YOHANES 20
20
Lal᷊abinganna tawe loṛṛone
(Mat. 28:1-8; Mrk. 16:1-8; Luk. 24:1-12)
1Su allo Misa ruaallo, su tempo ta'e marandumma, Maria Magdalena inaite watukku lal᷊abinganna. I tou naasilo watu laṛṛapingnge na'irute wuassu loṛṛangngu lal᷊abinganna udde. 2Ne i tou tinumal᷊angnga nadea'a si Simon Petrus wuṛṛu mallal᷊aṛṛenggenna apan arangnguannu Mawu Yesus, wuṛṛu nabbisara si mangitou, “Mawu suete nial᷊appa wuassu lal᷊abinganna, wuṛṛu i ya'u wagga suapa i Tou niapal᷊allowanga.”
3See i Petrus wuṛṛu mallal᷊aṛṛenggenna waine udde inaite watukku lal᷊abinganna. 4Itarua tuttal᷊angnga, arawe mallal᷊aṛṛenggenna waine udde mallihaṛṛanna wuassi Petrus, wuṛṛu i tou na'oma rorone su lal᷊abinganna. 5I tou nallinge sulal᷊ummu lal᷊abinganna wuṛṛu naasilo kaengnga kafan uaraddo isudde, arawe i tou tawe sinumutta. 6I Simon Petrus uatantuṛṛutta wuassu liudde, lapiddu sinumutta sulal᷊ummu lal᷊abinganna udde. I tou naasilo kaengnga kafan uaraddo isudde, 7arawe kaengnga apan uawa'issa pua Mawu Yesus tawe gaddi'a maranine arawe lalul᷊unanna paṛṛalane. 8Wua'udde mallal᷊aṛṛenggenna apan na'oma paarorone su lal᷊abinganna, sinumuttate lai. I tou na'ellegga wuṛṛu nangimante. ( 9Na'oman sara orassa udde i mangitou taambe naasunna apa apan uawoṛṛetta sulal᷊ummu Wuke Susi manungku i Tou ṛinone mabangunna wuassu papate.) 10Wua'udde manga mallal᷊aṛṛenggennu Mawu Yesus napul᷊ete.
Mawu Yesus naipasilon batangan-Ne si Maria Magdalena
(Mat. 28:9-10; Mrk. 16:9-11)
11I Maria Magdalena uarisikka su saruannu lal᷊abinganna lapiddu lulluai. Tantal᷊anna lulluai i tou ua'ellega lal᷊ummu lal᷊abinganna, 12see i tou naasilo ruang katou mala'ekatta uapedettu mawira. I mangitou udde ua'ianna su lanna'u winal᷊unannu Mawu Yesus, sangkatou su wageangngu pua, wuṛṛu waine lai su wageangngu ledda. 13Manga mala'ekatta udde naiwal᷊o, “Inangnga, anio lulluai?”
I Maria sinumimbakka, “Mawu'u suete nianu, wuṛṛu i ya'u wagga i Tou niaddo suapa.”
14Napawe wua nabbisara aroddi, i tou nanaile liudde wuṛṛu naasilo Mawu Yesus uarisikka isudde. Arawe i tou wagga manungku udde Mawu Yesus. 15Mawu Yesus naiwal᷊o si tou, “Inangnga, anio lulluai? Inangnga maddea'a sisai?”
I Maria massunna manungku udde mabawailla, nariaddi i tou nabbisara, “Iamangnga, amungkangngu Iamangnga nangingkatti Tou wua isindi, tul᷊unga'a wal᷊o'a si ya'u suapa Iamangnga nangadon Tou, tadea'u i ya'u wotongnge mangal᷊appa si Tou.”
16Mawu Yesus nabbisara si tou, “Maria!”
I Maria nanaile Mawu Yesus see nabbisara sulal᷊ummu wisaran Ibrani, “Rabuni!” (Atatappasanne “Huru”.)
17“Arie pamita si Ya'u” wisara Mawu Yesus si tou, “ana waugu i Ya'u taambe nasengkengnga ringannu Iamangnga. Arawe roote ringannu manga tuṛṛang-Ku, wuṛṛu pasingkata'e si mangitou manungku orassa indi Ya'u ireete ringannu Iamang-Ku wuṛṛu Iamangngu, Ruata-U wuṛṛu Ruatanu.”
18Ne i Maria inaite namasingkatta su manga mallal᷊aṛṛenggennu Mawu Yesus manungku i tou suete naasilo Mawu Yesus wuṛṛu manungku Mawu suete namasingkattu sarangkanambone udde si tou.
Mawu Yesus naipasilon batangan-Ne su manga mallal᷊aṛṛenggen-Ne
(Mat. 28:16-20; Mrk. 16:14-18; Luk. 24:36-49)
19Su allo Misa udde lai, su tempo ṛabbite, manga mallal᷊aṛṛenggennu Mawu Yesus uaammulla su sambau wal᷊e apan ngarane uaṛṛuudda, ana waugu i mangitou matta'uttu manga tembonannu Yahudi. Inaṛṛombanganne Mawu Yesus nirumanta wuṛṛu dirumarisikka su pattangnganni mangitou wuṛṛu nabbisara, “Sal᷊amatta wuṛṛu paddarame si yamiu.”
20Napawe suete nabbisara aroddi, i Tou namasiloten lima-Ne wuṛṛu sandiṛṛan-Ne si mangitou. Su tempo naasilo Mawu, i mangitou lembo nilumuassa. 21See Mawu Yesus nabbisara si mangitou paassa lai, “Sal᷊amatta wuṛṛu paddarame si yamiu. Ere lai Iamangnga nandolo-U aroddi lai Ya'u mandolokki yamiu.” 22See i Tou napaasabangngu singangu-Ne si mangitou wuṛṛu nabbisara, “Sengkampe Ghaṛṛahon Ruata. 23Amungkangngu i yamiu mangampungnga rosan sangkatou taumata, Ruata lai mangampungnga rosane. Amungkangngu yamiu tawe mangampungnga rosan taumata waine, Ruata lai tawe mangampungnga rosane.”
Mawu Yesus wuṛṛu i Tomas
24I Tomas (apan isassago lai “Ṛindua”), sangkatou wuassu sire mapul᷊o dua mallal᷊aṛṛenggennu Mawu Yesus, apan tawe suadio'a ringannu mallal᷊aṛṛenggenna waine su tempo Mawu Yesus nirumanta. 25Ne manga mallal᷊aṛṛenggennu Mawu Yesus apan baine nabbisara si Tomas, “I yami naasilote Mawu!”
Arawe i Tomas sinumimbakka, “Amungkangngu i ya'u taambe naasilo lanna'u lessam pa'u su lima-Ne, udde wuṛṛu taambe napangadon tal᷊imado'u su manga lanna'u lessam pa'u udde wuṛṛu taambe napangadon lima'u susandiṛṛan-Ne, i ya'u tawe mangngimanna saran paassa.”
26Sangkamisa nal᷊iudda, manga mallal᷊aṛṛenggennu Mawu Yesus naammulla apia su tampa udde, wuṛṛu i Tomas isudde lai. Anambo ngara uaṛṛuudda. Arawe Mawu Yesus nirumanta wuṛṛu nirumarisikka su pattangnganni mangitou, see nabbisara, “Sal᷊amatta wuṛṛu paddarame si yamiu.” 27Wua'udde Mawu Yesus nabbisara si Tomas, “Pa'ellege lima-U, wuṛṛu addoa'e tal᷊imadonu isindi. Ul᷊uṛṛa'e limanu wuṛṛu addoa'e su sandiṛṛang-Ku. Arie mapapadua lai ewe'e pangimante!”
28I Tomas nabbisara Mawu Yesus, “Mawu'u wuṛṛu Ruata'u!”
29Ne Mawu Yesus nabbisara si tou, “I'o mangngimanna ana waugu naasilote si Ya'u? Asasal᷊amatta su taumata apan mangngimanna salaiwe tawe naasilo si Ya'u!”
Pandumannu wuke indi
30Ta'e manambo lai manga al᷊aṛṛindu'a waine apan suete niola'u Mawu Yesus su saruannu manga mallal᷊aṛṛenggen-Ne, arawe tate nawoṛṛeta sulal᷊ummu wuke indi. 31Arawe sarangkanambone indi niwoṛṛetta, tadea'u i yamiu mangngimanna manungku Mawu Yesus eteudde Ratu Punnu Sal᷊amatta, Ana'u Ruata, wuṛṛu ana waugu mangngimanna si Tou, i yamiu naasomba wiakka.
Currently Selected:
YOHANES 20: LAITLD
Highlight
Share
Copy
Want to have your highlights saved across all your devices? Sign up or sign in
