LUKAS 19

Mawu Yesus wuṛṛu i Zakheus

1Napawe Mawu Yesus na'omate su Yerikho, i Tou nanassukku amatanne sinumabbi soa udde. 2Su soa udde pia sangkatou tembonannu madarorongnga wose apan ala. Aranne i Zakheus. 3I tou maapulu ma'ellega isai isassago Mawu Yesus udde, arawe ana waugu taumata tumanite manambo wuṛṛu wadangnge lai mawawo, ne i tou tawe maasilo Mawu Yesus. 4Aroddi tou tinumal᷊angnga nalliu ṛoro wuassu taumata, see i tou inumawitte su alu sangkalu, tadea'u wotongnge maasilo Mawu Yesus apan sarun sumabbi isudde. 5Napawe Mawu Yesus na'omate su alu udde, i Tou naningngara see nabbisara, “Zakheus, lintukke paal᷊ihakka! Ana waugu allo indi i Ya'u inai su wal᷊enu.”

6I Zakheus mal᷊iha-l᷊ihakka nilumintukka wuṛṛu nanal᷊oho Mawu Yesus ringannu lulluassa. 7Manga taumata apan naasilo olangnge udde nanattakke mallobbosa. I mangitou nabbisara, “Ih! I Tou inai mattindaho su wal᷊en taumata lal᷊eo!”

8Wua'udde su wal᷊ene i Zakheus nirumarisikka wuṛṛu nabbisara Mawu Yesus, “Mawu, sangkawageanganna wuassu rarotongku sarun ionggolla su taumata asiangnga; wuṛṛu su alawo'u taumata apan suete niawusuangku, sarun waeṛṛanna apia si tou paappatta wuassu paarorone!”

9See Mawu Yesus nabbisara, “Su allo indi i'o wuṛṛu lal᷊oṛṛon bal᷊enu maasomba asasal᷊amatta wuassu Ruata wuṛṛu onggol᷊annu wiakka apan bakku, ana waugu i'o lai papapulunni Abraham. 10Ana'u Taumata nirumanta maddea'a wuṛṛu manal᷊amatta taumata apan nial᷊iwune.”

Sasumandingngu roitta wul᷊awanna

(Mat. 25:14-30)

11Tantal᷊anna taumata ta'e uararingikka Mawu Yesus mabbisara, i Tou nabati'u sambau sasumandingnga. Ana waugu su orassa udde i Tou maraniten Yerusalem, wuṛṛu taumata massunna manungku Ruata mal᷊iha-l᷊ihakka mamarenta ere sangkatou Ratu su runia indi. 12Mawu Yesus nabbisara, “Pia sangkatou papunna inai su wanua marau apan itenega maola'a ratu, wua'udde i tou mabelengnga. 13Tantal᷊anna taambe inai, i tou namago sire mapul᷊o mangangimbene, see nangagille si mangitou sangkatou-sangkatou passambau roitta wul᷊awanna. ‘Pabbal᷊u'e ringannu roitta indi tantal᷊anna i ya'u su amatanna,’ unni tou si mangitou. 14Arawe tumana'u wanuane maddantinni tou. Nariaddi, napawe i tou inaite, i mangitou nandolokku taumata niapawal᷊o, ‘I yami maddirin taumata indi maola'a ratung kami.’

15Arawe papunna udde nitenega naola'a ratu, wua'udde nabelengke watukku wanuane. Ringannu mal᷊iha-l᷊ihakka i tou namago manga mangangimbene sinumaruanna si tou, ana see maasingkatta sangkurate auntunganna apan suete niasombanganni mangitou. 16Mangangimbe paarorone nirumanta wuṛṛu nabbisara, ‘Tua, roitta wul᷊awanna sambau apan nionggoli Tuanga si ya'u, suete ta'u niola'a mapul᷊o.’ 17‘Mapia,’ unnu mawu udde, ‘i'o mangangimbe mapia! Ana waugu sulal᷊ummu inolaanna adio'a i'o wotongnge apangimananna, i ya'u sarun mamile si'o maola'a mangangatokku soa mapul᷊o.’ 18Mangangimbe aruane nirumanta wuṛṛu nabbisara, ‘Tua, roitta wul᷊awanna sambau apan nionggolu Mawu si ya'u udde suete ta'u niola'a lima.’ 19Su mangangimbe udde ratu nabbisara, ‘I'o sarun mapile mangangatokku soa lima.’ 20Mangangimbe waine nirumanta wuṛṛu nabbisara, ‘Tua indi roinnu; roitta udde ta'u niaddo su leso. 21I ya'u matta'utti Tuanga, ana waugu i Tuanga sangkatou taumata apan maṛṛagissa. Mawu mangnganu apa apan tawe wageangngi Tuanga, wuṛṛu i Tuanga lai mangngammullu auntunganna su tampa apan tawe nissuanannu Mawu.’ 22Ratu udde nabbisara si tou, ‘I'o mangangimbe lal᷊eo! Nassul᷊ungngu ere wisaranu sassane, i ya'u sarun maṛṛuumannu. I'o masingkatta i ya'u taumata maṛṛagissa: i ya'u mangnganu al᷊awoa apan tawe rarotongku, wuṛṛu mangngammulu auntunganna su tampa i ya'u tawe massuanna. 23Amungkangngu aroddi, anio i'o tawe napaasuttan roitta udde su bangngane, tadea'u napawe i ya'u mabelengnga i ya'u wotongnge manarimmattu roitta udde ringannu wungane?’ 24Wua'udde ratu nabbisara manga taumata apan uararingikka isudde, ‘Anute roitta udde wuassi tou, wuṛṛu onggol᷊a'e su mangangimbe apan uasahipunna roitta wul᷊awanna mapul᷊o udde.’ 25Arawe manga taumata udde nabbisara, ‘Tua, i tou piate lai mapul᷊o.’ 26Ratu udde sinumimbakka, ‘Naunge: taumata apan piate, i tou sarun onggol᷊annu anamboanne lai. Arawe taumata apan tawe uatahuanna saran adio'a, apa apan tatahuananne sarun anuanna lai wuassi tou. 27Wuṛṛu orassa indi apira'e inawarendi manga see'u udde apan maddiri ya'u maola'a ratune. Patete i mangitou su saruangku!’ ”

Mawu Yesus sinumutta su Yerusalem ringannu awawantuga

(Mat. 21:1-11; Mrk. 11:1-11; Yoh. 12:12-19)

28Napawe Mawu Yesus suete nabbisara sarangkanambone udde, i Tou inumamatte nalliuṛṛoro wuassi mangitou watukku Yerusalem. 29Napawe na'omate su Betfage wuṛṛu Betania su Wuiddu Zaitun, i Tou nandolokku ruang katou mallal᷊aṛṛenggen-Ne inai malliu ṛoro. 30“Roote su ampunganga apan sasaruananna udde,” unnu Mawu Yesus sitarua, “amungkangngu iraddua sumutta poiaroddi, iraddua sarun maasilo sambau ana'u keledai aiitanna. Keledai udde taambe sina'eannu taumata. Wu'ate keledai udde wuṛṛu apira'e isindi. 31Amungkangngu pia taumata maiwal᷊o siraddua, ‘Anio iraddua namu'a keledai udde?’ wal᷊oa'a, ‘Mawu mappandumma.’ ”

32Ruang katou mallal᷊aṛṛenggennu Mawu Yesus udde inaite, wuṛṛu naaratingnga sarangkanambone udde nassul᷊ungngu ere niwisara-Ne. 33Tantal᷊anna i mangitou mammu'a ana'u keledai udde, tatahuanne nabbisara sitarua, “Anio iraddua mammu'a keledai udde?”

34Itarua sinumimbakka, “Mawu mappandumma.” 35See itarua nangapiddu ana'u keledai udde ringannu Mawu Yesus. Wua'udde i mangitou nangampakku jubah mangitou su tapanna'u keledai wuṛṛu nattul᷊ungngu Mawu Yesus sinuma'e su liuddu keledai. 36Tantal᷊anna i Tou sussabbi uasa'e keledai udde manga taumata mammilattu jubah mangitou su lal᷊anna.

37Napawe Mawu Yesus maraniten Yerusalem, su lal᷊anna apan sussossokka watukku Wuiddu Zaitun, manga mallal᷊aṛṛenggen-Ne apan manambo udde mannattakke u'ui madalo Ruata wuṛṛu ma'adiangkamanna si Tou ana waugu manga al᷊aṛṛindu'a apan suete niasiloanni mangitou. 38I mangitou u'ui, “Nial᷊amatanna Ratu apan nirumanta ringannu arannu Mawu! Paddarame su surga wuṛṛu awawantuga su Ruata!”

39Manga pirang katou taumatan Farisi wuassu wallattu taumata udde nabbisara su Mawu Yesus, “Iamangnga Huru, wo'ai paal᷊annawa'a mallal᷊aṛṛenggenni Iamangnga.”

40Mawu Yesus sinumimbakka, “Pangimante! Amungkangngu i mangitou mallannaba, manga watu indi lai sarun umui.”

Mawu Yesus nilumuain Yerusalem

41Su tempo Mawu Yesus maraniten Yerusalem, wuṛṛu naasilote soa udde, i Tou nilumuain Yerusalem. 42Wisara-Ne, “Ma'a'akkanna, apia eteapa amungkangngu allo indi i'o maasingkatta apa apan botongnge mandantam padarame! Arawe orassa indi i'o tawe maasilo. 43I'o sarun maapendamma su sambau tempo, suapan manga seennu ma'ola'a anambon asasusa su pabbiaṛṛannu miallo-miallo; i mangitou sarun mamangalo malliwunna si'o wuṛṛu manessengngu wuassu al᷊awo'u pabbuuanne. 44I mangitou sarun maṛṛimunsa'a si'o wuṛṛu anambon tumanangngu; wuṛṛu tawedu saran sambau itantangngi mangitou watu uaatokka su tampane, ana waugu i'o tawe manutukka tempone Ruata rumanta manal᷊amatta si'o!”

Mawu Yesus sinumutta su Wal᷊e Mawu

(Mat. 21:12-17; Mrk. 11:15-19; Yoh. 2:13-22)

45Mawu Yesus sinumutta su Wal᷊e Mawu wuṛṛu nallimbuakke manga mabbawal᷊u'a isudde. 46“Sulal᷊ummu Wuke Susi,” wisara Mawu Yesus si mangitou, “uawoṛṛetta arendi: Ruata nabbisara, ‘Wal᷊e'u sarun maola'a wal᷊e tampa a'al᷊iomananna.’ Arawe wal᷊e udde niola'i yamiu sal᷊akku maṛaṛampassa!”

47Miallo-miallo Mawu Yesus mangngaṛṛa'a su Wal᷊e Mawu. Manga tembonannu imam wuṛṛu manga hurun agama, see manga piaṛṛa'u taumatan Yahudi maapulu mamate si Tou, 48arawe tawe maasomba lal᷊anne ipa'ola'a olangnge udde, ana waugu manga taumata sidutu uararingikka si Tou, wuṛṛu mal᷊uassa madaringikka wisara-Ne.

Currently Selected:

LUKAS 19: LAITLD

Highlight

Copy