PANDARIADDI 6
6
Al᷊al᷊eon taumata
1Napawe taumata aatambanna anambone wuṛṛu nassal᷊iawukke su ahewallu runia, wuṛṛu manga ana'a wawine niasungkangke, 2al᷊aṛṛana'u Ruata ma'ellega manungku mangka maṛṛuala udde mangkaṛṛamaga. Ana see i mangitou na'awingke manga maṛṛuala apan ipaapulu mangitou. 3Ne Mawu nabbisarate, “I ya'u tawe mamalan taumata mabbiakka saran mal᷊annu-l᷊annu; i mangitou arariadianna apan mattate. Manattakka orassa indi uukki mangitou tawe manampal᷊iu wuassu 120 su tonnane.” 4Su tempo udde, wuṛṛu lai nal᷊iudda wua'udde pia taumata wawalla su runia. I mangitou papapulunnu manga maṛṛualan taumata apan naawingngu al᷊aṛṛana'u Ruata. Manga taumata wawalla eteudde manga baṛṛanin seetta wahewalla wuṛṛu manga taumata tinumelengnga su tempon al᷊amona.
5 Mawu na'ellega tumaniten dal᷊eo manga taumata su runia; anambon ṛingiranni mangitou sidutu lal᷊eo. 6I Tou sinumassilla buatte nandiaddi si mangitou wuṛṛu napaatana'i mangitou su runia. I Tou tumaniten sinumassilla, 7na'oman sara nabbisara, “I ya'u sarun mamate apan buatte Ta'u niola'a udde, wuṛṛu lai al᷊awo'u manu'u winalanganna wuṛṛu winatangnga waine, ana waugu ya'u sinumassilla buatte nandiaddi si mangitou.” 8Arawe i Nuh maal᷊uassa naungngu Mawu.
I Nuh
9-10Ete indi watti'u pinabbiaṛṛanni Nuh. I tou pia ana'a esakka siri tallu, eteudde i Sem, i Yafet wuṛṛu i Ham. I Nuh tawe na'ola'a pasasal᷊a, wuṛṛu ete i tou sangkatou su wallatu taumata apan ma'ola'a apapia su tempo udde. I tou mabbiakka uaaukka ringannu Ruata. 11Arawe anambon taumata waine lal᷊eo su aellegu Ruata, wuṛṛu araṛṛagissa mariaddi su al᷊awo'u tampa. 12Ruata ma'ellega runia indi wuṛṛu tumba'u naasilo al᷊al᷊eo, ana waugu anambon taumata lal᷊eo wiakke.
13Ana see Ruata nabbisarate si Nuh, “I ya'u buatte nakkawessa manginsue wiakku al᷊awou'u riadianna. I ya'u sarun mamate si mangitou suadio'a ringannu runia, ana waugu runia napeneten araṛṛagissi mangitou. 14I'o pa'ola'e apalla sangngassa wuassu alu apan matohassa; ola'ete wabbo'ane sulal᷊umme, wuṛṛu wuṛṛaite nae lapisete wuassu lal᷊umme wuṛṛu wuassu liudde. 15Apalla udde ṛinone 133 meteṛṛe al᷊o'engnge, 22 meteṛṛe al᷊al᷊akke, wuṛṛu 13 meteṛṛe atanggake. 16Ola'ete atumme apalla udde wuṛṛu onggol᷊en wawallanne 44 sentimetere su wallattu atuppa wuṛṛu manga darandungnge. Apalla udde ola'e tallun kaṛṛengketanna, wuṛṛu ola'ete ngarane sambau su sandiṛṛanne. 17I ya'u sarun mandantan manawangnga ipamate al᷊awo'u riadianna apan mabbiakka su runia. Sarangkanambone su runia sarun mate, 18arawe si'o, i Ya'u ṛinone ma'ola'a paaire. Suttate sulal᷊ummu apalla udde suadio'a ringannu awingngu, wuṛṛu al᷊aṛṛanangngu wuṛṛu manga awingngi mangitou. 19-20Apira'e lai sulal᷊ummu apalla udde passampare wuassu al᷊awo'u hatin manu'u winalanganna wuṛṛu winatangnga waine, tadea'u i mangitou tawe mate lai. 21Apira'e lai al᷊awo'u anna maola'a wiakki yamiu wuṛṛu manga winatangnga udde.” 22I Nuh tinumuṛṛutta al᷊awo'u parentan Ruata si tou.
Currently Selected:
PANDARIADDI 6: LAITLD
Highlight
Share
Copy
Want to have your highlights saved across all your devices? Sign up or sign in
