PANDARIADDI 3
3
Taumata nilumawangnga Ruata
1Atoanna eteudde sambau winatangnga apan apandeanne wuassu al᷊awo'u winatangnga apan niola'u Ruata. Atoanna udde naiwal᷊o wawine udde, “Apa Ruata atonna-tonna naningaddi raddua umanna manga wuan kaaluanna sulal᷊ummu wailla indi?”
2“I yami wotongnge umanna manga wuan kaaluanna wussu al᷊awo'u aaluanna sulal᷊ummu wailla indi,” sasimbakku wawine udde, 3“tumba'u imbaṛṛangnga alu su pattangngannu wailla indi. Ruata manningaddi yami umanna wuan kalu udde ara'e mangindingnga; amungkangngu udde olaanni yami, i yami sarum mate.”
4Atoanna udde sinumimbakka, “Udde nassal᷊a; iraddua tawe mate. 5Ruata nabbisara aroddi, ana waugu i Tou masingkatta manungku amungkangngu iraddua umanna wua'udde, ṛingiranni raddua mabbal᷊i masemakka; iraddua sarun maola'a ere Ruata wuṛṛu maasingkattu apa apan mapia wuṛṛu apan apan dal᷊eo.”
6Wawine udde na'ellega manungku alu udde maṛṛansangnga, wuṛṛu wuane ellehanna matemangnga annananna. Ne i tou naṛṛingidda apiawe eteapa amungkangngu i tou mabbal᷊i pande. Ana waugu udde i tou nani'o wuan kalu udde, ana see niumanna, wuṛṛu awingnge lai nionggol᷊anna, ana see awingnge lai niumante. 7Tawe nal᷊annu wua niumanna wua'udde, ṛingiranni tarua nawu'a wuṛṛu itarua naatutukka manungku itarua tantol᷊ete. Ana waugu udde itarua nallindumma watanganni tarua ringannu rongngu alu ara apan niatokki tarua mapia-mapia.
8Wawallone udde itarua naaringikka Ruata u'amatta sulal᷊ummu wailla, ana see itarua na'imbuni su wallatu manga aaluanna tadea'u tawe aasiloannu Ruata. 9Arawe Ruata namago esakka udde, “Suapa i'o?”
10Esakka udde sinumimbakka, “I ya'u naaringikka Si'o sulal᷊ummu wailla; i ya'u nata'utta, nariaddi i ya'u na'imbuni ana waugu i ya'u tantol᷊e.”
11“Isai namasingkatta si'o manungku i'o tantol᷊e?” Ruata naiwal᷊o. “Apa i'o niumanna wua apan Ta'u isassingadda udde?”
12Esaka udde sinumimbakka, “Wawine apan nionggollu iaparinganna si ya'u, buatte nangonggollu wua'udde si ya'u ana see ta'u nianna.”
13Ruata naiwal᷊o wawine udde, “Anio i'o na'ola'a udde?”
Sasimbakke, “I ya'u niwahiannu atoanna, na'oman sara i ya'u niumanna wua'udde.”
Ruata nangema'u ṛuumanna
14Wua'udde Ruata nabbisara atoanna, “I'o iṛṛuumanna ana waugu pallal᷊agunu udde; wuassu al᷊awo'u winatangnga tumba'u i'o apan sarun maningkul᷊u awawontoga indi: Manattakka orassa indi i'o sarun tumondon tiannu, wuṛṛu umanna awu su al᷊o'engngu pabbiaṛṛannu. 15I'o wuṛṛu wawine udde sarun matatiakka, papapulunne wuṛṛu papapulunnu sidutu uasaseetta. Papapulunne sarun maṛṛimunsa'a puanu, wuṛṛu i'o sarun mangi'i paalli mangitou.”
16Ana see Ruata nabbisara wawine udde, “I ya'u sarun manimu atatadungngu su tempo i'o pia illoṛṛo wuṛṛu su tempo i'o mangunsiwe. Arawe manimbe aroddi, i'o sidutu pia apulu su awingngu, arawe i'o sarun massuṛṛubawa si tou.”
17Ana see Ruata nabbisara su esakka udde, “I'o uararingikka manga wisaran awingngu ana see niumanna wua apan Ta'u nisingadda annanannu. Ana waugu pallal᷊agunu udde, niawontohante leta'a. I'o sarun mammanara masahadda su al᷊o'engngu pabbiaṛṛannu tadea'u leta'a indi wotongnge mangonggollu anna apan uatimu si'o. 18Raduutta wuṛṛu ṛoa'a sarun maola'a hessin leta'a si'o, wuṛṛu manga sinuananna lul᷊u sarun maola'a pabbawiakku. 19I'o sarun mammanara ringannu masaha-sahadda wuṛṛu ringannu liaha i'o mammanara leta'a indi tadea'u pia gessine, maddatingngu i'o mabbelengnga su leta'a, ana waugu ete wuassu leta'a i'o niola'a. I'o niola'a wuassu leta'a, wuṛṛu sarun mabelengnga apia su leta'a.”
20I Adam nanagon awingnge i Hawa ana waugu wawine udde naola'a inangngu anambon taumata. 21Ne Ruata na'ola'a laubbi Adam wuṛṛu i Hawa wuassu pisin binatangnga ana see niluṛṛe sitarua.
I Adam wuṛṛu i Hawa nilimbuaṛṛanna wuassu waillu Eden
22Ruata nabbisara, “Orassa indi taumata nabbal᷊ite ere i ite wuṛṛu uatahuanna asingakatta su ola'u apapia wuṛṛu al᷊al᷊eo. Nariaddi mappianne isingadde i tou umanna wuan kalu apan mangngonggolu wiakka, tadea'u arie i tou mabbiakka saran mal᷊annu-l᷊annu.” 23Ne Ruata nallimbuakka taumata wuassu waillu Eden wuṛṛu nirolokka itarua mattinsahadda su leta'a apan naola'a inasapputanni mangitou. 24Wua'udde, su samba'an da'i wuassu wailla udde su saruannu ngara suttanna, Ruata nangaddon manga mala'ekattam, wuṛṛu sammata hal᷊ele pia putungnge apan tuttiri su al᷊awo'u tampa, ipandiaga lal᷊anna watukku punnu alu apan mangngonggolu wiakka udde. Ringannu aroddi tawe saran sangkatou apan hotongnge maasutta mangundanin punnu alu udde.
Currently Selected:
PANDARIADDI 3: LAITLD
Highlight
Share
Copy
Want to have your highlights saved across all your devices? Sign up or sign in
