O YOHANIS 5
5
O Yesus wihi togumu womatëngo o Betesda ma akere malupangoka
1Iböto de gënanga, naga o Yahudioka manga wange ma ago-agomo, o Yesus woiki o Yerusalemika. 2O Yerusalem ”O Duba ma Ngorana” madatekoka naga o akere malupanga moi, de o Ibranioka manga demo ihiromanga Betesda. Genangoka naga o kamari motoa. 3De o kamari-kamari gënanga manga ngöe o nyawa yopopanyake imaiduoka; naga yopiloko, yosuga deʼ naga yolugu. [Onanga mata-mata yödamä o akere malupangoka iluluaka. 4Hababu naga mamoi-mamoi ma Jou aimalaekat iuti o akere malupanguku gënanga deʼ yaluluaka ma akere. Deʼ o nyawa yopopanyake madodihiraka yowohama o lupanguku gënanga maöraha o akere iluluaka aha yotogumu o panyake okia dika önanga yadäene.] 5O ngïoka gënanga naga o nauru womatëngo wopopanyake o taongo moruange de tufange madekana. 6O Yesus wimäke ünanga woma iduoka dokengoka, deʼ wohiöriki ünanga duru kaidekana wopanyake; o Yesus wileha unangika, ”Noigo ngona notogumu?”
7O nyawa wopopanyake gënanga wohaluhu, ”Bapa, moiua o nyawa nenangoka ihinoa ngohi o akere malupanguku maöraha ma akere iluluaka. Deʼ maöraha ngohitameta o akere malupangika, o nyawa mahomoa yohiraka imanoa.”
8O Yesus witemo unangika, ”Nomomiki, nagoraka anitikara deʼ noma dagi.” 9De öraha gënanga dika o nyawa gënanga wotogumoka. Unanga wagoraka aitikara deʼ womadagi.
O hali gënanga idadi o Yahudioka manga Puji mawangeoka. 10#Neh. 13:19; Yer. 17:21 Hababu gënanga o Yahudioka manyawa yokokuaha, iwitemo o nyawa ahao wotogumino gënanga, ”O wange nënanga o Puji ma wange. Ngona iyakunua nao anitikara.”
11Mä o nyawa gënanga wohaluhu, ”O nyawa wohihitogu-togumu ngohi kangano wohihuloko ngohi tagoraka ahitikara deʼ toma dagi.”
12Yoleha önanga, ”O naguna gënanga wonihuloko ngona nagoraka ani tikara deʼ noma dagi?”
13Mä o nyawa wotogu-togumoka gënanga wohiorikua o nyawa nagona, hababu o Yesus womahihangoka o nyawa yowöe-wöe manga hidogoronaka gënanga.
14Maduruino o Yesus imamäke de o nyawa gënanga ma Jou ai Tau magoronaka, deʼ witemo unangika, ”Oraha nënanga ngona notogumoka. Uha nobaradohali, hupaya uha naohana o hali iholoi itorou.”
15De woiki o nyawa gënanga, daha wohingahu o Yahudioka manyawa yokokuahaika o Yesus wihitogumu. 16Deʼ mahababu gënanga, önanga ihidailako iwianiaya o Yesus, hababu Unanga wahitogumu o nyawa o Yahudioka manga Puji mawangeoka.
17Mä o Yesus watemo onangika, ”Ahi Ama hokogenangika womanarama hiädono öraha nënanga, deʼ Ngohiö tomanarama.”
18Ai demo-demo gënanga idadi o Yahudioka manyawa yokokuaha duru ihidailako la iwitoma. Onanga yodiai gënanga, igoungua hababu Unanga watilakuru o agama madatoro mangale o Yahudioka manga Puji mawange, mä hababu Unanga wotemo ma Jou Madutu gënanga ai Ama; mangarati Unanga womahitero Ai diri de ma Jou Madutu.
O Ngohaka aikuaha
19O Yesus wohaluhu hagala o nyawaika gënanga hokonënanga, ”Ningaku, o Ngohaka gënanga okia-kiaua wakunu wodiai de Ai kuaha mahirete. Unanga duga-duga wodiai okia Unanga wamäke de wadiai ma Ama. Hababu okia ma Ama wadiai hokogenangö ma Ngohaka wadiai. 20Hababu ma Ama wihininga ma Ngohaka deʼ wihi matoko Unangika mata-mata wadiaioka mahirete. De ma Ama aha wihimatoko Unangika o manarama-o manarama iholoi i lamokoli, hiädono mata-mata yohëranga. 21Ma Ama gënanga wahi momiki o nyawa yohonengoka, deʼ wahidöaka önanga o ngango madutu deʼ ikakali; hokogenangoli ma Ngohaka wahidöaka o ngango ikakali hagala o nyawaika yoigo yahidöaka o ngango. 22Ma Ama mahirete wahihakimua o nagona dika. Hababu mata-mata kuaha mangale wahihakimi wihilapahioka Ai Ngohakika. 23Ma Ama wodiai gënanga, hupaya mata-mata o nyawa iwihoromati ma Ngohaka hokä önanga iwihoromati ma Ama. O nyawa iwihoromatiua ma Ngohaka, iwi horomatiuaö, o Ama wihulo-huloko ma Ngohaka.
24Igoungu itiai Ahiade-ade nënanga: O nyawa yohininga hagala Ahidemo deʼ iwingaku Unangika wohihulo-huloko Ngohi, o wowango madutu deʼ ikakali kato önanga. Onanga aha yahukumua; önanga yolapahioka de o honenge deʼ yamäke o wowango. 25Ningaku: Aha iböa maöraha – de yadonoka maöraha – o nyawa yohonengoka aha yoihene Ai ilingi ma Jou Madutu ai Ngohaka. Deʼ o nyawa yoihe-ihene aha yowango. 26Hokä o Ama mahirete o ngango matiti, Unanga wihidadi Ai Ngohaka o ngango matitioli. 27Unanga wihidöakoka Ai Ngohakika o haku mangale wahihakimi hababu Unanga o Nyawa manga Ngohaka. 28Uha ngini nihëranga niihene o hali nënanga, hababu maöraha aha iböa o nyawa mata-mata yohone-honengoka yoihene Ai ilingi, 29#Dan. 12:2 daha yohupu o lungunino. O nyawa yododiaioka o oa aha yomomiki mangale o ngango. Mä o nyawa yododiaioka o dorou, aha yomomiki mangale yahukumu.”
O nyonyata-o nyonyata mangale o Yesus
30”Ngohi takunua todiai okianaga imoteke Ahi hininga mahuka mahirete. Ngohi duga-duga tahihakimi imamoteke de ma Jou Madutu aipareta. Deʼ ahiputuhu Ngohi iadili, hababu Ngohi tamotekua Ahi hininga mahuka mahirete, mä Ai hininga mahuka o Ama wohihulo-huloko Ngohi.
31Demo hohiade Ngohi mahirete tohidöaka o hakihi mangale Ahi diri, o hakihi gënanga yakunua yangaku. 32Mä naga o nyawa mahomoa ihidöaka o hakihi mangale Ngohi, deʼ Ngohi tohi öriki manga hakihi gënanga itiai. 33#Yoh. 1:19-27, 3:27-30 Ngini nia hidingoto nia huhuloko o Yohanisika, deʼ unanga wohi döakoka o hakihi madiai mangale Ngohi. 34O hali nënanga Ngohi totemoka, Ngohi tolingirua o hakihi o nyawaino, mä hupaya ngini inihihalamati. 35O Yohanis gënanga hokä o hilo iwango deʼ i tararono madararono. Oraha mahuhutulu ngini nimörene nio dahongo o dararono gënanga. 36Mä ahi hakihi Ngohi i holoi ilamoko de o Yohanis ai hakihi. Okia öraha nënanga Ngohi todiai, enagënanga o manarama wohihi döakoka o Ama Ngohino, manyonyata o Ama wohi huloko Ngohi. 37#Mat. 3:17; Mark. 1:11; Luk. 3:22 Deʼ o Ama wohi huloko Ngohiö, wohi döaka o hakihi mangale Ngohi. Ngini ni ihenuahi Ai ilingi, ekola de niwi mäke uahi Ai rupa. 38Ai demo niagogonua niahininga magoronaka, hababu ngini nihingakua Ngohino, Unanga wohihuloko. 39Ngini nima dotoko Ma Jou Ai Demo ma Buku madol̄a, hababu niatobote de mangëkomo gënanga ngini niamäke o ngango madutu deʼ ikakali. Deʼ Ma Jou Ai Demo ma Buku mahirete gënanga ihidöaka o hakihi mangale Ngohi. 40Mä ngini nioluku niaino Ngohino la niamäke o ngango ikokakali.
41Ngohi tolingirua o horomati o nyawaino. 42Ngohi tininako ngini. Ngohi tinihiöriki ngini niwihiningaua ma Jou Madutu niahininga magoronaka. 43Ngohi toböa de Tongohi Ahi Ama aikuaha, ngaro hokogënanga ngini nihitarimaua Ngohi. Mä nako o nyawa mahomoa yoböa de manga kuaha mahirete, ngini niaigo niatarima önanga. 44Sarakia ngini iyakunu ningaku, nako ngini nilingiri o higiriri niadodiawo o nyawaino, deʼ nimahiahaua nialingiri o horomati ma Jou Madutu woma Tëngo-tëngokaino? 45Uha niatobote Ngohi aha tinihihowono ngini Ahi Ama aihimangoka. Aha winihihowono ngini ganga o Musa, ünanga ngini niwingano-nganono. 46Demo hiade ngini niwingaku o Musaika, ngini aha nihi ngaku Ngohino, hababu mangale Ngohi ünanga watulihi. 47Mä nako ngini niangakua okia o Musa watulihoka, sarakia ngini iyakunu ningaku okia Ngohi totemoka?”
Currently Selected:
O YOHANIS 5: TLB
Highlight
Share
Copy
Want to have your highlights saved across all your devices? Sign up or sign in
