Luka 18

Gipimaniso nya mulamuli nyamba si wadi

1Khavbo avbo, a di va embela gipimaniso gi yeyedzago giguruvedzo nya gulombelele nyamba garala, khuye: 2“Dhoropani nya gukari a di romo mulamuli moyo a nga bani ari mwalo githawo ni Nungungulu ambari ni vathu vakwawe. 3A di gu vbanya nuye dhoropani mule nyamayi moyo nya noni a nga bani a gu tala gu hongola ndrangani ga mulamuli, aya, khuye: ‘Nyi lamule eni ni nala wangu.’ 4Ma di vbindra matshigu nya gulaphe na gu bomba gu mu lamula; aholu litshigu limwedo a di pimisa, kharati: ‘Ambari nyi si thavigo Nungungulu, ni olu nyi si ningigo githawo vathu vakhwathu, 5nyi ngu lamula noni yeyi, yi nyi garadzago, gasi yi nyi dige nyi rula, yi siti nyi garadza gambe.’ ” 6Pfhumu a di engedza gambe, khuye: “Mu ngu si pwa iso si ganedwago khu mulamuli yoyu nya guvivbedwe khu monyo, gani? 7Ina Nungungulu khuye a na gumba lamula sihathwa saye, si mu ranago wutshigu ni mihani, ambari a gu gira gukhwatshi a gu hwela, gani? 8Nyi ngu mi embelani, khu lisine, kheni: A na dzegela gu si lamula. Ina gikhati a na wuyago Mwamana wa Muthu, a nata mana gukhodwa tigoni, gani?”

Mufarisi ni mukhuphisi

9A di va embela gambe gipimaniso gegi, gasi gu hevbudza vale va nga bani va gu dzi khusedza guvbindrisa, va gu dzi vega kha nga vathu nya gululame, va nyenya vakwawe, 10a di khuye: “Vama vavili va di bela Nyumbani ga Nungungulu vaya gira nombelo. Moyo a diri Mufarisi, mumbe a diri muhengisi nya khupho. 11Mufarisi a di lombelela na emide, khuye: ‘Nyi ngu gu bonga, Nungungulu, kholu eni kha nyi fanani ni vambe vathu, va gu dzimbafa, va gu mwalo ndruda, va gu sibhayi; gambe kha nyi fanani ni mukhuphisi yoyu. 12Eni nyi ngu hala nyondro mbili khu semana, nyi ngu livba gikhaba nya silo sangu satshavbo.’ 13Gasi muhengisi nya khupho, a di ema khu hwindzo, nyamba tiyela ni gu khusedza thamo, a di dzipwa nandru, a veta khana na gu khuye: ‘Nungungulu, nyi tsetselele, kholu nyi gighohi.’ 14#Wona gambe: Mat 23:12; Luk 10:11. Nyi ngu mi embelani, kheni: Oyu muhengisi nya khupho khugide khu vbale a hongola gaya na tsetseledwe, gasi mufarisi khandriso si nga mu dugelago. Kholu watshavbo muthu a dzi khusedzago a na vbwasamiswa, gasi uye a dzi sodzisago a na khusedzwa.”

Jesu ni sanana

(Matewu 19:13-15; Marko 10:13-16)

15Va di mu yisela gambe sanana gasi a si kuha. Vapizane vaye, na va wonide esi, va di va kawuka. 16Aholu Jesu a di rana sanana sita vbafuvbi gwaye a ganela, khuye: “Digani sanana sita gwangu, mu nga si himbedzeli, kholu khwawe Mufumo wa Nungungulu. 17Khu lisine nyi ngu mi embelani, kheni: Uye a si hakhigo Mufumo wa Nungungulu kha nga gyanana gidugwanana, gima kha na wu mana.”

Mwama nya gitetema

(Matewu 19:16-30; Marko 10:17-31)

18Mujudha moyo nya guthavisege a di mu wudzisa, khuye: “Muhevbudzi nya wadi, ginani nyi fanelago gu gira, gasi nyi mane guvbanya nya gupindruge?” 19Jesu a di mu hakha, khuye: Khu ginani u gukhuwe nyi wadi? Uye a gu wadi moyo khu Nungungulu basi. 20#Wona gambe: Eks 20:12-16; Dhet 5:16-20. U ngu yiti milayo yi gu, khiyo: U nga bhayi, u nga songi, u nga bi, u nga singedzi muthu, mwendro gu gira wukustumunyu nya malipha; rungudza babe wago ni mayi wago. 21Gasi uye a di khuye: “Muhevbudzi, nyi ngu landrisa satshavbo soso gukhugela wuphyani gwangu.” 22Na pwide esi, Jesu a di mu embela, khuye: “Gimwegyo basi gi nga tshadego. Rengisa satshavbo u gu naso, u kabanisela dzitsapawu dzakone sisiwana, gasi u mane thomba ya Ndzadzini. Nu giride isoso, delu uta nyi landrela.” 23Na pwide magana yaya, mwama nya gitetema a di garadzega ngudzu, kholu a diri ni dzithomba nya dzingi.

24Na mu wonide kharati, Jesu a di khusa lito, khuye: “Gu ngu garadza ngudzu gu bela Mufumoni wa Ndzadzini avo va gu ni dzithomba! 25Khidzo nyi mi embelago, gu vbevbugide gu vbulela lidzoke vbahogotunu nya tshingano, guvbindra gu dzega gitetema gi bela Mufumoni wa Ndzadzini!” 26Avo va nga bani va mu pwa va di khavo: “Khu kharati khu mani a na vbanyiswago?” 27Jesu a di hakha, khuye: “Iso si si kodzwigo gu girwa khu vathu, si ngu kodzega ga Nungungulu.”

28Pedro a di mu embela, khuye: “Ethu hi digide silo sathu satshavbo hi gu landra.” 29Uye a di khuye: “Khu lisine nyi ngu mi embelani nya gukheni: Mwalo a digago ndranga, mwangadzi, vandriyaye, vavelegi mwendro sanana khu kotani nya Mufumo wa Nungungulu, 30a na gumba bweledzedwa mafuni momu, bwelo khavbo a mana guvbanya nya gupindruge ga limbe litigo li na tago.”

Jesu a ngu tivisa nya wuraru gufa gwaye

(Matewu 20:17-19; Marko 10:32-34)

31Na dzegide vale nya likhumi na vavili, a di va embela, khuye: “Mu ngu, wonani, olu ha gu gwela Jerusalema, iyo si naya tadzisegago satshavbo sile si nga lowago khu vaprofeti na si gu lumba Mwamana wa Muthu. 32A naya ningedwa ga va nya mayigo. A na vadwa, a saniswa ni gu hetshedwa. 33Hwane nya gu bani va mu vetide khu dzimboma, va na mu songa. Aholu khu litshigu nya wuraru a na wuga khu gufani.” 34Gani olu, avo kha va nga si pima a gu vbweta gukhuye ginani. Maganelelo yale ma di si beli mapimoni gwawe, khu kharato, kha va nga bani va dziti a gu thula ginani.

Gikhumu gya Jeriko

(Matewu 20:29-34; Marko 10:46-52)

35Na va gu vboha dhoropani ga Jeriko, va di mana gikhumu gimwegyo gi nga bani gi khade bambe nya ndzila, na gi gu lomba zomola. 36Na gi pwide ligwaha nya vathu va nga bani va gu vbindra, gi di wudzisa, khigyo: Gasi ginani? 37Gi di embedwa pwani khu Jesu wa Nazareta a vbindrago. 38Khavbo avbo, gi di khusedza lito, gi lomba, khigyo: “Jesu, Mwamana wa Dhavhidhe, nyi pwele wuhindzi!” 39Avo va nga bani va thangide va di gi kawuka, gasi gu gi degudza. Aholu igyo gi di vbindrisa gu gulumela, khigyo: “Mwamana wa Dhavhidhe, nyi pwele wuhindzi!” 40Jesu a di ema, a gu gi ranisa. Na gi vbohide, a di gi wudzisa, khuye: 41“Wa guvbweta khuwe nyi gu rini?” Gi di hakha, khigyo: “Pfhumu, nya guvbweta kheni nyi wona!” 42Jesu a di gi embela, khuye: “Wona. Gukhodwa gwago gu gu vbanyiside.” 43Khu vbale, gikhumu gi di dzegela gu wona, gi gu mu landra, na gi gu dhumisa Nungungulu. Vathu vatshavbo, na va wonide esi, va di rungudza Nungungulu.

Currently Selected:

Luka 18: BGE2014

Highlight

Copy