O KEJADIAN 33
33
O Yakub ima make de o Esau
1O Yakub wïmake o Esau woböa deʼ ainyawa yaratuhu iata. Karana gënanga waregu aingoha-ngohaka o ngo Leaoka, o ngo Rahel de yahinotö ngoihekata paliara. 2Yahinoto ngoihekata paliara kamamoi de toona manga ngoha-ngohaka wahigogere mahima-himangoka, ipaha o ngo Lea kamamoi de ami ngoha-ngohaka, daha o ngo Rahel de o Yusuf duru mapore-poretoka. 3Toönanga manga himangoka mata-mata o Yakub womadagi, deʼ womahi tigi-tigika ai riakika, ünanga watilabukuku de wohuba hiädono wohigali matumidi. 4Mä o Esau wïdooara o Yakubika, daha wï kololo deʼ wïame. Deʼ o nyawa yahinoto gënanga yoboriari. 5Maöraha o Esau wamäke o ngongoheka deʼ o ngoha-ngohaka gënanga, ünanga woleha, ”O nagona ne önanga naga dede ngona nënanga?”
”Önanga tongohi ahi goha-ngohaka,” o Yakub wohaluhu, ”Ma Jou Madutu wohihi döakoka ngohino o ngoha-ngohaka gënanga.” 6De iböto gënanga ai hekata paliara de toona manga ngoha-ngohaka yotagi mahimangiha, daha yatilabukuku yohuba. 7De ipaha moböa o ngo Lea de ami ngoha-ngohaka, deʼ ihibobaha o Yusuf deʼ o ngo Rahel imahi tigi daha önanga mata-mata yatilabukuku.
8O Esau woleha, ”Okia anidumutu de o doomu-doomu tamö make-make kangano?”
O Yakub wohaluhu, ”Mangale yasanangi anihininga Riaka.”
9Mä o Esau wïtemo, ”Yaoaka tongohi ahiarata, iparaluokaua ngona nohihidöaka o ngongike ngohino.”
10O Yakub wato, ”Uha! Nako ngohi tasanangioka anihininga Riaka, natarima ahihuhuba nënanga. Ngohino, tamake anirupa Riaka hoko gënanga anidemo mahailoa ngohino. 11Ngohi togahoko, natarima o huhuba tao-aoka nënanga. Ma Jou Madutu Ai hininga maoaka ngohino deʼ wohihidöaka hagala moi-moi ngohi topöparalu.” O Yakub gila-gila wïgegoto hiädono mabaha o Esau watarima ai ngongike gënanga.
12Daha o Esau wïtemo, ”Naino ngone homa hidiai la homä jobo, ngohi aha totagi tonïhihira.”
13O Yakub wohaluhu, ”Riaka nohi öriki o ngoha-ngohaka nënanga yobole, deʼ ngohi kokiani tomahi dodiai de mata-mata o aiwani i popaliara kaihühuhuohi. Nako habïri i tai-taiti, ngarokä o wange moi dika, done mata-mata o aiwani de matika gënanga aha i honenge. 14Nomä dagi nohira, ngohi toninïki toma bole-bole. Ngohi aha tomä dagi hatoli toma tai-taiti de ahi aiwani ipö paliara deʼ ahi ngoha-ngohaka nënanga hiädono yakunu toni daene Riaka o Edom mabereraka.”
15O Esau wato, ”Nako hoko gënanga, kayaoa de ngohi tämal̄aika ngonaka yämuruono naga ahi nyawa.”
Mä o Yakub wïbaluhu, ”Ngarouha nomahuha, ngohi duga-duga töigo tasanangi anihininga Riaka.” 16Hoko gënanga o wange gënanga o Esau womä jobo womakilioro o Edomika. 17Mä o Yakub woiki o Sukotika, daha ai tau womahigoko deʼ ai aiwani ipopaliara mahohohongo mangï. Genanga mahababu o ngï gënanga wohiromanga o Sukot.
18Ai dodagi magoronaka o Mesopotamia de waino, o Yakub womahi ädono de mahalamati o Sikhemika o Kanaan mabereraka, daha wohigoko ai tau-tau o tonaka malua-luasoka moi o kota madatekoka. 19#Yos. 24:32; Yoh. 4:5 O tonaka i lua-luasi manga tau-tau madoomu gënanga waijaino o Hemor manyawaoka, o Sikhem ai ama, de maija o tiwi haaka o ratuhu moi. 20De ipaha ünanga wohigoko o huhuba mangï genangokadau deʼ wohiromanga ”O El, o Israeloka manga Jou Madutu”.
Currently Selected:
O KEJADIAN 33: TLB
Highlight
Share
Copy
Want to have your highlights saved across all your devices? Sign up or sign in
