YOHANES 16
16
1Sarangkanambone udde Ta'u niapaasingkatta si yamiu tadea'u i yamiu tawe massinaadda. 2I yamiu sarun iapaasabangnga wuassu manga wal᷊em pattataṛṛamawuanna. Wuṛṛu sarun a'omanna tempone manungku taumata apan mamate si yamiu massunna i tou massubba Ruata. 3I mangitou ma'ola'a udde si yamiu ana waugu i mangitou taambe naaillal᷊a Iamangnga aroddi lai si Ya'u. 4Arawe orassa indi iwal᷊o-U olangnge udde si yamiu, tadea'u amungkangngu udde mariaddi murine, i yamiu maanaungnga manungku i Ya'u suete namasingkatta si yamiu.”
Manaran Ghaṛṛaho Ruata
“Hatto indi tawe Ta'u niwal᷊o si yamiu ro'en paarorone, ana waugu i Ya'u ta'e su sampunna ringanni yamiu. 5Arawe orassa indi Ya'u sarun inai ringanni Tou apan nandolo-U; wuṛṛu tawe saran sangkatou wuassi yamiu maiwal᷊o, watukkuapa i Ya'u inai. 6Orassa indi ewe'e naungngu niatambanna asasusane, ana waugu i Ya'u namasingkattu olangnge udde si yamiu. 7Arawe i Ya'u mamasingkatta atonna si yamiu: Mappianne si yamiu amungkangngu i Ya'u inai; ana waugu amungkangngu i Ya'u tawe inai, Mantatal᷊ungnga udde tawe rumanta ringanni yamiu. Arawe amungkangngu i Ya'u inai, i Ya'u sarun mandolokki Tou ringanni yamiu. 8Amungkangngu i Tou nirumantate, i Tou sarun mapaal᷊iatta'a su runia atapasannu rosa, apan ṛinone, wuassu inolaanna apan atonna, wuṛṛu wuassu ṛuumannu Ruata. 9I Tou sarun mapaal᷊iatta'a manungku tawe mangngimanna si Ya'u, udde lai rosa; 10manungku i Ya'u atonna, ana waugu i Ya'u inai ringannu Iamangnga wuṛṛu i yamiu tate maasilo si Ya'u lai; 11wuṛṛu manungku Ruata mannattake maṛṛuumanna, ana waugu tembonannu runia indi suete niṛṛuumanna.
12Manambo lai Ta'u iwal᷊o si yamiu, arawe orassa indi yamiu tawe maasengkamma. 13Arawe amungkangngu Ghaṛṛaho udde rumanta, eteudde i Tou apan napaal᷊iatta'u atatul᷊iddu Ruata i yamiu sarun ehetan-Ne iapaaillal᷊a anambon apan taṛṛino. I Tou tawe mabbisara wuassu riri-Ne sassane arawe mamasingkattu apa apan suete niaringiṛṛanne, wuṛṛu i Tou namasingkatta si yamiu apa apan sarun mariaddi su allon sal᷊immurine. 14I Tou sarun mamantuga si Ya'u, ana waugu apa apan suete niapaasingkatta si yamiu, sinengkamma wuassia-U. 15Sarangkanambone apan tatahuanannu Iamangnga udde lai tatahuanang-Ku. Ana waugu udde i Ya'u mabbisara manungku apa apan niapaasingkattu Ghaṛṛaho si yamiu, nisengkamme wuassia-U.”
Asasusa wuṛṛu al᷊al᷊uassa
16“Ete adio'a lai tempone, i yamiu tate maasilo si Ya'u, wuṛṛu ete adio'a lai tempone i yamiu sarun maasilo si Ya'u.”
17Sire pira mallal᷊aṛṛenggennu Mawu Yesus uaaiwal᷊ote sangkatou ringannu waine, “Apa pandumanne i Tou nabbisara si ite, ‘Ete adio'a lai yamiu tate maasilo si ya'u, wuṛṛu ete adio'a lai yamiu sarun maasilo si Ya'u’? Apa lai pandummu wisara-Ne: ‘I Ya'u inai ringannu Iamangnga’?” 18I mangitou sidutu uaaiwal᷊o, “Apa atappasanne, ‘ete adio'a tempone’? I ite tawedu maasunna i Tou mabbisara su ola'u apa!”
19Mawu Yesus masingkatta manungku i mangitou maapulu maiwal᷊o si Tou. Ne i Tou nabbisara, “Tanginna suete niwal᷊o-U, ‘Ete adio'a tempone i yamiu tate maasilo si Ya'u, wuṛṛu ete adio'a tempone i yamiu sarun maasilo si Ya'u’. Eteudde apan naola'a pattatiakka su wallatti yamiu?
20Pangimante, i yamiu sarun lumuai wuṛṛu sumangitta, arawe runia sarun lumuassa. Naungngi yamiu sarun masusa, arawe asasusanu udde sarun mawal᷊u maola'a al᷊al᷊uassa. 21Amungkangngu sangkatou wawine maraniten mangunsiwe, i tou massusa, ana waugu temponete i tou matataṛṛangnga. Arawe aroddi anangnge niasungkangnga, wawine udde naabul᷊iten asasusane ana waugu lulluassa manungku sangkatou ana'a niasungkangke su runia. 22Aroddi lai yamiu; Orassa indi naungngi yamiu massusa, arawe i Ya'u sarun maisasomba apia ringanni yamiu, ne naungngi yamiu sarun lumuassa; wuṛṛu tawedu sangkatou maapanganu al᷊al᷊uassa udde wuassu lal᷊ummu naungngi yamiu.
23Su allo udde, i yamiu tate maiwal᷊o manga apa si Ya'u. Pangimante: Al᷊awo'u apa apan raddoronganni yamiu su Iamangnga sulal᷊ummu arang-Ku, udde sarun ionggolu Iamangnga si yamiu. 24Na'oman sara orassa indi yamiu taambe nadorongnga manga apa sulal᷊ummu arang-Ku. Padorongke, ne i yamiu sarun manengkamma, tadea'u al᷊al᷊uannu udde masuungnga.”
Auntunganna su wowon runia
25“Sarangkanambone indi Ta'u iwal᷊o si yamiu ringannu sasumandingnga. Arawe sarun a'omanna tempone, i Ya'u tate mappaattu sasumandingnga lai, arawe mabbisara uahahati si yamiu su ola'u Iamangnga. 26Su tempo udde i yamiu sarun madorongnga su Iamangnga sulal᷊ummu arang-Ku; Paanaungete, i Ya'u tawe madorongnga wuassu Iamangnga ionggolla si yamiu, 27ana waugu Iamangnga sassane marangngu si yamiu. I Tou marangngu si yamiu ana waugu i yamiu marangngu si Ya'u, wuṛṛu mangngimanna manungku i Ya'u nirumanta wuassu Ruata. 28Atonna i Ya'u nirumanta wua dingannu Iamangnga, wuṛṛu suete nirumanta sulal᷊ummu runia. Arawe orassa indi Ya'u manantangken runia inai mabelengnga ringannu Iamangnga.”
29See manga mallal᷊aṛṛenggennu Mawu Yesus nabbisara si Tou, “Orassa indi Mawu mabbisara uahahati wuṛṛu tawe mappaattu sasumandingnga, 30wuṛṛu i yami masingkatta manungku Mawu masingkattu sarangkanambone. Ipa'ura lai taumata maiwal᷊o manga apa su Mawu. Ana waugu udde i yami mangngimanna Mawu nirumanta wua dingannu Ruata.”
31Mawu Yesus sinumimbakka si mangitou, “Nariaddi orassa indi yamiu mangngimanna? 32Paanaunge! Tempone sarun rumanta, ewe'e nia'omante, i yamiu sarun massal᷊iawukka. I yamiu sarun mapul᷊e su wal᷊en sangkatou-sangkatou wuṛṛu manantang-Ku sassane. Arawe i Ya'u tawe sassane ana waugu Iamangnga udde ringang-Ku. 33Sarangkanambone indi iwabal᷊o-U si yamiu, tadea'u i yamiu maasomba al᷊al᷊uassa ana waugu su sampunna ringang-Ku. Su runia i yamiu sarun matataṛṛangnga. Arawe siddutu'a naungngu! I Ya'u suete napaarugin runia!”
Currently Selected:
YOHANES 16: LAITLD
Highlight
Share
Copy
Want to have your highlights saved across all your devices? Sign up or sign in
