O KEJADIAN 26
26
O Ishak wogogere o Gerar mabereraka
1O bereraka gënanga idadioli o habirokata hokä idadadioka o Abraham ai orahoka. O Ishak wïhimanga o Abimelekh, o Filistin manyawa manga koano, o Gerar mabereraka deʼ womahi demo hupaya wogogere dokengoka. 2O hali gënanga wadiai karana ma Jou womahi matokoka Ai diri unangika deʼ wïtemo, ”Uha noiki o Mesirika nogogere o bereraka nënanga, hokä Tonihiparetaka ngonaika. 3#Kej. 22:16-18 Ngohi aha tonï göana deʼ Tonihibarakati. Mata-mataika o daera nënanga aha Tonihidöaka ngonaika deʼ aningohaka de ani danongika. Ngohi aha tohiganapu Ahi jaji tohidoä-doäkoka o Abrahamika ani ama. 4Ngohi aha tonihidöaka ngonaika o ngohaka de o danongo mangöe hokä o murumu o dihangoka, deʼ mata-mataika o daera nënanga aha Tahidöaka onangika. Mata-mata o berera de o hoana o duniaka aha yogahoko Ngohino hupaya Ngohi tahibarakati önanga hokä sarakia Tahibarakati ani difauku. 5Ngohi aha tinihi barakati ngini, karana o Abraham wohihimotekoka Ngohi deʼ wapaliara hagala o hukumu deʼ Ahi huloko.”
6Hoʼ o Ishak wogogere o Gerar mabereraka. 7#Kej. 12:13, 20:2 Maöraha hagala manyawa genangoka yoleha mangale o ngo Ribka, o Ishak wohaluhu munanga gënanga ngoihiranga, deʼ koigoungua ngoihekata. O Ishak wohawana hagala o nyawa gënanga aha iwi toma mangale imä l̄ë o ngo Ribka duru ami hohailoa gënanga. 8De ipaha o Ishak wogogere dokengoka o wange moiuku makoano Abimelekh o jangelaino womä lega-lega, deʼ wïmake o Ishak magogiriaka imaule-ule deʼ imahi morene deongo Ribka. 9Done ünanga wïahoko o Ishak deʼ ünanga wïtemo, ”Koigoungua o ngoheka gënanga ngoni hekata? Yadodoa hoʼ ngona nahetongo gënanga munanga ngoni hiranga?”
O Ishak wohaluhu, ”Ngohi tapikiri, ngohi aha ihitoma nako ta hetongo gemunanga ngohi hekata.”
10”Okia ngona nadiaioka ngomino?” o Abimelekh wotemo. ”Womatengoani ahikawaha yakunu dika womäidu de ngoni hekata, deʼ nako o hali gënanga idadi, ngona namoku mabobaluhu mangale tongomi mia howono gënanga.” 11De ipahaika o Abimelekh wahidöaka o hohininga mata-mata ai kawahaika hoko nënanga, ”O nagona honanga iwi ruae o nyawa nënanga ekola ngoihekata, aha yahukumu yahohonenge.”
12O Ishak wohibarihi o gihihi mangale womädatomo o bereraka gënanga, deʼ o taongo gënanga wamake mahasili idogo maratuhu moi de wohi bari-barihi, karana ma Jou wihibarakati ünanga. 13Ai kaya iholoi idogo deʼ ünanga idadi wokaya ma ago-agomo. 14O Filistin manyawa yosanangua unangika karana ünanga ai gilaongo yowöe, o duba matika deʼ o hapi. 15De ipaha önanga yöpohuku de o tonaka mata-mata o humu yahai-haitoka o Abraham ai gogilaongo maöraha ünanga kawo-wangohi.
16De ipahaika o Abimelekh wïtemo o Ishakika, ”Noikoka namal̄a miaberera nënanga. Ngone iholoioka nokuaha ngaro de ngomi.” 17Hoʼ o Ishak woiki deʼ womätau o Gerar ma Waioka. Genangoka ünanga wogogere madekanino. 18Unanga wahaitoli mata-mata o humu ihai-haitoka o Abraham ai orahoka deʼ yopohu-pohukoka de o tonaka o Filistin manyawa kade wamal̄a o Abraham. Mata-mata o humu gënanga ihiromanga kaimatero de ai ama wohiromanga.
19O Ishak ai gogilaongo yohaiti o humu deʼ yamake o akere de maboboloi. 20Mä o aiwani magogoana o Gerar mabereraka imateke ributu de o Ishak ai aiwani magogoana. Önanga yato, ”O akere nënanga madutu tongomi.” Karana gënanga o Ishak wohiromanga o humu gënanga ”O ributu”.
21O Ishak ai gogilaongo yohaiti o humu mahomoali, kai dadiokali o ributu yakorona o humu genangoli. Karana gënanga, o Ishak wohiromanga o humu gënanga ”Tekehaturu”. 22De ipahaika ünanga woma tururu genangoka, deʼ yohaiti o humu mahangeoka. Nenanga mamoi idadiua o ributu. Karana gënanga, o Ishak wohiromanga o humu gënanga ”Ibebasoka”. Wätemo, ”O öraha nënanga ma Jou wonahi bebasoka ngone mangale högogere o berera nënanga deʼ ngone aha ilamoko nanga hasili nenangokadau.”
23De ipahaika o Ishak womäjobo deʼ woma hiädono o Bersyebaika. 24O hutu gënanga ma Jou womahimatoko Ai diri unangika deʼ wïtemo, ”Ngohi ani ama o Abraham ai Jou Madutu. Uha nohawana: Ngohi tonïgoana. Ngohi aha Tonihibarakati deʼ Tonihi doäka ngonaika o ngohaka de o danongo manga ngöe karana Ahi jaji Ahi gilaongika o Abraham.” 25De ipaha o Ishak wohigoko o huhuba mangï deʼ wïhuba ma Jou genangoka mangï. Unanga womätau genangoka deʼ ai gogilaongo yohaiti o humu mahomoa.
O jaji o Ishak deʼ o Abimelekh manga hidogoronaka
26 #
Kej. 21:22
O wange moiuku o Abimelekh woböa o Gerar dewaino, de o Ahuzat, wïnonasihati, deʼ o Pikhol aitentara manga baluhu, hupaya imakamake de o Ishak. 27Done o Ishak wäleha, ”Yadodoahö ngini niböa homaka make de ngohi örahanenanga, enahioko mahira ngini nihïhaturu, deʼ nihiduhu tingini niabereraka?”
28De ipaha önanga iwïbaluhu, ”O öraha nënanga ngomi mihi öriki ma Jou wonïgoana ngona deʼ ngomi mia dibangoka iholoi yaoa ngone hodiai o jaji. Nokoboto 29ngona aha nodiaiua o dorou ngomino, hokä sarakia ngomiö komaiwa midiai o dorou ngonaika. Ngomi miajakoka yaoa ngonaika deʼ minihigumal̄a ngona noiki de madame-dame. Inyataka ngomino ma ma Jou wonihi barakati ngona.” 30De ipaha o Ishak wäahoko yol̄omo, deʼ önanga yol̄omo deʼ yokere. 31Yarehino mawange o ngoru-ngorumino moi-moi yahetongo manga jaji ihigoungu de o koboto. De ipaha o Ishak wätemo onangika niadodagi kaisosanangi, deʼ önanga imakitingaka hokä imateke-dodiawo.
32O wange genangö o Ishak ai gogilaongo yoböa deʼ ihingahu unangika mangale o humu önanga yohai-haitoka. Onanga yato, ”Ngomi mia makeoka o akere.” 33Daha o Ishak wohiromanga o humu gënanga ”O Koboto”. Genanga ma ahali madodihiraka o kota gënanga ihi romanga o Bersyeba.
O Esau ai heka-hekata o hoana de o berera mahomoaino
34Maöraha o Esau ai umuru o taongo moruata, ünanga wokawingi de o moholehe yahinoto o Het mahoana de maberera manyawa, enagënanga o ngo Yudit o Beeri ngoi ora, deʼ o ngo Basmat o Elon ngoi ora. 35O ngohaka yahinoto gënanga yahuha o Ishak deʼ o ngo Ribka manga wowango.
Currently Selected:
O KEJADIAN 26: TLB
Highlight
Share
Copy
Want to have your highlights saved across all your devices? Sign up or sign in
