I Yohanes Nanahani si Yesus

(Mat. 3:13-17; Luk. 3:21-22)

9Su tempo e'e I Yesus nasongo bou Nasaret su Galilea, bou e'e I Sie nisahani ngi Yohanes su sal᷊uhu Yordan. 10Suapangu Yesus naawi bou sal᷊uhi e'e I Sie nakawua l᷊angi nawuka dang pia Roh u Mawu Ruata nul᷊umintu kere paluma nurumoro si Sie. 11#Kej. 22:2; Mzm. 2:7; Yes. 42:1; Mat. 3:17, 12:18; Mrk. 9:7; Luk. 3:22Bou e'e nikaringihi tingihu Mawu Ruata nangul᷊i, “I Kau Ana-Ku ko Daku i Kukindaghi. I Kau makal᷊uasi naung-Ku.”

I Yesus Nisal᷊ukatengu setang

(Mat. 4:1-11; Luk. 4:1-13)

12Bou e'e Roh u Mawu Ruata turusi bou e'e numbawa si Yesus nakoa sarang tanah ko l᷊inggi. 13Paupul᷊o sul᷊ou nge I Sie pai se'e, ni sal᷊ukatengu setang. Manga binatang ko maghila ene l᷊ai dingang-E pai se'e, dang manga mal᷊aikati nutal᷊ung si Sie.

I Yesus nukumui sire pa mukakisaghe

(Mat. 4:12-22; Luk. 4:14-15, 5:1-11)

14Suapang i Yohanes nihukung, I Yesus natamai sarang Galilea dang nangul᷊i u habari mapia bou Mawu Ruata. 15#Mat. 3:2Angkung-E, “Mawu Ruata seng maehong manita mamarenta putobate i kumu bou kaul᷊i u dosa ngu, dang pangimangte su habari mapia bou Mawu Ruata!”

16Su tempo I Yesus karal᷊enge su epeng u Rano Galilea, I Sie nakawua mukakisaghe duang katau, ko i Simon dingang u tuari nge i Andreas. I sire kapanomae su rano e'e. 17I Yesus nangul᷊i si sire rua, “Maite tuhu si Sia. Ia sarung manintiro sire rua manoma taumata.” 18I sire rua dingang nanintang u soma, bou e'e nutumuhu si Yesus.

19I Yesus turusi nurumal᷊eng, bou e'e nakawua l᷊ai sire rua tamahuari, i Yakobus sire ruang i Yohanes, ko manga ana i Zebedeus. I sire rua sural᷊ung u sakaeng, kapanambinge soma. 20I Yesus dingang nukui si sire rua. I sire rua nanintang i amang i sire rua su sakaeng dingang u manga taumata i sire. Bou e'e i sire rua natamai nutumuhu si Yesus.

Taumata ko nikasukang u roh ko dal᷊ai

(Luk. 4:31-37)

21I Yesus dingang u manga tumatuhu-E nahumpa su soa ngu Kapernaum. Su l᷊ou ngu Sabati tuhue, I Yesus nusumu su wal᷊e pukakal᷊iomanengang dingang u nanita nanintiro. 22#Mat. 7:28-29Manga taumata ko nakaringihi si Sie naherang u kakakoa I Sie manintiro, ual᷊ingu I Sie nanintiro dingang u kawasa, wal᷊inge we kere manga meteru agama.

23Su tempo e'e pia taumata singkatau ko nikasukangu roh ko dal᷊ai nusumu sarang l᷊al᷊ungu wal᷊e pukakal᷊iomanengang dingang u nukumiha, 24“Oh Yesus, tau Nasaret, apa ikoa-U si kami? I Kau nusumongo tadeau mupakasilaka i kami? Ia matitong i sai i Kau, I Kau ko daroi Susi bou Mawu Ruata.”

25“Karumasi!” I Yesus nuheang roh ko dal᷊ai e'e, “suwangte i kau bou taumata i'i!”

26Kuteu roh e'e mangkatewe nangingko-ngingko taumata e'e numbatu uha e, bou e'e nusumuwang bou taumata e'e dingang kakihae. 27Kaul᷊iu manga taumata naherang, haki u i sire mangkate nukakina, “Ko hal᷊i apa i'i? Simbau tatintiro ko wuhu! Dingangu mahuntimari dang makawasa I Sie nuparenta manga roh ko dal᷊ai nipasuwang, dang roh ko dal᷊ai e'e nundaringihi si Sie!”

28Inau l᷊ahabari hal᷊i I Yesus, nawombeng kere kasahawue su kaul᷊i u Galilea.

I Yesus nupakaul᷊e ngu taumata maul᷊i

(Mat. 8:14-17; Luk. 4:38-41)

29I Yesus dingang u manga tumatuhu-E nanintang u wal᷊e pukakal᷊iomanengang e'e dang natamai nakoa sarang wal᷊e ngi Simon sire rua ngi Andreas. I Yakobus sire rua ngi Yohanes natamai l᷊ai dingang i sire. 30Iempo ngi Simon kokowawine kal᷊ahange su l᷊al᷊okang. Inau su tempo I Yesus l᷊au manga tumatuhu-E nusumu su wal᷊e e'e, I Yesus nihabareng u hal᷊i e'e. 31Kute u I Yesus natamai nusumandighi si empo ngi Simon e'e l᷊au nuhinggo l᷊ima nge, bou e'e namangung si sie. L᷊ahange e dingang nailang dang i sie l᷊ai nanita nutal᷊ung si sire.

32Nawawul᷊aeng, suapang u matangutiti nusumira,#1:32 nukumindaghi: pirambau wohe horo: muwawal᷊uang manga taumata natamai nakoa sarang koa I Yesus numbawa taumata ko masasaki dingang u ko nisukang u roh ko dal᷊ai. 33Kaul᷊iu taumata su soa e'e nul᷊ahumbung sutingong u wal᷊e e'e. 34Bou e'e I Sie nupakaul᷊e ngu taumata maul᷊i ko kaputatahang haghi ngu saki, l᷊au nanguseri l᷊ai maul᷊i roh ko dal᷊ai. I Sie ta namalangu manga roh ko dal᷊ai e'e nudidato, watu u i sire matitong ko i sai I Sie.

I Yesus nunasi su Galilea

(Luk. 4:42-44)

35Ndai mal᷊ou neng kalonge I Yesus nuwangung, bou e'e nurumal᷊eng nanintang u wal᷊e. I Sie nakoa sarang tampa dio mal᷊umpi su l᷊ikuru soa, dang nukal᷊iomaneng pai se'e. 36Arawe i Simon dingang u manga dingange natamai nundea si Sie. 37Dang suapang i sire nusombang I Sie, i sire nangul᷊i, “Taumata kaul᷊ie kapundeae si Tuang.”

38Arawe I Yesus nusumimbahi, “Intae i kite turusi tamai l᷊umal᷊eng sarang soa ko wal᷊inge, ko tamai masasandighi i'i. Ia mang mambeng munasi pai se'e l᷊ai, watu'u ko e'e pandung Ku namai.”

39 # Mat. 4:23, 9:35 Ual᷊ingu e'e I Yesus nakoa sarang apang tampa su kaul᷊i u Galilea, l᷊au nunasi su apang wal᷊e pukakal᷊iomanengang dang nanguseri apang roh ko dal᷊ai.

I Yesus nupakaul᷊e ngu singkatau ko pia sakie su pisi

(Mat. 8:1-4; Luk. 5:12-16)

40Pia singkatau ko pia sakie u pisi ko makatataku#1:40: pia saki u pisi ko makatataku: tumuhu atorang u agama Yahudi, saki i'i makakoa masasaki ta botonge manumba Mawu Ruata su tampa pukakal᷊iomanengang. nusumongo sarang koa I Yesus. Tau e'e nusuba l᷊au nudidato, “Boko i Tuang mo, kere botonge i Tuang mupakaul᷊e ngu ia.”

41I Yesus nukumindaghi u#1:41 nukumindaghi: pirambau wohe horo: muwawal᷊uang tau e'e. Inau I Sie namundang tau e'e dingang u nangul᷊i, “Ia mo, kaulete!” 42Singkatempo e'e l᷊ai saki e nailang dang i sie naul᷊e. 43Bou e'e I Yesus nundoi si sie pakapul᷊e dingang u tatanata i'i, 44#Im. 14:1-32“Awase, kumbahang muwuke manga si sai-sai, dakoe tamai sarang koa u imam, l᷊au pundo si sie mupakal᷊ahe i kau seng naul᷊e. Bou e'e sukal᷊aul᷊e ngu i kau punggileko sasumba ngu kere ko niparentangi Musa, makoa tatia su manga taumata himoneu i kau seng tinga-tingari naul᷊e.”

45Arawe tau e'e natamai, dingang u nuwawukengu hal᷊i ko seng nariadi e'e su apang tampa sarang I Yesus seng ta makasu mapia su soa e'e. I Sie kitang natatana su l᷊ikuru soa su tampa ko mal᷊umpi. Arawe taumata mangkate mang kasongonge sarang koa-E bou apang tampa.

Currently Selected:

MARKUS 1: LAISXN

Highlight

Copy