LUKAS 22
22
Ma'aire mamate Mawu Yesus
(Mat. 26:1-5; Mrk. 14:1-2; Yoh. 11:45-53)
1Ramean Roti Tawe Ragine apan isassago Paskah maranite. 2Manga imam tembonanne wuṛṛu manga hurun agama tantal᷊anna maddea'a lal᷊anne mamate Mawu Yesus ringannu mal᷊anna-l᷊annaba, ana waugu i mangitou matta'uttu taumata nambo.
I Yudas inumire mamate Mawu Yesus
(Mat. 26:14-16; Mrk. 14:10-11)
3Wua'udde Setanna nangintaṛṛo si Yudas apan isassago lai Iskariot, eteudde sangkatou wuassu sire mapul᷊o dua mallal᷊aṛṛenggennu Mawu Yesus. 4Ana waugu udde i Yudas inaite wuṛṛu na'irete manga imam tembonanne wuṛṛu manga tembonannu mandariaga Wal᷊e Mawu su ola'u ereapa i tou wotongnge manantillu Mawu Yesus si mangitou. 5I mangitou mangke lulluassa wuṛṛu naddiandi mangonggolu roitta si tou. 6I Yudas inumire wuṛṛu i tou nadea'e tempone manantillu Mawu Yesus si mangitou, ringannu tawe asingkatannu taumata.
Mannaddia annu Paskah
(Mat. 26:17-25; Mrk. 14:12-21; Yoh. 13:21-30)
7Na'omate allone Ramean Roti Tawe Ragine, manungku domba annu Paskah pototante. 8Ne Mawu Yesus nandolokki Petrus wuṛṛu i Yohanes, “Roote panaddia annu Paskah si ite.”
9“Suapa Iamangnga, i yami manaddia anna udde?” aiwal᷊o mangitou.
10Mawu Yesus sinumimbakka, “Su tempo i yamiu sumutta su soa, i yamiu massomban sangkatou esakka uaapiddu sambau wensadda lal᷊oṛṛoannu ua'e. Tantalongke si tou su wal᷊e suttanni tou, 11wuṛṛu wal᷊oa'e su tatahuannu wal᷊e udde: Iamangnga Huru mappaiwal᷊o, ‘Suapa tampane manga mallal᷊aṛṛenggeng-Ku wuṛṛu i Ya'u umanna annu Paskah?’ 12Tatahuannu wal᷊e udde sarun mamantingida si yamiu wabbo'a wahewa sambau su ṛengkenne aruane, nasuungngu saranapane. Saddiaite sarangkanambone isudde.”
13Ne inaite i Petrus wuṛṛu i Yohanes, naaratingke sarangkanambone nassul᷊ungnga ere iwabbisara Mawu Yesus. I mangitou nanaddiate annu Paskah isudde.
Sal᷊iwangngu Mawu
(Mat. 26:26-30; Mrk. 14:22-26; 1Kor. 11:23-25)
14Napawe na'omate tempone umanna annu Paskah udde, Mawu Yesus inuma'ianna su sampunna ringannu manga mallal᷊aṛṛenggen-Ne su sal᷊iwangnga udde. 15See i Tou nabbisara si mangitou, “I Ya'u ma'apulu atonna umanna annu Paskah indi su sampunna ringanni yamiu, tantal᷊anna i Ya'u taambe matataṛṛangnga susa! 16Ana waugu udde, pangimante: i Ya'u tate umanna anna indi apia ma'oman sara atappasannu sal᷊iwangnga indi iapaal᷊iatta'a su Runia Wakkun Ruata.”
17Wua'udde Mawu Yesus namengkette mangkon anggore, see inumal᷊iomanna na'adiangkamanna su Ruata, wua'udde nabbisara, “Sengkampe indi, wuṛṛu tahiate; 18ana waugu asingkate: manattakka orassa indi i Ya'u tate ma'inumma anggore indi apia ma'oman sara Ruata uataṛṛinote sarangkanambone.”
19Wua'udde Mawu Yesus nanganute roti. Wuṛṛu napawe suete na'adiangkamanna, i Tou nattahiate roti udde ringannu lima-Ne, see nionggolla si mangitou, wuṛṛu nabbisara, “Ete indi wadang-Ku [apan tinantilla ana waugu i yamiu. Ola'e indi maola'a sambau pananaunganna si Ya'u.” 20Aroddi lai napawe suete inumanna, i Tou nangonggolu mangkon anggore udde si mangitou wuṛṛu nabbisara, “Mangko indi, eteudde pa'aire Ruata apan wakku, apan nitohassu daṛṛa-U – daṛṛa apan tinantilla ana waugu i yamiu].”
21“Arawe pa'ellega! Taumata apan mamate si Ya'u, isindi lai ringang-Ku! 22Ana'u Taumata sarun mate su ereapa suete tinantunnu Ruata, arawe nasilakate taumata apan mamate si Tou!”
23Ne i mangitou nanattakke uaiwal᷊o sangkatou ringannu sangkatou, isai wuassu wallatti mangitou sarun ma'ola'a olangnge udde.
Pattatatiakka su ola'u isai ahewal᷊anne
24Su wallattu manga mallal᷊aṛṛenggennu Mawu Yesus nariaddi pattatatiakka su ola'u isai wuassi mangitou apan ṛinone ellehanna lembon ahewal᷊anne. 25Mawu Yesus nabbisara si mangitou, “Manga ratum walahanna apan tawe maaillal᷊a Ruata mannansara tumanangnge, wuṛṛu manga tembonanne isassago ‘Mallal᷊u'adda Tumanangnge’. 26Arawe i yamiu tawe wotongnge aroddi. Ewe'e mawal᷊i'a taumata wahewa su wallatti yamiu ṛinone maola'a adio'anne, wuṛṛu piaṛṛangnge ṛinone maola'a ere sangkatou mangangimbe. 27Isai magewal᷊anne: taumata apan ua'ianna u'anna su medda, ara'e taumata apan mangngimbe si tou? Natantunna taumata apan ua'ianna udde. Arawe i Ya'u isindi ringanni yamiu naola'a ere sangkatou mangangimbe.
28Sulal᷊ummu al᷊awo'u asasusa-U, yamiu sidutu su sambau ringang-Ku. 29Ere lai Iamangnga suete nangonggolu taṛṛino si Ya'u ipamarenta, aroddi lai Ya'u sarun mangonggolu taṛṛino udde si yamiu. 30Ringannu aroddi yamiu wotongnge lumuassa ringang-Ku su tempo i Ya'u maola'a Ratu. Wuṛṛu i yamiu sarun uma'ianna su atanggaṛṛanne su mapul᷊o dua adderan araratuanna wuṛṛu mamarenta mapul᷊o dua walahannu taumatan Israel.”
Papasingkatta manungku i Petrus sarun massinaadu Mawu Yesus
(Mat. 26:31-35; Mrk. 14:27-31; Yoh. 13:36-38)
31“Simon, Simon, paddaringikka! Setanna suete niwala mamono'a si yamiu; ere gandumma iṛṛae wuassu wal᷊a'ane na'oman sara apan mappianne iṛṛae wuassu apan dal᷊eo. 32Arawe i Ya'u suete inumal᷊iomanni yamiu, Simon, tadea'u pangangimannu tawe mallome. Wuṛṛu napawe i'o mabelengke ringang-Ku, i'o sarun manohassa manga tuṛṛangngu.”
33I Petrus sinumimbakka, “Mawu, i ya'u uasaddia sumutta su tuttupanna wuṛṛu mate su sampunna ringannu Mawu!”
34“Pangimante, Petrus,” unnu Mawu Yesus, “tantal᷊anna manu'a taambe inumu'u allo indi, i'o paatallute nassina'a-U.”
Dompetta, pato'a wuṛṛu hal᷊ele
35Wua'udde Mawu Yesus nabbisarate si mangitou, “Dorone su tempo i Ya'u nandolokki yamiu, tawe namalang kamiu mangapiddu dompetta, pato'a ara'e sapatu, apa auranganni yamiu su tempo udde?”
“Tawe!” sasimbakki mangitou.
36“Arawe orassa indi,” unnu Mawu Yesus, “Isai pia dompetta ara'e pato'a, ṛinone iapidda; wuṛṛu isai tawe hal᷊ele, ṛinone mabal᷊u'u jubahne ipamalli hal᷊ele. 37Ana waugu, pangimante, wageangngu Wuke Susi tingikke arendi, ‘I Tou sassunnanna ere sangkatou taumata lal᷊eo,’ ṛinone mariaddi su riri-U. Ana waugu apan uawoṛṛetta su Wuke Susi matataṛṛino si Ya'u tantal᷊anna mattipusse orassa indi.”
38“Mawu,” unnu mallal᷊aṛṛenggennu Mawu Yesus, “Pa'ellega, isindi pia ruam bua halel᷊e.”
“Uddita'e!” sasimbakku Mawu Yesus.
Mawu Yesus inumal᷊iomanna su Wuiddu Zaitun
(Mat. 26:36-46; Mrk. 14:32-42)
39Mawu Yesus nanantangken soa wuṛṛu inaite ere inanaramanne watukku Wuiddu Zaitun, wuṛṛu manga mallal᷊aṛṛenggen-Ne inai lai ringanni Tou. 40Napawe na'omate isudde, i Tou nabbisara si mangitou, “Aal᷊iomante tadea'u i yamiu tawe marosa amungkangngu i yamiu wono'anna!”
41Wua'udde i Tou nangindau adio'a wuassi mangitou, iraṛṛangngo araune paassa panuntungannu watu, 42see inumal᷊intuda wuṛṛu inumal᷊iomanna, “Iamangnga,” wisara-Ne, “amungkangngu wotongnge, paaraua'a wuassia-U sansara apan sasaruanang-Ku indi. Arawe arie tumuṛṛuttu apulu-U, ewe'e tumuṛṛuttu apulun Iamangnga.” [ 43Sangkatou mala'ekatta nirumanta ringanni Tou wuṛṛu nanohassa si Tou. 44Mawu Yesus tumaniten uatataṛṛangnga sansara sulal᷊ummu naung-Nge na'oman sara i Tou u'al᷊iomanna atonna-tonna. Liahane naal᷊ihida raṛṛa tutturo su leta'a.]
45Napawe suete inumal᷊iomanna, Mawu Yesus nabelengke apia ringannu manga mallal᷊aṛṛenggen-Ne. I Tou naaratingnga si mangitou tantal᷊anna mattiilla ana waugu massusa. 46See i Tou nabbisara si mangitou, “Anio i yamiu mattiilla? Pabbangunte wuṛṛu a'al᷊iomanna tadea'u i yamiu tawe awono'anna.”
Mawu Yesus nisametta
(Mat. 26:47-56; Mrk. 14:43-50; Yoh. 18:3-11)
47Tantal᷊anna Mawu Yesus ta'e uahahatto, nirumantate taumata manambo. I mangitou uapiaṛṛa'a si Yudas, sangkatou wuassu mallal᷊aṛṛenggennu Mawu Yesus. Wua'udde i Yudas inaite natudda Mawu Yesu see nangari'a si Tou. 48Arawe Mawu Yesus nabbisara si tou, “Yudas, apa ringannu aari'a udde i'o mamate Ana'u Taumata?”
49Napawe manga mallal᷊aṛṛenggennu Mawu Yesus apan isudde naasilo apa apan sarun mariaddi, i mangitou nabbisara, “Mawu, i yami mandoappa si mangitou ringannu hal᷊ele!” 50See sangkatou su wallatti mangitou namuulla allangngu imam wahewa ringannu hal᷊ele na'oman sara naṛṛassatta tal᷊ingane aikkatanna.
51Arawe Mawu Yesus nabbisara, “Udita'e!” See i Tou namita tal᷊ingan taumata udde see niapaapia.
52Wua'udde Mawu Yesus nabbisara manga imam tembonanne wuṛṛu manga tembonannu mandariaga Wal᷊e Mawu, see manga piaṛṛa'u taumatan Yahudi apan nirumanta isudde, manametta Mawu Yesus, “Apa i Ya'u indi taumata lal᷊eo, na'oman sara i yamiu nirumanta uaapiddu hal᷊ele wuṛṛu papuulla ipanametta si Ya'u? 53Miallo-miallo i Ya'u su sambau ringanni yamiu su Wal᷊e Mawu, arawe i yamiu tawe manametta si Ya'u. Arawe indite tempone i yamiu manametta, su tempo taṛṛinon ararandumma mappaamattu manarane.”
I Petrus nassinaadu Mawu Yesus
(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)
54I mangitou nanamette Mawu Yesus see niapidda su wal᷊em imam wahewa. I Petrus tinumantalongnga ro'en marau. 55Su pattangngannu rallakku wal᷊e udde piate putungnga apan suete nire'omanna wuṛṛu i Petrus inaite inuma'ianna su sampunna ringannu manga taumata ua'ianna uapal᷊iwutta putungnga udde. 56Sangkatou mangangimbe wawine naasilo si Petrus ua'ianna su winggim putungnga udde; see mangangimbe wawine udde mannutukka si Petrus, wua'udde nabbisara, “Taumata indi lai tanginna su sambau ringannu Mawu Yesus!”
57Arawe i Petrus nassinaada. I tou nabbisara, “I ya'u atonna-tonna waggan taumata udde!”
58Tawe nal᷊annu wua'udde, sangkatou waine naasilo si Petrus wuṛṛu nabbisara, “I'o lai sangkatou su wallatti mangitou!”
Arawe i Petrus sinumimbakka, “Tawe, wal᷊ine i ya'u!”
59Iraṛṛangngo sangka orassa nal᷊iudda, sangkatou waine lai nabbisara ma'ikkatta, “Atonna-tonna taumata indi mallal᷊aṛṛenggennu Mawu Yesus, ana waugu i tou lai taumatan Galilea!”
60Arawe i Petrus sinumimbakka, “Apa pandumannu, i ya'u wagga!”
Orassa udde lai, tantal᷊anna i Petrus ta'e mabbisara, manu'a inumu'u. 61Mawu Yesus nanaile wuṛṛu na'ellega si Petrus. See i Petrus naanaungke Mawu Yesus suete nabbisara si tou, “Tantal᷊anna manu'a taambe inumu'u allo indi, i'o paatallute massina'a-U.” 62Ne sinumabangke i Petrus wua'isudde wuṛṛu nilumuaite.
Mawu Yesus ninalangnga wuṛṛu nipuulla
(Mat. 26:67-68; Mrk. 14:65)
63Manga taumata apan ualu'adda Mawu Yesus, mannalangnga wuṛṛu mamuulla si Tou. 64I mangitou nanutuba matane wuṛṛu naiwal᷊o si Tou, “Si'ata'a isai namuulla Si'o?” 65Manambo lai manga wisara aal᷊uandaga apan iwabbisara mangitou su Mawu Yesus.
Mawu Yesus su saruannu Mallaṛṛuungngu Agama
(Mat. 26:59-66; Mrk. 14:55-64; Yoh. 18:19-24)
66Su rua'allone, manga piaṛṛa'u taumatan Yahudi, manga imam tembonanne, wuṛṛu manga hurun agama naammulla, see Mawu Yesus niapidda su saruannu Mallaṛṛuungngu Agama mangitou. 67“Pasingkata'a si yami,” unni mangitou si Tou, “atonna I'o indi Ratum Punnu Sal᷊amatta?”
Mawu Yesus sinumimbakka, “Amungkangngu i Ya'u mabal᷊o si yamiu, yamiu tawe mangngimanna. 68Wuṛṛu amungkangngu i Ya'u maiwal᷊o si yamiu, i yamiu lai tawe sumimbakka. 69Arawe manattakka orassa indi, Ana'u Taumata sarun uma'ianna su uanannu Ruata Lembo Mataṛṛino.”
70I mangitou sarangkanambone nabbisara, “Amungkangngu aroddi, I'o indi Ana'u Ruata?”
Mawu Yesus sinumimbakka, “Aroddi ere su wisarang kamiu.”
71Ne i mangitou nabbisara, “Ipa'ura lai sakassi! I ite naaringikke wuassu moṛṛongnge sassane!”
Currently Selected:
LUKAS 22: LAITLD
Highlight
Share
Copy
Want to have your highlights saved across all your devices? Sign up or sign in
