O MARKUS 6
6
O Nazaret mabereraka o Yesus iwioluku
(Mat. 13:53-58; Luk. 4:16-30)
1Kagenangoka de o Yesus wolio imakomoteke de iwinöninïki, ai kapongika. 2O Yahudioka manga Puji mawangeoka Unanga womuläenge wodotoko o pupuji matauoka. Naga o nyawa manga ngöe genangokadau. Maöraha o nyawa gënanga yoihene o Yesus aidodötoko, önanga duru yohëranga. Onanga yotemo, ”O nyawa nënanga okiaino wamäke mata-mata nënanga? O sawaro marupa sarakia nënanga naga Unangoka? Sarakia ho Unanga wodiai i hëra-hëranga? 3Mode koigoungua Unanga nënanga o gota matukanga, o ngo Maria amingohaka, deʼ Ai dodoto o Yakobus, o Yosis, o Yudas deʼ o Simon? Igoungu Ai bira-biranga managa yogogere kanenangokadau.” Karana gënanga önanga iwioluku Unanga.
4 #
Yoh. 4:44
Ho o Yesus wätemo onangika, ”O nabi womatëngo okiaka dika iwi horomati, sawaliua aikapongoka, deʼ airiadodoto deʼ aiayo de aibiranga manga hidogoronaka, iwihoromatiua.”
5O ngï genangoka o Yesus wakunua wodiai okianaga ihera-herangö, sawaliua wahitogumu yamuruono naga o nyawa yopopanyake de wägelenga Ai giama manga l̄okuoka. 6O Yesus wohëranga önanga yongakuua.
O Yesus wähuloko iwinöninïki yangimoi de yahinoto
(Mat. 10:5-15; Luk. 9:1-6)
Ipaha o Yesus woiki wokiloliti o kapo-kapongika gënanga, deʼ wodotoko. 7Unanga wä ahoko iwinöninïki yangimoi de yahinoto, de wähuloko önanga yähohinoto deʼ wahidöaka o kuaha onangika laʼ yaduhu o womaha madorou. 8#Luk. 10:4-11 Unanga wahidöaka ohidumutu nënanga onangika, ”Ngarouha nimägao okianaga niadodagi magoronaka, sawaliua o diki-diki. Uha niao o inomo ekola o hadaka mapopoje, ekola o tiwi. 9Nia päke o hapato, mä uha nimä gao o baju o dobiki hinoto.” 10Unangö wätemo, ”Nako ngini niwohama o tau moika, nigogere genangokadau hiädono ngini nia mal̄a o kota gënanga. 11#Kis. 13:51 Mä nako ngini niädono o ngï moioka, deʼ o nyawa genangokadau yoluku inï tarima deʼ inihigihene ngini, nia mal̄a o ngï gënanga. Deʼ o kafo nia l̄ouoka niahurerouku hokä o hohininga onangika!”
12De iwinöninïki o Yesus yangimoi de yahinoto gënanga ima goraka. Onanga yoiki de ihi ngahu o abari, o nyawa kokiani yotoba de yamal̄a o baradoha gënanga. 13#Yak. 5:14 Iwinöninïki o Yesus gënanga yaduhu mangöe o womaha madorou, yahi ehe o zaitun maminya o nyawa yopopanyakeika deʼ yahi togumu önanga.
O Yohanis Wo ohi-ohiki wohonenge
(Mat. 14:1-12; Luk. 9:7-9)
14 #
Mat. 16:14; Mark. 8:28; Luk. 9:19 O abari-abari mangale mata-mata idädadioka gënanga yadonoli ma Koano Herodesika, hababu o Yesus airomanga ihiorikoka kiaka dika. Naga o nyawa yotemo, ”O Yohanis Wo ohi-ohiki wowangokali! Gënanga mahababu Unanga de Ai kuaha wodiai i hëra-hëranga gënanga.”
15Mä o nyawa mahomoa yato, ”Unanga o Elia.”
Nagaoli yato, ”Unanga o nabi, hokä o nabi womatëngo kahuruonino.”
16Maöraha o Herodes woihene gënanga, ünanga wotemo, ”Marai nënanga o Yohanis Woohi-ohiki, kiaka kahuruono ngohi tähulokoka yatobiki aihäeke. Orahanënanga ünanga wowangokali!”
17 #
Luk. 3:19-20
Hababu koidadiowahi gënanga o Herodes wähulokoka o nyawa iwitagoko o Yohanis, deʼ iwihingohama o buika. O Herodes wodiai hokogënanga karana mangale o ngo Herodias, aidodoto mahirete ngoi hekata, enagënanga o Filipus. Hababu o Herodes womi kawingoka o ngo Herodias, 18deʼ yakorona de o hali gënanga o Yohanis wögogilio wïtaaere o Herodes hokonënanga, ”Yakunua ngona nokawingi de anidodoto ngoi hekata gënanga!”
19Gënanga mahababu o ngo Herodias mijanggutu o Yohanisika deʼ momau o Yohanis iwitöma, mä munanga makunua madiai o hali gënanga, karana o Herodes womitätatoko. 20Hababu o Herodes wähulokoka o nyawa iwïgöana ihidodiai o Yohanis uha wobodito, karana ünanga wïmodongo o Yohanisika. Unanga wohi öriki o Yohanis o nyawa maoa moi, wïhulokoka ma Jou Madutu. Deʼ hokogënanga o Yohanis wotemo, o Herodes kawoigo wohigihene, ngarokö ünanga duru wobaliha karana gënanga.
21Mabaha o ngo Herodias mamäke o ngëkomo o Herodes aiwange woma kil̄au mataongoka. O öraha gënanga o Herodes wodiai o rame mangale yopopareta i kökurutil̄e, o pareta makuahaka, deʼ o kapita-kapita deʼ o Galilea makawaha mabalu-baluhu. 22O rameoka gënanga o ngo Herodias ngomi ora moholehe mosëlo, deʼ ami sëlo gënanga o Herodes aihininga yasanangi de aitamu-tamu. Hoʼ o Herodes womitemo mamoholehika gënanga, ”Ngona okia nöigo, nogahoko dika. Ngohi aha tonihi döaka ngonaika!” 23Daha o Herodes wojaji o moholehika gënanga deʼ makoboto. O Herodes womi temo, ”Okia dika ngona nogahoko aha tonihidöaka, igoungu ngarokö ahi pareta mahononga!”
24Ho o moholehe gënanga mohupu deʼ momileha ngomi ayoika, ”Ayo okia yaoa kokiani ngohi togahoko?”
Ngomi ayo mohaluhu, ”Nogahoko o Yohanis Woohi-ohiki ai häeke.”
25O moholehe gënanga tai-taiti momakilioro o Herodesika deʼ motemo, ”Ngohi togahoko o Yohanis Woohi-ohiki aihäeke nohihi döaka ngohino öraha nënanga dika moi o dulanga mal̄okuoka!”
26Woihene o gogahoko gënanga o Herodes duru ai hininga ihuha. Mä unanga wakunua watila o gogahoko gënanga karana ünanga wokobotoka aitamu-tamu manga himangoka. 27Hoʼ unanga gila-gila wïpareta womatëngo aigogöana wal̄ë o Yohanis Woohi-ohiki ai häeke. De ma tentaraoka gënanga woiki o buika, daha watobiki o Yohanis Woohi-ohiki aihäeke. 28Ipaha ünanga wao o häeke gënanga o dulanga mal̄okuoka deʼ wohilapahi mamoholehika gënanga. Deʼ o moholehe gënanga mohi döakoli ngomi ayoika. 29Maöraha iwinöninïki o Yohanis yoihene o hali gënanga, önanga yoiki yal̄ë o Yohanis aimayeti, deʼ yalungunu.
O Yesus wahi ol̄omo o nyawa yäribuhu motoa
(Mat. 14:13-21; Luk. 9:10-17; Yoh. 6:1-14)
30O rasul-rasul wähulo-huloko o Yesus gënanga ipaha imakilioroli, deʼ imatoomu de o Yesus. Onanga ihingahu Unangika mata-mata önanga yadodiaioka, deʼ yodotokoka. 31Manga ngöe duru o nyawa yoböa deʼ yoiki, hiädono mangale yol̄omo mä o Yesus deʼ iwinöninïki yakunua. Hababu gënanga o Yesus wätemo iwinö ninïkika, ”Niaino laʼ ngone hoiki o ngï magigoro koiwa-iwaika kiaka ngoneyakunu homa tëngoka deʼ ngini yakunu nimahi batongo jai-jai.” 32Ho onangö imagöraka yoiki de o ngotiri yödumutu o ngï magigoro koiwa-iwaika.
33Mä manga ngöe o nyawa yämäkeoka önanga yamal̄a o ngï gënanga, deʼ yänäko önanga o nagona. Hoʼ, mata-mata o kota madaera gënanga, manyawa imapopopäta yanïki o dudungika mangëkomo, yärorebe o Yesus deʼ iwinöninïki. 34#Bil. 27:17; 1Kok. 22:17; 2Taw. 18:16; Yeh. 34:5; Za. 10:2; Mat. 9:36 Maöraha o Yesus o ngotiroka de wouti, Unanga wämäke o nyawa mangangöe. Unanga aidora onangika, hababu önanga hokä o duba magogöana koiwa. Ho Unangö womuläenge wädotoko mangöe o hali onangika. 35Maöraha o bimaoaka, o Yesus iwinöninïki yotemo Unangika, ”I tigi-tigi yohutu deʼ o ngï nënanga itingakino. 36Iholoi yaoa Bapa nähuloko o nyawa neönanga yoiki, hupaya önanga yakunu imaija o inomo o kapongo-kapongoika deʼ o kapo-kapongo ikilolitino nënanga.”
37Mä o Yesus wohaluhu, ”Ngini dika niahiol̄omo önanga.”
”Owë, boteka ngomi kokiani mioiki mi ija o roti ma ija o ratuhu hinoto o tiwi haäka mangale miahiol̄omo o nyawa neönanga?” yato hoko gënanga o Yesus iwinöninïki gënanga.
38Daha o Yesus wäleha, ”Naga o roti muruono nginioka? Beika nioiki niolega.”
Iböto önanga yölega, önanga yato, ”Naga o roti motoa deʼ naga o nawoko o ngai hinoto.”
39Daha o Yesus wähuloko o nyawa mata-mata gënanga yogogere o doomu-doomu moi o momo maijo-ijoka. 40Onangö gënanga yogogere de madatoro, o doomu-o doomu moi. Naga yaratuhu moi o doomu moi, deʼ nagaö yamoritoa o doomu moi. 41I paha o Yesus wal̄ë o roti motoa deʼ o nawoko hinoto gënanga, deʼ womamataga o dihangil̄e deʼ wotemo tarima kasi ma Jou Madutuika. I böto de gënanga, Unanga wabëla-bëlaka o roti gënanga de Ai giama deʼ wohidöaka iwinöninïkika laʼ hikodoku o nyawa yowöe-wöeika gënanga. Deʼ o nawoko hinoto gënanga ihi kodokuoli onangika mata-mata. 42Onanga yol̄omo hiädono yäpunuhu. 43Ipaha o inomo maboloi gënanga o Yesus iwinöninïki yatoomu – mata-mata naga o karaja ngimoi de hinoto i omanga. 44O nau-nauru ya ol̄o-ol̄omo o roti gënanga yatakihiri naga yaribuhu motoa.
O Yesus womädagi o akere mal̄okuika
(Mat. 14:22-33; Yoh. 6:15-21)
45Ipaha de gënanga o Yesus womataiti wähuloko iwinöninïki yosobo yongotiri yohira o Betsaidaika o taaga mahonongaka, Unanga magogiriahi wähuloko o nyawa yowöe-wöe gënanga yolio. 46O nyawa yowöe-wöe gënanga wäpidiloka, o Yesus woiki o tonaka itotoporonika laʼ womäniata. 47Yohutuoka, iwinöninïki o Yesus manga ngotiri o taaga mahidogoronaka yaikaka, hode o Yesus kao dudungokahi. 48Unanga wämäke önanga kamanga hangihara de yokangela yaoru o ngotiri gënanga, karana o hidal̄oko yapuhukika. Hababu gënanga, done ho o takoro hange deʼ o takoro butanga o hutu inohi mahigorona, Unanga waino onangino womä dagi o akere mal̄okuika. Deʼ Unanga wotagi wogila-gila hokä aha wätilakuru önanga. 49Maöraha önanga iwi mäke womä dagi o akere mal̄okuika, önanga yato bote o tokata, 50hiädono önanga yopöa-pöaka yohawana. Hababu önanga mata-mata iwi mäke Unanga deʼ onanga duru yatodokana.
Mä gila-gila o Yesus wätemo onangika, ”Nima rirïdi! Ngohi o Yesus. Uha nihawana!” 51Dahaö Unanga wodöa manga ngotiril̄e, deʼ mahidal̄oko ma irïdi. Iwinöninïki o Yesus duru yohëranga. 52I hëra-hëranga de o roti motoa gënanga kowahiohi önanga i mangarati. Mahuhahi onangika laʼ i mangarati.
O Yesus wahitogumu o nyawa yopopanyake o Genesaret mabereraka
(Mat. 14:34-36)
53Maöraha imahi ädono o taaga mahonongaika, önanga i matapu o Genesaret mahohanoka. 54Maöraha önanga yohupu o ngotiril̄e, o nyawa yämäke yaino-ino gënanga o Yesus. 55Ho önanga ima popopäta o daera gënanga yamöde-mödeke, deʼ yomuläenge yä ao o nyawa yopopanyake o Yesusika o tikara mal̄okuoka. Nako önanga yoihene o Yesus naga o ngï moioka, önanga yä ao o nyawa yopopanyake dokengika. 56Kiaka dika o Yesus woböa – kaya oa o kapongoka, o kotaka ekola o kapongoka – genangino o nyawa salalu yaino deʼ yakelenga manga nyawa yopopanyake o lapangoka. Dahaö önanga yogahoko yagegoto hupaya o nyawa yopopanyake gënanga yahi gumal̄a yatigi o Yesus aijuba, ngarokö mabarenika dika. Mata-mata yatigi-tigi Ai juba, yotogumu.
Currently Selected:
O MARKUS 6: TLB
Highlight
Share
Copy
Want to have your highlights saved across all your devices? Sign up or sign in
