O LUKAS 21

O ngoheka o bobao amihuhuba

(Mark. 12:41-44)

1Ma Jou ai Tauoka, o Yesus wälega-lega o nyawa yokaya-kaya yönoa mangatiwi o huhuba mangïuku. 2Unanga womi mäkeoli momatëngo o bobao duru momihikini mönoa hinoto o tiwi tabaga. 3Daha o Yesus wotemo, ”Niihene: o bobao nënanga mönoa iholoi iwöe, ngaro de mahomoa mata-mata. 4Hababu önanga ihidöaka manga arata maboloi. Mä o bobao nënanga, ngarokö duru momihikini, mohidöaka mata-mata naga munangoka kiaka muna mahirete moparalu la mangale mowango.”

O Yesus wohiade-ade mangale ma Jou ai Tau aha ikilianga

(Mat. 24:1-2; Mark. 13:1-2)

5Naga o nyawa manga ngöe ihiade-ade yakorona hokokia marahai ma Jou ai Tau ihidiai de o helewo mahohailoa deʼ okia naga ihihuba-huba ma Jou Madutuika. O Yesus wätemo onangika, 6”Ahao naga maöraha, mata-mata niamäke-mäke nënanga aha yakilianga; nenangoka kaohelewo moiö de koiwa naga imakalapeuku marioka!”

O huha deʼ o aniaya

(Mat. 24:3-14; Mark. 13:3-13)

7Onanga yoleha o Yesusika, ”Bapa Guru, muruonoka o hali gënanga aha idadi? Deʼ okia manonako ganga yadonoka maöraha o hali gënanga aha idadi?”

8O Yesus wätemo, ”Nimahidodiai, uha hiädono ngini inïtipu. Manga ngöe o nyawa aha yoböa de yapäke Ahi romanga, deʼ yotemo, ’Nënanga Ngohi!ʼ deʼ ’Ma orahoka.’ Mä uha ngini niänïki önanga. 9Uhaö nihawana nako ngini niihene o parangi deʼ o galawani ma abari. Mata-mata gënanga kokiani ihira idadi. Mä genanga mamangaratiua kiamati maorahoka.”

10Daha o Yesus wohigila-gila Aiade-ade, wato, ”Moi o hoana manyawa aha yoparangi yälawani o hoana manyawa mahomoa deʼ moi o negara aha yängika yälawani o negara mahomoa. 11Kiaka dika aha idadi o ohu ikua-kuata, o habirokata deʼ o panyake o bobaku. Aha idadi o dihangoka o hali höboborohono deʼ hö modo-modongo. 12Mä mata-mata gënanga idadiowahi, ngini aha inïtagoko deʼ inïaniaya. Ngini aha yatailako niahowono o pupuji matauoka deʼ inihingohama o buiika. Deʼ ngini aha inï tatauru inïao o kokoano deʼ yokokuaha manga himangoka karana ngini nihinöninïki. 13Gënanga tingini niaöraha la nihingahu o Abari ma Oa ma Jou Madutuino. 14#Luk. 12:11-12 De niahininga magahumu ngini aha nihawaterua mangale okia kokiani ngini nitemo la nioriwo niadiri. 15Ngohi mahirete aha tinihidöaka nginika o demo-demo deʼ o sawaro gënanga, hiädono moiua niahaturüino yakunu inilawani ekola ihipongono okianaga ngini nitemo. 16Niaayo deʼ niaama, niadodoto, niaroriadodoto deʼ niadodiawo aha ngini inïnakokaua. Utu nginino aha önanga yätoma. 17Ngini aha manga ngöe o nyawa inïdohata karana ngini Nihinöninïki. 18Mä niatadauru nia häekoka mangai moiö de aha koihihangua. 19Nako ngini nitongohono deʼ itaitua inïtohata, ngini aha nihalamati.”

O Yesus wohiade-ade mangale o Yerusalem aha ikilianga

(Mat. 24:15-21; Mark. 13:14-19)

20”Oraha kia ngini niamäke o Yerusalem ihigilolitino o tentara, ngini aha nihiöriki o berera gënanga itedekanokaua aha ibinaha. 21O öraha gënanga o nyawa o Yudea madaeraoka kokiani yopiringana o l̄oku-l̄okuika. Onanga o kota magoronaka kokiani yamal̄a o kota, deʼ onanga o kota maporetoka uha yowohama o kotaika. 22#Hos. 9:7 Hababu owange-owange gënanga ganga ’Yaputuhu o Hukumanga ma Wange’, hupaya de hokogënanga idadi okianaga itulihoka Ma Jou Ai Demo ma Buku. 23Hokokia maborohono o wange gënanga mangale o ngoheka de manga röehoka, deʼ o ayo kayahühuhuohi manga ngohaka magil̄au! O berera nënanga aha yaöhana o huha maamoko, deʼ ma Jou aha wähukumu o hoana manyawa nënanga. 24Naga aha yätoma de o oworo, nagaoli aha yäao hokä o tabuanga manyawa o nyawa mahomoa manga bereraika; deʼ o nyawa iwinäko-näkoua ma Jou Madutu aha yapito-pitoko o Yerusalem hiädono maöraha imata ma Jou wohigogeroka mangale önanga.”

O Nyawa manga Ngohaka aiböa

(Mat. 24:29-31; Mark. 13:24-27)

25 # Yes. 13:10; Yeh. 32:7; Yl. 2:31; Him. 6:12-13 ”Ahao o wange malakoka, o mede, deʼ o murumu o dihangoka aha yamäke o nonako-nonako. O duniaka o hoana de o berera manyawa aha yohawana deʼ yobingu yöhimanga o moku-moku maruruhu deʼ o lulu o ngötoka. 26O nyawa aha yohawana yätoka yohonenge yöhimanga okia aha idädadi o dunia mata-mataika nënanga, hababu yakokuaha o gitawa aha iruaeuku. 27#Dan. 7:13; Him. 1:7 Oraha gënanga o Nyawa manga Ngohaka aha woböa o lobi magoronaka de Ai kuaha deʼ Ai mulia maamoko. 28O öraha okia o hali-o hali gënanga imuläenge idadi, nimomiki deʼ niahäeke niagoraka, hababu botino dika ngini aha inihihalamati.”

O dodötoko o ara magotaino

(Mat. 24:32-35; Mark. 13:28-31)

29Daha o Yesus woade-ade onangika o hitotero moioli nënanga, wato, ”Niatailako o ara mautu magota deʼ mata-mata o gota mahomoa mautu. 30Oraha okia madubo-dubo imuläenge niöriki, ngini nianäko, ngade-ngadeoka maöraha ihiwara. 31Hoko genangoli nako ngininiöriki o hali-o hali gënanga idadi ngini aha nihiöriki ma Jou Madutu de majapatioka aha wopareta hokä o Koano.

32La nihiöriki! O hali-o hali gënanga aha idadi, o nyawa yowango-wango o örahanënanga yohonengowahi mata-mata. 33O dihanga deʼ o dunia aha ihihanga mä Ahi demo itatapu kahiado-adonika.”

Paralu nimä göa-göana

34”Niogöana niadiri, uha hiädono ngini talalu nitasibu nirame-rame deʼ niokere o daluku ibiha-biha, ekola kalioli niapikiri niangango madodagi, hiädono ngini nimasadiaua maöraha iböa o wange gënanga i todokanino. 35Hababu ma Wange gënanga aha iböa hokä o aiwani madadagoko o nyawa mata-mataika o dunia nënanga mahimangoka. 36Nimä göa-göana, deʼ nimäniata salalu hupaya ngini nikuata nio himanga o hali mata-mata aha idodädadi deʼ ngini yakunu niwï himanga o Nyawa manga Ngohaka.”

37 # Luk. 19:47 O wangeoka o Yesus wodotoko ma Jou ai Tauoka, deʼ yohutuku Unanga woiki o Zaitun ma Doporonika deʼ genangoka wogogere. 38O ngorumino magetongo mangangöe o nyawa yoiki ma Jou ai Tauika la yoihene o Yesus wodotoko.

Currently Selected:

O LUKAS 21: TLB

Highlight

Copy